1, 2. ¿Tlen “kuali tekitl” kichiua se tlayekanki?

 XAMO yiuelis titlapaleuis ken tlayekanki tla yitikpia seki xiuitl titlapaleuia ken siervo ministerial. ¿Uelis timochijchikauas para tikchiuas non “kuali tekitl”? (1 Tim. 3:1).

² ¿Tlen tekitl kichiua se tlayekanki? Mochijchikaua nochipa tetlapouis, kinmaluia tokniuan uan kinmachtia. Noijki tlen kijtoua uan kichiua kinpaleuia tokniuan okachi matlaneltokakan. Ikinon Biblia kijtoua nonmej tokniuan katej “ken se tetliokolil” (Efes. 4:8).

3. ¿Tlen moneki kichiuas se tokni tlen kineki tlapaleuis ken tlayekanki? (1 Timoteo 3:​1-7; Tito 1:​5-9).

³ ¿Tlen moneki kichiuas akin kineki tlapaleuis ken tlayekanki? Moneki kichiuas seki tlamantli pero amo ijkon ken ijkuak ikaj kitemoua se tekitl uan kiluiaj kox kimati tekipanos. Porque ijkuak ikaj kitemoua se tekitl san moneki kichiuas tlen kineki akin kipaleuis. Pero tla ikaj kineki tlapaleuis ken tlayekanki amo san moneki kuali tetlapouis uan kuali tlamachtis. Noijki moneki makichiua tlen kijtoua Biblia itech 1 Timoteo 3:​1-7 uan Tito 1:​5-9 (xiktlajtolti). Axkan tikitaskej tlen moneki kichiuas akin kineki tlapaleuis ken tlayekanki para kuali makitakan tokniuan uan noijki akinmej amo kitekichiuiliaj Jehová. Noijki tikitaskej tlen moneki kichiuas para kuali kiyekanas ifamilia uan kuali tlapaleuis itech tlanechikol.

 ‘MAKITAKAN KUALI TLEN TIKCHIUA’

4. ¿Tlen kijtosneki se tlayekanki “amo makichiua itlaj tlen ika kiteluiskej”?

⁴ Para ikaj uelis tlapaleuis ken tlayekanki moneki “amo makichiua itlaj tlen ika kiteluiskej”. Non kijtosneki amo makichiua itlaj tlen ika kiteluiskej tokniuan. Noijki “akinmej amo tlaneltokaj makitakan kuali tlen kichiua”. Xamo uelis kiteneuaskej se tlayekanki akinmej amo tlaneltokaj porque okse tlamantli tlaneltoka. Pero amo matlakajkayaua uan amo makichiua tlen amo kuali para amo makiteneuakan tleka ijkon kichiua (Dan. 6:​4, 5). Ximotlajtlani: “¿Tokniuan kitaj nikchiua tlen kuali uan noijki ijkon kitaj akinmej amo kitekichiuiliaj Jehová?”.

5. ¿Tlen kijtosneki se tlayekanki “makipatioita tlen kuali”?

⁵ Noijki tlayekanki moneki “makipatioita tlen kuali”. Non kijtosneki makita tlen kuali kichiuaj oksekimej uan makinyolchikaua. Noijki kijtosneki mapaki kinpaleuis oksekimej uan makinpaleui tokniuan maski amo kiluiaj ijkon makichiua (1 Tes. 2:8). ¿Tleka miak ipati ijkon makichiuakan tlayekankej? Porque okachi pakiskej ijkuak kinpaleuiskej tokniuan uan ijkuak kinmaluiskej (1 Ped. 5:​1-3). Yejuan pakiskej maski chikauak tekipanoskej porque kinpaleuiskej tokniuan (Hech. 20:35).

6. ¿Ken kiteititia se tokni kuali kinselia oksekimej? (Hebreos 13:​2, 16; noijki xikita foto).

⁶ Moneki “kuali makinseli oksekimej”. Non kijtosneki nochtin kinchiuilis tlen kuali uan amo san akinmej inuan mouika (1 Ped. 4:9). Se diccionario kijtoua “akin kuali kinselia oksekimej mochijchikaua kiteititis nochtin kintlasojtla maski amo kinmixmati uan paki ijkuak kinyoleua oksekimej mayakan ikalijtik”. Ikinon ximotlajtlani: “¿Kitaj tokniuan kuali nikinselia oksekimej?” (xiktlajtolti Hebreos 13:​2, 16). Akin kuali kinselia oksekimej kinmaka tlen kipia ijkuak yauij kitlajpalotiuij. Kinmaka tlen kipia akinmej amo kipiaj miak tlamantli uan noijki kinmaka akinmej okachi kitekichiuiliaj Jehová. Noijki kinpaleuia tlayekankej itech circuito uan tokniuan tlen yauij tlamachtitiuij itech itlanechikol (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Ken kiteititia se tlayekanki amo kixneki tomin?

⁷ “Amo makixneki tomin”. Non kijtosneki  amo kitemos kipias miak tlamantli. Moneki okachi kipatioitas kitekichiuilis Jehová maski kipias tomin noso amo (Mat. 6:33). Noijki moneki majxilis uan kitemakas tlen kipia para kiueyichiuas Jehová, kimaluis ifamilia uan tokniuan (Mat. 6:24; 1 Juan 2:​15-17). Ikinon ximotlajtlani: “¿Nikixneki tomin? ¿Nipaki porque nikpia san tlen moneki? Noso ¿nikneki niktlanis okachi miak tomin uan nikpias miak tlamantli? (1 Tim. 6:​6, 17-19).

8. ¿Ken kiteititia se tokni ‘nochi kichiua ken moneki’ uan ‘kimati monauatis’?

⁸ Akin ‘nochi kichiua ken moneki’ uan ‘kimati monauatis’ kuali mokuayejyekoua ijkuak itlaj kichiua. Ikinon amo sapanoua tlakua nion sapanoua koni miak alcohol. Kuali moxiluia uan motlakentia, amo san motonalpoloua uan amo kichiua ken akinmej amo kitekichiuiliaj Jehová (Luc. 21:34; Sant. 4:4). Noijki amo san niman kualani maski itlaj kiluiaj uan amo koni miak alcohol nion amo tlauana. Ikinon ximotlajtlani: “¿Nikteititia nochi nikchiua ken moneki uan nikmati nimonauatis?”.

9. ¿Tlen kijtosneki se tokni ‘kuali mokuayejyekoua’ uan ‘nochi kuali kichiua’?

⁹ Akin tlayekana kilnamiktok tlen kijtoua Biblia ijkuak itlaj panoua uan ijkon kiteititia ‘kuali mokuayejyekoua’. Ijkuak itlaj moneki kichiuas kuali mokuayejyekoua tlen kijtoua Biblia ikinon kuali kipejpena tlen kichiuas porque kajsikamati tlen ompa kijtoua. Achto kita nochi tlen opanok uan amo san niman itlaj kijtojtikisa (Prov. 18:13). Kuali kipejpena tlen kichiuas uan ijkon kiteititia mokuayejyekoua ijkon ken Jehová mokuayejyekoua. Noijki ‘nochi kuali kichiua’. Non kijtosneki nochi kichiua ken moneki uan kitemaktilia ijkuak moneki. Nochtin kimatij uelis kineltokiliskej uan kichiua tlen kinauatiaj, ikinon oksekimej kitaj kuali tlen kichiua. Matimomachtikan tlen moneki kichiuas para kuali kiyekanas ifamilia ijkon ken kijtoua Biblia.

KUALI XIKYEKANA MOFAMILIA

10. ¿Tlen kijtosneki se tokni kimati “kuali kiyekanas ifamilia”?

¹⁰ Tla se tokni yomonamikti uan kineki yetos tlayekanki, moneki makixmatikan ifamilia kichiua tlen kuali. Ikinon moneki “kuali kiyekanas ifamilia”, kiteititis kintlasojtla uan kipejpenas tlen okachi kuali kipaleuis ifamilia. Noijki moneki kipaleuis ifamilia makitekichiuili Jehová. ¿Tleka miak ipati ijkon makichiua? Porque apóstol Pablo okijto: “Tla se tlakatl amo kimati kiyekanas ifamilia, ¿ken kimaluis itlanechikol toTajtsin Dios?” (1 Tim. 3:5).

11, 12. ¿Tleka miak ipati makichiua tlen kuali ifamilia tokni tlen kineki tlapaleuis ken tlayekanki? (Noijki xikinmita fotos).

¹¹ Tla non tokni kinpia ikoneuan moneki “matetlakamatikan uan makichiuakan tlen kuali”. Pero makintlasojtla ijkuak kinmachtis tlen moneki kichiuaskej. Yejuan pakij uan kinpaktia mauiltiskej. Pero tla kuali kinmachtiaj, tetlakamatiskej, tetlakaitaskej uan kichiuaskej tlen kuali. Noijki tokni moneki kinpaleuis ikoneuan kuali mamouikakan iuan Jehová, mamoyekanakan ika principios bíblicos uan makinpaleui mamoyektlalikan para uelis moapolaktiskej.

¹² Ikoneuan tlayekanki moneki “matlaneltokakan para amo makinteluikan kichiuaj tlen amo kuali uan teixnamikij”. ¿Tlen kipanos tokni tla se ikone tlajtlakolchiuas uan iuan chanti? Xamo ayakmo uelis tlapaleuis ken tlayekanki porque ayakmo kuali kimachtia ikone nion kiyektlalia (xikita revista Akin Tetlapouijtok 15 de octubre 1996, página 21, párrafos 6, 7).

 XIKINPALEUI TOKNIUAN

13. ¿Ken kiteititia se tokni “teajsikamati” uan amo “yoltlakuauak”?

¹³ Sapanoua tikinpatioitaj tokniuan tlen inuan timonechikouaj uan mochijchikauaj kichiuaskej ken Cristo. Porque tokni tlen ‘teajsikamati’ tlapaleuia kuali mamouikakan oksekimej. Tla tikneki titeajsikamatis moneki tikinkakis oksekimej uan tiktlakaitas tlen mokuayejyekouaj. ¿Tlen tikchiuaskia tla timonechikos inuan oksekimej tlayekankej uan yejuan kipejpenaskej kichiuaskej tlen amo mitspaktia? Tlayekanki amo moneki ‘yetos yoltlakuauak’. Non kijtosneki amo kinekis mamochiua tlen san ye kipaktia. Ye kimati okachi kuali kisas tlen kichiuaskej tla kintlajtlanis oksekimej (Gén. 13:​8, 9; Prov. 15:22). Noijki “amo mamokualanijtinemi” inuan oksekimej uan “amo san niman makualani”. Non kijtosneki kintlakaita oksekimej uan kuali kintlapouia. Ye moyekuika inuan oksekimej ikinon tlapaleuia kuali mayetokan tokniuan ijkuak itlaj panoua (Sant. 3:​17, 18). Ye kinyolseuia akinmej kualanij porque kinyektlapouia. Ijkon uelis kinyolseuis hasta akinmej techixnamikij (Juec. 8:​1-3; Prov. 20:3; 25:15; Mat. 5:​23, 24).

14. ¿Tleka tokni tlen tlapaleuis ken tlayekanki “amo mayeto se tlakatl tlen yikin opejki tlaneltoka” uan ken kiteititia ‘amo kikaua toTajtsin Dios’?

¹⁴ Tokni tlen tlapaleuis ken tlayekanki “amo mayeto se tlakatl tlen yikin opejki tlaneltoka”. Moneki kuali tlaneltokas maski ayamo kipia miak xiuitl omoapolakti. Moneki kiteititis ye yolyamanki ijkon ken Jesús okiteititi tla kineki tlapaleuis ken tlayekanki. Non kijtosneki makitekichiuili Jehová ken ye kineki uan ijkuak ye kinekis (Mat. 20:23; Filip. 2:​5-8). Noijki amo makikaua toTajtsin Dios, makintlakamati itlanauatiluan uan makichiua tlen kijtouaj akinmej kiyekanaj ialtepe (1 Tim. 4:15).

15. ¿Moneki sapanoua kuali tlamachtis tokni para tlapaleuis ken tlayekanki?

¹⁵ Akin kineki tlapaleuis ken tlayekanki moneki “makimati ken tlamachtis”. Pero non  amo kijtosneki moneki sapanoua kuali tlamachtis para ijkon tlapaleuis. Porque sekimej amo okachi kuali tlamachtiaj ijkuak timonechikouaj noso kitaj oui. Pero kuali tlamachtiaj ijkuak tetlapouiaj uan ijkuak yauij kinyolchikauatiuij tokniuan (noijki xikita 1 Corintios 12:​28, 29 uan Efesios 4:11). Pero tokni akin kineki yetos tlayekanki moneki mochijchikauas kuali tlamachtis. ¿Tlen kipaleuis ijkon makichiua?

16. ¿Tlen kipaleuis se tokni okachi kuali matlamachti? (Noijki xikinmita fotos).

¹⁶ “Tlen tlamachtis makisa itech tlajtoli tlen melauak”. Tla se tlayekanki kineki kuali tlamachtis, moneki tlamachtis itech tlanechikol tlen kijtoua Biblia uan ijkuak kinyektlapouis tokniuan. Uelis ijkon kichiuas tla momachtia Biblia uan amatlajkuilolmej (Prov. 15:28; 16:23). Ijkuak momachtis makita tlen kijtosnekij versículos uan non kipaleuis kuali matlamachti uan makinyektlapoui tokniuan. Ijkuak tlamachtis mamochijchikaua makajsikamatikan akinmej kikakij. Noijki kipaleuis kuali matlamachti tla kinmiluia tlayekankej tlen yiuejkika tlapaleuiaj, makiluikan tlen uelis kichiuas para kuali tlamachtis uan makichiua tlen kiluiaj (1 Tim. 5:17). Noijki tlayekankej moneki kinyolchikauaskej tokniuan maski ualeua moneki kinmiluiskej “tlen amo kuali kichiuaj”. Pero moneki kiteititiskej kintlasojtlaj. Tla kinyektlapouiaj tokniuan, kintlasojtlaj uan tlamachtiaj tlen kijtoua iTlajtol toTajtsin Dios, okachi kuali tlamachtiskej porque kichijtoskej ijkon ken Jesús okichi (Mat. 11:​28-30; 2 Tim. 2:24).

XIMOCHIJCHIKAUA TITLAPALEUIS KEN TLAYEKANKI

17. (1) ¿Tlen kinyolchikauas siervos ministeriales mamochijchikauakan tlapaleuiskej ken tlayekankej? (2) ¿Tlen moneki kilnamiktoskej tlayekankej ijkuak kitaskej kox se tokni uelis okachi tlapaleuis? (Xikita recuadro “ Tlayekankej moneki kuali makitakan akin uelis tlapaleuis ken tlayekanki”).

¹⁷ Axkan yotikitakej tlen moneki kichiuas akin kineki tlapaleuis ken tlayekanki. Pero  xamo sekimej siervos ministeriales kijtoskej amo keman uelis ijkon tlapaleuiskej. Pero kinyolchikauas tla kilnamiktokej Jehová uan ialtepe amo keman kinmiluiskej nochi kuali makichiuakan (1 Ped. 2:21). Noijki kinpaleuis iespíritu santo toTajtsin Dios matlapaleuikan (Filip. 2:13). ¿Mitspaktiskia tikchiuas seki tlamantli tlen otimomachtijkej para titlapaleuis ken tlayekanki? Xiktlatlaujti Jehová, ximomachti tlen uelis tikchiuas uan xikinmilui tlayekankej mamitsiluikan tlen moneki tikchiuas para titlapaleuis.

18. ¿Tlen moneki kichiuaskej siervos ministeriales?

¹⁸ Tinochtin moneki timochijchikauaskej tikchiuaskej tlen axkan otimomachtijkej uan noijki akinmej yitlapaleuiaj ken tlayekankej (Filip. 3:16). Tla titlapaleuia ken siervo ministerial, ximochijchikaua titlapaleuis ken tlayekanki. Xikilui Jehová mamitspaleui uan mamitsmachti okachi xiktekichiuili uan mamitspaleui xitlapaleui itech tlanechikol (Is. 64:8). Jehová mitsteochiuas tla timochijchikauas titlapaleuis.