Akinmej okalakiayaj templo opanouayaj itech se korredor para ajsitiuij kanin Santo. ¿Keski metro okipiaya non korredor? Ijkuak ayamo opeuaya xiuitl 2023 Traducción del Nuevo Mundo okijtouaya itech 2 Crónicas 3:4: “Korredor tlen okatka tlayekapan okatka patlauak ijkon ken kali, okipiaya 20 codos uan ik uejkapan okipiaya 120 codos”. Seki Biblias kijtouaj non korredor okatka uejkapan kanaj “120 codos”. Non kijtosneki okipiaya 53 metros ik uejkapan.

Pero desde 2023 nin versículo omopatlak itech Traducción del Nuevo Mundo uan axkan kijtoua: “Okipiaya 20 codos”. Non kijtosneki okipiaya kanaj 9 metros ik uejkapan. a Matikitakan tleka okipatlakej.

Itech 1 Reyes amo kijtoua keski metro okipiaya ik uejkapan non korredor. 1 Reyes 6:​3, ompa Jeremías okijto ken okatka patlauak uan ueyak pero amo okijto keski metro okatka ik uejkapan. Satepan okijto okseki tlamantli tlen okipiaya templo. Okipiaya se atekochtli kanin omomajtekiayaj uan ochijchitoka ika tepostli, okinpiaya majtlaktli carritos uan okinpiaya ome tlaketsalmej tlen ochijchitokaj ika cobre tlen okatkaj ixpan non korredor (1 Rey. 7:​15-37). Tla non korredor kipiaskia kanaj 50 metros ik uejkapan, okachi uejkapan motaskia uan amo okachi motaskia templo. ¿Tleka Jeremías amo okijto ken okatka non korredor? Opanok miak xiuitl uan sekimej ixtlamatkej judíos okijkuilojkej templo tlen okichijchi Salomón okatka okachi uejkapan uan amo non korredor.

Sekimej ixtlamatkej mokuayejyekouaj templo amo kixikoskia korredor tla okatka 120 codos ik uejkapan. Yiuejkika ijkuak itlaj okichijchiuayaj sapanoua uejkapan ika tetl uan ladrillo, kanin okipeualtiayaj tepamitl okatka sapanoua patlauak pero kanin otlamiaya okatka pitsauak. Ijkon okinchijchiuayaj templos ompa Egipto. Pero templo tlen okichijchi Salomón amo ijkon okichijchi. Sekimej ixtlamatkej mokuayejyekouaj tepamitl tlen okipiaya templo okatka patlauak kanaj 6 codos noso okipiaya 2,7 metros. Se tlakatl itoka tlen Theodor Busink uan momachtia ken okalchiuayaj yiuejkika, okijto: “Xamo korredor amo okipiaya 120 codos porque tepamitl tlen okipiaya templo amo okatka patlauak ik kanin okalakiayaj”.

Xamo amo kuali okijkuilojkej ijkuak okichijkej icopia 2 Crónicas 3:4. Seki copias kijtouaj okipiaya “120”. Pero okseki copias ken Códice alejandrino tlen okijkuilojkej siglo makuili uan Códice ambrosiano tlen okijkuilojkej siglo chikuase kijtouaj okipiaya “20 codos”. ¿Tleka tlatlamantli okijkuilojkej? Porque ika hebreo tlajtoli cien uan codos omotaya san se tlamantli ijkuilitok. Ikinon xamo ijkuak ikaj omonekiaya kijkuilos “20 codos”, okijkuilo “120”.

Miak ipati matikajsikamatikan ken ochijchitoka templo tlen okichijchi Salomón pero okachi ipati matikajsikamatikan non templo okiteititi templo espiritual. Sapanoua tiktlasojkamatiliaj Jehová porque techkauilia matiktekichiuilikan itech itemplo espiritual (Heb. 9:​11-14; Apoc. 3:12; 7:​9-17).