ONINESKI itech 1934. Notajtsin omotokayotiaya Fred uan nonantsin Edna Molohan. Ijkuakon yejuan yokipiayaj veinte xiuitl omomachtijtokaj Biblia (axkan timotokayotiaj tiiTlaixpantijkauan Jehová). Ne sapanoa nikintlasojkamatilia onechmachtijkej ma niktlasojtla toTajtsin Dios. Otichantiayaj Parsons nin altepetl poui itech altepetl Kansas. Kanin omonechikoayaj okatkaj miakej tlapejpenalmej. Nochipa otimonechikoayaj uan otitetlapouiayaj. Nochi sábados otitetlapouiayaj itech ojtli. Ualeua sapanoa otisotlauayaj ijkuak otitlamiayaj. Pero notajtsin nochipa otechuikaya ma tikkuatij helados.

Tinochtin tlen ompa otimonechikoayaj omonekiaya titetlapouiskej itech miakej altepetsitsintin uan noijki kanin okinmiskaltiayaj piomej. Otitlapatlayaj ika revistas uan akinmej otekipanoayaj itech granjas otechmakayaj kilitl uan okseki tlamantli, noijki teksistli noso totoltetl uan ualeua otechmakayaj piomej. Amo otikpiayaj miak tomin pero notajtsin okitemakak tomin ika nochi iyolo para amatlajkuilolmej, ik non, ijkuak otitlapatlayaj ika amatlajkuilolmej otikpiayaj tlakuali.

Notatajuan okitemojkej se gramófono tlen ika titetlapouiskiaj. Ne amo onikmatiaya ken niktekitiltis porque ok onikatka nitsikitsin. Pero onechpaktiaya nikinpaleuis ijkuak okintlaliayaj tlapoualismej tlen okintemakaya tokni Rutherford ijkuak otiayaj titetlajpalotiuij uan ijkuak otitlamachtiayaj.

Notajtsin okitlalili se bocina tocarro tlen okiski itech 1936 uan okatka se Ford. Nin carro sapanoa otechpaleui ijkuak otitetlapouiayaj. Achto otiktlaliayaj tlatsotsonali uan satepan otiktlaliayaj se tlapoualistli. Ijkuak otlamiaya tlapoualistli, akinmej  otechkakiayaj otikinmakayaj amatlajkuilolmej.

Itech se altepetsintli tlen poui Kansas itoka Cherryvale, policías okiluijkej notajtsin ayakmo ma kintlali grabaciones itech parque porque chichikometika ompa miakej omoseuiayaj. Notajtsin amo itlaj okijto uan okikixti tocarro itech parque uan okiketsalti kiauak. Ompa okitlali grabación uan miakej okikakiayaj. Onechpaktiaya nitetlapouis iuan notajtsin uan nokni Jerry.

Kanaj itech 1900 totoka otitetlapouiayaj kanin amo okinekiayaj techkakiskej. Ijkon ken yonamechilui ompa Joplin (Misuri) kualkan otimeuayaj uan omonekiaya san ichtaka tikinkauaskiaj amatsitsintin itlampa puerta. Satepan tinochtin otimonamikiayaj para tikitaskiaj kox policía okikitski se tokni.

Ijkuakon otitetlapouiayaj itech ojtli. Otikinuikayaj amamej uan ijkon okitayaj otitetlapouiayaj iTekiuajkayo toTajtsin Dios. Nikilnamiki tlen opanok itech noaltepe. Tokniuan okiuikayaj se amatl kanin okijtoaya “Akinmej pouij itech se religión tlakajkayauaj uan tlachtekij”. Oyajkej kanaj se kilómetro uan omokuepatoj. Amo itlaj okinmiluijkej tleka ijkon okijtoayaj nonmej amamej pero miakej okijtoayaj tleka ijkon okijtoayaj.

Nokalchanejkauan oyayaj uejueyij nechikolmej ompa Texas. Notajtsin otekitiaya itech ferrocarril tlen opanoaya ik Misuri-Kansas-Texas. Ik non, amo itlaj otiktlaxtlauayaj ijkuak otiayaj uejueyij nechikolmej. Notío Fred Wismar opejki momachtia Biblia itech xiuitl 1900 ijkuak okatka telpochtli uan satepan omoapolakti. Satepan okintlapoui ikniuan tlen omomachtiaya uan noijki okitlapoui nonantsin. Notío miakej okixmatiayaj ompa Texas uan noijki ompa otlapaleuiaya ken tlayekanki itech circuito. Otechpaktiaya iuan tiyetoskej porque otetlasojtlaya uan oyolpakiaya. Noijki okipaktiaya tetlapouis uan non onechyolchika.

Itech 1941 otiajkej se ueyi nechikol ompa San Luis (Misuri). Nochtin telpokamej uan ichpokamej okinmiluijkej tlayekapan ma motlalikan porque tokni Rutherford kitemakaskia se tlapoualistli itoka “Ikoneuan ueyi tekiua”. Ompa otikatkaj kanaj quince mil telpokamej uan ichpokamej. Otechtlajtlachialti tokni Rutherford uan tlen okipaleuiayaj porque ijkuak otlanki, otechmajmakakej se amochtli itoka Hijos.

Abril 1943 otiajkej Coffeyville (Kansas) ompa otikpixkej se ueyi nechikol tlen omotokayoti “Xitlapaleuikan”. Nin ueyi nechikol  sapanoa nikilnamiktok porque ijkuakon otechapolaktijkej ijtik atl sapanoa sesek. Noijki ijkuakon omoijto itech nochi tlanechikolmej peuaskia mochiuas Tlamachtil pampa akinmej tetlapouiaj. Okiski se amatlajkuilol tlen okipiaya 52 tlamachtilmej para ika mopaleuiskiaj. Satepan onikpanolti se tlamachtil para akinmej tetlapouiaj.

Itech 1951 otlanki onimomachti uan omonekiaya nikpejpenas tlen nikchiuaskia. Ne oniknekiaya nias Betel porque nokni Jerry ompa okatka. San niman oniktitlanki se amatl ompa Betel tlen kajki Brooklyn. San niman onechnotskej uan onechiluijkej 10 de marzo 1925 ma nitekipanoti Betel. Sapanoa onechpaleui okachi ma nimouika iuan Jehová.

Oniknekiaya nitlapaleuis kanin kikixtiaj amatlajkuilolmej uan amochmej. Pero amo keman ompa onechtitlankej. Onechtlalijkej ma nitetlamaka uan satepan onechtlalijkej ma nitlakualchiua. Onechpakti nin tekitl uan onimomachti miak tlamantli. Ompa otitekipanoayaj tlatlamantli hora, ik non, onimajxiliaya nimomachtis. Nin onechpaleui okachi chikauak ma nikpia notlaneltokilis uan kuali ma nimouika iuan Jehová. Noijki onechpaleui okachi ma niktekichiuili Jehová ompa Betel maski san keski xiuitl kinekiskia. Jerry okiski Betel itech 1949 iuan isiua tlen itoka Patricia. Pero amo uejka ochantitoj, ik non, onechpaleuiayaj uan onechyolchikauayaj.

Satepan ompa Betel, tokniuan okinpejpenkej akinmej kitemakaskiaj tlapoualismej. Tokniuan tlen okipejpenkej okinmiluijkej ma kintlajpalotij tlanechikolmej tlen amo uejka okatkaj ompa Brooklyn. Ne noijki onechpejpenkej uan otikinmachtiayaj tokniuan uan noijki inmiuan otitetlapouiayaj. Sapanoa onimomojtiaya ijkuak onikinmachtiaya tokniuan. Nochipa oniaya itech tren. Nikilnamiki tlen onechpanok itech xiuitl 1954 ijkuak sapanoa oseuaya. Se domingo tiotlak ijkuak yoniaya Nueva York uan non tiotlak niajsiskia Betel. Pero sapanoa otlaseuetski uan sapanoa oejekak uan oijtlakauik tren. Oniajsito lunes kualkan kanaj las cinco kanin moketsa tren. Onitlejkok itech metro tlen yaui Brooklyn uan san melajka onia onitlakualchiuato maski non yoak amo onikochki. Pero oniajsito maski yitlajka uan onisotlauatoka. Pero sapanoa niyolpaki nikinpaleuia tokniuan uan oksekimej nikinmixmati.

Ijkuak onikpiaya seki xiuitl ompa Betel, onechiluijkej ma nitlapaleui itech radio WBBR. Ijkuakon nin radio okatka itech ojtli 124 ompa Columbia Heights. Itech se amatl okijtoaya akinmej san sekan momachtiskiaj Biblia sejse semana. Ne noijki ompa onechtlalijkej. Tokni A. H. Macmillan tlen noijki otiknotsayaj Mac noijki ompa otlamachtiaya. Ye miak xiuitl okatka Betel uan onechpaleui kuali ma niktekichiuili Jehová.

Itech 1958 onechiluijkej ma nitlapaleuiti itech Tlamachtil ika Biblia tlen kichiua Watchtower itech Galaad. Onikinpaleuiaya akinmej ompa omomachtiayaj ma kinyektlalilikan inmiamauan para yaskiaj kanin tlapaleuiskiaj. Ijkuakon sapanoa okatka patio yaskia itech avión, ik non, amo miakej itech oyayaj. Miakej okintitlankej África uan Asia uan oyajkej itech barco. Pero satepan misioneros opejkej yauij itech avión porque ayakmo okatka patio.

Okachi onechmakakej tekitl itech 1960 porque omonekiaya nikintlaneuis aviones  para kinuikaskiaj tokniuan. Porque mochiuaskia uejueyij nechikolmej internacionales ompa Europa itech 1961. Ne noijki onia Hamburgo (Alemania) itech se avión tlen otiktlanejkej. Ijkuak otlanki ueyi nechikol, ne uan ok eyi betelitas otiktlanejkej se carro uan otiajkej Italia otitetlajpalotoj ompa Betel tlen kajki Roma. Satepan otiajkej Francia uan otipanokej itech tepeyo Pirineos uan otiajsitoj España. Ompa amo okitekauiliayaj ma tetlapouikan tokniuan. Otiyolpakej otikinmixmatkej tokniuan tlen chantij Barcelona. Yejuan amo okinkauiliayaj ma tetlapouikan ik non, otikinkimilojkej revistas uan otikintliokolijkej. Satepan otiajkej Ámsterdam uan satepan otimokuepkej Nueva York.

Opanok se xiuitl, onechiluijkej ma nikyektlali nochi tlen omonekiaya porque 583 tokniuan yaskiaj uejueyij nechikolmej internacionales. Nin omochi itech 1963 uan omotokayoti “Kuali tlajtolmej”. Se omochi Europa, okse Asia uan okse Pacífico sur. Saiktlami Honolulú (Hawái) uan Pasadena (California). Omonekiaya panoskej Líbano uan Jordania para kitaskiaj kanin ochantik Abraham, Isaac, Jacob uan kanin otetlapouijkej itlatitlaniluan Jesús. Omonekiaya nochi tikyektlaliskej pero noijki omonekiaya tikinkixtiskej inmiamauan tokniuan porque seki altepemej okintlajtlaniayaj.

1963 noijki nikpatioita. Itech 29 de junio 1963 onimonamikti iuan se tokni itoka Lila Rogers ye ochantiaya Misuri uan yokipiaya eyi xiuitl ompa Betel. Chikometika otiajkej iuan tokniuan tlen opanokej Grecia, Egipto uan Líbano. Satepan otiajkej Jordania pero san niman otiajsitoj porque amo uejka. Ompa amo okinkauiliayaj tokniuan ma tetlapouikan uan amo otikmatiayaj kox uelis kalakiskiaj iTlaixpantijkauan Jehová. Porque amo otikinpiayaj toamauan, ik non, amo otikmatiayaj tlen panoskia. Otimotlajtlachialtijkej ijkuak otiajsitoj terminal porque ipan kali okatkaj tokniuan uan okipixtokaj se amatl kanin okijtoaya “Timechchixtokej iTlaixpantijkauan Jehová”. Otechpakti otitlachiatoj kanin ochantik Abraham, Isaac, Jacob uan kanin otetlapouiayaj itlatitlaniluan Jesús. Ompa opejki motetlapouia (Hech. 13:47).

Yikipia kanaj cincuenta xiuitl onimonamikti iuan Lila uan nechpaleuia ma niktekichiuili Jehová. Ne uan nosiua miak uelta otiajkej España kanin amo okinkauiliayaj tokniuan ma tetlapouikan. Otikinuikiliayaj amatlajkuilolmej uan okseki tlamantli noijki otikinyolchikauayaj. Otikintlajpalotoj tokniuan tlen otsaktokaj ompa Cádiz (España). Oniyolpakik ijkuak onikitak okinyolchika tlen onikinmachti.

 Itech 1963 opejki nitlapaleuia para ma mochiuakan uejueyij nechikolmej internacionales ompa África, América Central uan del Sur, Australia, Europa, Hawái, el Lejano Oriente, Nueva Zelanda uan Puerto Rico. Lila uan ne yotiajkej miakej uejueyij nechikolmej. Melauak tikilnamiktokej tlen omochi itech 1989 ompa Varsovia (Polonia). Miakej tokniuan tlen chantij Rusia oyajkej non ueyi nechikol uan melauak okinpakti porque yikin non achto omochiuaya. Otikinmixmatkej miakej tlen miak xiuitl otsaktokaj porque otlaneltokayaj itech toTajtsin Dios.

Noijki otechpakti tikintlajpalotiuij miakej tokniuan tlen katej Betel uan noijki misioneros. Saiktlami otikintlajpalotoj tokniuan tlen chantij Corea del Sur uan otikinmixmatkej cincuenta tokniuan tlen otsaktokaj ompa Suwon. Nochtin oyolpakiayaj uan otechiluijkej ma ajsi tonal kitekichiuiliskej Jehová ken moneki. Tejuan noijki otechyolchikajkej (Rom. 1:11, 12).

Yopanok miak xiuitl uan ialtepe Jehová yomomiaktili porque ye kiteochijtok. Itech 1943 ijkuak onimoapolakti san kanaj mil otetlapouiayaj. Pero axkan tikatej kanaj ocho millones itech 240 altepemej. Tikintlasojkamatiliaj tokniuan misioneros porque melauak tlapaleuiaj. Onechpakti inmiuan nitlapaleuis uan noijki porque onikinpaleui ma ajsitij kanin okintitlaniayaj.

Niyolpaki porque onikpejpenki niktekichiuilis Jehová ijkuak onikatka nitelpochtli uan oniktitlanki amatl Betel para ma nechselikan. Jehová sapanoa yonechteochi. Tiyolpakij titlapaleuiaj Betel. Otikinpaleuijkej miakej tokniuan ompa Brooklyn uan miakej inmiuan timouikaj.

Ok tikatej Betel uan Lila sapanoa nechpaleuia. Yinikpia kanaj 84 xiuitl pero ok nikinselia cartas tlen ajsij Betel uan nikintitlani.

Melauak kualtsin tipouij itech ialtepe Jehová. Porque tikitaj mochiua tlen kijtoa Malaquías 3:18: “Namejuan oksepa nankitaskej akin yolmelauak uan akin amo yolkuali, akin kitekichiuilia toTajtsin Dios uan akin amo kitekichiuilia”. Nochi tlen Satanás kiyekana mota yipojpoliuis uan miakej ayakmo kinekij yoltoskej uan amo kineltokaj kuali yetoskej satepan. Pero tejuan tlen tiktlasojtlaj Jehová maski titlajyouiaj, tikneltokaj satepan kuali tiyetoskej. Sapanoa tikpatioitaj titetlapouiskej itech Tekiuajkayotl (Mat. 24:14, TNM). Ika nin Tekiuajkayotl kipojpoloskej tlen kiyekana Satanás uan yetos se xochitlali. ¡Yitiknekij ijkon ma mochiua! Melauak tiyolpakiskej porque ayakmo tikpiaskej tlajtlakoli uan nochipa tichantiskej tlaltikpak.