¿Techkaki toTajtsin Dios ijkuak tiktlatlaujtiaj?
¿Timokuayejyekoua toTajtsin Dios mitskaki ijkuak tiktlatlaujtia? Miakej noijki ijkon motlajtlaniaj. Oksekimej ijkuak tlajyouiaj kitlatlaujtiaj toTajtsin Dios ma kinpaleui. Pero ok tlajyouiaj. ¿Kijtosneki toTajtsin Dios amo kinkaki? ¡Amo! Biblia kijtoua toTajtsin Dios techkaki ijkuak tiktlatlaujtiaj ken ye kineki. Ma tikitakan tlen ompa ijkuilitok.
TOTAJTSIN DIOS KEMA TECHKAKI
“Te tikinkaki akinmej mitstlatlaujtiaj, nochtin monauak motokiskej” (Salmo 65:2).
Sekimej motlatlaujtiaj porque ijkon moyolseuiaj pero mokuayejyekouaj amikaj kinkaki. Pero amo san moneki timotlatlaujtiskej porque tiknekij timoyolseuiskej uan para titlaxikoskej. Biblia techiluia “Jehová * amo uejka kajki itech akinmej kitlatlaujtiaj, itech nochtin akinmej kinotsaj ika tlen melauak [...]; ye kinkaki ijkuak kitlatlaujtiaj ma kinpaleui” (Salmo 145:18, 19).
Ik non, kuali tikmatij Jehová kinkaki akinmej kiueyichiuaj. Ye techititia techtlasojtla porque techiluia: “Uan namejuan technotsaskej uan techtlatlaujtiskej uan ne namechkakis” (Jeremías 29:12).
TOTAJTSIN DIOS KINEKI XIKTLATLAUJTI
“Nochipa ximotiotsajtsilijtokah” (Romanos 12:12).
Biblia techiluia nochipa ma tiktlatlaujtikan Jehová. Non techititia ye kineki ijkon ma tikchiuakan (Mateo 26:41; Efesios 6:18).
¿Tleka toTajtsin Dios kineki ximotlatlaujti? Ximokuayejyeko: Nochtin tetajmej kinpaktia ijkuak inkoneuan kinmiluiaj ma kinpaleuikan. Xamo tetajmej yikimatij tlen kinekij inkoneuan noso tlen kimachiliaj. Pero ijkuak kikakij tlen kintlajtlaniliaj, yejuan kitaj inkoneuan kintlasojtlaj uan kineltokaj uelis kinpaleuiskej. Noijki ijkon ijkuak tiktlatlaujtiaj Jehová, tikititiaj tikneltokaj techpaleuis uan tiknekij iuan timouikaskej (Proverbios 15:8; Santiago 4:8).
TOTAJTSIN DIOS KEMA KINEKI MITSPALEUIS
“Nochi tlan nomechtekipachoah, xiktlalikah imak Dios, porke Ye [namechmaluia]” (1 Pedro 5:7).
ToTajtsin Dios kineki ma tiktlatlaujtikan porque techtlasojtla uan kineki techpaleuis. Ye kimati nochi tlen techtekipachoua uan tlen techtlajyouiltia.
Ma tikitakan tlen okichi se itekipanojka Jehová. Tekiua David nochipa okitlatlaujti ma kipaleui uan okilui tlen omokuayejyekouaya uan tlen okimachiliaya (Salmo 23:1-6). ¿Tlen okichi toTajtsin Dios? Sapanoua okitlasojtlaya uan nochipa okikak (Hechos 13:22). Noijki ijkon toTajtsin Dios techkaki porque techtlasojtla uan kineki techpaleuis.
“NIKTLASOJTLA JEHOVÁ PORQUE YE NECHKAKI IJKUAK NIKTLATLAUJTIA”
Ijkon kijtoua se salmo tlen ijkuilitok itech Biblia. Akin okijkuilo non salmo okimatiaya toTajtsin Dios okikakiaya uan non okiyolchika. Okilnamiktoka toTajtsin Dios iuan okatka uan non okipaleui ma tlaxiko ijkuak otlajyouijtoka (Salmo 116:1-9).
Nochipa tiktlatlaujtiskej Jehová tla tikilnamiktokej techkaki. Ma tikitakan tlen okipanok se tlakatl tlen itoka Pedro, ye chanti ompa España. Itelpoch tlen okipiaya 19 xiuitl oixpoliuik itech se accidente. Ijkuakon Pedro nochipa omotlatlaujtiaya uan okilui toTajtsin Dios ma kiyolseui uan ma kipaleui. ¿Tlen opanok? Pedro okijto: “Jehová onechkaki uan okintekitilti sekimej itekipanojkauan tlen otechyolseuijkej ne uan nosiua. Ijkon otikitakej toTajtsin Dios otechpaleui”.
Ualeua toTajtsin Dios ijkuak technankilia kintekitiltia akinmej inmiuan timouikaj para techpaleuiskej.
Maski ayakmo oksepa okitakej inkone, ye uan ifamilia omoyolchikajkej porque omotlatlaujtiayaj. Isiua tlen motokayotia María del Carmen okijto: “Ayakmo okachi onimoyolkokouaya ijkuak onimotlatlaujtiaya. Kuali onikmatiaya Jehová okajsikamatiaya ken onimomachiliaya porque ijkuak oniktlatlaujtiaya kuali onimomachiliaya”.
Biblia uan tlen miakej yokinpanok kiteititiaj toTajtsin Dios techkaki ijkuak tiktlatlaujtiaj. Pero toTajtsin Dios amo nochtin kinnankilia. ¿Tleka sekimej kinkaki uan oksekimej amo?
^ párr. 5 ToTajtsin Dios itoka Jehová (Salmo 83:18).
Xamo noijki mitspaktis
TLEN OKACHI IPATI TLAMACHTIA BIBLIA
¿Techkaki toTajtsin Dios?
¿ToTajtsin Dios kikakis ikaj tlen san itech motekipachoa? ¿Uan tla se tlakatl kitlajyouiltia isiua pero satepan kiluia toTajtsin Dios ma kiteochiua?
¿TLEN KIJTOUA BIBLIA?
¿Techkaki toTajtsin Dios ijkuak tiktlatlaujtiaj?
¿Melauak kitekipachoua toTajtsin Dios tlen techpanoua?
