TLAMACHTIL 41
TLAKUIKALI 13 Ma tikchiuakan ken Cristo
¿Tlen techmachtia Jesús ijkuak ok okatka 40 tonal nikan tlaltikpak?
“Yejuan okitakej Jesús 40 tonal uan ye okitematilti iTekiuajkayo toTajtsin Dios” (HECH. 1:3).
NIN TLEN TIMOMACHTISKEJ
Tikitaskej tlen techmachtia Jesús ijkuak ok okatka 40 tonal nikan tlaltikpak.
1, 2. ¿Tlen opanok ijkuak ome discípulos oyayaj Emaús?
ITECH 16 de nisán xiuitl 33, idiscípulos Jesús omoyolkokouayaj uan omomojtiayaj. Ome discípulos okiskej Jerusalén uan oyajkej Emaús tlen omokauaya kanaj 11 kilómetros ik uejka. Omoyolkokouayaj porque okimiktijkej Jesús tlen okinyekanaya. Yejuan okichiayaj Mesías makinpaleui judíos pero omotaya ayakmo ijkon panoskia. Pero ayamo okimatiayaj tlen panoskia satepan.
2 Ijkuak discípulos onejnentiayaj, se tlakatl omotoki innauak uan inuan oyajki. Yejuan okiluijkej omoyolkokouayaj porque okimiktijkej Jesús. Satepan non tlakatl itlaj okinmilui tlen amo keman okilkajkej. Opejki kintlapouia “tlen okijkuilo Moisés uan tlen okijkuilojkej profetas”. Ijkon okinyekilui tleka okitlajyouiltijkej uan okimiktijkej Mesías. Ijkuak oajsitoj Emaús, discípulos okajsikamatkej non tlakatl ye Jesús tlen okiyolitijkej. Xamo sapanoua opakej porque okitakej Mesías oksepa oyoltoka (Luc. 24:13-35).
3, 4. (1) ¿Tlen okinpanok discípulos? (Hechos 1:3). (2) ¿Tlen timomachtiskej?
3 Jesús miak uelta okinmonextili idiscípulos ijkuak ok okatka 40 tonal nikan tlaltikpak (xiktlajtolti Hechos 1:3). Jesús okinyolchika idiscípulos ikinon ayakmo omoyolkokouayaj nion omomojtiayaj. Non okinpaleui mapakikan uan mamoyolchikauakan matetlapouikan uan matlamachtikan iTekiuajkayo toTajtsin Dios. a
4 Techpaleuis miak tla timomachtiskej tlen okichi Jesús ijkuak ok okatka nikan tlaltikpak. Axkan timomachtiskej Jesús okinyolchika idiscípulos, okinpaleui okachi makajsikamatikan iTlajtol toTajtsin Dios uan okinmachti okachi matlapaleuikan. Tlen axkan tikitaskej techpaleuis matikchiuakan ijkon ken Jesús okichi.
MATIKINYOLCHIKAUAKAN OKSEKIMEJ
5. ¿Tleka omonekiaya makinyolchikauakan idiscípulos Jesús?
5 Omonekiaya makinyolchikauakan idiscípulos Jesús. ¿Tleka? Porque sekimej okikajkej inchan, infamilia uan inteki para yaskej iuan Jesús (Mat. 19:27). Oksekimej okintlajyouiltiayaj porque omochijkej idiscípulos Jesús (Juan 9:22). Pero okitekauilijkej makintlajyouiltikan porque okineltokayaj Jesús ye Mesías (Mat. 16:16). Pero ijkuak okimiktijkej, yejuan amo okimatiayaj tlen panoskia uan omoyolkokojkej.
6. ¿Tlen okichi Jesús ijkuak okiyolitijkej?
6 Jesús okimatiaya idiscípulos omoyolkokouayaj porque ye okimiktijkej. Ye okimatiaya ijkuak ijkon omomachiliayaj amo kijtosneki ayakmo otlaneltokayaj. Ikinon ijkuak okiyolitijkej san niman okinyolchika. Jesús okimonextili María Magdalena ijkuak ochokatoka kanin ye otoktoka (Juan 20:11, 16). Satepan okinmonextili ome discípulos tlen otimotlapouijkej kanin peua nin tlamachtil. Noijki okimonextili apóstol Pedro (Luc. 24:34). ¿Tlen techmachtia tlen okichi Jesús? Matikitakan tlen opanok ijkuak okimonextili María Magdalena.
7. ¿Tlen okitak Jesús okichijtoka María uan ken okiyolchika? (Juan 20:11-16; noijki xikita dibujo).
7 (Xiktlajtolti Juan 20:11-16). 16 de Nisán sekimej siuamej kualkan oyajkej kanin Jesús otoktoka (Luc. 24:1, 10). Se siuatl tlen ompa oyajki omotokayotiaya María Magdalena. Ijkuak ompa oajsito uan otlachixki kanin otoktoka Jesús, amikaj ompa okatka ikinon san niman oyajki okinmiluito Pedro uan Juan. Yejuan san niman otlachiatoj kanin otoktoka Jesús uan María noijki inuan oyajki. Yejuan okitakej melauak amikaj ompa okatka uan omokopkej inkalijtik. Pero María ompa omoka chokatok. Ye amo okimatiaya pero Jesús okitoka. Ye okiknomatki non siuatl ijkuak okitak ken ochokaya. Ikinon okimonextili uan itlaj okichi tlen okiyolchika. Opejki iuan motlapouia uan okinauati makinmiluiti discípulos ye okiyolitijkej (Juan 20:17, 18).
Matikchiuakan ijkon ken Jesús ijkuak tikitaj tlen kinpanoua oksekimej uan matikinmajsikamatikan ijkuak moyolkokouaj. (Xikita párrafo 7).
8. ¿Ken uelis tikchiuaskej ijkon ken Jesús okichi?
8 ¿Ken uelis tikchiuaskej ijkon ken Jesús okichi? Matikinyolchikauakan tokniuan nochipa makitekichiuilikan Jehová. Ikinon matikitakan tlen kinpanoua, matikinmajsikamatikan uan kuali matikintlapouikan. Matikitakan tlen okipanok se tokni itoka Jocelyn ijkuak ikni itlaj okipanok uan oixpoliuik. Ye okijto: “Miak metstli sapanoua onimoyolkokouaya”. Pero se tokni iuan isiua okiluijkej mauia inkalijtik, kuali okikakej, okajsikamatkej uan okiluijkej Jehová kipatioita. Jocelyn okijto: “Ijkuakon amo onikmatiaya tlen nikchiuas uan onimomachiliaya ken niyetoskia ijtik mar kanin motlauiteki atl. Pero Jehová okinyolini nonmej tokniuan manechpaleuikan uan yetoskia ken onechkixtijkej ijtik mar. Onechyolchikajkej oksepa maniktekichiuili Jehová”. Tejuan noijki uelis tikinyolchikauaskej oksekimej tla kuali tikinkakij ijkuak techiluiaj ken momachiliaj. Ijkon uelis tikinyolseuiskej uan tikinpaleuiskej makitekichiuilikan Jehová (Rom. 12:15).
MATIKINPALEUIKAN OKSEKIMEJ OKACHI MAKAJSIKAMATIKAN ITLAJTOL TOTAJTSIN DIOS
9. ¿Tlen ok omonekiaya kichiuaskej idiscípulos Jesús uan ken okinpaleui?
9 Idiscípulos Jesús okineltokayaj iTlajtol toTajtsin Dios uan omochijchikauayaj kichiuaskej tlen ompa kijtoua (Juan 17:6). Pero amo okajsikamatiayaj tleka okimiktijkej Jesús ken se tlakatl tlen okichi itlaj amo kuali. Jesús okimatiaya idiscípulos kuali okipiayaj inyelis pero omonekiaya okachi kajsikamatiskej iTlajtol toTajtsin Dios (Luc. 9:44, 45; Juan 20:9). Ikinon okinpaleui makajsikamatikan tlen kijtosneki tlen okitlajtoltiayaj. Matikitakan tlen okichi Jesús ijkuak okinmonextili ome discípulos ijkuak oyayaj Emaús.
10. ¿Ken okajsikamatkej idiscípulos Jesús ye okatka Mesías? (Lucas 24:18-27).
10 (Xiktlajtolti Lucas 24:18-27). Jesús itlaj okintlajtlani ijkuak inuan oyaya idiscípulos uan amo san niman okinmilui akin okatka ye. ¿Tleka? Xamo okinekiaya achto kimatis tlen omokuayejyekouayaj uan ken omomachiliayaj. Ikinon yejuan okiluijkej ken omokuayejyekouayaj uan ken omomachiliayaj. Okiluijkej yejuan okichiayaj Jesús makinnauati israelitas uan ayakmo matlanauatikan romanos. Ijkuak okiluijkej tlen okintekipachouaya, ye okinpaleui ika iTlajtol toTajtsin Dios makajsikamatikan omochijkej miakej profecías. b Satepan ijkuak yotlayouak noijki okinmitato oksekimej discípulos uan noijki okinyekilui tlen kijtosneki nonmej profecías (Luc. 24:33-48). ¿Tlen techmachtia tlen okichi Jesús?
11, 12. (1) ¿Tlen techmachtia tlen okichi Jesús ijkuak okinpaleui oksekimej makajsikamatikan iTlajtol toTajtsin Dios? (Noijki xikinmita fotos). (2) ¿Ken okipaleui Nortey tlen okilui akin okimachtiaya?
11 ¿Ken uelis tikchiuaskej ijkon ken Jesús okichi? Ijkuak ikaj tikmachtiaj, matiktlajtlanikan seki tlamantli tlen techpaleuis matikmatikan tlen mokuayejyekoua uan ken momachilia (Prov. 20:5). Satepan uelis tikpaleuiskej makintemo seki textos tlen ika mopaleuis makimati tlen kichiuas. Amo matikiluikan tlen moneki kichiuas. Okachi kuali matiktlajtlanikan ken kipaleuiaj nonmej textos. Matikitakan tlen okipanok se tokni itoka Nortey tlen chanti Ghana.
12 Nortey opejki momachtia Biblia ijkuak okipiaya 16 xiuitl. Pero ifamilia amo okipakti mamomachti. ¿Tlen okipaleui ok mamomachti? Akin okimachtiaya okititi Mateo capítulo 10 uan okiyekilui ompa kijtoua kintlajyouiltiskiaj akinmej kichiuaj ken Cristo. Nortey okijto: “Onikajsikamatki onimomachtiaya tlen melauak porque nofamilia opejki nechtlajyouiltia”. Akin okimachtiaya noijki okititi Mateo 10:16 kanin kijtoua matimotlachilikan. Okipaleui mamokuayejyeko ken uelis ijkon kichiuaskia ijkuak kinmiluiskia ifamilia tlen omomachtijtoka. Satepan ijkuak Nortey omoapolakti okinekiaya mochiuas precursor pero ipapa okinekiaya okachi mamomachti. Tokni tlen okimachtiaya amo okilui tlen omonekiaya kichiuas. Ye okitlajtlani seki tlamantli tlen kipaleuiskia mamokuayejyeko uan noijki okititi principios bíblicos. ¿Tlen okichi Nortey? Ye omochi precursor regular uan ipapa okilui mauia uan ayakmo inuan machanti. Ye okijto ken omomachiliaya: “Nikita kuali tlen onikchi”. Non kiteititia tikinpaleuiaj oksekimej matlaneltokakan ijkuak tikinpaleuiaj makajsikamatikan iTlajtol toTajtsin Dios (Efes. 3:16-19).
Tikchiuaj ken Jesús ijkuak tikinpaleuiaj oksekimej makajsikamatikan iTlajtol toTajtsin Dios. (Xikita párrafo 11). e
MATIKINMACHTIKAN OKSEKIMEJ OKACHI MATLAPALEUIKAN
13. ¿Tlen okichi Jesús ijkuak ayamo oyaya iluikak? (Efesios 4:8).
13 Jesús okichi ika nochi iyolo tekitl tlen okinauati iTajtsin ijkuak okatka nikan tlaltikpak (Juan 17:4). Pero ye amo keman omokuayejyeko san ye omonekiaya kichiuas non tekitl para kuali makisa. Ikinon ijkuak ye otetlapoui eyi xiuitl uan tlajko nikan tlaltikpak, okinmachti oksekimej noijki ijkon makichiuakan. Ye okimatiaya idiscípulos kichiuaskiaj kuali tekitl tlen okinnauati. Ikinon okinmilui matetlapouikan, makinmachtikan oksekimej kuali tlajtoli uan makinmaluikan ichkatsitsiuan Jehová. Ijkon okinmilui makichiuakan maski sekimej idiscípulos ayamo okipiayaj 30 xiuitl (xiktlajtolti Efesios 4:8). Nonmej discípulos yotetlapouiayaj iuan Jesús. Pero ye ok okinmachti okseki tlamantli ijkuak ayamo oyaya iluikak uan non kinpaleuiskia okachi kuali makichiuakan inteki. Matikitakan tlen okinmachti.
14. ¿Ken okinpaleui Jesús idiscípulos okachi matlaneltokakan? (Noijki xikita dibujo).
14 Jesús okiteititi okintlasojtlaya idiscípulos porque okinyekilui tlen omonekiaya kichiuaskej. Ijkuak Jesús okiyolitijkej, sekimej idiscípulos amo okineltokayaj ikinon okinyekilui omonekiaya kineltokaskej yokiyolitijkej (Luc. 24:25-27; Juan 20:27). Okinmilui makinpaleuikan tokniuan uan amo san makixnekikan kipiaskej tomin (Juan 21:15). Noijki okinmilui amo san makitakan tlen tekitl okipiayaj oksekimej itech tlanechikol (Juan 21:20-22). Discípulos amo okajsikamatiayaj keman tlanauatiskia iTekiuajkayo toTajtsin Dios. Ikinon ye okinpaleui makajsikamatikan uan makitakan okachi ipati tetlapouiskej (Hech. 1:6-8). ¿Tlen kinmachtia tlayekankej tlen okichi Jesús?
Tikchiuaj ken Jesús ijkuak tikinpaleuiaj oksekimej tokniuan okachi matlapaleuikan. (Xikita párrafo 14).
15, 16. (1) ¿Ken uelis kichiuaskej tlayekankej ijkon ken okichi Jesús? (2) ¿Ken okipaleuijkej Patrick?
15 ¿Ken uelis kichiuaskej tlayekankej ijkon ken Jesús okichi? Uelis kinmachtiskej tokniuan makichiuakan seki tekitl uan noijki uelis kinpaleuiskej telpochmej okachi matlapaleuikan itech tlanechikol. c Pero moneki kilnamiktoskej tokniuan uelis motlapololtiskej ijkuak kichiuaskej inteki. Ikinon moneki kinyekiluiskej telpochmej ken moneki kichiuaskej inteki. Noijki makinmiluikan tleka moneki mayetokan yolyamankej, makichiuakan tlen kinmiluiaj uan makinpaleuikan tokniuan (1 Tim. 3:1; 2 Tim. 2:2; 1 Ped. 5:5).
16 Matikitakan tlen okipanok se tokni itoka Patrick. Ijkuak ye okatka telpochtli amo okinyeknotsaya tokniuan. Se tlayekanki okitak tlen okichiuaya uan okiyekilui amo ijkon makichiua. Patrick okijto: “Niktlasojkamatilia tlen onechilui non tokni porque onimoyolkokouaya ijkuak onikinmitaya oksekimej okinmakayaj tekitl tlen ne oniknekiaya nikchiuas. Tlen onechilui tokni onechpaleui maniyeto niyolyamanki uan manikinpaleui tokniuan. Noijki onechpaleui amo san manikneki nikpias se tekitl itech tlanechikol”. Ikinon ijkuak okipiaya 23 xiuitl okiluijkej matlapaleui ken tlayekanki (Prov. 27:9).
17. ¿Ken okiteititi Jesús okinneltokiliaya idiscípulos?
17 Jesús okinnauati idiscípulos matetlapouikan uan matlamachtikan (Mat. 28:20). Xamo discípulos omokuayejyekojkej amo uelis kichiuaskiaj tekitl tlen okinnauati Jesús. Pero ye okinyolchika uan okineltokaya uelis kichiuaskiaj non tekitl. Ikinon okinmilui: “Ne namechtitlanis ijkon ken noTajtsin onechualtitlanki” (Juan 20:21).
18. ¿Ken kichiuaskej tlayekankej ijkon ken Jesús okichi?
18 ¿Ken kichiuaskej tlayekankej ijkon ken Jesús okichi? Tlayekankej tlen yimiak xiuitl kitekichiuiliaj Jehová moneki kinmachtiskej oksekimej makichiuakan seki tekitl itech tlanechikol (Filip. 2:19-22). Uelis kinmiluiskej telpochmej matlachipauakan kanin timonechikouaj uan matlapaleuikan ijkuak tlayektlaliaj. Ijkuak tlayekankej kimakaskej se tekitl tokni, makineltokakan kuali kichiuas iteki porque yokimachtijkej ken kichiuas. Se tokni itoka Matthew tlen yikin opejki tlapaleuia ken tlayekanki, motlasojkamati porque tlayekankej kimachtiaj ken kichiuas iteki uan kineltokiliaj ijkon kichiuas. Ye okijto: “Tlayekankej nechpaleuiaj maski nimotlapololtia pero ok nechmachtiaj kuali manikchiua noteki”. d
19. ¿Tlen moneki nochipa matikchiuakan?
19 Ijkuak Jesús ok okatka 40 tonal nikan tlaltikpak, okinyolchika idiscípulos, okinmachti uan okinpaleui makichiuakan okseki tekitl. Ikinon nochipa matikchiuakan ijkon ken ye okichi (1 Ped. 2:21). Ye techpaleuis ijkon matikchiuakan porque okijto: “Nochipa namouan niyetos hasta ijkuak tlamis tlen axkan onka” (Mat. 28:20).
TLAKUIKALI 15 ¡Cristo ueyititok!
a Evangelios uan okseki amochmej tlen kinpia Biblia kiteititiaj Jesús okinmonextili idiscípulos miak uelta ijkuak okiyolitijkej. Okimonextili María Magdalena (Juan 20:11-18). Okinmonextili oksekimej siuamej (Mat. 28:8-10; Luc. 24:8-11). Noijki okinmonextili ome idiscípulos (Luc. 24:13-15). Okimonextili Pedro (Luc. 24:34). Noijki ijkuak okinmonextili apóstoles pero amo okimonextili Tomás (Juan 20:19-24). Ijkuak okinmonextili apóstoles uan noijki Tomás (Juan 20:26). Ijkuak okinmonextili chikome discípulos (Juan 21:1, 2). Okinmonextili kanaj 500 discípulos (Mat. 28:16; 1 Cor. 15:6). Okimonextili ikni tlen omotokayotiaya Santiago (1 Cor. 15:7). Okinmonextili nochtin iapóstoles (Hech. 1:4). Okinmonextili iapóstoles ik ompa Betania (Luc. 24:50-52). Xamo noijki okseki uelta okinmonextili idiscípulos pero amo ijkuilitok (Juan 21:25).
b Itech jw.org tikinmajsis seki profecías tlen omochijkej itech Mesías kanin kijtoua “¿Kiteititiaj profecías tlen moijtoua itech Biblia Jesús ye Mesías?”.
c Ualeua sekimej tlayekankej tlen kipiaj kanaj 25 xiuitl noso 30 xiuitl kintlaliaj mayetokan tlayekankej itech circuito. Pero moneki yikimatiskej ken kichiuaskej seki tekitl tlen okinmachtijkej ijkuak otlapaleuiayaj ken tlayekankej.
d Xikita revista Akin Tetlapouijtok agosto 2018 páginas 11, 12, párrafos 15 hasta 17 uan revista Akin Tetlapouijtok 15 de abril 2015 páginas 3 hasta 13. Ompa kijtoua seki tlamantli tlen kiteititia moneki makinpaleuikan telpochmej okachi makichiuakan seki tekitl itech tlanechikol.
e FOTO: Se tokni kipaleuia akin kimachtia mamokuayejyeko tlen kijtoua Biblia uan ye okitlamotlato tlen ika iluichiua.
