Ximokuayejyeko ken mouikaj gemelos tlen san se tlamantli tlachixtokej. Yejuan kipiaj itlaj tlen kichiua kuali ma mouikakan. Se directora itoka Nancy Segal, ye kita ken katej gemelos uan noijki kipia se ikni gemela, okijto sekimej gemelos “kuali moajsikamatij uan amo moneki kiluis ikni tlen okichi”. Okse siuatl tlen noijki kipia igemela, okijto: “Tejuan kuali timoixmatij”.

¿Tleka kuali mouikaj uan kuali moixmatij? Maski nin tlamantli kipia tlen kitas iuan ken kinmiskaltiaj intatajuan, ixtlamatkej kijtoaj porque san se tlamantli kipiaj ADN. *

XIMOKUAYEJYEKO: ToTajtsin Dios kuali otechchijchi, ik non, kuali techixmati. Uan se salmista itoka David okijto: “Otechmalui ijkuak onikatka ijtik nonantsin. Noomiouan amo moixpan omotlatijkej ijkuak otechchijchi [...]. Otechitak ijkuak yikin opejki nimoskaltia ijtik nonantsin uan itech moamoch omoijkuilo nochi tlen nikpiaskia” (Salmo 139:13, 15, 16). ToTajtsin Dios amo san kimati ken tichijchitokej, noijki kimati tleka tikpiaj tlatlamantli toyelis. Ik non, ye melauak techajsikamati.

Tekiua David okitlatlaujti Jehová: “Jehová te nochi yotechtlatemoli uan techixmati. Te tikmati tlen nikchiua ijkuak nimotlalia uan ijkuak nimoketsa. Maski uejka tika, tikmati tlen nimokuayejyekoa. Ayamo itlaj nikijtoa pero te Jehová nochi yitikmati” (Salmo 139:1, 2, 4). Jehová kimati nochi tlen tikmachiliaj uan noijki tlen tiknekij tikchiuaskej” (1 Crónicas 28:9; 1 Samuel 16:6, 7). ¿Tlen techmachtia nin tlamantli itech toTajtsin Dios?

Ijkuak tiktlatlaujtiaj amo tikmatij ken tikiluiskej nochi tlen timokuayejyekoaj pero toTajtsin Dios nochi yikimati. Ye kita nochi tlen tikchiuaj uan kajsikamati tleka ijkon tikchiuaj. Noijki ye kimati tlen uelis tikchiuaskej. Ik non, ye otechchijchi ma titetlasojtlakan uan kineki kimatis tlen timokuayejyekoaj uan tlen tikmachiliaj (1 Juan 4:7-10).

 Biblia kijtoa:

• “Toteko Dios kintlajtlatok n yolchipawakeh, iwa kinkakilia intiotsajtsilis” (1 PEDRO 3:12).

• ToTajtsin Dios kijtoa: “Nimitsmakas ixtlamatilistli uan nimitsmachtis xikchiua tlen kuali. Ne nimitsmaluis” (SALMO 32:8).

¿Techpaleuis tikmatiskej toTajtsin Dios techajsikamati? Ma tikitakan tlen okipanok Anna, ye chanti Nigeria. Ye okijto: “Sapanoa onimoyolkokoaya uan oniknekiaya nimikis. Omikik nonamik, satepan onechiluijkej onikpiaya cáncer uan notakotsin okatka hospital porque omonechikoaya atl itech ikuatitix uan nin kokolistli itoka hidrocefalia. Sapanoa oui okatka porque notakotsin noijki okatka ompa hospital uan ne noijki omonekiaya nechtekiskej, nechchiuiliskiaj quimioterapia uan radioterapia”.

¿Tlen okipaleui Anna ma kixnamiki ouijkayotl? Ye okijto: “Onechpaktiaya nimokuayejyekos itech Filipenses 4:6, 7, ompa kijtoa “iyolsewilis Dios, non amaka weleti kajsikamati, kimokuitlawis [kimaluis] nomoyolo iwa nomotlayejyekolis”. Ijkuak onikilnamikiaya nin texto, onikmachiliaya Jehová nouan okatka uan onikmatiaya ye okachi nechajsikamati. Noijki onechyolchikajkej nokniuan tlen noijki tlaneltokaj ken ne.

”Axkan okachi kuali nimomachilia maski ok nimokokoa. Axkan tiyolpakij porque Jehová touan kajki. Santiago 5:11 kijtoa: ‘Matikinmitakah kateh ika pakílistli akimeh okixikojkeh n tlaijyowílistli: Nomejwah nonkimatokeh kenomi Job okixiko nochi n tlaijyowílistli, iwa yononkitakeh tlan okimák sa iksemi n Toteko Dios. Porke n Toteko Dios satlawel tetlasojtlak iwa teiknoma’”. Jehová kuali okajsikamatiaya tlen okipanoaya Job uan noijki kajsikamati tlen techpanoa.