1. ¿Ken techititia 2 Corintios 3:1-3 se tlateochiualistli ijkuak ikaj tikmachtiaj uan moapolaktia? (Xikita ixko revista).

¿KEN timomachiliaj ijkuak ikaj itech tlanechikol moapolaktia? ¡Sapanoua tiyolpakij! (Mat. 28:19). ¡Uan tla tejuan otikmachtijkej, okachi tiyolpakij! (1 Tes. 2:19, 20). Akinmej yikin moapolaktiaj katej ken ‘se amatlajkuíloli kan tlajtoa kuali de tejwah’ uan noijki nochtin tokniuan tlen inmiuan timonechikouaj (xiktlajtolti 2 Corintios 3:1-3).

2. (1) ¿Tlen moneki timotlajtlaniskej uan tleka? (2) ¿Ken titlamachtiaj? (Xikita nota).

² Tiyolpakij porque naui xiuitl tlen yopanok itech nochi tlaltikpak tokniuan okinmachtijkej * diez millones sejse metstli. Uan noijki sejse xiuitl omoapolaktijkej kanaj doscientos ochenta mil. Non kiteititia ok miakej poliuij moapolaktiskej. ¿Ken uelis tikinpaleuiskej? Jehová kimati mochias, ik non, ok kinkauilijtok ma momachtikan uan ma kichiuakan ken Cristo. Yitlamis tlen amo kuali, ik non, ma tikinpaleuikan ma moapolaktikan (1 Cor. 7:29a; 1 Ped. 4:7).

3. ¿Tlen timomachtiskej?

³ Akinmej pouij itech Cuerpo Gobernante okintlajtlanijkej  akinmej tlapaleuiaj itech kalmej Betel tlen moneki kichiuaskej para kinpaleuiskej ma moapolaktikan akinmej momachtijtokej. Itech nin tlamachtil uan okse tikitaskej ken uelis tikchiuaskej ken tlayekankej itech circuito, misioneros uan precursores (Prov. 11:14; 15:22). * Tlen yejuan okijtojkej kiteititia tlen moneki tikchiuaskej akinmej titlamachtiaj uan akinmej tikinmachtiaj. Itech nin tlamachtil tikitaskej makuili tlamantli tlen moneki kichiuas akin kineki moapolaktis uan ken uelis kipaleuis akin kimachtia.

4. ¿Tlen moneki tikilnamiktoskej?

⁴ Miakej tokniuan san kaltempa tlamachtiaj. Maski miakej kinpaktia ijkon momachtiskej Biblia, xamo amo momachtiaj sejse semana uan san tepitsin momachtiaj. Para okachi kinekiskej momachtiskej, xamo tokniuan kintlajtlaniliaj innúmero uan kintitlaniliaj seki textos. * Ijkon uelis kichiuaskej miak metstli pero akin momachtia amitlaj kichiuas. Moneki tikilnamiktoskej tla amo momachtia ken moneki, xamo amo motemakas ixpan Jehová nion moapolaktis.

5. Ijkon ken okijto Jesús itech Lucas 14:27-33, ¿tlen uelis tikinmiluiskej akinmej tikinmachtiaj?

⁵ Jesús okijto ome neskayomej tlen okiteititi tlen moneki kichiuas akin kineki kichiuas ken ye. Otlajto itech se tlakatl tlen kichijchiuaskia se torre uan se tekiua tlen moteuiskia iuan okse altepetl. Okijto akin kineki kichiuas se torre omonekiaya achto ‘kiyejyekolis kox kajxilis itomi para weletis kitlamis’ uan tekiua omonekiaya mokuayejyekos tla isoldados uelis tlatlaniskiaj (xiktlajtolti Lucas 14:27-33). Jesús okimatiaya akin okinekiaya kichiuas ken ye, achto omonekiaya mokuayejyekos nochi tlen omonekiaya kichiuas. Noijki ijkon akin tikmachtiaj para kichiuas ken Jesús, ma tikyoleuakan sejse semana ma momachti.

6. ¿Tlen uelis tikchiuaskej para ma kitekichiuili Jehová akin tikmachtiaj?

 ⁶ Achto, moneki okachi ma tiuejkauakan ijkuak ikaj tikmachtiaj ikaltempa. Amo san se versículo ma tikmachtikan. Ijkuak yomomatki okachi tikmachtiaj, ma tiktlajtlanikan kox kanaj uelis timotlaliskej uan ompa timomachtiskej. Ika tlen kichiuas kiteititis kox melauak kipatioita momachtis tlen Biblia kijtoua. Uan satepan uelis tiktlajtlaniskej kox kineki momachtis uijuiptlatika porque non kipaleuis ma kitekichiuili Jehová. Ma tikitakan tlen okseki uelis kichiuas akin tikmachtiaj.

7. ¿Ken moneki timoyektlaliskej akinmej titlamachtiaj?

⁷ Akinmej titlamachtiaj, moneki kuali timoyektlaliskej ijkuak titlamachtitiuij. Achto moneki tiktlajtoltiskej tlen titlamachtiskej uan noijki textos. Ma tiktemokan tlen okachi ipati. Ma timokuayejyekokan tlen itoka tlamachtil, tlen kijtouaj subtítulos, tlajtlanilmej, textos tlen kijtouaj “xiktlajtolti” uan fotos. Noijki ma tiktemokan se video tlen kipaleuis ma kajsikamati tlen tikmachtiskej. Ma timokuayejyekokan tlen kipanotok uan ken tikchiuaskej para kuali ma kajsikamati tlen tikmachtiaj uan ijkon uelis kichiuas tlen momachtijtok (Neh. 8:8; Prov. 15:28a).

8. ¿Tlen moneki tikchiuaskej ijkon ken okijto Pablo itech Colosenses 1:9 uan 10?

⁸ Ijkuak timoyektlaliaj noijki ma tikiluikan Jehová tlen kipanotok akin tikmachtiaj uan ma kipaleui. Ma tikiluikan ma techpaleui kuali ma tikintekitiltikan textos para ma ajsi itech iyolo akin tikmachtiaj (xiktlajtolti Colosenses 1:9, 10). Ma timokuayejyekokan kox itlaj amo kajsikamatis noso amo kinekis kiselis tlen tikmachtiskej. Ma tikilnamiktokan moneki tikpaleuiskej ma moapolakti.

9. ¿Ken uelis tikpaleuiskej ma moyektlali akin tikmachtiaj?

⁹ Akin tikmachtiaj tiknekij ma kipatioita  tlen Jehová uan Jesús yokichijkej uan okachi ma momachti (Mat. 5:3, 6). Akin tikmachtiaj moneki kuali kikakis tlen tikititiaj. Ik non, moneki tikiluiskej ma moyektlali ijkuak ayamo tikmachtitiuij uan ma mokuayejyeko ken kichiuas tlen tikmachtiaj. Uelis tikmachtiskej ken moyektlalis. * Ma tikititikan ken uelis kimatis tlen tlanankilis uan ma kitlapalui tlen moneki. Satepan ma tikiluikan ijkuak tlanankilis ma kijto tlen kajsikamati. Ijkon tikmatiskej tla kuali okajsikamatki. Ma tikitakan tlen okseki moneki kichiuas akin tikmachtiaj.

10. ¿Tleka akin tikmachtiaj moneki mojmostla kitlajtoltis Biblia uan tlen moneki kichiuas para kipaktis?

¹⁰ Amo san moneki tikmachtiskej sejse semanas, ye noijki moneki itlaj kichiuas. Moneki motlapouis uan kikakis Jehová. Kikakis tla mojmostla kitlajtoltia Biblia (Jos. 1:8; Sal. 1:1-3). Ma tikititikan amatl tlen kajki itech jw.org kanin kijtoua keski capítulos uelis kitlajtoltis sejse semana uan ma tikiluikan uelis kikixtis se copia. * Ijkuak kitlajtoltis Biblia, ma tikiluikan ma mokuayejyeko tlen kimachtia itech Jehová uan ken uelis kichiuas tlen momachtijtok (Hech. 17:11; Sant. 1:25).

11. (1) ¿Ken uelis tikititiskej ma motlatlaujti akin tikmachtiaj? (2) ¿Tleka moneki motlatlaujtis nochipa?

¹¹ Akin tikmachtiaj ma tikiluikan mojmostla ma motlatlaujti. Ijkuak peuas uan ijkuak tlamis tikmachtiskej ma tiktlatlaujtikan Jehová ika nochi toyolo uan ma tikijtokan itoka akin tikmachtiaj. Ijkon kimatis ken kitlatlaujtis Jehová ika nochi iyolo uan kijtos itoka Jesús (Mat. 6:9; Juan 15:16). Okachi kixmatis Jehová ijkuak mojmostla kitlajtoltis Biblia uan kitlatlaujtis (Sant. 4:8). Non kipaleuis ma motemaka ixpan Jehová uan ma moapolakti.

12. ¿Ken uelis tikpaleuiskej akin tikmachtiaj ma mouika iuan Jehová?

¹² Akin tikmachtiaj moneki ajsis itech iyolo tlen momachtia uan amo san kilnamiktos. Porque tla ajsis itech iyolo, kinekis kichiuas tlen momachtijtok. Jesús kuali okiyekijto tlen otlamachti, ik non, kuali okajsikamatkej akinmej okikakiayaj. Pero miakej okinpaktiaya kikakiskej porque oajsiaya itech inyolo tlen okinmachtiaya (Luc. 24:15, 27, 32). Akin momachtia moneki kineltokas melauak kajki Jehová, uelis iuan motlapouis ken iTajsin, iDios uan moneki kimatos uelis iuan mouikas (Sal. 25:4, 5). Ma tikmachtikan Jehová yolkuali. Ma tikititikan ma kitlasojkamatili porque ye techtlasojtla, yolkuali uan techiknomati (Éx. 34:5, 6; 1 Ped. 5:6, 7). Jesús okijto “tlanawátili non okachi tlayakantok iwa okachi weyi kijtosneki” ye: “Xiktlasojtla Moteko Dios [Jehová]” (Mat. 22:37, 38). Ma tikpaleuikan akin tikmachtiaj ma kitlasojtla Jehová ika nochi iyolo.

13. Xikijto ken uelis tikiluiskej akin tikmachtiaj ken iyelis Jehová.

¹³ Ijkuak timotlapouiaj iuan akin tikmachtiaj ma tikiluikan tleka tiktlasojtlaj Jehová. Ijkon xamo kinekis iuan mouikas uan kitlasojtlas (Sal. 73:28). Ma tikijtokan tikmachtijtokej se amochtli noso se texto kanin kiteititia Jehová techtlasojtlaj, kiteititia ixtlamatki, nochi kichiua ika melajkayotl uan chikauak uan non ajsi itech toyolo. Uelis tikiluiskej non kichiua okachi ma tiktlasojtlakan Jehová. Axkan ma tikitakan tlen okseki moneki kichiuas para ma moapolakti.

14. Ijkon ken kijtoua Hebreos 10:24, 25, ¿tlen kipaleuis akin tikmachtiaj ma kitekichiuili Jehová?

¹⁴ Tiknekij ma moapolaktikan nochtin akinmej tikinmachtiaj. Kinpaleuis tla tikinyoleuaj noijki ma monechikokan. Sekimej tokniuan kijtouaj akinmej peuaj monechikouaj san niman peuaj kitekichiuiliaj Jehová (Sal. 111:1). Sekimej tokniuan kijtouaj kinyekiluiaj akinmej kinmachtiaj okachi momachtiskej tlen kijtoua Biblia tla  monechikoskej. Akin tikmachtiaj ma tiktlajtoltilikan Hebreos 10:24, 25 uan ma tikyekiluikan ken kipaleuis tla monechikos (xiktlajtolti). Noijki uelis tikititiskej video ¿Ken tikchiuaj tonechikoluan? * Ma tikpaleuikan nochipa touan ma monechiko.

15. ¿Tlen uelis tikchiuaskej para touan ma monechiko akin tikmachtiaj?

¹⁵ ¿Ken uelis tikchiuaskej tla akin tikmachtiaj ayamo touan monechikouaj noso san ualeua yaui? Ma tikiluikan otechpakti itlaj tlen otimomachtijkej ijkuak otimonechikojkej. Non okachi kipaleuis iuan amo ijkuak san tikiluiskej touan ma monechikoti. Ma tikmakakan revista Akin Tetlapouijtok uan Toteki akinmej tikchiuaj ken Cristo. Ma tikiluikan tlen timomachtiskej ijkuak timonechikoskej non semana uan ma tiktlajtlanikan tlen okachi kipaktiskia kimatis. Ijkuak yikin monechikos kipaktis porque tlen kikakis uan tlen kitas amo ijkon kichiuaj itech okse religión (1 Cor. 14:24, 25). Kinmixmatis tokniuan tlen kiyolchikauaskej uan kipaleuiskej ma moapolakti.

16. (1) ¿Ken uelis tikpaleuiskej akin tikmachtiaj ma moapolakti? (2) ¿Tlen timomachtiskej itech okse tlamachtil?

¹⁶ ¿Ken uelis tikpaleuiskej akin tikmachtiaj ma moapolakti? Ma tikititikan miak ipati sejse semana ma momachti uan ma moyektlali achto tikmachtitiuij. Ma tikititikan mojmostla ma kitlatlaujti Jehová uan iuan ma mouika. Ma tikyoleuakan touan ma monechiko. (Xikita recuadro “ ¿Tlen moneki kichiuas akin tikmachtiaj?”). Itech okse tlamachtil tikitaskej makuili tlamantli tlen moneki tikchiuaskej para ma moapolakti akin tikmachtiaj.