1, 2. Xikyekijto ken uelis timomachtiskej Biblia.

 XIMOKUAYEJYEKO tikneki tikkouas se kali. ¿Tlen moneki tikmatis achto? ¿San moneki tikitas se foto? Xamo tiknekis achto tikitati non kali. Tikinmitati cuartos tlen kinpia uan tikitas nochi tlen kipia. Xamo noijki tiknekis mamitsiluikan ken okichijkej. Te mitspaktiskia tikitas ken chijchitok nochi non kali.

² Noijki moneki ijkon tikchiuaskej ijkuak timomachtiaj iTlajtol toTajtsin Dios. Se amochtli kijtoua iTlajtol toTajtsin Dios yetoskia “ken se kali sapanoua ueyi uan kuali motlakxilijtok”. Pero tejuan ¿ken tikmatiskej tlen kijtoua Biblia? Tla amo timokuayejyekouaj ijkuak tiktlajtoltiaj Biblia, tikmatiskej san tlen amo oui ‘tlen achto otechmachtijkej itech iTlajtol toTajtsin Dios’ (Heb. 5:12). Ijkuak timomachtiskej Biblia matikchiuakan ijkon ken ijkuak tiknekij tikkouaskej se kali. Matikitakan ken mouika nochi tlen kijtoua Biblia. Amo moneki san tikmatiskej tlen tikneltokaj, moneki tikitaskej tleka titlaneltokaj.

3. ¿Tlen okinmilui Pablo makichiuakan tokniuan uan tleka? (Efesios 3:​14-19).

³ Moneki kuali timomachtiskej tlen okachi oui tla tiknekij  tikajsikamatiskej iTlajtol toTajtsin Dios. Apóstol Pablo okinmilui tokniuan mamochijchikauakan mamomachtikan iTlajtol toTajtsin Dios uan ijkon ‘kajsikamatiskiaj tlen patlauak, ueyak, uejkapan uan tlen uejkatlan’. Non kinpaleuiskia okachi matlaneltokakan (xiktlajtolti Efesios 3:​14-19). Tejuan noijki moneki ijkon tikchiuaskej. Matikitakan ken uelis okachi timomachtiskej iTlajtol toTajtsin Dios uan ijkon kuali tikajsikamatiskej nochi tlen kipia.

4. Xikyekijto tlen uelis tikchiuaskej para kuali timouikaskej iuan Jehová.

⁴ Akinmej tikchiuaj ken Cristo amo moneki tikmatiskej san seki tlamantli tlen kijtoua Biblia. Tiknekij tikajsikamatiskej “tlen mokuayejyekoua toTajtsin Dios maski amikaj kajsikamati” uan techpaleuis espíritu santo (1 Cor. 2:​9, 10). Uelis timomachtiskej itlaj tlen techpaleuis okachi matimouikakan iuan Jehová. Onka miak tlamantli tlen uelis techpaleuis. Uelis tiktemoskej ken okiteititi Jehová okintlasojtlaya akinmej yiuejkika okitekichiuilijkej uan ken techpaleuia matikmatikan noijki techtlasojtla. Uelis timomachtiskej ken otlanauati Jehová makiueyichiuakan israelitas uan matikitakan ken tikueyichiuaj axkan. Noijki uelis timomachtiskej ken okichi Jesús tlen okijtouayaj profecías ijkuak okatka nikan tlaltikpak uan ijkuak otetlapoui.

5. ¿Tlen okachi mitspaktiskia timomachtis?

⁵ Sekimej tokniuan tlen kuali momachtiaj Biblia okintlajtlanijkej tlen okachi kinpaktia momachtiskej. Itech recuadro “ Seki tlamantli tlen uelis timomachtiskej” kipia seki tlamantli tlen tokniuan okijtojkej. Techpaktis timomachtiskej amatlajkuilolmej Tlen ika momachtiaj iTlaixpantijkauan Jehová uan Índice de las publicaciones Watch Tower. Tla timomachtiskej nonmej amatlajkuilolmej, okachi titlaneltokaskej uan okachi tikixmatiskej toTajtsin Dios (Prov. 2:​4, 5). Axkan matimomachtikan seki tlamantli tlen techmachtia Biblia.

6. (1) ¿Tleka amo san se tlamantli kijtosneki ijkuak timokuayejyekouaj itlaj tikchiuaskej uan ijkuak tiknekij itlaj tikchiuaskej? (2) ¿Tleka uelis tikneltokaskej tlen Jehová kichiuas nochipa yetos? (Efesios 3:11).

⁶ Matikitakan tlen kijtoua Biblia kineki kichiuas toTajtsin Dios. Para tikajsikamatiskej moneki matikilnamikikan amo san se tlamantli kijtosneki ijkuak timokuayejyekouaj itlaj tikchiuaskej uan ijkuak tiknekij itlaj tikchiuaskej. Ijkuak timokuayejyekouaj itlaj tikchiuaskej yetoskia ken ijkuak tikpejpenaj se ojtli para tiajsitiuij kanin tiknekij tiaskej. Pero ayakmo uelis tiajsitiuij tla itlaj techtsakuilis. Pero ijkuak tiknekij itlaj tikchiuaskej yetoskia ken yotiajsitoj kanin otiknekiayaj tiaskej. Tejuan kuali tikmatij kanin tiajsitiuij ikinon maski itlaj techtsakuilis tiktemoskej ik kanin tiaskej. Jehová yokijto tlen kichiuas ikinon tiktlasojkamatiliaj porque techititia ika Biblia tlen kineki kichiuas (Efes. 3:11). Nochipa mochiua tlen ye kineki porque “okichi nochi tlamantli para mamochiua itlanekilis” (Prov. 16:4). Uan nochi tlen kichiuas Jehová nochipa yetos. Ikinon ¿tlen kineki kichiuas toTajtsin Dios uan tlen yokichi para ijkon kichiuas?

7. ¿Tlen okichi Jehová para kichiuas tlen okinekiaya maski Adán uan Eva otlajtlakolchijkej? (Mateo 25:34).

⁷ Ijkuak Jehová otlachijchi okinmilui Adán uan Eva tlen okinekiaya kichiuas. Ikinon okinmilui: “Ximomiaktilikan uan ximochiuakan nanmiakej, xiktemitikan tlaltikpak uan xikmaluikan […] nochtin tlen moliniaj itech tlaltikpak” (Gén. 1:28). Maski Adán uan Eva otlajtlakolchijkej non amo okichi Jehová makipatla tlen okinekiaya kichiuas. Ye san okipatlak seki tlamantli para ijkon kichiuas. Uan san niman okitlali se Tekiuajkayotl ompa iluikak para mamochiua tlen okijto (xiktlajtolti Mateo 25:34). Satepan okiualtitlanki ikone ipan tlaltikpak uan ijkon okiteititi sapanoua techtlasojtla. Jesús otetlapoui tlen kijtosneki non Tekiuajkayotl uan noijki okitemakak iyolilis para techmakixtis imak tlajtlakoli uan mikilistli. Satepan Jehová okiyoliti uan okitlali ken tekiua itech iTekiuajkayo. Pero uelis timokuayejyekoskej okseki tlamantli tlen kineki kichiuas toTajtsin Dios.

8. (1) ¿Tlen tlamachtil miak ipati kipia Biblia? (2) ¿Tlen okseki tlamantli kichiuas Jehová ijkon ken kijtoua Efesios 1:​8-11? (Xikita dibujo tlen kajki itech página 1).

⁸ Miak ipati tlen techmachtia Jehová ijkuak kijtoua kiueyichiuas itoka ijkuak kichiuas tlen okijto nikan tlaltikpak ika iTekiuajkayo tlen kiyekana Jesucristo. Amitlaj uelis kitsakuilis Jehová ijkon makichiua uan yokijto ijkon kichiuas (Is. 46:​10, 11, notas; Heb. 6:​17, 18). Amo miak poliui toTajtsin Dios kikopas se xochitlali tlaltikpak uan ixuiuan Adán uan Eva ayakmo yetoskej tlajtlakolejkej uan nochipa yoltoskej (Sal. 22:26). Pero Jehová amo san non kineki kichiuas. Ye kichiuas nochtin mamouikakan uan makimatikan san ye kinamiki kinnauatis akinmej chantij iluikak uan tlaltikpak (xiktlajtolti Efesios 1:​8-11). ¿Amo melauak kualtsin tlen Jehová yokijto kichiuas?

9. ¿Tlen yitikmatij panos satepan porque timomachtiaj Biblia?

⁹ Matimokuayejyekokan profecía tlen Jehová okijto itech xochitlali Edén uan ijkuilitok itech Génesis 3:15. b Ompa kijtoua seki tlamantli tlen panoskia satepan para mamochiua tlen toTajtsin Dios kineki. Ompa kijtoua  ikone siuatl tlen okachi ueyititok yetoskia ixui Abrahán uan nin yetoskia ye Mesías (Gén. 22:​15-18). Satepan xiuitl 33 Jesús okikojkojkej ikxi ijkon ken yomoijtojka (Hech. 3:​13-15). Pero ok poliui kanaj 1,000 xiuitl para mochiuas nochi non profecía uan ye kixajxamanis itsonteko Satanás (Apoc. 20:​7-10). Pero Biblia noijki techmachtia tlen kipanos ialtepe Jehová ijkuak yikipojpoloskej nochi tlen kiyekantok Satanás.

10. (1) ¿Tlen kijtoua Biblia panos san niman? (2) ¿Ken uelis timoyektlaliskej para tikchiaskej tlen panos satepan? (Xikita nota).

¹⁰ Matikilnamikikan seki tlamantli tetlajtlachialti tlen okijto Biblia panoskia. Tekiuajkej kijtoskej “axkan tinochtin kuali tikatej uan amitlaj techtekipachoua” (1 Tes. 5:​2, 3). Ijkuak tekiuajkej kinekiskej kinpojpoloskej religiones tlen tlakajkayauaj “san niman” peuas ueyi tlajyouilistli (Apoc. 17:16). Satepan xamo panos seki tlamantli tlen amo keman tikitaj ijkuak “kitaskej iKone Tlakatl uits ika ichikaualis ipan mixtli” (Mat. 24:30). Jesús kinmixkomakas nochtin uan kinxexelos ijkon ken se tlajpixki kinxexeloua ichkamej uan tentsomej (Mat. 25:​31-33, 46). Ijkuakon Satanás sapanoua kualanis uan kichiuas tekiuajkej mamosetilikan. Biblia kitokayotia Gog de Magog uan kixnamikis ialtepe toTajtsin Dios (Ezeq. 38:​2, 10, 11). Ijkuakon kinnechikoskej itech iluikak tlapejpenalmej tlen ok mokauaj nikan tlaltikpak. Ompa monechikoskej iuan Cristo uan ángeles para moteuiskej itech guerra tlen itoka Armagedón uan ijkon tlamis ueyi tlajyouilistli (Mat. 24:31; Apoc. 16:​14, 16). c Ijkuak panos nochi non tlamantli, Jesucristo peuas tlanauatis mil xiuitl ipan nochi tlaltikpak (Apoc. 20:6).

11. ¿Timokuayejyekoua tlen uelis tikchiuaskej ijkuak nochipa tiyoltoskej? (Noijki xikinmita dibujos).

¹¹ Matimokuayejyekokan ken tiyetoskej satepan. Biblia kijtoua Jehová okitlali itech toyolo matiknekikan nochipa tiyoltoskej (Ecl. 3:11). ¿Timokuayejyekouaj ken techpaleuis non tlamantli uan okachi timouikaskej iuan Jehová? Amochtli tlen itoka Acerquémonos  a Jehová página 319, kijtoua: “Okachi tikixmatiskej Jehová ijkuak tiyoltoskej sapanoua miak xiuitl. Pero ok moneki timomachtiskej okseki tlamantli kualtsin tlen kichiua Jehová. […] Amo ueli nochi timokuayejyekouaj ken sapanoua kualtsin tlayetos ijkuak tichantiskej itech xochitlali. Uelis tikchiuaskej miak tlamantli pero okachi ipati timouikaskej iuan Jehová”. Pero ¿tlen uelis okachi timomachtiskej itech iTlajtol toTajtsin Dios?

12. Xikyekijto ken uelis tikmatiskej tlen panotok iluikak.

¹² ITlajtol toTajtsin Dios techpaleuia matikmatikan Jehová sapanoua ueyititok ompa iluikak (Is. 33:5). Biblia noijki techpaleuia matikixmatikan Jehová uan akinmej kitechiuiliaj ompa iluikak (Is. 6:​1-4; Dan. 7:​9, 10; Apoc. 4:​1-6). Uelis tiktlajtoltiskej tlamantli tetlajtlachialti tlen okitak Ezequiel ijkuak omotlapo iluikak uan toTajtsin Dios okititi seki tlamantli (Ezeq. 1:1).

13. ¿Tlen tikmachiliaj ijkuak tikmatij tlen kichijtok Jesús ompa iluikak? (Hebreos 4:​14-16).

¹³ Matimokuayejyekokan tlen kichijtok Jesús ompa iluikak ken Tekiua uan Teopixki tlen tlayekana. Ijkuak timotlatlaujtiaj ye techpaleuia “matimotokikan itech itrono toTajtsin Dios tlen kitetliokolia tlen kuali” uan matikiluikan matechiknomati ‘ijkuak monekis matechpaleuikan’ (xiktlajtolti Hebreos 4:​14-16). Nochipa matikilnamiktokan ken yotechpaleuijkej Jehová uan Jesús uan tlen kichijtokej axkan ompa iluikak. Yejuan techtlasojtlaj ikinon moneki timochijchikauaskej okachi tiktekichiuiliskej Jehová ika nochi toyolo (2 Cor. 5:​14, 15).

14. ¿Ken uelis tikteititiskej tikintlasojkamatiliaj Jehová uan Jesús? (Noijki xikinmita fotos).

¹⁴ Tejuan tikteititiaj tikintlasojkamatiliaj  Jehová uan ikone ijkuak timochijchikauaj tikinpaleuiaj oksekimej mamochiuakan iTlaixpantijkauan Jehová uan idiscípulos Jesús (Mat. 28:​19, 20). Apóstol Pablo noijki ijkon okichi porque okintlasojkamatiliaya Jehová uan Cristo. Ye okimatiaya Jehová “kineki nochtin mamomakixtikan uan kuali makajsikamatikan tlen melauak” (1 Tim. 2:​3, 4). Ikinon sapanoua otetlapoui para kinpaleuiskia oksekimej mamomakixtikan (1 Cor. 9:​22, 23).

15. ¿Tlen techpaleuis matipakikan ijkon ken kijtouaj Salmo 1:2?

¹⁵ Salmista okijto paki akin “moyolpaktia ika itlanauatil Jehová” uan kuali kisa tlen kichiua. Noijki “tonal uan youak ichtakatsin kitlajtoltia itlanauatil” uan mokuayejyekoua tlen kitlajtoltia (Sal. 1:​1-3). Se tlakatl tlen kitlajtolkopa Biblia okijto: “Akin kitlajtoltia Biblia moneki kipaktis tlen kijtouaj itlanauatiluan toTajtsin Dios, makinmomachti uan mamokuayejyeko”. Noijki okijto: “Akin kitlajtoltia Biblia mokuayejyekos san motonalpolos ijkuak amo kajsikamatis tlen ompa kijtoua” (Studies in the Psalms, Joseph Rotherham). Tejuan noijki techpaktis timomachtiskej Biblia tla timochijchikauaj tikajsikamatiskej tlen ompa kijtoua uan ken mouika nochi. Tipakiskej tla timochijchikauaj timomachtiskej nochi tlen kijtoua iTlajtol toTajtsin Dios.

16. ¿Tlen timomachtiskej chikome?

¹⁶ Tinochtin uelis tikajsikamatiskej tlen Jehová techmachtia itech iTlajtol. Chikome timomachtiskej tlen kijtosneki templo espiritual tlen Pablo okijkuilo itech carta tlen okinmijkuilili tokniuan hebreos. Melauak techpaktis tlen timomachtiskej.