Ma yeto chikauak motlaneltokilis maski tiyetos itech se tlanechikol ika okse tlajtoli
“Itech noyolo oniktlati motlajtol ken itlaj tlen sapanoa miak ipati” (SALMO 119:11).
1-3. (1) ¿Tlen okachi moneki kichiuaskej itekipanojkauan toTajtsin Dios? (2) ¿Tlen tlamantli kixnamikij tokniuan tlen momachtijtokej okse tlajtoli? (3) ¿Tlen tlajtlanilmej tikinnankiliskej? (Xikita tlaixkopinal tlen ika peua tlamachtil).
AXKAN miakej iTlaixpantijkauan Jehová tlapaleuijtokej ma mochiua tlen kijtoa Apocalipsis 14:6. Nin profecía kijtoa motetlapouis itech Tekiuajkayotl “itech nochteh paísmeh, innawak nochteh non tlatlamantli tlachixtokeh, innawak nochteh akimeh tlatlamantli tlajtoah, iwa itech nochteh n altepemeh”. Miakej iTlaixpantijkauan Jehová momachtijtokej okse tlajtoli. Sekimej misioneros noso sekimej yoyajkej itech okseki altepemej kanin moneki okachi ma motetlapoui. Oksekimej peua yauij itech se tlanechikol ika okse tlajtoli itech inmialtepe.
2 Nochtin itekipanojkauan toTajtsin Dios moneki nochipa kipiaskej chikauak intlaneltokilis uan noijki inkalchanejkauan (Mateo 5:3, TNM). (Xikita recuadro “¿Tlen kijtosneki?”). Uelis amo timajxiliaj timomachtiskej Biblia ken moneki. Pero tokniuan tlen katej itech tlanechikol ika okse tlajtoli noijki kixnamikij okseki tlamantli.
3 Maski ninmej tokniuan momachtiaj okse tlajtoli, okachi moneki kuali ma momachtikan tlamachtilmej tlen okachi oui itech Biblia (1 Corintios 2:10). ¿Tlen uelis kichiuaskej ninmej tokniuan ma momachtikan tlen okachi oui itech Biblia ijkuak itlaj amo kajsikamatij itech tlanechikol? ¿Tleka tetajmej tlen katej itech se tlanechikol ika okse tlajtoli moneki ma kitakan kox inkoneuan kipiaj itech inyolo tlen Biblia tlamachtia? Ma tikitakan.
SE TLAMANTLI TLEN UELIS KICHIUAS AYAKMO KUALI MA TIMOUIKAKAN IUAN JEHOVÁ
4. ¿Tlen uelis kichiuas ayakmo kuali ma timouikakan iuan Jehová? Xikijto se neskayotl.
4 Tla amo tikajsikamatij Biblia ika okse tlajtoli, uelis ayakmo kuali timouikaskej iuan Jehová. Ma tikitakan itlaj tlen yiuejkika opanok. Ijkuak Nehemías omokuepki Jerusalén, okitak sekimej konemej judíos amo okimatiayaj tlajtoskej intlajtol judíos (xiktlajtolti Nehemías 13:23, 24). * Ik non, nonmej konemej amo okajsikamatiayaj iTlajtol toTajtsin Dios uan amo kuali omouikayaj iuan Jehová (Nehemías 8:2, 8).
5, 6. ¿Tlen kitaj sekimej tetajmej tlen tlapaleuiaj itech se tlanechikol ika okse tlajtoli, uan tleka ijkon panoa?
5 Sekimej tetajmej tlen tlapaleuiaj itech se tlanechikol ika okse tlajtoli, kitaj inkoneuan ayakmo kuali mouikaj iuan Jehová. ¿Tleka ijkon kinpanoa? Pampa konemej amo kajsikamatij tlen moijtoa itech nechikolmej. Ik non, tlen ompa tlamachtiaj amo ajsi itech inyolo uan amo kichiuaj tlen moneki. Ma tikitakan tlen kijtoa se tokni tlen itoka Pedro, tlen ochantiaya iuan ikalchanejkauan itech ueyi altepetl Sudamérica uan ochantitoj itech ueyi altepetl Australia: “Ijkuak timotlapouiaj itech toTajtsin Dios, moneki ma kalaki itech toyolo” [1] (xikita nota kanin tlami tlamachtil) (Lucas 24:32).
6 Uelis amo ajsi itech toyolo ijkuak tiktlajtoltiaj se amatlajkuilol ika okse tlajtoli. Uan noijki oui timotlapouis ika okse tlajtoli. Nin uelis kichiuas ma timosotlauakan uan ayakmo kuali tiktekichiuiliskej Jehová. Ik non, maski moneki nochipa ma timomachtikan ika pakilistli okse tlajtoli, okachi moneki kuali ma timouikakan iuan Jehová (Mateo 4:4).
ITEKIPANOJKAUAN TOTAJTSIN DIOS TLEN KUALI IUAN OMOUIKAKEJ
7. ¿Tlen okichijkej babilonios pampa Daniel ma kichiua uan ma kineltoka ken yejuan okineltokayaj?
7 Ijkuak Daniel uan iyolikniuan okinuikakej Babilonia, babilonios okinekiayaj ma kichiuakan tlen yejuan okichiuayaj uan ma kineltokakan tlen yejuan okineltokayaj. ¿Ken okichijkej? Okinmachtijkej intlajtol uan okintlalilijkej intoka tlen okinmotlaliliayaj babilonios (Daniel 1:3-7). Yankuik itoka Daniel omouikaya iuan Bel, teotsin tlen okachi okiueyichiuayaj babilonios. Uelis ueyi tekiua itech Babilonia okinekiaya Daniel ma kineltoka okachi ueyititok inteotsin akinmej ochantiayaj Babilonia uan amo Jehová, iDios Daniel (Daniel 4:8).
Daniel nochipa kuali omouikak iuan Jehová pampa omomachtiaya iTlajtol tlen oijkuilitoka ika tlajtoli hebreo
8. ¿Tlen okichi Daniel pampa nochipa kuali mouikaskia iuan Jehová?
8 Itech Babilonia, Daniel okiluijkej ma kikua tlakuali tlen ueyi tekiua okikuaya. Pero Daniel okitlakamatki itlanauatil toTajtsin Dios (Daniel 1:8). Daniel nochipa kuali omouikak iuan Jehová maski okatka itech okse ueyi altepetl. ¿Ken okichi? Omomachtiaya iTlajtol toTajtsin Dios tlen oijkuilitoka ika tlajtoli hebreo (Daniel 9:2). Ijkuak opanok kanaj 70 xiuitl ijkuak Daniel oajsito Babilonia, ok okixmatiayaj ika itoka hebreo, Daniel (Daniel 5:13).
9. ¿Ken okitaya iTlajtol toTajtsin Dios akin okijkuilo Salmo 119?
9 Noijki tikpia ineskayo akin okijkuilo Salmo 119. Otlajyoui ijkuak sekimej ikalchanejkauan ueyi tekiua okitenejkej. Pero okitlajtolti iTlajtol toTajtsin Dios uan non okipaleui amo ma kichiua ken oksekimej (Salmo 119:23, 61). Ye okika ma ajsi itech iyolo itlamachtil toTajtsin Dios (xiktlajtolti Salmo 119:11, 46). *
NOCHIPA KUALI MA TIMOUIKAKAN IUAN JEHOVÁ
10, 11. (1) ¿Tleka moneki ma timomachtikan Biblia? (2) ¿Ken uelis tikchiuaskej? Xikyekijto ika se neskayotl.
10 Maski tikpiaj miak tekitl itech tlanechikol noso kanin titekitij, nochipa moneki toselti ma timomachtikan Biblia uan noijki iuan tokalchanejkauan (Efesios 5:15, 16). Uan ijkuak timomachtiskej, amo tikchiuaskej san pampa tiknekij totoka tiktlajtoltiskej Biblia noso san pampa titlanankiliskej itech tlanechikol. ITlajtol toTajtsin Dios moneki ajsis itech toyolo uan kichikauas totlaneltokilis.
11 Tla tiknekij ijkon tikchiuaskej, amo san totech ma timokuayejyekokan, noijki intech oksekimej (Filipenses 1:9, 10). ¿Tleka ijkon tikijtoaj? Ijkuak timomachtiskej pampa titetlapouiskej, tiaskej nechikolmej, tiktemakaskej se tlapoualistli noso tikpanoltiskej se neskayotl, ualeua amo timokuayejyekoaj ken uelis techpaleuis tlen timomachtiaj. Se neskayotl, akin tlakualchiua moneki kiyekos tlakuali achto kikuaskej oksekimej, pero non amo kijtosneki yoixuik. Tla kineki kuali yetos, moneki kuali tlakuas. Noijki ijkon, tla tiknekij kuali timouikaskej iuan Jehová, moneki nochipa timomachtiskej Biblia pampa ma techpaleui.
12, 13. ¿Tleka kijtoaj miakej tokniuan okachi kinpaleuia ma momachtikan Biblia ika intlajtol?
12 Miakej tokniuan tlen tlapaleuiaj itech se tlanechikol ika okse tlajtoli, kijtoaj kinpaleuia momachtiskej Biblia ika intlajtol (Hechos 2:8). Misioneros noijki kijtoaj, kinpaleuia momachtiaj Biblia ika intlajtol uan amo san ika tlen kikakij itech nechikolmej.
13 Se tokni tlen itoka Alain, yikipia chikueyi xiuitl momachtijtok tlajtoli persa. Tokni kijtoa: “Ijkuak nimomachtia ika tlajtoli persa, okachi nimokuayejyekoa kox nikajsikamati non tlajtoli. Ken san okachi nimokuayejyekojtok, amo nochipa ajsi itech noyolo tlen niktlajtoltijtok. Ik non, nochipa nimomachtia Biblia uan amatlajkuilolmej ika notlajtol”.
TETAJMEJ, MA AJSI ITECH INYOLO NAMOKONEUAN TLEN NANKINMACHTIAJ
14. ¿Tlen moneki kitaskej tetajmej, uan tleka?
14 Tetajmej tlen kichiuaj ken Cristo moneki ma kitakan kox inkoneuan kajsikamatij uan kipatioitaj tlen melauak. ¿Tleka? Ma timotlapouikan itech se tokni tlen itoka Serge uan itech isiua tlen itoka Muriel. Yejuan okatkaj kanaj eyi xiuitl itech se tlanechikol ika okse tlajtoli. Pero okitakej inkone tlen kipia 17 xiuitl, ayakmo okinekiaya tetlapouis nion yas nechikolmej. Muriel kijtoa: “Amo okipaktiaya tetlapouis ika okse tlajtoli, pero achto sapanoa okipaktiaya tetlapouis ika totlajtol francés”. Serge kijtoa ijkuak okatkaj itech se tlanechikol ika okse tlajtoli, ikone amo okachi okitekichiuiliaya Jehová. Ik non, okachi kuali omokuepkej itech tlanechikol kanin okatkaj.
Kuali xikita kox mokoneuan kipiaj itech inyolo tlen Biblia tlamachtia. (Xikinmita párrafos 14 uan 15).
15. (1) ¿Tlen moneki kitaskej tetajmej tla kinekij mokuepaskej itech tlanechikol ika intlajtol inkoneuan? (2) ¿Tlen kinmiluia tetajmej Deuteronomio 6:5-7?
15 Uelis sekimej tetajmej kinekij mokuepaskej itech tlanechikol ika intlajtol inkoneuan. Pero ¿tlen moneki mokuayejyekoskej achto kipejpenaskej tlen kichiuaskej? Achto, ma kitakan kox uelis kinmachtiskej inkoneuan ma kitlasojtlakan Jehová uan noijki kinmachtiskej okse tlajtoli. Ome, ma kitakan kox inkoneuan kinekij tetlapouiskej, yaskej nechikolmej noso yetoskej itech se tlanechikol ika okse tlajtoli. Ijkuak yikuali okitakej nonmej tlamantli, tetajmej uelis kijtoskej okachi kuali ma mokuepakan itech tlanechikol ika tlajtoli tlen kuali kajsikamatij inkoneuan. Uan ijkuak inkoneuan kuali mouikaskej iuan Jehová, tetajmej uelis oksepa yaskej itech okse tlanechikol ika okse tlajtoli (xiktlajtolti Deuteronomio 6:5-7). *
16, 17. ¿Ken kinmachtiaj sekimej tetajmej inkoneuan itech Jehová?
16 Sekimej tetajmej kitaj ken kinmachtiskej inkoneuan itech Jehová maski katej itech se tlanechikol ika okse tlajtoli. Ma tikitakan tlen okichi se teta tlen itoka Charles. Ye kinpia eyi takotsitsintin tlen kipiaj kanaj 9 a 13 xiuitl. Nochtin katej itech se tlanechikol ika tlajtoli lingala. Tokni Charles kijtoa: “Otikijtojkej timomachtiskej Biblia iuan totakotsitsiuan uan timomachtiskej ken kalchanejke ika totlajtol”. Noijki tokni kijtoa mauiltiaj uan momachtiaj ika tlajtoli lingala uan ijkon takotsitsintin momachtiaj tlajtoli.
Ximochijchikaua timomachtis tlajtoli tlen kitekitiltiaj itech tlanechikol kanin tika uan xitlanankili itech nechikolmej. (Xikinmita párrafos 16 uan 17).
17 Axkan ma tikitakan tlen kichiua se tokni tlen itoka Kevin. Ye kinpia ome itakotsitsiuan, se kipia makuili xiuitl uan okse kipia chikueyi xiuitl. Kevin mochijchikaua kinmachtis Biblia itakotsitsiuan ika intlajtol, pampa kanin katej ayamo kuali kajsikamatij tlajtoli tlen motekitiltia itech tlanechikol. Tokni kijtoa: “Nosiua uan ne timomachtiaj iuan tokoneuan ika totlajtol francés. Noijki sejse metstli tiauij itech se nechikol ika francés. Uan noijki ijkuak timoseuiaj tiauij itech se ueyi nechikol regional ika totlajtol”.
18. (1) ¿Ken uelis kinpaleuis Romanos 15:1, 2 tetajmej ma kipejpenakan tlen okachi kuali pampa inkoneuan? (2) ¿Tlen kijtoaj sekimej tetajmej uelis tikchiuaskej? (Xikita nota kanin tlami tlamachtil).
18 Sejse kalchanejkej moneki kijtos ken kinpaleuiskej inkoneuan pampa okachi kuali ma mouikakan iuan Jehová [2] (xikita nota kanin tlami tlamachtil) (Gálatas 6:5). Itech párrafo 14 otimotlapouijkej itech Muriel uan Serge. Muriel kijtoa ye uan inamik ok okinekiayaj tlapaleuiskej itech se tlanechikol ika okse tlajtoli. Pero oyajkej itech okse tlanechikol uan ijkon okipaleuijkej inkone okachi kuali ma mouika iuan Jehová (xiktlajtolti Romanos 15:1, 2). Axkan Serge kijtoa kuali tlen okichijkej. Kijtoa ijkuak omokuepkej itech tlanechikol ika tlajtoli francés inkone opejki okachi kuali mouika iuan Jehová uan omoapolakti. Axkan inkone kajki ken precursor regular uan mokuayejyekojtok tlapaleuiti itech se tlanechikol ika okse tlajtoli.
MA AJSI ITECH TOYOLO ITLAJTOL TOTAJTSIN DIOS
19, 20. ¿Ken uelis tikteititiskej tiktlasojtlaj iTlajtol toTajtsin Dios?
19 Jehová kintlasojtla nochtin tlaltikpaktlakamej. Ye yokichi iTlajtol ma yeto ika miakej tlatlamantli tlajtolmej uan ijkon nochtin tlaltikpaktlakamej ma kixmatikan tlen melauak (1 Timoteo 2:4). Jehová kimati okachi kuali iuan timouikaj ijkuak tiktlajtoltiaj Biblia ika totlajtol.
20 Tinochtin moneki ma timochijchikauakan kuali ma timouikakan iuan Jehová. Ik non, moneki ma timomachtikan Biblia ika se tlajtoli tlen okachi kuali tikajsikamatij. Ijkon tikinpaleuiskej tokalchanejkauan ma kipiakan chikauak intlaneltokilis uan tikteititiskej melauak tiktlasojtlaj iTlajtol toTajtsin Dios (Salmo 119:11).
^ [1] (párrafo 5): Otikinpatilijkej intoka.
^ [2] (párrafo 18): Xikita tlamachtil “La crianza de los hijos en un país extranjero: desafíos y galardones”, itech La Atalaya (ika náhuatl del centro Akin Tetlapouijtok) 15 de octubre 2002. Ompa tikajsis tlen uelis tikchiuas uan ijkon tikinpaleuis mokalchanejkauan.
^ párr. 4 Nehemías 13:23, 24 kijtoa: “Noijki itech nonmej tonalmej onikinmitak judíos tlen omonamiktijkej iuan siuamej asdoditas, ammonitas uan moabitas. Uan inkoneuan, tlajko otlajtoayaj asdodeo uan intlajtol okseki altepemej, pero amo ikaj okimatiaya intlajtol judíos”.
^ párr. 9 Salmo 119:11 kijtoa: “Itech noyolo oniktlati motlajtol ken itlaj tlen sapanoa miak ipati, ijkon amo nitlajtlakolchiuas moixpan”. Uan 46 kijtoa: “Maski niyetos inmixpan uejueyij tekiuajkej, amo nipinauas nitlajtos itech motlanauatiluan”.
^ párr. 15 Deuteronomio 6:5-7 kijtoa: “Uan moneki tiktlasojtlas Jehová moDios ika nochi moyolo uan ika nochi moalma uan ika nochi mochikaualis. Uan ninmej tlajtolmej tlen axkan nimitsnauatijtok moneki yetoskej ipan moyolo; uan moneki tikmachtis mokone uan tiktlapouis ijkuak timotlalis itech mokalijtik uan ijkuak tinemis itech ojtli uan ijkuak timotekas uan ijkuak timeuas”.
