Paul: Sapanoua otipakiayaj. Noviembre 1985 otiajkej ompa Liberia tlen kajki África ik kanin kisa tonaltsin porque ompa titlapaleuiskiaj ken misioneros. Avión tlen itech otiayaj oajsito Senegal. Anne okijto: “Kanaj se hora poliui tiajsitiuij Liberia”. Pero ijkuakon otechiluijkej: “Moneki matemokan akinmej yauij Liberia. Porque sekimej okixnamikej tekiua uan kinekij kikixtiskej ikinon amo uelis ompa tiajsitiuij”. Majtlaktli tonal otimokajkej ompa Senegal inuan sekimej tokniuan tlen otlapaleuiayaj ken misioneros. Ijkuakon opejki kijtouaj ompa Liberia miakej okinmiktiayaj uan tekiua amikaj okikauiliaya makisa ikalijtik nion mayeto itech ojtli ijkuak tlayoua porque tlamo kinmiktiskia.

Anne: Tejuan amo techpaktia nouian tiaskej. Porque desde ijkuak onikatka nitakotsin onechiluiayaj: “Te san timotekipachoua”. Onimomojtiaya hasta ijkuak onikpanouiaya se ojtli. Pero otiknekiayaj tiajsiskej kanin otechiluijkej matitlapaleuitij.

Paul: Otineskej ompa Inglaterra uan ne onichantiaya kanaj 8 kilómetros ik kanin ochantiaya Anne. Ijkuak otlanki otimomachtijkej secundaria opejki titlapaleuiaj ken precursores. Otiknekiayaj nochipa okachi titlapaleuiskej. Nopapanuan uan imama Anne otechyolchikajkej matitlapaleuikan. Ijkuak onikpiaya 19 xiuitl onechiluijkej manitlapaleuiti Betel uan 1982 onimonamikti iuan Anne uan san sekan ompa otlapaleuijkej.

Anne: Sapanoua otechpaktiaya titlapaleuiskej Betel. Pero otiknekiayaj titlapaleuiskej kanin omonekiaya okachi mamotetlapoui. Ompa Betel otitekipanouayaj inuan sekimej tokniuan tlen achto otlapaleuiayaj ken misioneros uan yejuan otechyolchikajkej okachi matitlapaleuikan. Ikinon eyi xiuitl otiktlatlaujtijkej Jehová sejse youali uan otikiluiayaj otiknekiayaj titlapaleuiskej ken misioneros. Otipakej porque 1985 otechyolejkej matimomachtitij tlamachtil 79 ompa Galaad. Ijkuak otlanki tlamachtil otechiluijkej matitlapaleuitij ompa Liberia tlen kajki África ik kanin kisa tonaltsin.

Paul: Otiajkej itech avión tlen achto okikauilijkej mauia Liberia. Ompa miakej omomojtiayaj uan okatkaj inkalijtik porque amo okinkauiliayaj makisakan. Ijkuak okikakiayaj oualaya se carro, sapanoua omomojtiayaj porque nochtin ocholouayaj. Sejse youak otikintlajtoltiayaj Salmos uan otimoyolseuiayaj. Pero otipakiayaj ijkuak otikchiuayaj tekitl tlen otechiluijkej. Anne otlapaleuiaya ken misionera uan ne onitlapaleuiaya Betel iuan se tokni itoka John Charuk. a Ye onechmachti miak tlamantli porque kuali okimatiaya tlen okinpanotoka tokniuan.

Anne: ¿Tleka otechpakti otitlapaleuijkej ompa Liberia? Porque tokniuan otechtlasojtlayaj, opakiayaj uan amo keman okikajkej Jehová. Opejki tikintlasojtlaj ken yetoskiaj tofamilia. Yejuan otechiluijkej seki tlamantli tlen otechpaleui okachi matimouikakan iuan Jehová uan kualtsin otitetlapouiayaj. Sapanoua okinpaktiaya tlen otikinmachtiayaj akinmej otechkakiayaj ikinon okualaniayaj tla san niman otiayaj. Amo otikitayaj oui tikintlapouiskej oksekimej tlen kijtoua Biblia. Miakej otikinmachtiayaj ikinon otikitayaj oui nochtin tikinmachtiskej. Sapanoua otechpaktiaya ompa titetlapouiskej.

Paul: Naui xiuitl kuali otikatkaj. Pero 1989 opejki guerra uan omopatlak tonemilis. 2 de julio 1990 akinmej okixnamikiayaj tekiua okimoaxkatijkej ik kanin kajki Betel. Eyi metstli amikaj iuan otimotlapouijkej nion iuan tofamilia. Noijki amo otimotlapouijkej inuan tokniuan tlen okatkaj Betel ompa Nueva York. Nouian otetlajyouiltiayaj porque opanotoka miak tlamantli amo kuali, amo otikpiayaj miak tlamantli tlen tikkuaskej uan miakej siuamej okinpijpinatiayaj. 14 xiuitl otlajyouijkej nochtin tlen ochantiayaj altepetl Liberia.

Anne: Akinmej ochantiayaj itech okseki altepetsitsintin omomakayaj inuan oksekimej uan omomiktiayaj. Itech ojtli nouian okatkaj akinmej otemiktiayaj, tetlajtlachialti ken omotlakentiayaj, okalakiayaj itech kalmej uan okiuikayaj tlen okinekiayaj. Sekimej omoueyinekiayaj uan okijtouayaj otemiktiayaj ken yetoskia “kinmiktiaj piomej”. Okintsakej carreteras uan okinmiktiayaj akinmej okinekiayaj ompa panoskej uan ompa okintetemayaj. Noijki ijkon opanok ik kanin kajki Betel. Okinmiktijkej sekimej tokniuan uan noijki ome tokniuan tlen otlapaleuiayaj ken misioneros tlen sapanoua otikintlasojtlayaj.

Miakej tokniuan okinpaleuijkej familias tlen okintlajyouiltiayaj uan okinekiayaj kinmiktiskej maski  noijki uelis itlaj kintoktiskiaj. Noijki ijkon okichijkej sekimej misioneros uan sekimej tokniuan tlen otlapaleuiayaj Betel. Sekimej tokniuan tlen ocholojkej omokauayaj itech achto piso ompa kalijtik uan oksekimej ochantiayaj tlakpak kanin tejuan otikatkaj. Ne uan Paul otichantiayaj inuan se familia uan yejuan okatkaj chikome tokniuan.

Paul: Akinmej otemiktiayaj nochipa okalakiayaj Betel para kitaskiaj kox ikaj ompa otiktlatijtokaj. Ijkuak ijkon opanouaya ome tokniuan oyayaj tlatlapotiuij, yejuan inuan omotlapouiayaj uan ome tokniuan otlachixtokaj itech se ventana. Tla tokniuan tlen oyayaj tlatlapotiuij okinpiayaj ik tlayekapan inmauan, okijtosnekiaya amitlaj opanouaya. Pero tla okintlaliayaj ik tlakuitlapan inmauan okijtosnekiaya akinmej ompa oyayaj otetlajyouiltiayaj. Ikinon tokniuan tlen otlachixtokaj itech ventana san niman okintlatiayaj tokniuan.

Anne: Se tonal tokniuan ayakmo ouelik okintsakuilijkej akinmej ompa oajsitoj uan okualantokaj. Ikinon yejuan okalakej Betel. Ne uan se tokni otikalakej itech se baño. Non baño okipiaya kanin otiktlaliayaj seki tlamantli pero noijki ompa otimotlatiayaj uan tokni ompa okalak. Akinmej otlatemoayaj onechtokakej ijkuak onitlejkok itech escaleras uan okiuikayaj intepos. Yejuan sapanoua okualaniayaj ikinon opejki kiuitekij puerta. Pero Paul okinmilui: “Ompa kajki nosiua”. Pero ijkuak onitlayektlalijtoka kanin otiktlaliayaj seki tlamantli, onechkakej ikinon opejki niuiuioka, amo uelis niktlaposkia puerta porque kimatiskiaj ikaj otiktlatijtokaj. Oniktlatlaujti Jehová uan onikilui manechpaleui, oniktlapo puerta uan amo onimomojti ijkuak onikintlajpalo. Se tlakatl oyajki otlatemoto kanin otiktlaliayaj seki tlamantli uan okitlamotlak nochi tlen ompa okatka pero amikaj okajsik. Ikinon oyajki inuan akinmej iuan oyayaj uan otlatemotoj itech okseki cuartos uan noijki tlakuapak. Pero amikaj okajsikej.

Paul: Miak uelta amo otikpiayaj tlen tikkuaskej pero tlen otimomachtiayaj kualkan ompa Betel yetoskia ken tlakuali tlen otechpaleuiaya. Tinochtin otikmatiayaj tla otiktlajtoltiayaj uan otimomachtiayaj Biblia techpaleuiskia matitlaxikokan.

Tla ayakmo tikpiaskiaj tlen tikkuaskej uan tlen tikoniskej, xamo monekiskia oksekan tiaskej uan kinmiktiskiaj akinmej touan omotlatijtokaj. Ualeua otikitayaj ken se milagro ijkuak Jehová otechmakaya tlen ika timopanoltiskej. Ye nochipa otechmalui uan otechpaleui amo matimomojtikan.

Miakej okachi otlajyouiayaj pero tejuan otechyolchika tlen tlamachtia Biblia. Miakej tokniuan ocholouayaj para amitlaj makinpano pero yejuan otlaneltokayaj uan omoyolseuijtokaj maski okixnamikiayaj miak tlamantli. Sekimej okijtouayaj non guerra okinpaleuijtoka mamoyektlalikan para ijkuak peuaskia “ueyi tlajyouilistli”. Miakej tlayekankej uan telpochmej omoyolchikajkej uan opejki kinpaleuiaj tokniuan. Miakej tokniuan tlen okikajkej inkalijtik san sekan okatkaj, opejki tetlapouiaj uan omonechikouayaj ijtik kojyo. Ijkuak tokniuan okintlajyouiltiayaj, omoyolchikauayaj porque omonechikouayaj  uan otetlapouiayaj. Ijkuak otikinmakayaj tokniuan tlen okinpolouaya, otechyolajsik ijkuak otechintlajtlaniliayaj mochilas para tetlapouiskej. Miakej kuali otechkakiayaj ijkuak otikintlapouiayaj kuali tlajtoli. Omoyolkokouayaj uan omotekipachouayaj porque opanotoka guerra. Yejuan omotlajtlachialtiayaj ijkuak okinmitayaj tokniuan opakiayaj. Tokniuan omotlasojtlayaj uan opakiayaj maski opanotoka miak tlamantli (Mat. 5:​14-16). Hasta sekimej tlen otetlajyouiltiayaj omochijkej iTlaixpantijkauan Jehová ijkuak okinmitayaj tokniuan opakiayaj.

Paul: Miak uelta oticholojkej. Eyi uelta amo otiuejkajkej uan san niman otimokopatoj pero satepan otiajkej ome xiuitl. Se tokni tlen otlapaleuiaya ken misionera okiijto ken otimomachiliayaj. Okijto: “Itech Galaad otimomachtijkej omonekiaya titlapaleuiskej ika nochi toyolo maski san kanin techtitlaniskiaj uan ijkon otikchijkej. Ikinon sapanoua otimoyolkokouayaj ijkuak otikinkauayaj tokniuan porque otlajyouiayaj”. Pero otipakiayaj porque otikinpaleuiayaj tokniuan tlen okatkaj Liberia desde altepemej kanin otikatkaj.

Anne: Mayo 1996, tinaui otikiskej Betel itech se carro uan otikinuikakej amamej tlen okipiayaj itlaj miak ipati. Omonekiaya tiaskej kanaj 16 kilómetros uan ijkon oksekan tikinuikaskiaj amamej. Ijkuakon opejki tlatojtoponiaj kanin otikatkaj, otechketsaltijkej, otechiluijkej matikisakan pero okiuikakej carro iuan Paul. Ompa otimokajkej uan amo otikmatiayaj tlen tikchiuaskej. Ijkuakon otikitakej Paul oualkiski ik kanin miakej okatkaj uan oeskisaya itsonteko. Otimokuayejyekojkej okimotlakej pero otikijtojkej tla ijkon kipanoskia amo nejnemiskia. Pero ye okijto san okitopejkej itech carro ikinon omokojko.

Satepan otikitakej se incarro soldados uan ompa okatkaj miakej akinmej sapanoua omomojtiayaj. Tejuan inakastlan otitlejkokej. Pero akin okixotlalti carro san niman okiuikak uan tejuan yitiuetsiskiayaj. Otiktsajtsiliayaj mamoketsa pero amo otechkak porque sapanoua omomojtiaya. Pero kuali otimokitskijkej itech carro uan amo otimokajkajkej. Otiajsitoj kanin oyaya carro pero otisotlauakej uan otiuiuiokayaj porque otimomojtiayaj.

Paul: Tejuan amitlaj otikpiayaj, san otikuikayaj totlaken sokio uan tlen yotsatsayanki. Otimotlajtlachialtijkej amitlaj otechpanok. Otikochkej inakastlan se helicóptero tlen oijtlakauik porque okitlatojtoponilijkej. Mostlatika itech non helicóptero otiajkej altepetl Sierra Leona. Otimotlasojkamatkej amitlaj otechpanok pero otechtekipachouayaj tokniuan.

Anne: Otiajsitoj Betel tlen kajki Freetown ompa Sierra Leona kanin kuali otechmaluijkej. Pero ijkuakon opejki nikilnamiki tlen otechpanok. Nochipa onimomojtiaya porque onimokuayejyekouaya itlaj panoskia uan amo onikneltokaya kuali otikatkaj. Amo ueli onikochiaya, onimomojtiaya uan onimitoniaya porque onimokuayejyekouaya itlaj panoskia. Onikmachiliaya amo kuali onimijyotiaya. Pero Paul onechnapalouaya noso onechnauajtekiaya uan nouan omotlatlaujtiaya. Noijki otiktlakuikiliayaj toTajtsin Dios hasta ijkuak onimoyolseuiaya. Onimokuayejyekouaya onikuatlapolo uan ayakmo uelis nitlapaleuiskia ken misionera.

Nochipa nikilnamiktos tlen opanok satepan. Non semana otikinselijkej ome revistas. Otikselijkej revista ¡Ma titlachixtokan! 8 de junio 1996. Onechpaleui manikajsikamati tlen onechpanotoka ijkuak oniktlajtolti kanin kijtoua “Qué hacer ante los ataques de pánico”. Noijki otikselijkej revista Akin Tetlapouijtok 15 de mayo 1996 uan onimomachti kanin kijtoua “¿De dónde proviene su fuerza?”. Ompa omotaya se papalotl tlen iajasuan otsatsayankej. Non revista okiyekijto se papalotl ok patlani uan kitemoua tlen kikuas maski otsatsayankej iajasuan. Noijki okijto tejuan ok uelis tikinpaleuiskej oksekimej maski timoyolkokouaj porque Jehová techpaleuis ika iespíritu santo. Ijkon onechyolchika Jehová ijkuak omonekiaya (Mat. 24:45). Onechpaleui onikintemo okseki tlamachtilmej uan san sekan onikintlali. Non onechpaleui ayakmo manitlajyoui uan manikilkaua tlen otechpanok.

Paul: Sapanoua otipakiayaj ijkuak oksepa otimokopayaj Liberia. Itlamian xiuitl 2004, yotikpiayaj 20 xiuitl ompa otitlapaleuijtokaj. Ijkuakon  ayakmo okatka guerra uan tokniuan okijtojkej kiyektlaliskiaj Betel. Pero ijkuakon otechiluijkej oksekan matitlapaleuitij.

Otikitayaj oui oksekan tiaskej. Amo otiknekiayaj tikinkauaskej tokniuan porque sapanoua otikintlasojtlayaj. Ijkon otechpanok ijkuak otimomachtitoj Galaad, otikinkajkej tofamilias pero otikitakej Jehová otechteochi porque otikkauilijkej matechyekana. Ikinon otikchijkej tlen otechiluijkej uan otiajkej altepetl Ghana.

Anne: Sapanoua otichokakej ijkuak otikiskej Liberia. Pero otechyolchika tlen otechilui Frank. Ye okatka se tokni ixtlamatki tlen yokipiaya miak xiuitl. Ye okijto: “Techilkauakan”. Pero noijki okijto: “Tikmatij amo techilkauaskej pero moneki xikintlasojtlakan tokniuan kanin nantlapaleuitiuij. Non tekitl onamechmakak Jehová ikinon xitlapaleuikan ika nochi namoyolo”. Sapanoua otechyolchika tlen otechilui tokni porque amo miakej otechixmatiayaj kanin tiajsiskiaj uan amo otitlaixmatiayaj.

Paul: San niman opejki tikintlasojtlaj tokniuan tlen chantij Ghana. Ompa okatkaj miakej tokniuan. Otikitakej yejuan amo okikauayaj Jehová uan otlaneltokayaj. Pero ijkuak yotitlapaleuijtokaj 13 xiuitl ompa Ghana, otechiluijkej oksekan matitlapaleuitij. Otechiluijkej matitlapaleuitij Betel tlen kajki Kenia ompa África ik kanin kisa tonaltsin. Sapanoua otikinmilnamikiayaj tokniuan tlen achto inuan otikatkaj pero san niman opejki timouikaj inuan tokniuan tlen chantij Kenia. Hasta axkan ok nikan titlapaleuiaj kanin onka miak tekitl ijkon ken Ghana uan Liberia.

Anne: Sapanoua yimiak xiuitl yonitlajyoui ikinon ualeua nimomojtia. Porque ijkuak tichantij kanin itlaj panoua uan techtlajyouiltiaj, uelis timokokoskej uan sapanoua timomojtiskej. Jehová amo kichiuas se milagro para techpaleuis. Ijkuak nikkaki tlatojtoponiaj nechkokoua noijtik uan amo ueli nikinmolinia nomauan. Pero yonikitak moneki manikkauili Jehová manechyolchikaua uan ye kinyolinia tokniuan matechyolchikauakan. Noijki yonikitak Jehová techpaleuia matiktekichiuilikan ijkuak nochipa timomachtiaj, tiktlatlaujtiaj, timonechikouaj uan titetlapouiaj.

Paul: Ualeua techtlajtlaniaj: “¿Namechpaktia kanin nantlapaleuiaj?”. Uelis kualtsin motaskej altepemej kanin tiyetoskej pero ualeua san itlaj panotikisa. Ikinon ¿tlen okachi techpaktia? Okachi techpaktia tiyetoskej inuan tokniuan tlen tikinmitaj ken tofamilia. Tinochtin san se tlamantli timokuayejyekouaj maski tlatlamantli otechiskaltijkej uan oksekan otineskej. Otimokuayejyekouayaj tejuan tikinyolchikauaskiaj tokniuan pero yejuan otechyolchikajkej.

Ijkuak oksekan tiauij, tikitaj Jehová yokichi se milagro porque nouian tikinpiaj tokniuan. Tipouij itech se familia uan kuali tikatej porque tipouij itech tlanechikol. Tejuan tikmatij Jehová techyolchikauas tla nochipa inauak timopaleuiskej (Filip. 4:13).