1. ¿Tlen uelis kichiuas Jehová uan ijkon ma mochiua tlen kineki?

JEHOVÁ uelis kichiuas san tlen moneki uan ijkon ma mochiua tlen ye kineki. Ye techmachtia, techyolchikaua uan techmatiltia tlen kichiuas (Is. 48:17; 2 Cor. 7:6; Gál. 3:8). Pero noijki kinpaleuia sekimej uan ijkon ma kichiuakan tlen ye kineki (Mat. 24:14, TNM; 28:19, 20; 2 Cor. 1:3, 4). Ye uelis techmakas ixtlamatilistli uan chikaualistli uan ijkon ma tikchiuakan tlen kineki. Nochi nin kiteititia Jehová uelis ijkon kichiuas porque itoka non kijtosneki. Ijkon mokuayejyekoaj sekimej ixtlamatkej.

2. (1) ¿Tleka ualeua timokuayejyekoaj kox uelis tikpaleuiskej Jehová? (2) ¿Tlen timomachtiskej?

² Tinochtin uelis tikpaleuiskej Jehová pero xamo ualeua timokuayejyekoaj kox uelis tikpaleuiskej. ¿Tleka? Porque xamo sekimej yikipiaj miak xiuitl, mopatla seki tlamantli itech innemilis noso ayakmo ueli okachi kitekichiuiliaj. Sekimej xamo kijtoaj yikitekichiuiliaj, ik non, ayakmo moneki okachi kitekichiuiliskej. Itech nin tlamachtil tikitaskej Jehová uelis techmachtis uan ijkon tikchiuaskej tlen moneki. Tikitaskej ken okinpaleui sekimej tlakamej uan siuamej ma kichiuakan tlen ye kineki. Satepan tikitaskej tlen uelis tikchiuaskej tla tiknekij tikpaleuiskej Jehová.

3. ¿Ken techpaleuia Jehová ijkon ken kijtoa Filipenses 2:13?

³ (Xiktlajtolti Filipenses 2:13). * Jehová techtlalilia itech toyolo ma tikchiuakan tlen kineki. ¿Ken kichiua? Ualeua tokniuan techiluiaj kanin moneki okachi ma titetlapouitij noso tlayekankej kitlajtoltiaj se carta tlen kiualtitlanij tokniuan tlen tlapaleuiaj Betel. Xamo timotlajtlaniaj ken titlapaleuiskej ijkuak ijkon techiluiaj. Xamo technauatiaj ma tikchiuakan itlaj oui uan timotlajtlaniaj kox uelis tikchiuaskej. Xamo ijkuak tiktlajtoltiaj Biblia timokuayejyekoaj ken uelis ika tikinpaleuiskej oksekimej. Jehová amo techchiualtia ma tikchiuakan tlen amo tiknekij. Pero kita ijkuak tiknekij okachi tiktekichiuiliskej uan techpaleuia.

4. ¿Ken uelis techpaleuis Jehová ma tikchiuakan tlen kineki?

⁴ Jehová noijki uelis techpaleuis ma tikchiuakan tlen kineki (Is. 40:29). Ika iespíritu santo techpaleuis ma tikchiuakan tlen moneki (Éx. 35:30-35). Noijki ika ialtepe techmachtia ma tikchiuakan seki tlamantli. Tla itlaj amo tikmatij ken tikchiuaskej, ma tikiluikan se tokni ma techpaleui. Noijki ma tikiluikan toTajtsin Dios ma techmaka ‘iweletílis’ (2 Cor. 4:7; Luc. 11:13). Biblia techtlapouia Jehová okinpaleui sekimej tlakamej uan siuamej ma kichiuakan tlen ye kineki. Ma tikitakan ken okinpaleui uan ken techpaleuis ma tikchiuakan tlen ye kineki.

5. ¿Tlen techmachtia Jehová ijkuak okipaleui Moisés ma kinkixtiti israelitas?

⁵ Jehová okipaleui Moisés ma kinkixtiti israelitas. Pero ¿keman okinauati ijkon ma kichiua? ¿Okichi ijkuak “Moisés okixtlamachtijkeh ika nochi tlan egipsios okimatiah”? (Hech. 7:22-25). Amo. Jehová okilui ma kichiua tlen ye okinekiaya ijkuak yokatka yolyamanki (Hech. 7:30, 34-36). Jehová okipaleui ijkuak oyajki ixpan tekiua tlen otlanauatiaya ompa Egipto (Éx. 9:13-19). ¿Tlen techmachtia tlen okichi Jehová? Techmachtia Jehová kinnauatia itlaj ma kichiuakan akinmej kipiaj kuali inyelis uan kineltokaj ye kinpaleuis (2 Cor. 4:7).

6. ¿Tlen techmachtia Jehová ijkuak okiyolini Barzilái ma kipaleui tekiua David?

⁶ Opanok seki siglos uan Jehová okiyekanki Barzilái ma kipaleui tekiua David. David okipiaya se ikone tlen omotokayotiaya Absalón. Absalón okinekiaya kimiktis David uan akinmej okipaleuiayaj. Ik non, uejka oyajkej pero osotlauayaj, oapismikiayaj uan oamikiayaj. Maski Barzilái okipiaya miak xiuitl ye uan oksekimej okiuikilijkej tlakuali David uan itlakeualuan. Barzilái amo omokuayejyeko amo kipaleuiskia Jehová porque yokipiaya miak xiuitl. Pero amo ijkon okichi. Ye okinpaleui itekipanojkauan toTajtsin Dios tlen amitlaj okipiayaj (2 Sam. 17:27-29). ¿Tlen techmachtia tlen okichi Barzilái? Maski tikpiaj miak xiuitl noso amo, Jehová uelis techyolinis ma tikinpaleuikan tokniuan ma kipiakan tlen ika mopanoltiskej (Prov. 3:27, 28; 19:17). Ualeua amo ueli tikinmakaj  seki tlamantli pero uelis tiktemakaskej tomin para ma kinpaleuikan ijkuak monekis (2 Cor. 8:14, 15; 9:11).

7. (1) ¿Ken okiyolini Jehová Simeón? (2) ¿Tleka nin tlamantli techyolchikaua?

⁷ Ompa Jerusalén okatka se tlakatl tlen omotokayotiaya Simeón uan yokipiaya miak xiuitl. Jehová okilui kitaskia akin yetoskia Mesías. Non sapanoa okiyolchika porque yiuejkika okichixtoka. Jehová okiteochi porque otlaneltokaya uan amo omosotla. Se tonal, iespíritu santo toTajtsin Dios okiyekanki Simeón ma uia itech teokali uan ompa okitak Jesús. Ijkuakon Jehová okilui ma kijto non chokotsin yetoskia Cristo (Luc. 2:25-35). Simeón xamo amo okitak Jesús ken okitekichiuili toTajtsin Dios. Pero ye okitlasojkamatili toTajtsin Dios tlen okikauili ma kichiua. Jehová kiteochiuas Simeón ijkuak yetos itech xochitlali uan kitas iTekiuajkayo Jesús tlapaleuis nochtin kuali ma yetokan (Gén. 22:18). Tejuan noijki ma tiktlasojkamatilikan Jehová porque techkauilia ma tiktekichiuilikan.

8. ¿Ken uelis techyolinis Jehová ma tikpaleuikan?

⁸ Itech achto siglo okatka se tlakatl tlen omotokayotiaya José uan ye noijki okipaleui Jehová (Hech. 4:36, 37). Tlatitlanilmej okitokayotijkej Bernabé. Itoka kijtosneki “Teyolchika” porque nesi okimatiaya teyolchikauas. Ijkuakon miakej tokniuan okimauiliayaj Saulo porque okimatiayaj sapanoa okintlajyouilti tokniuan. Pero Bernabé okipaleuito uan xamo Pablo okitlasojkamatili porque okatka yolkuali (Hech. 9:21, 26-28). Satepan tlayekankej tlen okatkaj Jerusalén okimatkej omonekiaya kinyolchikauaskej tokniuan tlen ochantiayaj ompa Antioquía tlen kajki Siria. ¿Akin okititlankej ma teyolchikauati? Okititlankej Bernabé. Kuali ijkon okichijkej porque ye “okinyolchika nochteh, iwa okinmili nochipa makitlakitakah n Toteko ika nochi inyolo” (Hech. 11:22-24). Axkan noijki Jehová uelis techpaleuis ma tikinyolchikauakan tokniuan. Sekimej moyolkokoaj porque oixpoliuik ikaj tlen okitlasojtlayaj uan moneki ma tikinyolchikauakan. Xamo noijki Jehová techyolinis ma tikintlajpalotij noso ma tikinnotsakan akinmej mokokoaj noso moyolkokoaj uan ijkon tikinyolchikauaskej. ¿Tikpaleuiskej Jehová ijkon ken okichi Bernabé? (1 Tes. 5:14).

9. ¿Tlen techmachtia Jehová ijkuak okipaleui se tokni tlen itoka Vasily?

⁹ Jehová okipaleui se tokni tlen itoka Vasily kuali ma kinyekana tokniuan. Ijkuak okipiaya 26 xiuitl omochi tlayekanki pero ye okimachiliaya amo uelis kinpaleuiskia tokniuan ijkuak kipiaskiaj ouijkayotl. Pero okipaleuijkej tokniuan tlen yotlayekanayaj miak xiuitl uan noijki okipaleui Tlamachtil itech Tekiuajkayotl. Sapanoa omochijchika kinpaleuis tokniuan. Ma tikitakan tlen okichi. Achto okijkuilo seki tlamantli tlen kichiuaskia. Ayakmo omomojtiaya ijkuak okichijtiaya tlen okijkuilo. Okijto: “Tlen achto onechmomojtiaya axkan kichiua ma niyolpaki. Kuali nimomachilia ijkuak Jehová nechpaleuia ma nikajsi se texto tlen ika nikyolchikauas se tokni”. Tokniuan tlakamej, Jehová namechyekanas xikinpaleuikan tokniuan tla nankichiuaskej ken tokni Vasily.

10. ¿Tlen okichi Abigaíl uan tlen techmachtia?

¹⁰ Tekiua David uan itlakeualuan omonekiaya ma kinpaleuikan ijkuak tekiua Saúl okinekiaya kinmiktis. Ik non, se tonal itlakeualuan David okiluitoj Nabal tlen okipiaya miak tomin, ma kinmaka tlakuali. Okitlajtlanilitoj porque okinmaluiliayaj ichkauan ompa kanin tlauaki. Pero Nabal okatka tsotsokatl uan amitlaj okinmakak. Ik non, David sapanoa okualanki uan okinekiaya kimiktiti Nabal uan nochtin akinmej okatkaj ompa ikalijtik (1 Sam. 25:3-13, 22). Pero Abigaíl tlen okatka isiua Nabal okatka ixtlamatki uan itlaj okichi. Ye okinamikito David, ixpan omotlankuaketski uan okilui amo ma momakopa porque tlamo tlajtlakolchiuaskia. Okilui ma kikauili Jehová ye ma kiyektlali non ouijkayotl. Tlen Abigaíl okilui David okipaleui amitlaj ma kichiua uan okajsikamatki ye Jehová okititlanki (1 Sam. 25:23-28, 32-34). Abigaíl okipiaya kuali iyelis uan non okipaleui ma kichiua tlen Jehová kineki. Jehová noijki uelis kinpaleuis tokniuan siuamej ma kimatikan ken kinyolchikauaskej uan kinmajsikamatiskej akinmej inmiuan chantij uan tokniuan (Prov. 24:3; Tito 2:3-5).

11. ¿Tlen okichijkej ichpokauan Salum uan axkan akinmej ijkon kichiuaj?

¹¹ Opanok miak siglos uan Jehová okinpaleui ichpokauan Salum uan oksekimej ma kiyektlalikan tepamitl tlen okiyaualoaya Jerusalén (Neh. 2:20; 3:12). Salum okatka tekiua pero ichpokauan sapanoa otlapaleuijkej maski okatka oui tekitl (Neh. 4:15-18). Amo okichijkej ken akinmej okatkaj tecoítas. Porque yejuan amo okinekej otlapaleuitoj (Neh. 3:5). Xamo sapanoa oyolpakej ijkuak okitakej ipan cincuenta y dos tonalmej okichijkej non tekitl (Neh. 6:15). Axkan miakej tokniuan siuamej yolpakij ijkuak kinchijchiuaj kalmej kanin timonechikoaj noso ijkuak kinyektlaliaj. Sapanoa tlapaleuiaj porque kimatij kichiuaskej miak tlamantli uan yolpakij kichiuaskej non tekitl.

12. ¿Ken uelis techyolinis Jehová ma tikinpaleuikan tokniuan ijkon ken okichi Tabita?

¹² Jehová noijki okipaleui Tabita, ik non, “nochipa okichiwaya tlan kuali iwa okimpalewiaya akimeh amitla okipiayah”. Okachi okinpaleuiaya siuamej tlen yoixpoliuik innamik (Hech. 9:36). Tabita okatka yolkuali uan okitemakaya tlen okipiaya, ik non, miakej sapanoa okichokilijkej ijkuak oixpoliuik. Pero sapanoa oyolpakej ijkuak tlatitlanil Pedro okiyoliti (Hech. 9:39-41). ¿Tlen techmachtia tlen okichi Tabita? Tinochtin uelis tikinpaleuiskej tokniuan (Heb. 13:16).

13. ¿Ken okipaleui Jehová tokni Ruth uan tlen okijto?

¹³ Se tokni itoka Ruth sapanoa opinauaya pero okinekiaya yetos misionera. Ijkuak okatka tsikitsin san totoka okinxexeloaya amatsitsintin ijkuak otetlapouiaya. Tokni sapanoa okipaktiaya tetlapouis. Pero sapanoa oui okitaya tetlapouiti itech iTekiuajkayo toTajtsin Dios. Maski opinauaya omochi precursora ijkuak okipiaya 18 xiuitl. Itech 1946 oyajki kanin Tlamachtiaj ika Biblia ompa Patterson uan satepan otetlapouito Hawái uan Japón. Jehová okipaleui uan sapanoa miakej okintlapoui. Ruth yotetlapoui kanaj ochenta xiuitl  uan okijto: “Jehová nechyolchikaua uan yonechpaleui ayakmo ma nipinaua. Jehová techpaleuis tla itech titlaneltokaskej”.

14. Ijkon ken kijtoa Efesios 3:16, 17, ¿tlen moneki tikchiuaskej tla tiknekij tikpaleuiskej Jehová?

¹⁴ Jehová tlatlamantli kinpaleuia itekipanojkauan. Pero ¿tejuan ken uelis techpaleuis? Techpaleuis tla tejuan timochijchikauaj tiktekichiuiliskej (xiktlajtolti Efesios 3:16, 17). Tla tikkauiliskej Jehová ma techpaleui ye uelis kichiuas ma tiyolpakikan ijkuak titetlapouiaj, kuali ma titlamachtikan uan ma tikmatikan ken titeyolchikauaskej. Noijki techpaleuia kuali ma tikchiuakan tlen technauatiaj, ma titeajsikamatikan noso ijkuak tikchiuaj okseki tlamantli uan ijkon ma mochiua tlen kineki.

15. Ijkon ken kijtoa 1 Timoteo 4:12, 15, ¿tlen moneki kitlajtlaniliskej telpokamej toTajtsin Dios?

¹⁵ Telpokamej, ¿yiuelis okachi nantlapaleuiskej? Porque moneki ma tlapaleuikan tlakamej uan ma mochiuakan siervos ministeriales. Itech seki tlanechikolmej katej miakej tlayekankej pero amo okachi katej siervos ministeriales. ¿Uelis okachi nantlapaleuiskej itech tlanechikol? Ualeua sekimej tokniuan kijtoaj: “Ne san nikneki nitetlapouis”. Tla ijkon nanmomachiliaj, xikiluikan Jehová ma namechpaleui ximochiuakan siervos ministeriales uan noijki ma namechyolchikaua okachi xiktekichiuilikan (Ecl. 12:1). Tiknekij techpaleuikan (xiktlajtolti 1 Timoteo 4:12, 15).

16. ¿Tlen ma tiktlajtlanilikan Jehová uan tleka?

¹⁶ Jehová techpaleuis ma tikchiuakan tlen ye kineki. Ik non, ma tiktlajtlanilikan ma techpaleui ma tiktekichiuilikan uan ma techyolchikaua. Maski yitikpiaj miak xiuitl noso amo, ma timochijchikauakan ma tiktekichiuilikan Jehová uan ma tikmakakan tlen tikpiaj (Ecl. 9:10). Ma timochijchikauakan ma tiktekichiuilikan uan amo keman ma timokuayejyekokan amo uelis tiktekichiuiliskej. Maski sapanoa tiktekichiuiliaj noso amo, tinochtin uelis tikueyichiuaskej porque san ye kinamiki.