Itech non amatl noijki okijtojkej omonekiaya ma kitlalikan se Sociedad de Naciones. Okinekiayaj “nochi altepemej ma tlapaleuikan ma yeto yolseuilistli uan nochtin kuali ma yetokan”. Noijki otlapaleuijkej akinmej opouiayaj itech seki religiones tlen okijtoayaj okichiuayaj ken Cristo. Akinmej opouiayaj itech Consejo Federal de las Iglesias de Cristo ompa América, okijtojkej Sociedad de Naciones “okatka ipatka iTekiuajkayo toTajtsin Dios nikan tlaltikpak”. Okintitlankej sekimej ma kinpaleuitij akinmej opouiayaj itech Sociedad de Naciones ijkuak okipixkej Conferencia de la Paz de París. Ijkuakon se tlakatl okijto: “Tlen okijtojkej non tonal kinpatiliskia nochtin innemilis”.

Mopatlaskia miak tlamantli pero nin amo kichiuaskiaj akinmej ompa omonechikojkej. Itech 1919 Jehová okinpaleui itekipanojkauan okachi ma tetlapouikan. Pero akinmej omomachtiayaj Biblia omonekiaya kipatlaskej seki tlamantli.

Tokniuan okijtojkaj sábado 4 de enero 1919 kinpejpenaskiaj akinmej tlayekanaskiaj itech Sociedad Watch Tower Bible and Tract. Ijkuakon otlayekanaya tokni Joseph Rutherford pero otsaktoka ompa Atlanta (Georgia, Estados Unidos) iuan chikome tokniuan tlen okipaleuiayaj. Omonekiaya kijtoskej kox ok tlayekanaskiaj tokniuan tlen otsaktokaj noso kinpejpenaskiaj oksekimej.

Tokni Joseph Rutherford okitekipachoaya ken yetoskia ialtepe Jehová. Okimatiaya sekimej tokniuan okinekiayaj ma kipejpenakan okse tlen tlayekanaskia. Ik non, okinmijkuilili se carta tokniuan uan okinmilui ma kipejpenakan tokni Evander Coward. Okijto non tokni okatka “yolyamanki”, “ixtlamatki” uan noijki “omotemakak ixpan toTeko”. Pero miakej tokniuan okijtoayaj ipan chikuase metstli kipejpenaskiaj akin tlayekanaskia. Noijki ijkon okijtoayaj abogados tlen okinpaleuiayaj tokniuan tlen otsaktokaj. Pero miakej tokniuan okualankej ijkuak okijtojkej tlen kichiuaskiaj.

 Satepan tokni Richard Barber okijto opanok itlaj tlen okinpaleui tokniuan kuali ma mokuayejyekokan. Se tokni tlen ompa okatka okijto: “Ne amo niabogado pero nikmati itlaj tlen moneki kichiuaskej akinmej yolmelajkej. ToTajtsin Dios kineki ma tiyetokan tiyolmelajkej. Tikteititiskej tiyolmelajkej ixpan toTajtsin Dios tla oksepa tikpejpenaskej ma tlayekana tokni Joseph Rutherford” (Sal. 18:25).

Tokni Alexander Macmillan tlen noijki otsaktoka okilnamik tlen opanok mostlatika ijkuak okipejpenkej akin tlayekanaskia. Tokniuan okititlanilijkej se carta tokni Joseph Rutherford kanin okijtoaya akin okipejpenkej. Ik non, tokni Joseph Rutherford okiuitek tepamitl kanin otsaktoka Alexander Macmillan uan okimakak carta. Tokni Alexander Macmillan san niman okimatki tlen okijtoaya. Ompa okijtoaya oksepa okinpejpenkej akinmej otlayekanayaj. Ok tlayekanaskia tokni Joseph Rutherford uan William Van Amburgh. Pero tokni Joseph Rutherford ok yetoskia presidente.

Chikome tokniuan ok otsaktokaj pero oksekimej tokniuan okinmololojkej kanaj 700,000 (setecientos mil) firmas para ma kinkixtikan tokniuan. Tokniuan amo omomojtijkej ijkon kichiuaskej. Miércoles 26 de marzo 1919 ijkuak ayamo okintemaktiliayaj firmas, okikixtijkej tokni Joseph Rutherford uan chikome tokniuan tlen noijki otsaktokaj.

Akinmej okiselijkej tokni Joseph Rutherford, okinmilui seki tlamantli: “Kuali nikmatok tlen otechpanok, techpaleuis ma tikixnamikikan okseki ouijkayotl. [...] Namejuan onanmochijchikajkej nankinkixtiskej namokniuan. Pero non amo okachi ipati. [...] Namejuan onanmochijchikajkej nankitematiltiskej tlen melauak uan sapanoa namechteochiuaskej porque ijkon onankichijkej”.

Tlen okinpanok tokniuan okiteititi Jehová okinpaleuijtoka. 14 de mayo 1919 tekiuajkej okijtojkej: “Ninmej tlakamej amo okinmixkomakakej ken omonekiaya [...]. Ik non, ayakmo moneki tsaktoskej”. Tokniuan okinteluijkej okichijkej miak tlamantli amo kuali uan tla tekiuajkej san ijkon kinkixtiskiaj, kijkuiloskiaj itlaj amo kuali okichijkej maski amo melauak yetoskia. Pero amikaj okiteititi kox melauak okichijkej tlen okinteluijkej. Tokni Joseph Rutherford nochipa okinpaleui tokniuan inmixpan akinmej opouiayaj itech Tribunal Supremo de Estados Unidos porque okatka juez uan miak uelta ijkon okichi.

Tokni Alexander Macmillan okilnamik: “Amo san timochixtoskiaj ma techuika toTeko iluikak. Omonekiaya itlaj tikchiuaskej uan ijkon tikajsikamatiskej tlen okinekiaya toTeko ma tikchiuakan”.

 Pero tokniuan tlen otlapaleuiayaj Betel ayakmo uelis ompa tekipanoskiaj. ¿Tleka? Porque ijkuak okintsakej opojpolikej nochi tlen ika okinchijchiuayaj amatlajkuilolmej. Non okinyolkoko uan miakej omotlajtlanijkej kox ayakmo tetlapouiskiaj.

¿Okatkaj sekimej tlen ok okinekiayaj kimatiskej tlen kichiuas iTekiuajkayo toTajtsin Dios? Kimatiskiaj kox omonekiaya tetlapouiskej ijkuak tokni Joseph Rutherford kitemakaskia se tlapoualistli uan miakej kinyoleuaskiaj. Tokni Alexander Macmillan okijto: “Tla amikaj yaskia, tikmatiskiaj ayakmo titetlapouiskiaj”.

Pero domingo 4 de mayo 1919 ompa Los Ángeles California, tokni Joseph Rutherford maski omokokoaya okitemakak tlapoualistli. Tlamachtil omotokayoti “La esperanza para la humanidad angustiada”. Ijkuakon omonechikojkej kanaj 3,500 uan miakej ayakmo okalakej porque miakej ompa okatkaj. Mostlatika omonechikojkej kanaj 1,500. Ijkon tokniuan okimatkej omonekiaya tetlapouiskej porque miakej okinekiayaj kimatiskej tlen kijtoa iTlajtol toTajtsin Dios.

Ijkuakon opejki okachi titetlapouiaj uan axkan ok timochijchikauaj ijkon tikchiuaskej.

Itech revista Akin Tetlapouijtok 1 de agosto 1919 ika inglés, omoijto septiembre mochiuaskia se ueyi nechikol ompa Cedar Point, (Ohio). Se telpochtli tlen omotokayotiaya Clarence Beaty tlen omomachtijtoka Biblia uan ochantiaya Missouri, okijto: “Tinochtin otimokuayejyekojkej omonekiaya ompa tiyetoskiaj”. Ijkuakon omonechikojkej kanaj 6,000 tokniuan. Amo otikmatiayaj kox miakej monechikoskiaj. Non tonal kualtsin okatka porque omoapolaktijkej kanaj doscientos ompa itempa ueyi atl tlen itoka Erie.

 Itech 5 de septiembre 1919 ijkuak yokipiaya makuili tonal omonechikojtokaj, tokni Joseph Rutherford okitemakak tlapoualistli tlen itoka “Discurso a los colaboradores”. Ijkuakon okitematilti peuas kichijchiuaskiaj se revista itoka The Golden Age. * Nin revista kijtoskia “tlen miak ipati panotoskia” uan kiyekijtoskia ika Biblia tleka panoskia seki tlamantli.

Okinmiluijkej tokniuan ma yetokan yolchikauakej uan ma tetlapouikan ika yankuik revista. Se carta okijtoaya ken omonekiaya kichiuaskej akinmej tetlapouiskiaj. Carta okijtoaya: “Nochtin akinmej yomotemakakej ixpan toTajtsin Dios noso yomoapolaktijkej omonekiaya kilnamiktoskej se tlateochiualistli tetlapouiskiaj uan mochijchikauaskiaj nochtin kintlapouiskej”. Miakej okiselijkej tetlapouiskej. Tokniuan oyolpakiayaj ijkuak otetlapouiayaj. Ik non, itech metstli diciembre yokatkaj kanaj cincuenta mil tlen okintlajtlaniayaj revistas.

Itlamian 1919 itekipanojkauan Jehová yikuali omoyektlalijkej uan okinekiayaj tetlapouiskej. Noijki omochijkej miakej profecías tlen tlajtoaj itech itlamian tonalmej. Itech Malaquías 3:1-4 omoijto itekipanojkauan toTajtsin Dios kinyejyekoskiaj uan kinyektlaliskiaj. Pero ayakmo ijkon okinpanok ijkuak okiskej itech ueyi Babilonia uan ijkuak Jesús okitlali “tlakeuali yolmelajki uan ixtlamatki” * (Apoc. 18:2, 4; Mat. 24:45, TNM). Akinmej omomachtiayaj Biblia kuali omoyektlalijkej para kitekichiuiliskiaj Jehová.