Tokniuan tlen okatkaj Betel yikanaj se xiuitl okichijchijtokaj estación de radio tlen omotokayotiaya WBBR ompa Staten Island tlen kajki Nueva York. Otlachipajkej kanin kichijchiuaskiaj se ueyi kali kanin chantiskiaj akinmej ompa tlapaleuiskiaj uan okichijchijkej okse kali kanin kitlaliskiaj non estación. Ijkuak otlanki otlayektlalijkej opejki kitlaliaj radio tlen ika mopaleuiskiaj tetlapouiskej. Pero okixnamikej okseki tlamantli ijkuak ayamo otlamiayaj kichijchiuaj.

Achto okitlalijkej antena. Okipiaya 91 metros ik ueyak uan omonekiaya kipiloskej itech ome postes de kouitl tlen okipiaya 61 metros ik uejkapan. Ijkuakon tokniuan amo ouelik okipilojkej. Pero okineltokakej Jehová kinpaleuiskia uan satepan okipilojkej. Se tokni itoka Calvin Prosser tlen noijki otlapaleui, okijto: “Tla san niman tikpiloskiaj, tikijtoskiaj toselti otikpilojkej non antena”. Pero tokniuan okijtojkej kuali okiski tlen okichijkej porque Jehová okinpaleui. Pero tokniuan okixnamikej okseki tlamantli.

Ijkuakon yikin opeuayaj kintekitiltiaj estaciones de radios ikinon otikitayaj oui tikkouaskej seki tlamantli. Pero ik kanin otikatkaj tokniuan okikojkej se tepostli tlen okititlaniaya señal de 500 vatios tlen ayakmo okatka yankuik. Noijki okitlalilijkej imicrófono se teléfono uan amo okikojkej se yankuik micrófono. Tokniuan okitakej kox kuali otekipanouaya non radio se youak itech metstli febrero. Tokniuan otlakuikakej tlakuikalmej tlen titlakuikaj ijkuak timonechikouaj porque omonekiaya itlaj kitlaliskej para mamokaki. Tokni Ernest Lowe okilnamikiaya ijkuak tokniuan otlakuikatokaj uan tokni Joseph Rutherford tlen achto okatka  juez b okinualnotski. Ye okinkaktoka itech iradio ompa Brooklyn tlen omokauaya kanaj 25 kilómetros ik uejka.

Tokni Joseph Rutherford okijto: “Ayakmo xitlakuikakan porque mokaki ken mokualaniaj mistonmej”. Tokniuan opinauakej uan okiseuijkej radio pero okimatiayaj yiuelis kitekitiltiskiaj radio.

24 de Febrero 1924 tokniuan opejki kitekitiltiaj radio uan tokni Joseph Rutherford okijto non radio “tlapaleuiskia mamotematilti tlen otlanauati Cristo”. Noijki okijto tlen ompa kipanoltiskiaj kinpaleuiskiaj oksekimej “makajsikamatikan ijkuilitok itech Biblia tlen panotok. Non kinpaleuiskia maski san tlen okineltokayaj noso san tlen religión okipiayaj”.

Miakej okikakej radio ijkuak tokniuan opejki kitekitiltiaj. 33 xiuitl ialtepe Jehová okitekitilti non radio tlen omotokayotiaya WBBR.

Julio 1924 tokniuan tlen okinmixmatiayaj ken akinmej omomachtiayaj Biblia omonechikojkej itech se ueyi nechikol tlen okichijkej ompa Columbus tlen kajki Ohio. Tokniuan tlen ompa omonechikojkej oualayaj itech miakej altepemej uan okinkakej tlamachtilmej ika tlajtoli alemán, árabe, francés, griego, húngaro, tlajtolmej tlen tlajtouaj ik norte ompa Europa, inglés, italiano, lituano, polaco, ruso uan ucraniano. Seki tlamachtilmej okinpanoltijkej itech radio uan noijki okinmiluijkej akinmej okichiuayaj periódico tlen itoka Ohio State Journal makijkuilokan sejse tonal tlen otlamachtiayaj itech ueyi nechikol.

Jueves 24 de julio miakej omonechikojkej itech ueyi nechikol uan kanaj 5,000 otetlapouijkej non tonal. Okintemakakej kanaj 30,000 amochmej uan opejki kinmachtiaj sapanoua miakej. Itech revista The Watch Tower okijkuilojkej “non tonal sapanoua oyolpakej akinmej omonechikojkej”.

Viernes 25 de julio noijki opanok itlaj miak ipati ijkuak tokni Joseph Rutherford omoyolchika uan okitlajtolti se amatl kanin okijtouaya amo kuali tlen okichiuayaj okseki religiones. Non amatl okijtouaya, tekiuajkej, akinmej kinyekanaj religiones uan akinmej tlanemakaj, “amo okinmachtiayaj oksekimej tlen kineki toTajtsin Dios para mayoltokan”. Noijki okijtouaya amo kuali tlen okichiuayaj “porque okipaleuiayaj Sociedad de Naciones  uan yejuan ‘okijtouayaj ijkon toTajtsin Dios otlanauatiaya nikan tlaltikpak’”. Tokniuan omonekiaya yetoskej yolchikauakej uan omonekiaya kinmiluiskej oksekimej tlen okijtouaya non amatl.

Revista The Watch Tower okijto ken okinpaleui tokniuan non ueyi nechikol. Okijto tokniuan tlen omonechikojkej ompa Columbus okinpaleui okachi matlaneltokakan. Noijki okijto okinyolchika matetlapouikan maski kintlajyouiltiskiaj. Tokni Leo Claus tlen noijki oyajki ueyi nechikol okijto: “Otechyolchika non ueyi nechikol uan otiknekiayaj tiktematiltiskej tlen otikkakej ik kanin tichantij”.

Metstli octubre, tokniuan opejki kintemakaj amatsitsintin tlen omotokayotiayaj Ecclesiastics Indicted noso Eclesiásticos denunciados kanin oijkuilitoka tlen okijto tokni Joseph Rutherford. Tokni Frank Johnson otlanki okintemakak amatsitsintin itech se altepetsintli tlen kajki Oklahoma ompa Estados Unidos uan okinchixki tokniuan 20 minutos para inuan yaskia. Pero amo okinchiato tokniuan kanin omokajkej porque sekimej amo okinpakti tlen otetlapouijtoka uan okinekiayaj itlaj kitoktiskej. Ikinon omotlati itech se teopan tlen ik ompa okatka. Amikaj ompa okatka ikinon okitlali se amatsintli itech iBiblia akin ompa otlamachtiaya uan noijki okintlali kanin omotlaliayaj akinmej ompa oyayaj uan san niman okiski. Pero noijki ijkon okichi itech ome teopanmej.

Frank san niman omokopki kanin kinchiaskia tokniuan. Omotlatito ik kanin okinemakayaj gasolina uan omotlachilijtoka para amo makitakan akinmej okinekiayaj itlaj kitoktiskej. Yejuan opanokej itech se carro pero amo okitakej. Pero san niman oajsitoj tokniuan tlen okinchixtoka Frank uan inuan oyajki.

Se tokni kilnamiki tlen opanok uan okijto: “Ijkuak otiajkej otipanokej ik kanin okatkaj nonmej teopanmej kanin tokni okinka amatsitsintin. Itech sejse teopan okatkaj kanaj 50 personas ompa kaltempa. Otikinmitakej sekimej okintlajtoltijtokaj amatsitsintin uan oksekimej okinmititiayaj amatsitsintin akin ompa otlamachtiaya. Amitlaj otechpanok porque san niman otiajkej. Otiktlasojkamatilijkej Jehová porque otechmalui uan otechpaleui amitlaj matechtoktikan akinmej okixnamikiayaj iTekiuajkayo”.

Itech okseki altepemej noijki omoyolchikajkej tokniuan uan otetlapouijkej. Ijkon opanok ik norte ompa Francia. Józef Krett okintlapoui akinmej otekipanouayaj itech minas uan oualayaj Polonia. Tokni okitemakak se tlamachtil tlen omotokayoti “Pronto resucitarán los muertos”. Ijkuak okinmakakej amatsitsintin akinmej ompa ochantiayaj para makikakitij non tlamachtil, se teopixki okinmilui amo mayakan. Pero yejuan oyajkej otlakakitoj. Omonechikojkej kanaj 5,000 uan noijki otlakakito teopixki. Tokni Józef Krett okilui teopixki makijto tlen kineltoka pero ye amo okinek. Tokni okintemakak nochi amatlajkuilolmej tlen okinuikaya. Noijki okinmilui tokniuan miakej okinekiayaj kimatiskej tlen kijtoua iTlajtol toTajtsin Dios (Amós 8:11).

Ompa África, se tokni itoka Claude Brown otetlapouito ompa Costa de Oro tlen axkan moixmati ken Ghana. Okinpaleui miakej makimatikan kuali tlajtoli porque nouian otlamachti uan noijki okintemakak miakej amatlajkuilolmej. Se tlakatl tlen omotokayotiaya John Blankson tlen omomachtiaya ken kichijchiuaj pajtli, okikak se tlamachtil tlen okitemakak tokni Claude Brown uan san niman okajsikamatki melauak tlen tlamachtia  Biblia. Ye okijto: “Onechyolchika tlen tlamachtia Biblia uan onikintlapouiaya akinmej inuan onimomachtiaya”.

Se tonal John Blankson oyajki itech se iglesia anglicana uan okilui teopixki makiyekilui tlen kijtosneki Trinidad. Pero ye yokimatiaya Biblia amo tlajtoua itech Trinidad. Teopixki okitsatsajtsili uan okilui: “Te amo tikchiua tlen Cristo otlanauati. Xiuia porque te mitsnauatia Diablo”.

Ijkuak John Blankson oajsito ikalijtik, okijkuilili se carta teopixki uan okilui inmixpan miakej makijtoti tlen kijtosneki Trinidad. Teopixki okinauati mauia makitati akin tlayekana kanin tlamachtiaj ken kichijchiuaj pajtli. Akin tlayekana okitlajtlani John Blankson kox okitlajkuilili teopixki.

John Blankson okijto okitlajkuilili.

Akin tlayekana okilui John Blankson makitlajkuilili teopixki uan makilui makitlapojpolui. Ikinon okitlajkuilili:

“Akin tlayekana onechilui manimitstlajkuilili para techtlapojpolui pero ijkon nikchiuas tla tejuatsin tikijtos amo melauak tlen titlamachtia”.

Akin tlayekana omotlajtlachialti uan okitlajtlani John Blankson: “¿Non tlamantli tikneki tikijkuilos?”.

“Kema. San non nikneki nikijkuilos”.

Akin tlayekana okilui: “Timitskixtiskej porque amo uelis nikan timomachtis tla tikixnamiki teopixki tlen tekiuajkej kipaleuiaj”.

“Pero kuali tikmatij ijkuak tejuatsin techmachtia uan itlaj amo tikajsikamatij, ¿amo timitstlajtlaniaj tlen amo tikajsikamatij?”.

“Kema”.

“Ijkon oniktlajtlani teopixki. Ye otlamachtijtoka Biblia uan ne itlaj oniktlajtlani. Tla ye amo kineki nechnankilis tlen oniktlajtlani, ¿tleka moneki niktlajkuililis manechtlapojpolui?”.

John Blankson amo okikixtijkej kanin omomachtiaya nion okitlajkuilili teopixki.

Itech revista The Watch Tower kijtoua tlen opanok non xiuitl. Ompa kijtoua: “Uelis tikijtoskej ijkon ken David okijto: “Te tikchiuas maniyeto nichikauak ken se soldado” (Sal. 18:39). Techyolchikaua tlen panotok nin xiuitl porque tikitaj techpaleuia Toteko. [...] Akinmej tetlapouiaj yolpakij kitematiltiaj kuali tlajtoli”.

Itlamian non xiuitl tokniuan okitakej ken okachi tetlapouiskiaj itech radio. Ik ompa Chicago opejki kitaj kanin kitlaliskej se estación de radio. Okitokayotijkej WORD uan nin tlajtoli kajki ika inglés. Non kijtosneki ITLAJTOL toTajtsin Dios. Okitlalijkej se estación de radio tlen okachi uejka okititlaniaya señal uan ijkon kikakiskiaj kuali tlajtoli hasta ik norte ompa Canadá.

1925 okachi kajsikamatiskiaj okseki tlamantli. Tokniuan okachi kajsikamatiskiaj tlen kijtoua Apocalipsis capítulo 12. Miakej amo kiseliskiaj tlen kiyekijtoskiaj pero oksekimej kuali kiseliskiaj. Kinpaktiskia kimatiskej tlen opanok iluikak uan tlen kichiuaskiaj tokniuan nikan tlaltikpak.