1. ¿Tlen kijtosneki ‘moneki tiktemoskej toTajtsin Diosʼ uan ken techpaleuia matiyolpakikan?

 IJKUAK melauak tiyolpakij amo ijkon timomachiliaj san seki tonal, uelis tiyolpakiskej nochipa. Itech tepetl kanin Jesús otlamachti okijto tlen uelis techpaleuis. Ye okijto: “Mayolpakikan akinmej kimatij moneki kitemoskej toTajtsin Dios” (Mat. 5:3, TNM). Ye kimati ijkuak Jehová otechchijchi, okitlali itech toyolo matiknekikan tikixmatiskej uan matikueyichiuakan. Non kiteititia Biblia ijkuak kijtoua “akinmej kimatij moneki kitemoskej toTajtsin Dios”. Jehová yolpaki ikinon kineki akinmej kitekichiuiliaj noijki matiyolpakikan (1 Tim. 1:11, TNM).

2, 3. (1) ¿Akinmej okijto Jesús noijki uelis yolpakiskej? (2) ¿Tlen tikitaskej uan tleka ipati?

² ¿Moneki nochi tikpiaskej para tiyolpakiskej? Amo. Itech tepetl kanin Jesús otlamachti okijto itlaj tlen tetlajtlachialti. Ye okijto: “akimeh tlaijyowiah” noijki uelis yolpakiskej maski otlajtlakolchijkej noso kinpanotok tlen amo kuali. Noijki okijto uelis yolpakiskej akinmej kintlajyouiltiaj porque kitematiltiaj toTajtsin Dios kichiua tlen kuali noso porque mochiuaj imachtijkauan (Mat. 5:4, 10, 11). Pero, ¿ken uelis tiyolpakiskej maski titlajyouiskej?

³ Jesús otlamachti amo moneki tikpiaskej nochi para melauak tiyolpakiskej. Okijto okachi ipati matiktemokan toTajtsin Dios uan iuan matimouikakan (Sant. 4:8).  ¿Ken uelis tikchiuaskej? Axkan tikitaskej eyi tlamantli tlen techpaleuis melauak matiyolpakikan.

4. ¿Tlen uelis tikchiuaskej para melauak tiyolpakiskej? (Salmo1:1-3).

⁴ SE: Melauak tiyolpakiskej tla timomachtiaj Biblia. Tejuan uan yolkamej moneki titlakuaskej para tiyoltoskej. Pero san tejuan uelis timomachtiskej Biblia uan moneki ijkon tikchiuaskej. Ikinon Jesús okijto: “N tlakatl amo san ika paj yolitok, yej noiwa ika nochi tlájtoli non Dios kijtoa” (Mat. 4:4). Moneki mojmostla tiktlajtoltiskej iTlajtol toTajtsin Dios. Se salmista okijto: “Yolpaki tlakatl [...] ye moyolpaktia ika itlanauatil Jehová uan tonal uan youak ichtakatsin kitlajtoltia itlanauatil” (xiktlajtolti Salmo 1:1-3).

5, 6. (1) ¿Tlen timomachtiaj itech Biblia? (2) ¿Ken techpaleuia ijkuak tiktlajtoltiaj Biblia?

⁵ Jehová techtlasojtla ikinon itech Biblia techtlapouia tlen uelis tikchiuaskej para tiyolpakiskej. Noijki ompa kijtoua ken uelis iuan timouikaskej, tleka otechchijchi uan tlen moneki tikchiuaskej tla tiknekij matechtlapojpolui. Noijki kijtoua tlen kichiuas satepan (Jer. 29:11). Sapanoua tiyolpakij ijkuak timomachtiaj Biblia uan tikajsikamatij tlen ompa kijtoua.

⁶ Biblia techmachtia tlen uelis techpaleuis tiyolpakiskej ijkuak tikchiuaskej tlen ompa kijtoua. Ikinon tla  tikmachiliaj ayakmo titlaxikouaj porque techpanotok tlen amo kuali, matimomachtikan iTlajtol toTajtsin Dios uan matimokuayejyekokan tlen ompa kijtoua. Jesús okijto: “Okachi kuali yolpakilisojkeh akimeh kikakih itlajtol Dios iwa kitlakitah” (Luc. 11:28).

7. ¿Tlen uelis tikchiuaskej para matechyolpakti tiktlajtoltiskej Biblia?

⁷ Ijkuak tiktlajtoltiaj Biblia moneki yolik tikchiuaskej para matechyolpakti. ¿Tlen kijtosneki non? Matimokuayejyekokan ikaj techchijchiuilia tlen techpaktia tikkuaskej. Pero amo timajxiliaj uan san niman tiknekij tikkuaskej noso xamo timokuayejyekojtokej okseki tlamantli. Ijkuak yotitlankej, tikitaj omonekiaya yolik titlakuaskiaj para tikueliliskiaj tlen otechchijchiuilijkej. Ijkuak tiktlajtoltiaj Biblia uelis ijkon techpanos, xamo amo timajxiliaj yolik tiktlajtoltiskej uan amo tikajsikamatij tlen ompa kijtoua. Para techyolpaktis tiktlajtoltiskej moneki yolik timomachtiskej, ijkon uelis timokuayejyekoskej ken ompa tikatej uan tikaktokej tlen panotok. Okachi tiyolpakiskej tla ijkon tikchiuaj.

8. ¿Ken techpaleuia “tlakeuali yolmelajki uan ixtlamatki”? (Xikita nota).

⁸ Jesús kikauilia “tlakeuali yolmelajki uan ixtlamatki” matechpaleui matikpiakan tlen ika timomachtiskej (Mat. 24:45, TNM). b Tlakeuali yolmelajki okachi kipatioita mamotlajtolkopa iTlajtol toTajtsin Dios (1 Tes. 2:13). Non techpaleuia matikajsikamatikan ken mokuayejyekoua Jehová. Ikinon tikintlajtoltiaj revistas Akin Tetlapouijtok, ¡Ma titlachixtokan! uan itech jw.org tikintlajtoltiaj tlamachtilmej, noijki timomachtiaj para ijkuak timonechikoskej tlajko semana uan itlamian semana, tikitaj JW Broadcasting^® tla kajki ika totlajtol. Tla ijkon tikchiuaj uan timomachtiaj, techpaleuis matiyolpakikan.

9. ¿Tlen noijki moneki tikchiuaskej para melauak tiyolpakiskej?

⁹ OME: Melauak tiyolpakiskej tla tiktlakamatij itlanauatiluan Jehová. Se salmista okijto: “Yolpaki akin kitlakaita Jehová uan akin nemi itech iojui” (Sal. 128:1). Ijkuak tiknekij tiktlakaitaskej Jehová amo tiknekij tikchiuaskej tlen ye kikokolia (Prov. 16:6). Ikinon timochijchikauaj tikintlakamatij itlanauatiluan kanin kijtoua tlen moneki tikchiuaskej uan tlen amo (2 Cor. 7:1). Tiyolpakiskej tla tikpatioitaj tlen Jehová kipaktia uan amo tikchiuaj tlen kikokolia (Sal. 37:27; 97:10; Rom. 12:9).

10. ¿Tlen moneki tikchiuaskej maski yitikmatij tlen kijtoua itlanauatiluan Jehová? (Romanos 12:2).

¹⁰ (Xiktlajtolti Romanos 12:2). Xamo tikmatij san Jehová kinamiki kijtos tlen kuali uan tlen amo pero noijki tikmatokej moneki tikintlakamatiskej itlanauatiluan. Matikijtokan ikaj kimati tekiuajkej kijtouaj ken uelis ikaj kiuikas icarro pero xamo amo kineki tetlakamatis uan kiuika ken ye kineki. Tejuan uelis tikteititiskej ika tlen tikchiuaj melauak techpaleuia itlanauatiluan Jehová, tla tikintlakamatij (Prov. 12:28). Ijkon okiteititi David ijkuak okilui Jehová:  “Techmachtis ika motlanauatiluan para niyoltos. Niyolpaki porque kuali techselia uan nochipa niyolpaki niyetos moyekma” (Sal. 16:11).

11, 12. (1) ¿Tlen uelis tikchiuaskej tla timotekipachouaj noso timoyolkokouaj? (2) ¿Ken techpaleuia tlen kijtoua Filipenses 4:8, matikpejpenakan tlen ika timoyolpaktiskej?

¹¹ Ijkuak timotekipachouaj noso timoyolkokouaj, para kuali timomachiliskej tikchiuaj okseki tlamantli. Pero moneki timomaluiskej para amo matikchiuakan tlen Jehová kikokolia (Efes. 5:10-12, 15-17).

¹² Carta tlen Pablo okintlajkuilili tokniuan tlen ochantiayaj Filipos, okinmilui mamokuayejyekokan kitechiuiliskej tlen kuali, tlen chipauak uan omonekiaya kiteititiskej tetlasojtlaj (xiktlajtolti Filipenses 4:8). Pablo amo okijto tlen ika timoyolpaktiskej pero tlen okijto uelis techpaleuis tikpejpenaskej tlen ika timoyolpaktiskej. Uelis tikchiuaskej nin: ijkuak tikitaskej tlajtoli “tlan kuali” matimokuayejyekokan itech “tlakuikalmej”, “películas”, “amochmej” noso “videojuegos”. Non techpaleuis tikmatiskej kox kiyolpaktis Jehová tlen tikpejpenaskej. Ijkon tikteititiskej tiknekij tikintlakamatiskej itlanauatiluan (Sal. 119:1-3). Noijki amo techkuejsos totlalnamikilis uan uelis tikchiuaskej tlen techpaleuis melauak matiyolpakikan (Hech. 23:1).

13. ¿Tlen okachi moneki tikchiuaskej para melauak tiyolpakiskej? (Juan 4:23, 24).

¹³ EYI: Okachi matikpatioitakan tikueyichiuaskej Jehová. Moneki matikueyichiuakan Jehová porque ye otechchijchi (Apoc. 4:11; 14:6, 7). Ikinon matikueyichiuakan ken ye kipaktia ‘ika nochi toyolo iwa de milajkaʼ (xiktlajtolti Juan 4:23, 24). Iespíritu santo toTajtsin Dios techyekana para matikueyichiuakan ken kijtoua Biblia. Moneki tikpatioitaskej tikueyichiuaskej Jehová maski tichantij kanin amo techkauiliaj matitetlapouikan nion matimonechikokan. Kanaj 100 tokniuan tsaktokej porque kitekichiuiliaj Jehová c pero yejuan yolpakij porque motlatlaujtiaj, momachtiaj Biblia uan kintlapouiaj oksekimej akin toTajtsin Dios uan iTekiuajkayo. Maski techuijuikaltiaj uan techtlajyouiltiaj, tejuan tiyolpakij porque tikmatij Jehová techpaleuia uan techteochiuas (Sant. 1:12; 1 Ped. 4:14).

14. ¿Tlen okipanok se tokni tlen chanti Tayikistán?

¹⁴ Tlen kinpanoua tokniuan, kiteititia uelis tiyolpakiskej tla tikchiuaj eyi tlamantli tlen yotikitakej. Matikitakan tlen okipanok se tokni tlen kipia 19 xiuitl itoka Yovidón Boboyónov uan chanti Tayikistán, 4 de octubre 2019 amo okinek mochiuas soldado ikinon okikixtitoj ikalijtik, satepan miak metstli okitsakej uan okitlajyouiltijkej. Itech miakej altepemej okipanoltijkej itech noticias tlen okipanok tokni. Noijki ompa okijtojkej okiuitekej porque amo okinek kimotlalilis uniforme uan noijki amo okinekiaya yetos soldado. Okixkomakakej uan okichiualtijkej  matekipano, satepan akin otlanauatiaya itech non altepetl okijto makikajkauakan. Tokni Yovidón nochipa okitlakamatki Jehová uan oyolpakik maski otlajyouijtoka. ¿Tlen okipaleui mayolpaki? Okimatiaya moneki momachtis iTlajtol toTajtsin Dios.

15. ¿Ken omomachti iTlajtol toTajtsin Dios tokni Yovidón ijkuak otsaktoka?

¹⁵ Ijkuak Yovidón otsaktoka omomachti iTlajtol toTajtsin Dios, maski amo okipiaya amatlajkuilolmej nion Biblia. ¿Ken okichi? Ijkuak tokniuan okiuikiliaya tlakuali okijkuilouayaj itech se bolsa texto tlen omomachtiayaj non tonal. Ijkon Yovidón omomachtiaya iTlajtol toTajtsin Dios uan nochipa itech omokuayejyekouaya. Ijkuak tokni okiski nin okijto: “Axkan okachi ximotokikan inauak Jehová. Xiktlajtoltikan iTlajtol uan ximomachtikan amatlajkuilolmej”.

16. ¿Tlen okachi okipatioitak Yovidón?

¹⁶ Tokni Yovidón okintlakamatki itlanauatiluan Jehová. Okachi okipatioitak mouikas iuan Jehová uan amo san moyolpaktis uan kichiuas tlen amo kuali. Nochipa, kualkan omeuaya uan okikakiaya  ken otlakuikaya totomej uan ijkuak yiouak okitaya metstli uan sitlalimej. Okijto: “Oniyolpakiaya porque onikmatiaya non otechtliokoli Jehová, ijkon kuali onimomachiliaya”. Ijkuak okachi tikpatioitaj tlen Jehová techmakatok uan iuan timouikaj, okachi tiyolpakij uan ijkon titlaxikouaj.

17. Tokniuan tlen kinpanotok ken tokni Yovidón, ¿ken uelis kinpaleuis tlen kijtoua 1 Pedro 1:6, 7?

¹⁷ Yovidón okachi okipatioitak kiueyichiuas Jehová. Okimatiaya okachi ipati kitlakamatiskia. Jesús okijto: “Xikweyijkachiwa Moteko Dios, iwa sanwel Ye tiktekichiwilis” (Luc. 4:8). Soldados uan akinmej okinyekanaya, okinekiayaj Yovidón makikaua Jehová. Pero ye mojmostla okitlatlaujtiaya makipaleui, makitlakamati uan matlaxiko. Maski okitlajyouiltijkej, Yovidón otlaxiko. Axkan yolpaki porque kimati maski okitsakej uan okiuitekej, melauak tlaneltoka (xiktlajtolti 1 Pedro 1:6, 7).

18. ¿Tlen techpaleuis matiyolpaktokan?

¹⁸ Jehová kimati ken melauak tiyolpakiskej. Tla tikchiuaj eyi tlamantli tlen axkan yotimomachtijkej, melauak tiyolpakiskej maski titlajyouijtokej. Ijkon noijki uelis tikijtoskej: “¡Yolpaki altepetl akin iDios ye Jehová!” (Sal. 144:15).