1. ¿Tleka uelis momakixtiskej akinmej tikinpaleuiaj ma kichiuakan ken Cristo?

TIKINMACHTISKEJ oksekimej ma kichiuakan ken Cristo kinpaleuis ma momakixtikan. Ijkon tikijtouaj porque Jesús okijto itech Mateo 28:19, 20, TNM: “Xiakan xikinchiuakan nomachtijkauan” uan “xikinapolaktikan”. Ik non, moneki moapolaktiskej akinmej tikinmachtiaj porque ijkon uelis momakixtiskej. Akin kineki moapolaktis momakixtis tla kineltoka Jesús topatka omotemakak uan Jehová okiyoliti. Ik non, tlatitlanil Pedro okinmilui akinmej okichiuayaj ken Cristo: “Apolaktilistli [...] axkan noijki namechmakixtia [...] ika iyolitilis Jesucristo” (1 Ped. 3:21, TNM). Ik non, ijkuak ikaj moapolaktia uelis kineltokas nochipa yolitos.

2. ¿Tlen moneki ma tikchiuakan ijkon ken kijtoua 2 Timoteo 4:1 uan 2?

² Moneki kuali titlamachtiskej tla tiknekij tikinpaleuiskej oksekimej ma kichiuakan ken Cristo (xiktlajtolti 2 Timoteo 4:1, 2). ¿Tleka moneki ijkon tikchiuaskej? Porque Jesús otechnauati: “Xiakan xikinchiuakan nomachtijkauan”. Noijki okijto: “Xikinmachtikan”. Tlatitlanil Pablo okilui Timoteo ma mochijchikaua uan okilui: “Tla ijkó tikchiwas, amo san te timomakixtis, yej noiwa momakixtiskeh akimeh mitskakiskeh”. Ik non, okilui: “Ximotlachili te monewia iwa kuali xikita tlan tiktemachtia” (1 Tim. 4:16). Moneki timochijchikauaskej kuali titlamachtiskej porque ijkon uelis tikinpaleuiskej oksekimej ma kichiuakan ken Cristo.

3. ¿Tlen timomachtiskej?

 ³ Sapanoua miakej tikinmachtiaj sejse semana. Pero ken yotikitakej itech okse tlamachtil moneki tikinpaleuiskej oksekimej ma mouikakan iuan Jehová uan ma moapolaktikan. Itech nin tlamachtil timomachtiskej makuili tlamantli tlen techititis ken tikinpaleuiskej para ma moapolaktikan.

4. ¿Tleka amo ma tikijtokan miak tlamantli ijkuak titlamachtiaj? (Noijki xikita nota).

⁴ Tinochtin techpaktia titlamachtiskej tlen kijtoua iTlajtol toTajtsin Dios. Ik non, xamo techpaktia tikijtoskej miak tlamantli. Pero akin kiyekana tlamachtil ika revista Akin Tetlapouijtok, Tlamachtil ika Biblia itech tlanechikol noso ikaj kimachtia, amo ma kijto miak tlamantli. Tinochtin ma titlamachtikan san tlen kijtoua Biblia. Ijkuak tikyekijtouaj se texto, amo ma tikijtokan nochi tlen tikmatij (Juan 16:12). * Ma tikilnamiktokan ijkuak opejki timomachtiaj amo otikajsikamatiayaj miak tlamantli (Heb. 6:1). Yolik otimomachtijkej nochi tlen axkan tikmatij, ik non, yolik ma tikititikan akin tikmachtiaj.

5. (1) ¿Tlen tiknekij ma kajsikamati akin tikmachtiaj ijkon ken kijtoua 1 Tesalonicenses 2:13? (2) ¿Tlen uelis tiktlajtlaniskej?

⁵ Akin tikmachtijtokej moneki ma kajsikamati tlen momachtijtok uits itech iTlajtol toTajtsin Dios (xiktlajtolti 1 Tesalonicenses 2:13). Ik non, moneki kijtos tlen kajsikamati. Amo nochipa ma tikyekiluikan tlen kijtouaj textos, noijki ma tiktlajtlanikan ma kijto tlen kajsikamati. Ma tikpaleuikan ma kita ken uelis kichiuas tlen momachtijtok. Ijkuak tikintlajtoltiskej versículos ma tiktlajtlanikan tlen kimachtiaj uan tlen mokuayejyekoua (Luc. 10:25-28). Ma tiktlajtlanikan: “¿Tlen techmachtia ken iyelis Jehová tlen otiktlajtoltijkej?”, “¿Ken uelis mitspaleuis tlen otiktlajtoltijkej?”, “¿Ken tikita tlen otimomachti?” (Prov. 20:5). Okachi kuali ma kipatioita tlen momachtia uan ma kichiua uan amo san ma momachti uan ma kimati miak tlamantli.

6. ¿Tleka techpaleuis ma tikinmiluikan tokniuan tlen okachi kuali tlamachtiaj, touan ma tlamachtitij?

⁶ ¿Tikinmiluiaj tokniuan tlen okachi  kuali tlamachtiaj, touan ma tlamachtitij? Ijkuak touan yotlamachtitoj, ma tikintlajtlanikan kox kuali otitlamachtijkej uan kox otiktekitiltijkej Biblia. Tla tiknekij kuali titlamachtiskej, moneki tiyetoskej tiyolyamankej (noijki xikita Hechos 18:24-26). Noijki uelis tikintlajtlaniskej ken okitakej akin tikmachtiaj, kox okajsikamatki tlen momachtijtok. Tla kanaj tiaskej, ma tikiluikan se tokni ma kimachtiti. Ijkon nochipa momachtis uan kitas miak ipati ijkon ma kichiua. Amo ma tikijtokan san tejuan uelis tikmachtiskej. San tiknekij ma kajsikamati tlen kijtoua Biblia uan ma kitekichiuili Jehová.

7. ¿Tlen uelis tikiluiskej akin tikmachtiaj para kipaktis tlen kijtoua Biblia?

⁷ Akin tikmachtiaj moneki kitas techpaktia uan tikneltokaj tlen kijtoua Biblia (1 Tes. 1:5, TNM). Ijkon okachi kipaktis tlen tikmachtijtokej. Uelis tikiluiskej ken yotechpaleuijkej principios bíblicos. Ijkon kitas ye noijki kipaleuis tla kichiuas tlen kijtoua Biblia.

8. ¿Tlen okseki uelis tikchiuaskej para tikpaleuiskej akin tikmachtiaj uan tleka?

⁸ Ijkuak ikaj tikmachtiaj, ma tikiluikan tlen okinpaleui oksekimej tokniuan tlen noijki okipixkej ouijkayotl. Uelis tikiluiskej se tokni tlen touan monechikouaj touan ma tlamachtitij, xamo ijkon akin tikmachtiaj kimatis tlen okipanok tokni uan uelis kichiuas ken ye. Noijki uelis tikititis “Biblia okinpatili innemilis” itech jw.org/ncx. * Tlamachtilmej uan videos tlen ompa katej kipaleuiskej ma kajsikamatij miak ipati ma kichiua tlen kijtouaj principios bíblicos.

9. ¿Tlen uelis tiktlajtlaniskej akin tikmachtiaj para ma kintlapoui ifamiliares uan akinmej iuan mouika?

⁹ Tla akin tikmachtiaj kipia inamik, noijki ma tikyoleuakan ma momachti. Noijki ma tikyoleuakan ma kintlapoui tlen momachtijtok infamiliares uan akinmej inmiuan mouika (Juan 1:40-45). Uelis tikiluiskej: “¿Ken tikyekiluiskia se familiar tlen axkan otimomachti?”, noso “¿tlen texto tiktekitiltiskia para tikyekiluis tlen yotimomachti akin  iuan timouika?”. Ijkon tikpaleuiskej ye noijki ma tlamachti uan ijkuak kichiuas tlen moneki, uelis tetlapouis iuan tokniuan itech tlanechikol. Ma tiktlajtlanikan kox kixmati ikaj tlen kineki momachtis Biblia. Tla techiluis kema, san niman iuan ma timotlapouikan uan ma tikiluikan kox kipaktiskia momachtis Biblia. Noijki ma tikititikan video ¿Ken tikchiuaj se tlamachtil ika Biblia? *

10. ¿Ken uelis tikchiuaskej ken Pablo ijkon ken kijtoua 1 Tesalonicenses 2:7 uan 8?

¹⁰ Moneki tikpaleuiskej akin tikmachtiaj. Ma timokuayejyekokan ye noijki yetos tokni (xiktlajtolti 1 Tesalonicenses 2:7, 8). Ualeua oui kitas ayakmo mouikas iuan akinmej amo iTlaixpantijkauan Jehová uan kichiuas nochi tlen moneki para uelis kitekichiuilis. Ik non, ma tikpaleuikan ma mouika iuan tokniuan tlen kiyolchikauaskej. Noijki tikteititiskej tiknekij iuan timouikaskej tla okseki tonal iuan timotlapouiaj uan amo san ijkuak tikmachtiaj. Ma tiknotsakan, ma tiktitlanilikan se texto noso ma tiktlajpalotij.

11. ¿Tlen tiknekij ma kichiua akin tikmachtiaj uan tleka?

¹¹ Akinmej chantij África kijtouaj: “Nochtin akinmej chantij itech se altepetl kipaleuiaj se chokotsin kuali ma moskalti”. Noijki ijkon uelis tikijtoskej: “Nochtin tokniuan itech se tlanechikol, kipaleuiaj akin momachtia ma kichiua ken Cristo”. Ik non, moneki tikpaleuiskej akin tikmachtiaj ma kinmixmati tokniuan tlen kiyolchikauaskej. Tokniuan kipaleuiskej ma kitekichiuili Jehová uan kiyolseuiskej ijkuak tlajyouis. Tla tikpaleuiaj ma mouika iuan tokniuan, ayakmo oui kitas ayakmo mouikas iuan akinmej amo kipaleuiaj ma kitekichiuili Jehová (Prov. 13:20). Tla yejuan kiluiskej amo kinekij ma kinnotsa, kilnamiktos uelis kinmajsis akinmej inmiuan mouikas itech ialtepe Jehová (Mar. 10:29, 30; 1 Ped. 4:4).

12. ¿Tleka moneki tikiluiskej akin tikmachtiaj uelis motemakas ixpan Jehová uan moapolaktis?

¹² Amo ma tipinauakan tikiluiskej akin tikmachtiaj uelis motemakas  ixpan Jehová uan moapolaktis. Titlamachtiaj porque tiknekij miakej ma moapolaktikan uan ma kitekichiuilikan Jehová. Tla akin tikmachtiaj yikipia seki metstli momachtijtok uan touan monechikoua, ma tikpaleuikan ma kajsikamati tikmachtiaj porque tiknekij ma mochiua iTlaixpantijka Jehová.

13. ¿Tlen moneki kichiuas akin momachtia?

¹³ Akin momachtia uan kineki moapolaktis moneki kichiuas seki tlamantli. Achto, ma kixmati Jehová, ma kitlasojtla uan itech ma tlaneltoka (Juan 3:16; 17:3). Satepan okachi kuali ma mouika iuan Jehová uan noijki iuan tokniuan (Heb. 10:24, 25; Sant. 4:8). Noijki ayakmo ma kichiua tlen amo kuali okichiuaya uan ma moyolkopa (Hech. 3:19). Ma kintlapoui oksekimej tlen momachtijtok (2 Cor. 4:13). Saiktlami, ma motemaka ixpan Jehová uan ma moapolakti uan ijkon kiteititis kitekichiuilis Jehová (1 Ped. 3:21, TNM; 4:2). Tinochtin tiyolpakij ijkuak ikaj moapolaktia. Ijkuak mochijchikauas kitekichiuilis Jehová, ma tikyolchikauakan uan ma tikiluikan nochipa ijkon ma mochijchikaua.

14. ¿Ken uelis tikmatiskej tla akin tikmachtiaj kineki kitekichiuilis Jehová?

¹⁴ Moneki tikmatiskej timochiaskej ijkuak ikaj tikpaleuiaj ma motemaka ixpan Jehová uan ma moapolakti. Pero moneki tikitaskej kox kineki kitekichiuilis Jehová. Ma timotlajtlanikan: “¿Mochijchikaua kitlakamatis tlen otlanauati Jesús? ¿San momachtia porque kipaktia tlen kijtoua Biblia?”.

15. ¿Ken kiteititia ikaj kineki kitekichiuilis Jehová?

¹⁵ Ma tikitiakan kox mochijchikajtok. ¿Kijtoua kitlasojtla Jehová uan kitlatlaujtia? (Sal. 116:1, 2). ¿Kipaktia kitlajtoltis Biblia? (Sal. 119:97). ¿Nochipa monechikoua? (Heb. 2:12). ¿Kichiua tlen momachtijtok? (Sal. 119:112). ¿Kintlapouia ifamiliares uan akinmej inmiuan mouika? (Sal. 9:1). ¿Kineki mochiuas iTlaixpantijka Jehová? (Sal. 40:8). Tla amitlaj kichijtok, ma tikitakan ken uelis tikmatiskej tleka amo mochijchikaua uan satepan kuali iuan ma timotlapouikan. *

16. ¿Keman uelis tikijtoskej ikaj ayakmo tikmachtiskej?

 ¹⁶ Ijkuak moneki tikitaskej tla ikaj ok tikmachtiskej, ma timotlajtlanikan: “¿Achto ye momachtia? ¿Mochijchikaua touan monechikos? ¿Ayakmo kichiua tlen amo kuali okichiuaya? ¿Yokika tlen poui itech religión tlen tlakajkayaua?”. Tla amo mochijchikaua kichiuas tlen moneki, yetoskia ken ikaj tikmachtijtokej ma ajkui pero amo kineki siauas. Noijki ijkon ayakmo ma tikmachtikan akin amo kineki mochijchikauas kipatlas inemilis.

17. ¿Tlen moneki tikchiuaskej akinmej titlamachtiaj ijkon ken kijtoua 1 Timoteo 4:16?

¹⁷ Moneki tikilnamiktoskej miak ipati tikinpaleuiskej oksekimej ma kichiuakan ken Cristo. Tiknekij tikinpaleuiskej ma moapolaktikan. Ik non, ma titlamachtikan tlen kijtoua Biblia ika pakilistli uan ma mota tejuan noijki tikneltokaj tlen titlamachtiaj. Ma tikpaleuikan akin tikmachtiaj ma mouika iuan tokniuan, ma tikiluikan uelis motemakas ixpan Jehová uan moapolaktis. Noijki ma tikitakan kox mochijchikajtok kichiuas tlen moneki (xikita recuadro “ ¿Tlen moneki tikchiuaskej akinmej titlamachtiaj?”). ¡Tiyolpakij tikinpaleuiskej oksekimej ma kitekichiuilikan Jehová! Ik non, ma tikinpaleuikan akinmej tikinmachtiaj ma moapolaktikan.