1. ¿Tleka moneki san ye Jehová ma tikueyichiuakan?

SAN Jehová kinamiki ma tikueyichiuakan porque ye otechchijchi uan kichiua ma tiyoltokan (Apoc. 4:11). Tejuan tiktlasojtlaj Jehová uan tiktlakaitaj pero xamo tiknekij tikchiuaskej okseki tlamantli uan amo tikueyichiuaj ken ye kineki. Moneki tikmatiskej tlen tlamantli uelis kichiuas ijkon ma tikchiuakan. Achto ma tikitakan tlen kijtosneki san toTajtsin Dios ma tikueyichiuakan.

2. ¿Tlen moneki tikchiuaskej ijkon ken kijtoa Mateo 4:10?

² Biblia kijtoa tla tiktlasojtlaj Jehová, tikteititiskej san ye tikueyichiuaj. Ik non, moneki san ye okachi ma tiktlasojtlakan uan amo okachi ma tikpatioitakan okseki tlamantli (xiktlajtolti Mateo 4:10).

3. ¿Tleka san ye Jehová tikueyichiuaj?

³ Kuali tikixmatij Jehová, ik non, san ye tikueyichiuaj. Tikmatij sapanoa kualtsin iyelis. Noijki tikmatij tlen kipaktia uan tlen amo uan tejuan noijki ijkon tikchiuaj. Tikajsikamatij ken kineki ma tiyetokan uan tikintlakamatij itlanauatiluan uan ijkon tikteititiaj tikpaleuiaj. Sapanoa tiktlasojkamatiliaj techkauilia iuan ma timouikakan (Sal. 25:14). Okachi timouikaj iuan Jehová ijkuak okachi tikixmatij (Sant. 4:8).

4. (1) ¿Ken kineki techkajkayauas Diablo? (2) ¿Tlen timomachtiskej?

 ⁴ Diablo tlanauatia nikan tlaltikpak uan kineki techkajkayauas ika miak tlamantli. Noijki kineki ma tikchiuakan tlen amo kuali techyoltilana (Efes. 2:1-3; 1 Juan 5:19). Kineki ma tikpatioitakan okseki tlamantli uan amo ma tikueyichiuakan san ye Jehová. Ma tikitakan ome tlamantli ken kichiua. Achto, kineki ma timokuayejyekokan moneki tikpiaskej miak tlamantli. Noijki kineki ma timoyolpaktikan ika tlen amo kuali.

5. ¿Tleka amo ma techpakti tikpiaskej okachi miak tomin?

⁵ Tinochtin tiknekij tikpiaskej tlen tikkuaskej, totlaken uan kanin tichantiskej. Pero ma timomaluikan amo ma techpakti tikpiaskej okachi miak tomin. Axkan miakej ‘satlawel kiwilitah tomi’ uan nochi tlen uelis kimokouiskej (2 Tim. 3:2). Jesús okimatiaya xamo imachtijkauan kinekiskiaj kipiaskej okachi tomin. Ik non, okinmilui: “Amaka tlakatl weletis kintekitilis ome inteko, porke se kitlawelitas iwa non ok se kitlasojtlas, noso se kitlakitas iwa non ok se [amo] kitlakitas. Amaka weletis kimopantis Dios tla satlawel momijmiktia para kitlawelpias tomi” (Mat. 6:24). Yetoskia ken kinpia ome intekouan akinmej kiueyichiuaj toTajtsin Dios uan noijki kitemoaj kipiaskej miak tomin. Amo kiueyichiuaj san ye Jehová.

6. ¿Tlen techmachtia tlen Jesús okinmilui tokniuan tlen ochantiayaj Laodicea?

⁶ Itlamian achto siglo tokniuan tlen ochantiayaj Laodicea okipiayaj miak tomin, miak tlamantli uan amitlaj okinpoloaya. Pero ixpan Jehová uan Jesús  yejuan amitlaj inpati okipiayaj, amo otlachiayaj uan okatkaj xipetstikej. Jesús amo okinyektlali porque okipiayaj tomin. Okinyektlali porque okitemoayaj okachi tomin uan amo kuali omouikayaj iuan Jehová (Apoc. 3:14-17). Tejuan san niman itlaj ma tikchiuakan tla tikitaj tiknekij tikpiaskej okachi miak tomin (1 Tim. 6:7, 8). Tlamo toyolo xelitos uan Jehová amo kiselis ken tikueyichiuaj. Porque ye kijtoa ma tiktlasojtlakan ‘ika nochi toyolo’ (Mar. 12:30). ¿Tlen uelis kichiuas okachi ma tiknekikan tikpiaskej tomin?

7-9. ¿Tlen techmachtia tlen okichi David?

⁷ Ma tikitakan tlen okipanok se tlayekanki itoka David uan chanti Estados Unidos. Ye kijtoa amo san kajauilmati tekipanos. Kanin otekipanoaya, okimakakej se tekitl uan kuali okitlaxtlauiaya. Nin tokni okixmatiayaj uan okijtoayaj ye okachi kuali otekipanoaya itech ialtepe. Tokni okijto: “Ijkuakon onimokuayejyeko Jehová onechteochiuaya, ik non, onikpiaya se kuali tekitl”. Pero ¿melauak Jehová okiteochijtoka?

⁸ David sapanoa otekipanoaya uan ayakmo kuali omouikaya iuan Jehová. Ye okijto: “Nochipa san onimokuayejyekojtoka itech noteki ijkuak onimonechikoaya uan onitetlapouiaya. Oniktlaniaya miak tomin pero san onimotekipachoaya uan ayakmo kuali onimouikaya iuan nosiua”.

⁹ David omonekiaya kitas tlen okachi okipatioitaya. Okijto: “Onimokuayejyeko itlaj nikchiuas”. Ik non, okitak keski horas uelis tekipanoskia uan okilui akin okipaleuiaya.  Pero okiluijkej ayakmo ompa tekipanoskia. ¿Tlen okichi? Okijto: “Oniktemiti amatsintli kanin onikijtoaya oniknekiaya niyetos precursor auxiliar uan mostlatika oniktemakak”. David uan isiua opejki tetlachipauiaj. Satepan David omochi precursor regular uan satepan isiua noijki omochi precursora regular. Yejuan opejki kichiuaj se tekitl tlen miakej amo kinpaktia pero yejuan amo okintekipachoaya. Nochipa kipiaj tlen ika mopanoltiskej maski amo miak kitlanij. Kinekij okachi kitekichiuiliskej Jehová uan yokitakej ye techmaluia tla tiktemoaj achto tiktekichiuiliskej (Mat. 6:31-33).

10. ¿Ken uelis tikmaluiskej toyolo?

¹⁰ Ma tikmaluikan toyolo maski tikpiaj miak tlamantli noso amo. ¿Ken tikchiuaskej? Amo okachi ma tiktemokan miak tlamantli nion sapanoa ma tikpatioitakan toteki. Moneki okachi ma tikpatioitakan tiktekichiuiliskej Jehová. Tla tiknekij tikmatiskej kox ijkon techpanotok, moneki ma timotlajtlanikan: “¿San nimokuayejyekojtok itech noteki ijkuak nimonechikoa noso ijkuak nitetlapouia? ¿Nochipa nechtekipachoa kox tikpiaskej tomin satepan? ¿Nimokualania iuan nonamik porque amo techajxilia tomin noso porque techpoloa seki tlamantli? ¿Nitekipanos kanin amo okachi tetlaxtlauiaj uan ijkon okachi niktekichiuilis Jehová?” (1 Tim. 6:9-12) Ijkuak ijkon timotlajtlaniskej, ma tikilnamiktokan Jehová techtlasojtla uan techiluia: “Ayik nimitskajtewas moselti, nion nimitsilkawas”. Ik non, tlatitlanil Pablo okijto: “Amo xikapisnekikah tomi” (Heb. 13:5, 6).

11. ¿Ken techijtlakos tlen ika timoyolpaktiaj?

¹¹ Jehová kineki kuali ma tiyetokan, ik non, ualeua moneki ma timoyolpaktikan. Biblia kijtoa: “Amo onka okse tlamantli kuali tlen uelis kichiuas tlakatl ken tlakuas uan tlakonis uan moyolpaktis porque chikauak tekiti” (Ecl. 2:24). Axkan onka miak tlamantli tlen ika timoyolpaktiskej pero seki tlamantli teijtlakoa, amo techpaleuia ma tikchiuakan tlen kuali uan miakej kichiuaj tlen iTlajtol toTajtsin Dios kijtoa amo kuali.

12. Ijkon ken kijtoa 1 Corintios 10:21, 22, ¿tleka moneki kuali tikpejpenaskej tlen ika timoyolpaktiskej?

 ¹² Tejuan tiknekij tikueyichiuaskej san ye Jehová, ik non, amo uelis ‘titlakuaskeh itech imesa n Toteko’ Jehová uan ‘inmesa n demóniojteh’ (xiktlajtolti 1 Corintios 10:21, 22). Ijkuak ikaj iuan titlakuaj kijtosneki kuali iuan timouikaj. Noijki ijkon yetoskia titlakuaj inmiuan akinmej kikokoliaj Jehová. Noijki tikkuaj tlen kiyektlaliaj tla timoyolpaktiaj ika kanin mota moteuiaj. Noijki tla timoyolpaktiaj ika naualotl, tla tikitaj kanin auilnemij uan okseki tlamantli tlen amo kuali. Timotlajyouiltiskej tla ijkon tikchiuaskej uan ayakmo timouikaskej iuan Jehová.

13, 14. Ijkon ken kijtoa Santiago 1:14, 15, ¿tleka amo ma timoyolpaktikan ika tlen amo kuali?

¹³ ¿Tleka tikijtoaj tlen ika timoyolpaktiaj yetoskia ken ijkuak titlakuaj? Ijkuak titlakuaj, kuali tikitaj tlen tikkuajtokej. Pero ijkuak yotiktolojkej, totlalnakayo peua tekipanoa uan kimokauia tlen kipaleuis. Timokokoskej tla amo tikkuaskej tlen techpaleuis ma tichikajtokan. Amo san niman tikitaskej kox techkokos tlen tikkuaj.

¹⁴ Noijki ijkon kuali ma tikpejpenakan tlen ika timoyolpaktiskej uan ijkon tikitaskej tlen tikkalakiaj itech tokuayejyekol. Porque satepan peua tekiti tokuayejyekol uan kimokauia tlen otikitakej uan tlen tikmachiliaj. Techpaleuia ijkuak timoyolpaktiaj ika tlen kuali pero techijtlakoa ijkuak timoyolpaktiaj ika tlen amo kuali (xiktlajtolti Santiago 1:14, 15). Amo san niman motas techijtlakos tlen ika timoyolpaktiaj. Ik non, Biblia techiluia: “Amo ximokajkayawakah: amaka weletis kikajkayawas Dios. Nochteh kipixkah tlan kitookah. Tla se tlakatl kichiwa san tlan kineki ikuerpo, san ye inewia kimotemolia imikilis” (Gál. 6:7, 8). Miak ipati ma tikixtopeuakan nochi tlen Jehová kitlajyaltia (Sal. 97:10).

15. ¿Tlen techmaka Jehová?

¹⁵ Miakej tokniuan kinpaktia kitaskej JW Broadcasting^® tlen kajki itech Internet. Se tokni itoka Marilyn, okijto: “JW Broadcasting sapanoa nechpaleuia ma niyolpaki uan nikmati tlen ika nimoyolpaktis. Ijkuak nimoyolkokoa noso noselti nimomachilia, nochipa niktemoa se tlapoualistli noso tlen kualkan timomachtiaj itech Biblia uan non sapanoa nechyolchikaua. Non nechpaleuia ma nimouika iuan Jehová uan noijki ma nikixmati ialtepe. JW Broadcasting yonechpatili nonemilis”. ¿Timoyolchikauaj ika nochi tlen onka itech JW Broadcasting? Ma tikitakan tlen kisa sejse metstli. Noijki ma tikinmitakan videos uan tlakuikalmej tlen techyolchikauaj.

16, 17. ¿Tleka moneki tikitaskej kox timotonalpoloaj ijkuak timoyolpaktiaj uan ken tikchiuaskej?

¹⁶ Amo san moneki kuali tikpejpenaskej tlen ika timoyolpaktiskej. Noijki moneki tikitaskej kox timotonalpoloaj ijkuak timoyolpaktiaj. Tlamo ayakmo okachi tiktekichiuiliskej Jehová. Miakej amo kimatij ken kichiuaskej. Ma tikitakan tlen okipanok se tokni itoka Abigail tlen kipia 18 xiuitl. Okijto: “Nechpaktia nikitas televisión ijkuak tlami nitekipanoa. Pero tla amo niktlalia keski horas nikitas, uejkika ompa nitlachixtos”. Noijki se telpochtli itoka Samuel okijto: “Ualeua nikinmita miakej videos itech Internet. Peua nikita se pero satepan nikita yikanaj eyi noso naui hora ompa nitlachixtok”.

 ¹⁷ ¿Ken uelis tikitaskej kox timotonalpoloaj ijkuak timoyolpaktiaj? Achto ma tikijkuilokan keski horas tikitaj televisión, keski horas titlatemojtinemij itech Internet uan keski horas timauiltiaj itech tocelular. Tla tikitaj okachi miak horas timoyolpaktiaj, moneki ma tikijkuilokan tlen achto tikchiuaskej. Achto ma tikijkuilokan tlen okachi moneki uan satepan ma tikijkuilokan keski horas timoyolpaktiskej. Satepan ma tikiluikan Jehová ma techpaleui ma tikchiuakan tlen yotikijtojkej tikchiuaskej. Ijkon timajxiliskej timomachtiskej, tikueyichiuaskej Jehová iuan akinmej tichantij, timonechikoskej, titetlapouitiuij uan tikinpaleuiskej oksekimej ma mochiuakan imachtijkauan Jesús. Noijki amo timokuatlamiskej ijkuak timoyolpaktiskej porque tikmatij achto tiktekichiuiliaj Jehová.

18, 19. ¿Ken tikteititiskej san ye Jehová tikueyichiuaj?

¹⁸ Ijkuak Pedro okijkuilo ken kipojpoloskej nochi tlen kiyekana Satanás uan okijto ken yetos satepan tlaltikpak, okijto: “Notlasojikniwah, ijkuak nonmochiah nochi ni matlamochiwa, xikchiwakah nochi tlan kuali para Dios manomechajsiki ika yolsewílistli iwa non yolchipawakeh” (2 Ped. 3:14). Tikteititiaj san ye Jehová tikueyichiuaj ijkuak tikchiuaj tlen okijto Pedro uan timochijchikauaj tikpiaskej chipauak tonemilis uan tikueyichiuaskej Jehová ken ye kineki.

¹⁹ Satanás uan nochtin akinmej kinyekana amo kinekij ma tikchiuakan tlen okachi tikpatioitaj (Luc. 4:13). Pero san ye Jehová moneki okachi ma tiktlasojtlakan maski tikixnamikiskej ouijkayotl. Yotikijtojkej san ye Jehová tikueyichiuaskej porque san ye kinamiki.