1. ¿Ken kinmita Jehová akinmej kitekichiuiliaj?

 JEHOVÁ kita nochi tlen mitspanoua. Kimati keman tiyolpaki uan keman timoyolkokoua (Sal. 37:18). Ye paki ijkuak kita timochijchikaua tiktekichiuilis maski ualeua timotekipachoua. Pero amo san kita tlen mitspanoua, ye noijki kineki mitspaleuis uan mitsyolseuis.

2. ¿Ken kinmaluia Jehová akinmej moyolkokouaj uan tlen moneki tikchiuas tla tikneki mamitsmalui?

² Salmo 147:3 kijtoua Jehová “kinpajtia akinmej moyolkokouaj uan kinmilpia kanin kinkokoua”. Nin texto kiteititia Jehová kinmaluia akinmej moyolkokouaj. ¿Tlen moneki tikchiuas tla tikneki Jehová mamitsmalui? Matikijtokan ikaj omokojko, tla kineki pajtis moneki kitati se tepajti. Pero tla kineki pajtis moneki kichiuas nochi tlen kiluis tepajti. Axkan timomachtiskej Jehová mitstlasojtla ikinon itech iTlajtol mitsiluia tlen moneki tikchiuas tla timoyolkokoua.

JEHOVÁ MITSPATIOITA

3. ¿Tleka sekimej amo kineltokaj ikaj kintlasojtla?

³ Axkan miakej amo tetlasojtlaj, tetlajyouiltiaj uan amo kinpatioitaj oksekimej. Se tokni itoka Helen a okijto:  “Onimoskalti itech se familia kanin amo otimotlasojtlayaj. Nopapa otechtlajyouiltiaya uan nochipa otechiluiaya amitlaj topati”. ¿Tejuatsin noijki ijkon omitspanok? Xamo omitstlajyouiltiayaj, nochipa omitsteneuayaj uan amo okiteititiayaj mitstlasojtlaj. Ikinon tikita oui tikneltokas ikaj mitspatioita.

4. ¿Tlen mitsiluia Jehová itech Salmo 34:18?

⁴ Tejuatsin uelis tikneltokas Jehová mitstlasojtla uan mitspatioita maski oksekimej omitstlajyouiltijkej. Porque “Jehová kajki inuan akinmej moyolkokouaj” (xiktlajtolti Salmo 34:18). Tla ‘sapanoua timoyolkokoua’, xikilnamiki Jehová okitak tiyolkuali uan omitsyoltilanki xiktekichiuili (Juan 6:44). Ikinon nochipa mitspaleuis porque mitstlasojtla.

5. ¿Ken okinmitak Jesús akinmej okintlajyouiltiayaj?

⁵ Tlen okichi Jesús techpaleuia matikajsikamatikan ken momachilia Jehová ijkuak titlajyouiaj. Ijkuak okatka nikan tlaltikpak okinmiknomatki akinmej okintlajyouiltiayaj (Mat. 9:​9-12). Se siuatl tlen sapanoua omokokouaya okikitski itlaken Jesús porque okineltokaya ijkon pajtis. Jesús okiyolseui uan okilui opajtik porque otlaneltokaya (Mar. 5:​25-34). Ijkon okiteititi ye mokuayejyekoua ken iTajtsin (Juan 14:9). Ikinon xikneltoka Jehová mitspatioita, kita tikpia kualtsin moyelis, titlaneltoka uan tiktlasojtla.

6. ¿Tlen uelis tikchiuas tla timokuayejyekoua amitlaj mopati?

⁶ ¿Tlen uelis tikchiuas tla timokuayejyekoua amitlaj mopati? Xikintlajtolti seki textos kanin kijtouaj Jehová mitspatioita uan ximokuayejyeko tlen mitsmachtiaj  (Sal. 94:19). b Tla ayamo tikchiua seki tlamantli tlen otikijto para okachi tiktekichiuilis Jehová, amo ximoyolkoko nion xikijto amo keman uelis itlaj tikchiuas. Noijki amo ximoyolkoko tla amo ueli tikchiua tlen oksekimej kichiuaj. Xikilnamikto Jehová mitsajsikamati uan amo kijtoua xikchiua tlen amo tiueli (Sal. 103:​13, 14). Noijki amo ximotlajtlakolti tla otitlajyoui ijkuak otimoskalti. Xikilnamikto Jehová kinmixkomakas akinmej tetlajyouiltiaj (1 Ped. 3:12). Sandra okitlajyouiltijkej ijkuak okatka takotsin. Ye okijto: “Nochipa nikiluia Jehová manechpaleui manikita tlen kuali nikchiua ijkon ken ye kita tlen kuali nikchiua”.

7. ¿Ken uelis tikinpaleuis oksekimej?

⁷ Jehová uelis mitspaleuis xikinpaleui oksekimej maski ualeua tikitas oui ijkon tikchiuas. Xikilnamikto tejuan tikpaleuiaj ijkuak titetlapouiaj (1 Cor. 3:9). Xamo tlen omitspanok mitspaleuis xikinmajsikamati oksekimej uan ijkon uelis tikinpaleuis. Helen tlen otimotlapouijkej itech párrafo 3, okijto okipaleuijkej ikinon axkan okachi kimati ken kinpaleuis oksekimej. Ye okijto: “Achto onimomachiliaya amitlaj nopati. Pero axkan nikmachilia Jehová nechtlasojtla uan kipatioita tlen nikchiua”. Helen tlapaleuia ken precursora regular uan sapanoua yolpaki.

JEHOVÁ KINEKI XIKNELTOKA YOMITSTLAPOJPOLUI

8. ¿Tlen kichiuas Jehová ijkon ken kijtoua Isaías 1:18?

⁸ Sekimej ok moyolkokouaj porque yiuejkika otlajtlakolchijkej ijkuak ayamo omoapolaktiayaj noso satepan ijkuak yomoapolaktijkej. Pero xikilnamikto Jehová omitstlaxtla porque mitstlasojtla uan kineki mitstlapojpoluis. Ye kineki xikseli tlen okichi. Jehová kijtoua: “Xiualakan uan matikyektlalikan ouijkayotl tlen tikpiaj”. c Ye kijtoua mitstlapojpoluis tla timoyolkopas (xiktlajtolti Isaías 1:18). Xiktlasojkamatili Jehová porque kilkaua tlen amo kuali otikchi uan san kilnamiktok tlen kuali tikchiua (Sal. 103:​9, 12; Heb. 6:10).

9. ¿Tleka miak ipati xikita tlen tikchijtok uan tlen tikchiuas satepan?

⁹ ¿Tlen mitspaleuis tla timoyolkokoua porque ok tikilnamiki otimotlapololti? Xikita tlen tikchijtok axkan uan tlen uelis tikchiuas satepan. Ximokuayejyeko tlen okipanok apóstol Pablo. Ye omoyolkokouaya porque okintlajyouilti tokniuan pero noijki okimatiaya Jehová yokitlapojpoluijka (1 Tim. 1:​12-15). Ikinon ayakmo okilnamiktoka okichi tlen amo kuali uan amo okilnamikiaya oueyititoka ijkuak okatka fariseo (Filip. 3:​4-8, 13-15). Ye opakiaya tetlapouis uan okitaya tlen uelis kichiuas satepan. Amo uelis tikpatlas tlen otikchi ijkon ken okipanok Pablo. Pero uelis tikitas ken okachi tiktekichiuilis Jehová axkan uan satepan.

10. ¿Tlen uelis tikchiuas tla otikintlajyouilti oksekimej?

¹⁰ Xamo timoyolkokoua porque okintlajyouilti oksekimej tlen otikchi. ¿Tlen uelis tikchiuas? Xikinmilui mamitstlapojpoluikan  uan xikinpaleui kuali mamomachilikan (2 Cor. 7:11). Xikilui Jehová makinpaleui akinmej otikintlajyouilti. Ye uelis mitspaleuis ximoyolseui uan noijki kinyolseuis akinmej otikintlajyouilti.

11. ¿Tlen mitsmachtia tlen okichi Jonás? (Noijki xikita dibujo).

¹¹ Amo oksepa xikchiua tlen otikchi pero xikkauili Jehová mamitsyekana para xiktekichiuili ken ye kineki. Xikilnamiki tlen okichi Jonás. Jehová okilui mauia Nínive pero ye oksekan oyajki. Ikinon Jehová okilui tlen omonekiaya kichiuas uan ye otetlakamatki (Jon. 1:​1-4, 15-17; 2:​7-10). Jehová oksepa okilui mauia Nínive uan ye san niman okitlakamatki. Jonás omoyolkokouaya pero ye okichi tlen Jehová okinauati (Jon. 3:​1-3).

JEHOVÁ MITSYOLSEUIS IKA IESPÍRITU SANTO

12. ¿Ken uelis mitsyolseuis Jehová ijkuak itlaj mitspanos noso ijkuak itlaj tikixnamikis? (Filipenses 4:​6, 7).

¹² Jehová mitsyolseuis ika iespíritu santo ijkuak itlaj mitspanos noso ijkuak itlaj tikixnamikis. Jehová okinyolseui Ron uan Carol ijkuak omomikti intelpoch. Yejuan okijtojkej: “Yimiak uelta otitlajyouijkaj pero okachi otechyolkoko tlen otechpanok. Miak uelta amo otikochiayaj ikinon otiktlatlaujtiayaj Jehová uan otikitayaj ken otechyolseuiaya ijkon ken kijtoua Filipenses 4:​6, 7” (xiktlajtolti). Ikinon xikilui Jehová ken timomachilia ijkuak itlaj tikixnamiki uan sapanoua timoyolkokoua. Uelis iuan timotlapouis san keski uelta tiknekis uan noijki uelis tiuejkauas san keski horas tiknekis (Sal. 86:3; 88:1). Nochipa xikilui Jehová mamitsmaka iespíritu santo uan xikneltoka ye nochipa mitskakis (Luc. 11:​9-13).

13. ¿Ken uelis mitspaleuis iespíritu santo toTajtsin Dios nochipa xiktekichiuili? (Efesios 3:16).

¹³ ¿Tisotlaua porque itlaj otikixnamik uan amo tikmati tlen tikchiuas? Iespíritu santo toTajtsin Dios mitsyolchikauas nochipa xiktekichiuili (xiktlajtolti Efesios 3:16). Matikitakan tlen okipanok se tokni itoka Flora. Ye uan inamik otlapaleuiayaj ken misioneros pero inamik okikajkaya uan omokajkajkej inmixpan tekiuajkej. Flora okijto: “Nochipa onimoyolkokouaya ijkuak ijkon onechtokti. Ikinon onikilui Jehová manechmaka iespíritu santo para manitlaxiko. Jehová onechpaleui kuali manimomachili uan ayakmo manimoyolkoko maski onikmachiliaya amo nikxikoskia”. Ye okitak okipaleui toTajtsin Dios okachi makineltoka uan kilnamiktok ye nochipa kipaleuis. Noijki okijto: “Jehová onechpaleui ijkon ken kijtoua Salmo 119:32: ‘Nimochijchikauas nias itech iojui motlanauatiluan porque tikchiua mayeto tlakualkan itech noyolo’”.

14. ¿Tlen moneki tikchiuas para tikselis iespíritu santo toTajtsin Dios?

¹⁴ ¿Tlen moneki tikchiuas tla yotikilui Jehová mamitsmaka iespíritu santo? Ximonechiko, xitetlapoui uan nochipa xiktlajtolti Biblia. Non mitspaleuis ximokuayejyeko ijkon ken Jehová mokuayejyekoua (Filip. 4:​8, 9). Ijkuak tiktlajtoltis Biblia ximokuayejyeko ken okinpaleui Jehová matlaxikokan akinmej okitekichiuiliayaj ijkuak itlaj okixnamikiayaj. Sandra tlen otimotlapouijkej itech  párrafo 6 okixnamik miak tlamantli. Ye okijto: “Ajsi itech noyolo tlen okipanok José. Ye nochipa omouikak iuan Jehová maski okixnamik miak tlamantli uan okitoktijkej tlen amo kuali” (Gén. 39:​21-23).

JEHOVÁ KINYOLINIS TOKNIUAN MAMITSYOLCHIKAUAKAN

15. ¿Akinmej uelis techyolchikauaskej uan ken uelis kichiuaskej ijkon kijtoua Colosenses 4:11? (Noijki xikita foto).

¹⁵ Tokniuan uelis ‘mitsyolchikauaskej’ ijkuak titlajyouis (Col. 4:11). Jehová mitstlasojtla uan kinyolinia tokniuan mamitsyolchikauakan. Yejuan mitsyolchikauaskej ijkuak mitskakiskej, ijkuak mitsajsikamatiskej uan ijkuak mouan yetoskej. Xamo mitsyolchikauaskej ijkuak mitstlajtoltiliskej se texto noso mouan motlatlaujtiskej (Rom. 15:4). d Noijki xamo se tokni mitsilnamiktis ken kita Jehová tlen mitspanoua uan non mitspaleuis kuali ximomachili uan ximoyolseui. Noijki tokniuan xamo mitsuikiliskej tlakuali noso kichiuaskej okseki tlamantli para mitspaleuiskej.

16. ¿Tlen moneki tikchiuas tla tikneki mamitspaleuikan tokniuan?

¹⁶ Monekis tikinmiluis tokniuan tla tikneki mamitspaleuikan. Porque yejuan  mitstlasojtlaj uan kinekij mitspaleuiskej (Prov. 17:17). Pero xamo amo kimatiskej ken timomachilia nion kimatiskej tlen mitspoloua (Prov. 14:10). Tla timoyolkokoua uelis tikintemos moyolikniuan tlen kuali mouikaj iuan Jehová uan uelis tikinmiluis tlen mitspanoua. Pero xikinmilui ken uelis mitspaleuiskej. Noijki uelis timotlapouis inuan tlayekankej. Sekimej tokniuan siuamej okachi kuali momachiliaj motlapouiskej iuan se tokni siuatl tlen okachi tlaneltoka.

17. ¿Tleka ualeua amo tikinkauiliaj oksekimej matechyolchikauakan pero tlen moneki tikchiuaskej?

¹⁷ Xiyeto inuan tokniuan. Tla timoyolkokoua xamo amo tikneki tiyetos inuan oksekimej. Xamo tokniuan amo mitsajsikamatiskej uan uelis itlaj kijtoskej tlen mitsyolkokos (Sant. 3:2). Pero xikinkauili mamitsyolchikauakan porque non mitspaleuis kuali ximomachili. Se tlayekanki itoka Gavin tlen sapanoua moyolkokoua, okijto: “Ualeua amo nikneki niyetos inuan noyolikniuan”. Pero ye mochijchikaua yetos inuan oksekimej uan non kipaleuia kuali mamomachili. Okse tokni itoka Amy okijto: “Yonechpanok miak tlamantli ikinon nikita oui nikinneltokilis oksekimej. Pero nimochijchikaua nikintlasojtlas tokniuan uan nikinneltokilis ijkon ken Jehová kichiua. Porque nikmati ijkon nikyolpaktia uan ne noijki nipaki”.

UELIS MITSYOLSEUIS TLEN JEHOVÁ KICHIUAS

18. ¿Tlen kichiuas Jehová uan te tlen uelis tikchiuas?

¹⁸ Xiyolpaki porque ayakmo miak poliui Jehová kichiuas ayakmo ximokoko, ayakmo ximoyolkoko uan kipojpolos nochi tlen mitstlajyouiltia (Apoc. 21:​3, 4). Ijkuak tiyetos itech xochitlali ayakmo tikilnamikis tlen mitsyolkokoua (Is. 65:17). Pero Jehová desde axkan “kinpajtia akinmej moyolkokouaj”. Ikinon xikkauili Jehová mamitspaleui. Xikilnamikto Jehová mitstlasojtla miak (1 Ped. 5:7).