Ijkuak se toyolikni amo kuali momachilia, xamo amo tikmatij tlen tikiluiskej noso tlen tikchiuaskej. Pero uelis tikteititiskej tiktlasojtlaj tla tikpaleuiaj.

“San xitlamatokah ijkuak nonkinkakiskeh oksikimeh” (SANTIAGO 1:19).

Uelis tikpaleuis moyolikni tla tikkaki ijkuak mitstlapouia. Amo ximokuayejyeko nochipa moneki itlaj tikiluis. Ye okachi kipatioitas tla tikkaki uan melauak mitstekipachoua tlen kipanoua. Xikajsikamati tleka ijkon momachilia uan amo xikteneua. Noijki xikilnamikto ualeua moyolikni kijtos itlaj tlen amo kimachilia uan satepan kijtos amo kuali tlen okijto (Job 6:2, 3).

“Xikinyolchikawakah akimeh mosotlawah” (1 TESALONICENSES 5:14).

Xamo moyolikni motekipachoua noso kimachilia amitlaj ipati. Ikinon miak ipati xikteititi mitstekipachoua tlen kipanoua. Ijkon tikyolchikauas moyolikni uan tikpaleuis mamoyolseui maski amo tikmati tlen tikiluis.

“Se melauak toyolikni nochipa kiteititia techtlasojtla” (PROVERBIOS 17:17).

Xikilui moyolikni tikneki tikpaleuis. Xiktlajtlani ken kineki xikpaleui uan amo xikpaleui ijkon ken te tikneki. Xamo moyolikni kineki xikpaleui pero amo kimati ken mitsiluis. Uelis tikiluis ken kichiuas seki tlamantli uan uelis san sekan nannemitiuij. Noijki uelis tiktlajtlanis kox kineki xiktlakouiti,  kox kineki xiktlachipaui noso xikchiua okseki tlamantli (Gálatas 6:2).

“Xikinmajsikamatiltikah [noso xikinxikokan] nochteh” (1 TESALONICENSES 5:14).

Xamo moyolikni amo nochipa kinekis mouan motlapouis. Pero xikilui tikkakis ijkuak ye kinekis mitstlapouis. Moyolikni mokokoua ikinon xamo itlaj kichiuas, kijtos itlaj tlen mitsyolkokos, ayakmo kinekis kichiuas tlen okijto noso kualanis. Ijkuak tikpaleuis moyolikni xikajsikamati uan amo san niman ximosotlaua (Proverbios 18:24).

Se iyolikni Farrah a sapanoua moyolkokoua uan motekipachoua uan non kichiua amo makineki tlakuas. Ye okijto: “Nimochijchikaua nikititis noyolikni nikneki nikpaleuis. Pero nikkaki ijkuak kineki nechtlapouis maski amo nikmati ken nikpaleuis. Non kipaleuia kuali mamomachili”.

Ha-eun sapanoua moyolkokoua. Ye okijto: “Nikpia se noyolikni tlen nechtlasojtla uan nochipa mokuayejyekoua tlen kuali. Se tonal onechyole ikalijtik uan uelik otlakualchi. Kuali onimomachili ikinon onikilui nochi tlen onechpanotoka. Non tonal sapanoua onechyolchika”.

Isiua Jacob sapanoua moyolkokoua. Ye okijto: “Sapanoua ipati titlaxikoskej. Ijkuak nosiua kichiua itlaj tlen amo nechpaktia, nikilnamiki ye mokokoua uan amo itlajtlakol ijkuak ijkon kichiua. Non nechpaleuia amo manikualani uan manikajsikamati”.

Enrico sapanoua motekipachoua. Ye okijto: “Nosiua nochipa nechpaleuia uan nechyolseuia. Ijkuak nimotekipachoua ye nechiluia san sekan itlaj matikchiuakan tlen ne amo okachi nikneki nikchiuas. Ualeua ye amo kichiua seki tlamantli tlen kipaktia. Kitemaka tlen kipia uan nochipa kita ken nechpaleuis. ¡Sapanoua niktlasojtla!”.