1. ¿Ken okitaya Pablo tekitl tlen okichiuayaj siervos ministeriales?

 SAPANOUA miak ipati tekitl tlen kichiuaj siervos ministeriales kanin timonechikouaj. Apóstol Pablo okinpatioitaya nonmej tokniuan porque nochipa okitlakamatiayaj toTajtsin Dios. Ijkon okiteititi ijkuak okintlajkuilili tokniuan tlen ochantiayaj Filipos uan okonintlajpalo siervos ministeriales uan tlayekankej (Filip. 1:1).

2. ¿Tlen okijto Luis porque tlapaleuia ken siervo ministerial?

² Miakej tokniuan tlen yomoapolaktijkej pakij tlapaleuiskej ken siervos ministeriales. Ijkon momachiliaj tokniuan telpochmej uan tokniuan tlen yikipiaj miak xiuitl. Devan okipiaya 18 xiuitl ijkuak okiluijkej matlapaleui ken siervo ministerial. Pero okse tokni tlen itoka Luis okipiaya kanaj 50 xiuitl ijkuak okiluijkej matlapaleui ken siervo ministerial. Ye okijto ken momachiliaj miakej siervos ministeriales ijkuak tlapaleuiaj. Okijto: “Okachi nikpatioita nitlapaleuis ken siervo ministerial ijkuak nimokuayejyekoua ken nechtlasojtlaj tokniuan tlen inuan nimonechikoua”.

3. ¿Tlen tlajtlanilmej tikinnankiliskej?

³ ¿Mitspaktiskia titlapaleuis ken siervo ministerial tla yotimoapolakti? ¿Tlen mitsyolinis xitlapaleui ken siervo ministerial? ¿Tlen moneki tikchiuas para ijkon titlapaleuis? Axkan tikinnankiliskej ninmej tlajtlanilmej. Pero achto matikitakan ken tlapaleuiaj siervos ministeriales.

 ¿KEN TLAPALEUIAJ SIERVOS MINISTERIALES?

4. ¿Ken tlapaleuiaj siervos ministeriales? (Noijki xikinmita fotos).

⁴ Tokniuan tlen tlapaleuiaj ken siervos ministeriales, yejuan yomoapolaktijkej uan okinpejpenkej ika iespíritu santo toTajtsin Dios para makinpaleuikan tlayekankej kanin timonechikouaj. Sekimej techpaleuiaj matikpiakan kanin titetlapouiskej uan techinmakaj amatlajkuilolmej para matitetlapouikan. Oksekimej tlapaleuiaj ijkuak tlachipauaj kanin timonechikouaj uan noijki tlapaleuiaj ijkuak tlayektlaliaj. Kinseliaj tokniuan ijkuak timonechikouaj uan tlapaleuiaj itech audio uan video. Yejuan kichiuaj miak tekitl pero okachi miak ipati kuali mouikaj iuan Jehová porque kitlasojtlaj uan kintlakamatij itlanauatiluan. Noijki sapanoua kintlasojtlaj tokniuan (Mat. 22:​37-39). ¿Tlen moneki kichiuas se tokni tla kineki tlapaleuis ken siervo ministerial?

5. ¿Tlen moneki tikchiuas tla tikneki titlapaleuis ken siervo ministerial?

⁵ Biblia kijtoua tlen moneki kichiuas akin kineki tlapaleuis ken siervo ministerial (1 Tim. 3:​8-10, 12, 13). ¿Tlen moneki tikchiuas tla tikneki ijkon titlapaleuis? Moneki ximochijchikaua ximomachti Biblia kanin kijtoua tlen moneki tikchiuas tla tikneki titlapaleuis uan satepan xikchiua tlen timomachtia. Pero achto xikita tleka tikneki titlapaleuis.

¿TLEKA TIKNEKI TITLAPALEUIS?

6. ¿Tleka tikneki tikinpaleuis tokniuan? (Mateo 20:28; noijki xikita dibujo).

⁶ Matikilnamikikan tlen okichi Jesús. Ye otlapaleuiaya porque okitlasojtlaya iTajtsin uan noijki okintlasojtlaya oksekimej. Ikinon omochijchikauaya tlapaleuis uan okichiuaya seki tekitl tlen amo okipatioitayaj oksekimej (xiktlajtolti Mateo 20:28; Juan 13:​5, 14, 15). Tla tiktlasojtla Jehová uan tikintlasojtla tokniuan, Jehová mitsteochiuas uan mitspaleuis xitlapaleui ken siervo ministerial (1 Cor. 16:14; 1 Ped. 5:5).

7. ¿Tleka se tokni amitlaj makichiua san para makitakan oksekimej noso makiueyitlalikan?

⁷ Miakej kinueyitlaliaj akinmej ueyititokej. Pero itech ialtepe Jehová amo ijkon tikchiuaj. Ijkuak se tokni tetlasojtla ijkon ken Jesús  kichiua, amo kinekis kinnauatis oksekimej nion kinekis makiueyitlalikan. Tla kitlaliskej se siervo ministerial tlen moueyineki xamo amo kichiuas seki tlamantli para kinmaluis tokniuan porque amo kipatioita. Xamo mokuayejyekos amo kitlakaitaskej tokniuan tla kichiuas non tekitl (Juan 10:12). Jehová amo kinteochiua akinmej moueyinekij. Noijki amo kinteochiua akinmej kichiuaj miak tlamantli san para makinmitakan oksekimej (1 Cor. 10:​24, 33; 13:​4, 5).

8. ¿Tlen okinyekilui Jesús iapóstoles?

⁸ Ualeua sekimej iyolikniuan Jesús okinekiayaj tlapaleuiskej san para makinueyitlalikan. Ijkon okinpanok apóstoles Santiago uan Juan. Yejuan okiluijkej Jesús makinmaka se tekitl miak ipati ijkuak peuaskia tlanauatis. Pero ye okinyekilui 12 apóstoles: “Akin kineki okachi ueyititos, moneki kinpaleuis oksekimej. Uan akin kineki tlayekapankisas, makinpaleui nochtin ken se tlakeuali” (Mar. 10:​35-37, 43, 44). Tokniuan tlen tlapaleuiaj ika nochi inyolo kichiuaj miak tekitl itech tlanechikol porque kinekij kinpaleuiskej tokniuan (1 Tes. 2:8).

¿TLEN MITSYOLINIS XIKINPALEUI TOKNIUAN?

9. ¿Tlen mitsyolinis xikinpaleui tokniuan?

⁹ Tejuatsin tiktlasojtla Jehová ikinon tikneki tikinpaleuis tokniuan. Pero xamo amo tikneki titlapaleuis ken siervo ministerial. ¿Tlen mitsyolinis xitlapaleui itech tlanechikol? Ximokuayejyeko ken tipakis tla tikinpaleuis tokniuan. Porque Jesús okijto: “Okachi paki akin itlaj kitemaka uan amo ijkuak itlaj kiselia” (Hech. 20:35). Ye nochipa okichi tlen kijtoua nin principio bíblico ikinon nochipa opakik ijkuak okinpaleuiaya oksekimej. Tipakis tla ijkon tikchiuas.

10. ¿Ken okiteititi Jesús opakiaya ijkuak okinpaleuiaya oksekimej? (Marcos 6:​31-34).

¹⁰ Matikitakan ijkuak Jesús opakik porque okinpaleuiaya oksekimej (xiktlajtolti Marcos 6:​31-34). Se tonal, Jesús oksekan okinuikak idiscípulos porque sapanoua osotlauayaj uan okinekiayaj moseuiskej. Pero sekimej achto oyajkej uan achto oajsitoj porque okinekiayaj kikakiskej tlen otlamachtiaya Jesús. Ye uan idiscípulos amo omajxiliayaj tlakuaskej. Jesús noijki uelis kijtoskia amo kinmachtiskia miak tlamantli uan kinmiluiskia mayakan. Pero ye okintlasojtlaya ikinon “opejki kinmachtia miak tlamantli”. Ijkon otlamachtijtoka hasta ijkuak “otiotlakik” (Mar. 6:35). Ye ijkon okinmachti porque “okinmiknomatki” uan amo porque omonekiaya ijkon kichiuas. Okinmachti porque okintlasojtlaya. Sapanoua opakiaya ijkuak okinpaleuiaya oksekimej.

11. ¿Ken okinpaleui Jesús oksekimej? (Noijki xikinmita fotos).

¹¹ Jesús okinmachti oksekimej akin toTajtsin Dios pero noijki okinpaleui ijkuak omonekiaya. Okichi se milagro ijkuak okimiaktili tlakuali uan satepan okinmilui idiscípulos makinxexelilikan tlakuali akinmej ompa okatkaj (Mar. 6:41). Non okinmachti ken omonekiaya tlapaleuiskej. Ijkon okinmachti siervos ministeriales miak ipati makinpaleuikan oksekimej. Sapanoua oyolpakiayaj apóstoles ijkuak ijkon otlapaleuiayaj. Yejuan okixexelojkej tlakuali tlen okimiaktili Jesús uan ijkon “nochtin otlakuajkej uan oixuikej” (Mar. 6:42). Jesús nochipa okinpaleui oksekimej ijkuak okatka nikan tlaltikpak (Mat. 4:23; 8:16). Opakiaya ijkuak otlamachtiaya uan ika nochi iyolo okinpaleuiaya oksekimej. Tejuatsin noijki sapanoua tipakis tla titlapaleuis ken siervo ministerial.

12. ¿Tleka amo matimokuayejyekokan amo uelis titlapaleuiskej itech tlanechikol?

 ¹² Pero amo ximotekipacho tla amo tikmati tikchiuas seki tlamantli. Porque xamo tikpia kualtsin moyelis tlen mitspaleuis xitlapaleui itech tlanechikol. Mitspaleuis tla tiktlatlaujtis toTajtsin Dios uan satepan tiktlajtoltis 1 Corintios 12:​12-30. Ompa Pablo okijto Jehová mitspatioita uan uelis titlapaleuis itech tlanechikol ijkon ken kichiuaj oksekimej tokniuan. Ikinon amo ximosotlaua tla ayamo ueli titlapaleuia ken siervo ministerial. Xikita ken okachi uelis tiktekichiuilis Jehová uan tikinpaleuis tokniuan. Tlayekankej kitaskej tlen ueli tikchiua ijkuak mitsiluiskej xitlapaleui (Rom. 12:​4-8).

13. ¿Tlen mitspaleuis ximochijchikaua titlapaleuis ken siervo ministerial?

¹³ Noijki tiknekis tiyetos siervo ministerial tla tikilnamiktok tinochtin akinmej tikchiuaj ken Cristo moneki tikchiuaskej seki tlamantli tlen Biblia kijtoua makichiuakan siervos ministeriales. Non tlamantli mitspaleuis ximochijchikaua titlapaleuis ken siervo ministerial. Porque tinochtin moneki okachi timotokiskej inauak Jehová, tikchiuaskej tlen kiyolpaktia uan tipakiskej ijkuak tikinpaleuiskej oksekimej. ¿Tlen moneki kichiuas akin kineki okachi tlapaleuis?

¿TLEN MONEKI TIKCHIUAS?

14. ¿Tlen kijtosneki tlajtoli ‘makimati ken kichiuas iteki’? (1 Timoteo 3:​8-10, 12).

¹⁴ Matikitakan seki tlamantli tlen moneki kichiuas akin kineki tlapaleuis ken siervo ministerial ijkon ken kijtoua 1 Timoteo 3:​8-10, 12 (xiktlajtolti). Tokni tlen tlapaleuis ken siervo ministerial moneki ‘makimati ken kichiuas iteki’. Non tlajtoli noijki uelis motlajtolkopas ikaj “kichiua tlen kijtoua” noso “amo san kajauilmati tlen kichiua uan ijkon oksekimej kitlakaitaj”. Pero non amo kijtosneki amo ixuetskas uan san kualantos (Ecl. 3:​1, 4). Moneki mochijchikauas kichiuas nochi tlen kiluiaj uan ijkon oksekimej kitaskej ye nochipa kichiua tlen kinauatiaj. Ijkon kitlakaitaskej nochtin tokniuan tlen inuan monechikoua.

15. ¿Tlen kijtosneki tlajtoli ‘amo matlakajkayaua’, ‘amo makixneki tomin uan amo makichiua tlen san ye kipaleuis’?

¹⁵ ‘Amo matlakajkayaua’ akin kineki yetos siervo ministerial. Non kijtosneki kijtos tlen melauak, kichiuas tlen kuali uan kichiuas tlen kijtoua. Akin kineki tlapaleuis ken siervo  ministerial moneki nochipa kichiuas tlen kijtos uan amikaj kikajkayauas (Prov. 3:32). Noijki ‘amo makixneki tomin uan amo makichiua tlen san ye kipaleuis’. Non kijtosneki amo tlakajkayauas ijkuak tlanemakas uan ijkuak kimaluis tomin tlen kitemakaj tokniuan kanin timonechikouaj. Noijki amo mamouika inuan tokniuan san porque kita kipiaj tomin.

16. (1) ¿Tlen kijtosneki ‘amo makoni miak vino’ akin kineki yetos siervo ministerial? (2) ¿Tlen kijtosneki ‘makipia chipauak itlalnamikilis’?

¹⁶ Akin kineki yetos siervo ministerial ‘amo makoni miak vino’. Non kijtosneki amo makoni miak alcohol nion makixmatikan kipaktia tlakonis. Noijki ‘makipia chipauak itlalnamikilis’. Non kiteititis kintlakamati itlanauatiluan Jehová. Uelis timouikaskej iuan toTajtsin Dios uan kuali tiyetoskej maski titlajtlakolejkej.

17. ¿Ken uelis kitaskej tlayekankej kox se tokni ‘uelis kichiuas iteki’? (1 Timoteo 3:10; noijki xikita foto).

¹⁷ Noijki moneki ‘achto makitakan kox uelis kichiuas iteki’ akin kineki yetos siervo ministerial. Non kijtosneki yokiteititi kichiua tlen kinauatiaj. Ikinon moneki mochijchikauas kichiuas tlen okiluijkej tlayekankej uan noijki kichiuas ijkon ken kijtoua ialtepe Jehová. Moneki kajsikamatis ken kichiuas iteki uan keman kitlamis. Tla mochijchikauas kuali kichiuas iteki, oksekimej kitaskej mochijchikajtok okachi tlapaleuis. Tlayekankej moneki kitaskej akinmej uelis kinmachtiskej okachi matlapaleuikan (xiktlajtolti 1 Timoteo 3:10). ¿Kanin timonechikouaj katej telpochmej tlen yomoapolaktijkej noso ayamo okachi telpochtij? ¿Kox kuali momachtiaj? ¿Tlanankiliaj ijkuak monechikouaj uan mochijchikauaj nochipa tetlapouiskej? Tlayekankej uelis kinmakaskej seki tekitl tlen yejuan uelis kichiuaskej. Ijkon uelis ‘kitaskej kox ueli kichiuaj inteki’. Ijkon ijkuak okachi telpochtiskej uelis tlapaleuiskej ken siervos ministeriales.

18. ¿Tlen kijtosneki se siervo ministerial amo makichiua itlaj tlen ika kiteluiskej?

¹⁸ Noijki akin kineki yetos siervo ministerial amo makichiua itlaj tlen ika kiteluiskej. Non kijtosneki amitlaj makichiua tlen oksekimej kijtojtinemiskej tlajtlakolchijtinemi. Pero ualeua oksekimej uelis kijtoskej tikchijtinemij tlen amo kuali maski amo melauak. Jesús ijkon okipanok uan okijto noijki ijkon kinpanoskia idiscípulos (Juan 15:20). Pero tokniuan tlen mochijchikauaj kipiaskej kuali  innemilis ijkon ken Jesús okichi, kintlakaitaskej tokniuan tlen inuan monechikouaj (Mat. 11:19).

19. ¿Tlen kijtosneki siervo ministerial ‘makipia san se isiua’?

¹⁹ Akin kineki yetos siervo ministerial ‘makipia san se isiua’. Tlakatl tlen yomonamikti uan kineki tlapaleuis ken siervo ministerial moneki kipias san se isiua (Mat. 19:​3-9). Noijki amo keman mauilnemi (Heb. 13:4). Pero noijki moneki kichiuas okseki tlamantli. Non kijtosneki san kitlasojtlas isiua uan amo makinuelita oksekimej siuamej (Job 31:1).

20. ¿Ken kiteititia se siervo ministerial ‘kuali kiyekana ifamilia’?

²⁰ Akin kineki yetos siervo ministerial moneki ‘kuali makiyekana ifamilia uan ikoneuan’. Non kijtosneki tla tokni kipia ifamilia moneki kuali kimaluis. Moneki chichikometika momachtis iuan ifamilia. Kitas ken uelis okachi tetlapouis iuan ifamilia. Noijki moneki kinpaleuis ikoneuan kuali mamouikakan iuan Jehová (Efes. 6:4). Tokni tlen kuali kimaluia ifamilia kiteititia noijki uelis kinmaluis tokniuan (noijki xikita 1 Timoteo 3:5).

21. ¿Tlen mitspaleuis xitlapaleui ken siervo ministerial?

²¹ Tla ayamo titlapaleuia ken siervo ministerial, timitsyoleuaj xiktlatlaujti Jehová uan ximomachti nin tlamachtil. Ximomachti tlen moneki tikchiuas para titlapaleuis ken siervo ministerial uan ximochijchikaua ijkon xikchiua. Ximokuayejyeko ken tikteititis tiktlasojtla Jehová uan tokniuan. Non mitsyolinis okachi xitlapaleui (1 Ped. 4:​8, 10). Ximochijchikaua xiyeto siervo ministerial uan ijkon tiyolpakis ijkuak tikinpaleuis tokniuan. Jehová mamitsteochiua porque timochijchikaua tiyetos siervo ministerial (Filip. 2:13).