TLAMACHTIL 43
TLAKUIKALI 90 Ma timoyolchikauakan
¿Tlen techpaleuis tla timotlajtlaniaj kox kuali tlen otikpejpenkej tikchiuaskej?
“Nochi kuali xikitakan” (1 TES. 5:21).
NIN TLEN TIMOMACHTISKEJ
Axkan timomachtiskej tlen techpaleuis ayakmo matimotlajtlanikan kox kuali otikpejpenkej tiktekichiuiliskej Jehová.
1, 2. (1) ¿Tlen tlamantli xamo timotlajtlaniaj? (2) ¿Tlen timomachtiskej?
UALEUA tinochtin timotlajtlaniaj kox kuali tlen tikchijtokej. a Matimokuayejyekokan se telpochtli motlajtlania kox Jehová kipatioita ikinon amo mixeuia moapolaktis. Noijki matimokuayejyekokan se tokni okipejpenki kitekichiuilis Jehová ijkuak okatka telpochtli uan amo okipejpenki kipias miak tomin. Pero axkan kipia ifamilia uan kita amo kajxilia tomin para kimakas ifamilia tlen ika mopanoltis. Ikinon xamo motlajtlania kox kuali tlen okichi ijkuak okatka telpochtli. Okse kimachilia ayakmo kitekichiuilia Jehová ijkon ken achto okichiuaya porque ayakmo chikauak. Xamo ualeua tejuan noijki timotlajtlaniaj: “¿Kitekipachoua Jehová tlen nechpanoua? ¿Kipatioita nochi tlen yonikchi para niktekichiuilis? ¿Ok kipatioita Jehová tlen nikchiua?”.
2 Ayakmo okachi titlaneltokaskej tla ijkon timokuayejyekouaj uan ayakmo tiktekichiuiliskej Jehová. Axkan timomachtiskej iTlajtol toTajtsin Dios techpaleuis tla timokuayejyekouaj ye amo kitekipachoua tlen techpanoua. Noijki tla timokuayejyekouaj kox kuali tlen otikpejpenkej tikchiuaskej uan kox kipatioita Jehová tlen tikchiuaj.
¿TLEN TECHPALEUIS MATIMOYOLCHIKAUAKAN IJKUAK ITLAJ TIMOTLAJTLANIAJ?
3. ¿Tlen techpaleuis matimoyolchikauakan tla timotlajtlaniaj kox kuali tlen tikchijtokej?
3 ITlajtol toTajtsin Dios techpaleuis matimoyolchikauakan tla timotlajtlaniaj kox kuali tlen tikchijtokej. Noijki techpaleuis okachi matitlaneltokakan uan okachi kuali matimouikakan iuan Jehová uan ijkon ‘nochipa titlaneltokaskej’ (1 Cor. 16:13).
4. ¿Ken techpaleuis tlen kijtoua 1 Tesalonicenses 5:21?
4 (Xiktlajtolti 1 Tesalonicenses 5:21). ITlajtol toTajtsin Dios techiluia: “Nochi kuali xikitakan”. ¿Ken tikchiuaskej non tlamantli? Matikitakan tlen kijtoua Biblia ijkuak timotlajtlaniaj kox kuali tlen tikchijtokej. Matikijtokan se telpochtli motlajtlania kox kitekipachoua Jehová tlen kipanoua. ¿Kipaleuis tla san motlajtlanijtos non tlamantli? Amo. Moneki kitas tlen kijtoua Biblia uan ijkon kimatis tlen mokuayejyekoua Jehová.
5. ¿Tlen tikchiuaskej tla tiknekij tikkakiskej tlen techiluia Jehová?
5 Ijkuak tiktlajtoltiaj iTlajtol toTajtsin Dios yetoskia ken ye techtlapouia. Pero moneki itlaj tikchiuaskej tla tiknekij tikkakiskej tlen techiluia Jehová ijkuak itlaj timotlajtlaniaj. Matikintemokan textos ijkuak itlaj techtekipachos uan matitlatemokan itech amatlajkuilolmej tlen techinmaka ialtepe (Prov. 2:3-6). Matiktlatlaujtikan Jehová matechpaleui matikajsikan tlen tiknekij tikmatiskej. Matikintemokan principios bíblicos tlen ika timoyekanaskej uan okseki tlamantli tlen techpaleuis. Noijki matimomachtikan tlen okichijkej yiuejkika akinmej noijki okinpanok ijkon ken tejuan.
6. ¿Ken techpaleuis tla nochipa timonechikoskej?
6 Noijki tikkakij Jehová ijkuak nochipa timonechikouaj. Sapanoua techpaleuia ijkuak timonechikouaj porque ompa tikinkakij tlamachtilmej noso tlen tlanankiliaj tokniuan. Non techpaleuis matiknankilikan tlen timotlajtlaniaj (Prov. 27:17). Axkan matikitakan tlen uelis timotlajtlaniskej uan tlen techpaleuis ayakmo ijkon matimotlajtlanikan.
¿TECHPATIOITA JEHOVÁ?
7. ¿Tlen tlamantli xamo timotlajtlaniaj?
7 Xamo se tonal yotimotlajtlanijkej kox kitekipachoua Jehová tlen techpanoua. Xamo timokuayejyekouaj amo keman timouikaskej iuan Jehová porque ye sapanoua ueyititok. Tekiua David nesi noijki ijkon omokuayejyeko ikinon okijto: “Jehová ¿tlen ipati tlakatl para xikilnamikto? ¿Tlen ipati ikone tlakatl para xikmalui?” (Sal. 144:3). ¿Kanin kijtoua toTajtsin Dios kitekipachoua tlen techpanoua?
8. ¿Tlen tlamantli kita Jehová ijkon ken kijtoua 1 Samuel 16:6, 7, 10-12?
8 ITlajtol toTajtsin Dios kiteititia ye kinpatioita akinmej oksekimej amo kinpatioitaj. Matikitakan tleka ijkon tikijtouaj. Yiuejkika, Jehová okititlanki Samuel mauia ikalijtik Jesé makipejpenati se ikone tlen yetoskia tekiua ompa Israel. Jesé okinnotski chikome itelpochuan pero amo okinotski David tlen okatka okachi tsikitsin. b Pero Jehová okipejpenki David (xiktlajtolti 1 Samuel 16:6, 7, 10-12). ¿Tleka Jehová ijkon okichi? Porque okitak ken iyelis David uan okitak okitlasojtlaya miak.
9. ¿Ken tikmatij Jehová techpatioita? (Noijki xikita foto).
9 Matimokuayejyekokan nochi tlen topatka yokichi Jehová porque techpatioita. Techmachtia tlen moneki tikchiuaskej (Sal. 32:8). Ijkon kichiua porque kuali techixmati (Sal. 139:1). Tikitaskej Jehová kitekipachoua tlen techpanoua tla tikchiuaj tlen techiluia porque techpaleuia tlen technauatia (1 Crón. 28:9; Hech. 17:26, 27). Ye kipatioita tlen tikchiuaj uan kita tikpiaj kualtsin toyelis (Jer. 17:10). ToTajtsin Dios kineki iuan matimouikakan (1 Juan 4:19).
“Tla te tiktemos, ye motekauilis xikajsi” (1 Crón. 28:9). (Xikita párrafo 9). c
¿KUALI OTIKPEJPENKEJ TLEN TIKCHIUAJ?
10. ¿Tlen uelis ikaj motlajtlanis tla okipejpenki kitekichiuilis Jehová?
10 Xamo ikaj motlajtlania kox kuali tlen okipejpenki kichiuas. Xamo amo okiseli se tekitl kanin kuali kitlaxtlauiskiaj noso amo okitlali se tlanemaktli porque okinekiaya okachi kitekichiuilis Jehová. Pero axkan kita kuali katej akinmej kinmixmati porque yejuan okitemojkej kipiaskej miak tomin. Ikinon xamo motlajtlania: “¿Kipatioita Jehová tlen onikchi porque onikpejpenki okachi niktekichiuilis?”. Noso “¿okachi kuali niyetoskia tla nikchiuaskia okse tlamantli?”.
11. ¿Tleka amo kuali omomachiliaya akin okijkuilo Salmo 73?
11 Ximokuayejyeko ken omomachili akin okijkuilo Salmo 73 tla se tonal ijkon yotimotlajtlani. Ye okitaya okachi kuali okatkaj akinmej amo okitekichiuiliayaj Jehová porque amo omokokouayaj, kuali okatkaj uan okipiayaj miak tomin (Sal. 73:3-5, 12). Ikinon omokuayejyekouaya amitlaj ipati okitekichiuiliaya Jehová. Ye mojmostla omotlajtlaniaya tleka ijkon okipanouaya uan san omokuayejyekouaya tlen amo kuali okipanotoka (Sal. 73:13, 14). ¿Tlen okipaleui ayakmo ijkon mamokuayejyeko?
12. Ijkon ken kijtoua Salmo 73:16-18, ¿tlen okipaleui kuali mamokuayejyeko akin okijkuilo Salmo?
12 (Xiktlajtolti Salmo 73:16-18). Akin okijkuilo Salmo oyajki kanin okiueyichiuayaj Jehová. Ompa kuali omokuayejyeko porque amikaj okikuejsouaya. Okajsikamatki amitlaj kiseliskiaj akinmej kuali okatkaj. Okitak okachi miak ipati kitekichiuilis Jehová uan non okipaleui mamoyolseui uan mamoyolchikaua (Sal. 73:23-28).
13. ¿Tlen techpaleuis matimoyolseuikan? (Xikinmita fotos).
13 Tejuan uelis timoyolseuiskej ijkon ken akin okijkuilo Salmo. ¿Ken uelis ijkon tikchiuaskej? Matimokuayejyekokan ken techteochiua Jehová uan kiselia tlen tikchiuaj. Pero ye amo kinpaleuia akinmej amo kitekichiuiliaj. Yejuan san kintekipachoua tekipanoskej uan kuali yetoskej pero amo kichiaj itlaj kiseliskej satepan. Pero Jehová kijtoua tejuan techteochiuas miak (Sal. 145:16). Amo tikmatij ken tiyetoskiaj tla tikpejpenaskiaj tikchiuaskiaj okseki tlamantli. Pero matikilnamiktokan amitlaj kinpolos akinmej kipejpenaj kitekichiuiliskej Jehová. Ijkon kichiuaj porque kitlasojtlaj toTajtsin Dios uan oksekimej.
Nochipa matikilnamiktokan tlen kichiuas Jehová. (Xikita párrafo 13). d
¿KOX KIPATIOITA JEHOVÁ TLEN TIKCHIUAJ?
14. ¿Tlen kinpanoua sekimej tokniuan uan tlen motlajtlaniaj?
14 Sekimej tokniuan kinpaktiskia okachi kitekichiuiliskej Jehová. Pero amo ueli ijkon kichiuaj porque yikipiaj miak xiuitl, mokokouaj uan xamo oksekimej amo ueli kichiuaj okseki tlamantli. Ikinon xamo mokuayejyekouaj Jehová amo kinpatioita uan motlajtlaniaj: “¿Kipatioita Jehová tlen nikchiua?”.
15. ¿Tlen okimatiaya akin okijkuilo Salmo 71?
15 Noijki ijkon omomachiliaya akin okijkuilo Salmo 71. Ikinon okilui Jehová: “Amo techkaua ijkuak ayakmo nichikauak” (Sal. 71:9, 18). Pero ye okimatiaya toTajtsin Dios nochipa kiyekanaskia uan kipaleuiskia tla nochipa kitekichiuiliskia. Okajsikamatki tikyolpaktiaj Jehová tla timochijchikauaj tiktekichiuiliskej maski ualeua oui ijkon tikchiuaskej (Sal. 37:23-25).
16. ¿Tleka tikijtouaj Jehová sapanoua kinpatioita tokniuan tlen kipiaj miak xiuitl? (Salmo 92:12-15).
16 Tla yitikpiaj miak xiuitl, matimokuayejyekokan Jehová techtlasojtla miak uan techpatioita. Ok uelis titlapaleuiskej maski ayakmo tichikauakej uan Jehová techpaleuis ijkon matikchiuakan (xiktlajtolti Salmo 92:12-15). Amo san matimokuayejyekojtokan tlen amo uelis tikchiuaskej. Matimokuayejyekokan tlen uelis tikchiuaskej. Tokniuan kitaskej tlen tikchiuaj uan non kinyolchikauas porque techtekipachoua tlen kinpanoua. Noijki matikintlapouikan tokniuan ken yotechpaleui Jehová uan matikinmiluikan tikchiaj mamochiua tlen ye yokijto kichiuas. Noijki matikilnamiktokan sapanoua tlapaleuia ijkuak timotlatlaujtiaj inpatka oksekimej (1 Ped. 3:12). Tinochtin uelis tiktekichiuiliskej Jehová uan tikinpaleuiskej oksekimej maski tlatlamantli titlajyouiaj.
17. ¿Tleka amo san matikitakan tlen oksekimej kichiuaj?
17 Matikilnamiktokan Jehová sapanoua kipatioita tlen tikchiuaj maski ayakmo tiktekichiuiliaj ijkon ken achto otikchiuayaj. Ualeua xamo san tikitaj tlen oksekimej kichiuaj pero amo ijkon matikchiuakan. ¿Tleka ijkon tikijtouaj? Porque Jehová amo keman ijkon kichiua (Gál. 6:4). Matikitakan tlen opanok yiuejkika. María okikxitlalili Jesús se aceite tlen okatka ajuiak uan patio (Juan 12:3-5). Pero okse siuatl tlen yoixpoliuik inamik uan amo okipiaya miak tlamantli, okintemakak ome tomintsitsintin tlen amo miak ipati (Luc. 21:1-4). Pero Jesús okipatioitak tlen okichijkej ninmej ome siuamej porque okiteititijkej otlaneltokayaj. Jehová sapanoua kipatioita tlen tikchiuaj porque tiktlasojtlaj uan tiktlakamatij maski tejuan tikitaj amitlaj ipati tlen tikchiuaj.
18. ¿Tlen techpaleuis ayakmo matimotlajtlanikan kox kuali tlen otikpejpenkej tikchiuaskej? (Noijki xikita recuadro “ ITlajtol toTajtsin Dios mitspaleuis ayakmo ximotlajtlani kox kuali tlen otikpejpenki tikchiuas”).
18 Tinochtin timotlajtlaniaj kox kuali tlen tikchijtokej. Pero yotimomachtijkej iTlajtol toTajtsin Dios techpaleuia matimoyolchikauakan uan matikneltokakan kuali tlen otikpejpenkej tikchiuaskej. Ikinon nochipa matiktemokan itech Biblia tlen timotlajtlaniaj uan kuali timomachiliskej porque timoyolchikauaskej. Jehová kitekipachoua tlen techpanoua, kipatioita tlen tikchiuaj para tiktekichiuiliskej uan kijtoua techteochiuas. Nochipa matikilnamiktokan Jehová techtlasojtla uan tisejse techmaluia porque amo tikkauaj.
TLAKUIKALI 111 ¿Tlen kichiua ma niyolpaki?
a TLEN OKACHI IPATI: Itech nin tlamachtil tikitaskej ijkuak ikaj motlajtlania kox kipatioita Jehová noso motlajtlania kox kuali tlen okipejpenki kichiuas. Amo techiluia ijkuak motlajtlaniaj kox melauak tlen kijtoua Biblia ikinon amo kineltokaj Jehová uan tlen kichiuas.
b Biblia amo kijtoua keski xiuitl okipiaya David ijkuak Jehová okipejpenki para yetoskia tekiua ompa Israel. Pero xamo okatka telpochtli ijkuak okipejpenkej (xikita revista Akin Tetlapouijtok 1 de septiembre 2011 página 29, párrafo 2).
