IJKUAK omochi Segunda Guerra Mundial, se soldado nazi okinmilui sekimej ITlaixpantijkauan Jehová: “Tla namejuan amo nankinekij nanmoteuiskej iuan akinmej chantij Francia noso Inglaterra, nanmechmiktiskej”. Amo uejka okatkaj miakej soldados nazis, yejuan okipiayaj miak teposmej. Pero tokniuan okatkaj yolchikauakej porque amo okinekej moteuiskej. Ijkon tikchiuaj nochtin tiiTlaixpantijkauan Jehová, amo timoteuiaj ijkuak mochiua guerra uan amo timokajkalakiaj ijkuak moteuiaj tekiuajkej, maski kijtoua techmiktiskej.

1. ISRAELITAS OPOUIAYAJ ITECH SE ALTEPETL

Yiuejkika, Jehová okipejpenki israelitas para mayeto ialtepe uan okinmilui “nanyetoskej noaxkauan tlen nikpatioita itech nochi okseki altepemej” (Éx. 19:5). ToTajtsin Dios okinmakak kanin chantiskiaj uan ijkuak okinmiluiayaj mamoteuitij iuan okseki altepemej, yejuan amo okinteuiayaj nion okinmiktiayaj oksekimej israelitas. a

Axkan, tiitekipanojkauan Jehová tikatej itech ‘nochi altepemeh non tlatlamantli titlachixtokeh  iwa tlatlamantli totlajtol tikpiah’ (Apoc. 7:9). Ikinon amo timoteuiaj itech guerras porque tla ijkon tikchiuaj xamo tikinmiktiskej tokniuan.

2. JEHOVÁ OKINAUATIAYA ISRAELITAS MAYAKAN GUERRAS

Yiuejkika, Jehová okijtouaya keman uan tleka omonekiaya moteuiskej israelitas. Matikilnamikikan ijkuak Jehová okinnauati mamoteuikan iuan cananeos, yejuan okinueyichiuayaj amo kuali ejekamej, sapanoua oauilnemiayaj uan okintlatiayaj inkoneuan. Jehová okinnauati makinmiktikan para ijkon israelitas amo tlajtlakolchiuaskiaj (Lev. 18:24, 25). Ijkuak israelitas yokatkaj itech tlali tlen Jehová okinmilui kinmakaskia, okinkauili mamoteuitij iuan akinmej okinkokoliayaj (2 Sam. 5:17-25). Pero Jehová amo okinkauiliaya yejuan makinpejpenakan mayakan guerra, ikinon ijkuak inselti ijkon okichiuayaj otlajyouiayaj (Núm. 14:41-45; 2 Crón. 35:20-24).

Axkan, Jehová amo technauatia matikchiuakan guerras. Miakej altepemej kichiuaj san tlen yejuan kinekij uan amo tlen toTajtsin Dios kipaktia. Yejuan kichiuaj guerras porque kinekij kipiaskej okachi miak tomin, kinmoaxkatiskej okseki altepemej, mokajkalakiskej itech política uan kichiuaskej tlen mokuayejyekouaj. Jehová amo kinpaleuia akinmej kijtouaj ipatka kichiuaj guerras uan kinmixpolouaj akinmej kixnamikij. Ijkuak panotos guerra Armagedón, Jehová kinmixpolos akinmej kixnamikij uan kinmakixtis akinmej kitekichiuiliaj (Apoc. 16:14, 16). Itekipanojkauan Jehová tlen katej tlaltikpak amo moteuiskej itech non guerra, san moteuiskej itekipanojkauan tlen katej iluikak (Apoc. 19:11-15).

3. ISRAELITAS AMO OKINMIKTIAYAJ AKINMEJ OKINELTOKAYAJ JEHOVÁ

Yiuejkika, israelitas amo okinmiktiayaj akinmej okiteititiayaj okineltokayaj Jehová,  san okinmiktiayaj akinmej Jehová okinmixkomakaya. Matikitakan ken okichijkej. Maski Jehová okinnauati israelitas makipojpolokan altepetl Jericó, yejuan okinmakixtijkej Rahab uan nochi ifamilia porque okineltokakej Jehová (Jos. 2:9-16; 6:16, 17). Satepan Jehová okintlapojpolui akinmej ochantiayaj Gabaón porque opejkej kiueyichiuaj (Jos. 9:3-9, 17-19).

Axkan, akinmej kichiua guerra amo kintlapojpoluiaj akinmej kineltokaj toTajtsin Dios uan ualeua kinmiktiaj nochtin maski amitlaj okichijkej.

4. ISRAELITAS OKITLAKAMATIAYAJ JEHOVÁ IJKUAK OYAYAJ GUERRA

Yiuejkika, israelitas okitlakamatiayaj Jehová ijkuak oyayaj guerra. Ualeua Jehová okinmiluiaya tlen uelis kichiuaskiaj para amo moteuiskiaj iuan okseki altepemej (Deut. 20:10). Jehová noijki okinnauati soldados omonekiaya yetoskej chipauakej uan kichiuaskiaj tlen kipaktia (Deut. 23:9-14). Jehová amo okinkauili israelitas makinpinatikan siuamej itech altepemej tlen okinmoaxkatiayaj ken okichiuayaj okseki altepemej. Tla yejuan okinekiayaj monamiktiskej iuan se siuatl tlen ochantiaya kanin okimoaxkatijkej altepetl, omonekiaya mochiaskej se metstli (Deut. 21:10-13).

Axkan, miakej altepemej okijkuilojkej seki tlanauatilmej para amo moteuiskej, ijkon miakej mopaleuiaj. Pero ualeua miakej amo kintlakamatij.

5. TOTAJTSIN DIOS OKIPALEUIAYA IALTEPE

Yiuejkika, Jehová okinpaleuiaya israelitas uan ualeua okichi milagros para matlatlanikan. Jehová okinmilui tlen omonekiaya kichiuaskej israelitas ijkuak okimoaxkatijkej Jericó, ijkuak yejuan chikauak otsajtsikej tepamitl oxixinki, ijkon okinmoaxkatijkej non altepetl (Jos. 6:20). Satepan noijki okintlanilijkej amorreos, Jehová okichi “Mauetsi uejueyij tesiuitl ken temej […]. Okachi miakej omikej ika tesiuitl uan amo akinmej israelitas okinmiktijkej ika espada” (Jos. 10:6-11).

AKINMEJ KICHIUAJ KEN CRISTO KUALI MOUIKAJ

Ken yotikitakej tejuan amo tikchiuaj ken israelitas. Pero noijki amo timokajkalakiaj itech guerras porque toTajtsin Dios okijtojka akinmej kitekichiuiliaj amo “momachtiskej guerra” uan amo tlapaleuiskej (Is. 2:2-4). Jesús noijki okijto imachtijkauan amo kichiuaskej ken akinmej amo kitekichiuiliaj Jehová (Juan 15:19).

Jesús noijki okinmachti imachtijkauan amo omonekiaya tekokoliskej, kualaniskej uan amo moteuiskej (Mat. 5:21, 22). Noijki okinmachti kuali mamouikakan iuan oksekimej uan makintlasojtlakan akinmej kinkokoliaj (Mat. 5:9, 44).

Tejuan amo tiauij itech guerras. Pero, ¿ikaj tikokoliaj noso tikchiuaj itlaj para ayakmo kuali mamouikakan tokniuan? Tla tikitaj ijkon tikchijtokej, san niman matikpatlakan tonemilis (Sant. 4:1, 11).

Tejuan amo tikinkokoliaj oksekimej, kuali timouikaj iuan tokniuan uan tikintlasojtlaj (Juan 13:34, 35). Ayakmo miak poliui uan Jehová kichiuas ayakmo mayetokan guerras ikinon amo itech matimokajkalakikan (Sal. 46:9).