Tlachixkej kijtoaj planetas, metstli uan sitlalimej kiteititiaj ken kipiaskej inyelis tlaltikpaktlakamej. Porque kijtoaj ken katej sitlalimej kiteititiskej ken kipias iyelis se konetl uan noijki tlen kichiuas ijkuak moskaltis.

Maski nin tlamantli opejki kichiuaj ompa Babilonia axkan ok ijkon kichiuaj. Itech 2012 ompa Estados Unidos okintlajtlanijkej tlen mokuayejyekoaj itech tlachixkej. Miakej kinneltokiliaj tlachixkej uan akinmej kijtoaj tlen panos satepan. ¿Pero uelis tikneltokaskej tlen kijtoaj? Amo. Ma tikitakan tleka ijkon kijtoaj.

• Sitlalimej uan planetas amo uelis kiteititiskej ken kipiaskej inyelis konemej ijkon ken kijtoaj tlachixkej.

• Pero nochtin uelis kinpanos tlen kijtoaj.

• Tlachixkej ok kineltokaj tlen yiuejkika okineltokayaj, okijtoayaj planetas kiyaualoaj tlaltikpak pero amo melauak porque planetas kiyaualoaj tonaltsin.

• Ijkuak kintlajtlaniaj tlachixkej, tlatlamantli kijtoaj tlen panos.

• Noijki kinpiaj 12 signos tlen moixmatij ken signos del Zodiaco para kimatiskej ken kipias iyelis se konetl ijkuak nesis. Pero ken tlaltikpak yikipia miak xiuitl, amo san sekan kajki. Ik non, ijkuak se konetl kitlaliliaj se signo ayakmo kinamiki porque tlaltikpak molinijti uan noijki tonaltsin.

Kineltokaj signos del Zodiaco techpaleuiaj ma tikmatikan ken kipias iyelis se konetl. Pero nochtin akinmej nesi se tonal, tlatlamantli mokuayejyekoaj. Tlachixkej san mokuayejyekoaj ken kipias iyelis se konetl uan tlen kichiuas ijkuak moskaltis. Uan nin amo melauak.

Amo yikin axkan kitekitiltiaj naualotl yiuejkika ijkon kichiuaj. Sekimej para kimatiskiaj tlen panos okinmijtitlapoayaj tlaltikpaktlakamej, yolkamej uan noijki okitayaj se kaxtil ken okitsopitiaya sintli. Oksekimej okitekitiltiayaj dibujos tlen omotlaliayaj itech ixayoyo café uan té noso tsopelikatl para kitaskej tlen panos. Axkan kintekitiltiaj cartas del tarot, bola de cristal uan sekimej yauij kinmitatiuij naualtin. Pero ¿melauak tlen kijtoaj naualtin? Amo. Ma tikitakan tleka.

Porque motlajtolnamikij maski kitekitiltiaj miak tlamantli para kitaskej tlen panos. Ijkuak ikaj kintlajtlania ome naualtin “ma kintlajtoltikan” cartas, ome tlatlamantli kijtoaj tlen panos.

Ik non, ayakmo kinneltokiliaj tlen kichiuaj uan tlen kitekitiltiaj. Sekimej kijtoaj naualtin amo melauak kintekitiltiaj cartas uan bolas de cristal porque yejuan san “kitaj” tlen kichiua akin kintlajtlania. Sekimej tlen yikipiaj miak xiuitl kichiuaj naualotl, san miak tlamantli tetlajtlaniaj, kichiaj ma tlanankilikan uan kitaj tlen kichiuaj. Uan ika non tlamantli kinmiluiaj tlen kinpanos uan amo kitaj okinnankilijkej ika tlen yejuan otlanankilijkej. Miakej kinneltokiliaj naualtin uan ijkon kitlanij miak tomin.

Tlachixkej uan naualtin, kineltokaj yipa ijkuilitok tlen techpanos. ¿Melauak tlen kijtoaj? Biblia kijtoa tlen tikpejpenaj tikneltokaskej uan tlen tikchiuaskej, uelis techpaleuis satepan noso amo (Josué 24:15).

ToTajtsin Dios amo kipaktia ma tikintlajtlanikan tlachixkej uan naualtin, ik non, moneki ma tikixtopeuakan. Biblia kijtoa: “Amo ikaj ma yeto [...] tlen kitekitiltia adivinación, tlen kitekitiltia magia, tlen kitemoa akin tlatetsauia, tlen kichiua naualotl, tlen tetlajchiuia, tlen kitlajtlania se nauali, noso ikaj tlen kijtoa tlen panos satepan nion ikaj tlen motlapouia iuan akinmej yomikej. Jehová a kitlajyaltia akin kichiua nochi nin tlamantli” (Deuteronomio 18:10-12).