XIMOKUAYEJYEKO mitstlapouijtokej itech se siuatl tlen otlakuikaya uan miakej okixmatiayaj. Xamo mitspaktia ken otlakuikaya. Mitstlapouiaj ijkuak okatka tsikitsin okipaktiaya tlakuikas uan omomachti kuali tlakuikas. Satepan oyaya tlakuikati kanin oiluichiuayaj uan ijkon miakej okixmatkej. Pero satepan okokoxkatik uan oixpoliuik.

Tlen omitstlapouijkej melauak opanok pero siuatl yoixpoliuik. Noijki uelis ixpoliuis akin tlamachtia, akin tlapajtia noso akinmej miakej kinmixmatij. Maski okichi miak tlamantli siuatl tlen otlakuikaya, xamo timotlajtlaniaj tlen okseki kichiuaskia tla amo ixpoliuiskia.

Timoyolkokoaj ijkuak ijkon panoa pero tinochtin tiixpoliuiskej (Eclesiastés 9:5). Maski timochijchikauaskej, amitlaj uelis tikchiuaskej amo ma tikokoxkatikan noso ma tiueuejtikan uan ma tiixpoliuikan. Ualeua tiualixpoliuij porque timokokoaj noso itlaj techpanotikisa. ITlajtol toTajtsin Dios kijtoa: “Nomonemilis méxpoktli: porke ijkó kemi monextia, ijkó noiwa san walpoliwi” (Santiago 4:14).

Miakej kijtoaj toyolilis amitlaj ipati uan amo tikmatij keman tiixpoliuiskej. Ik non, kijtoaj: “Matitlakuakah iwa matikonikah, porke mostla timikiskeh” (1 Corintios 15:32). Nin kiteititia tinochtin tikmatij se tonal tiixpoliuiskej. Ik non, ijkuak titlajyouiaj timotlajtlaniaj tleka tiyoltokej. ¿Akin uelis technankilis?

Miakej kineltokaj ixtlamatkej uelis itlaj kichiuaskej. Nochi tlen yokichijkej tlapaleuia okachi miak xiuitl ma tiyoltokan uan ok kitemoaj tlen techpaleuis. Pero miakej ok motlajtlaniaj: “¿Tleka tikokoxkatij uan tiixpoliuij? ¿Se tonal ayakmo tiixpoliuiskej?”. Itech okseki tlamachtilmej tikinnankiliskej ninmej tlajtlanilmej uan noijki tikitaskej: “¿Tleka tiyoltokej?”.