ITECH Mateo 13:24-26, Jesús okijto: “Ijkó noiwa tlamochiwa ilwikak kan Dios tlanawatia, kemi se tlakatl non okitook itlala kuali xínachtli. Pero ijkuak itlakawah okochtokah, owala se tlakatl non okikokoliaya n tekowa, iwa okitookili sasaliksakatl itsajtsalko n trigo, iwa ocholo. Ijkuak n tlátoktli omoskalti iwa omiawatik n trigo, noiwa omoskalti miak sasaliksakatl”. Miakej ixtlamatkej amo kineltokaj kox yiuejkika sekimej ijkon okichiuayaj. Pero seki amamej tlen kinpiaj tlanauatilmej romanos tlen yiuejkika omoijkuilojkej, kiteititiaj ijkon melauak opanoaya.

Se diccionario bíblico kijtoa tlanauatil romano amo kuali okitaya tla se tlakatl omomakuepaya uan okitokaya amo kuali xiuitl tetlala. Tla omonekiaya se tlanauatil ken non, kijtosneki opanoaya non tlamantli. Se tlakatl tlen kimati itech tlanauatilmej tlen itoka Alastair Kerr kiyekijtoa itech xiuitl 533, tekiua romano Justiniano okijkuilo seki amamej tlen intoka Digesto. Ninmej amamej okinpiayaj tlanauatilmej romanas kanin oijkuilitokaj tlen okijtojkej akinmej okimatiayaj itech tlanauatilmej itech xiuitl 100 uan xiuitl 250. Digesto tlajtoa itech se tlakatl ixtlamatki tlen omotokayotiaya Ulpiano, akin otlajto itech ikaj tlen okitokak amo kuali xiuitl tetlala uan okijtlako tlen okitokakej. Noijki okijto akin ijkon okichiuiliaya uelis kiluiskia akin ijkon okichiuili ma kitlaxtlauili tlen okijtlako.

Ken tikitaj, nonmej tlamantli opanoaya itech altepetl Roma. Nin kiteititia neskayotl tlen okijto Jesús uelis melauak opanok.