1, 2. ¿Tleka iTlaixpantijkauan Jehová kipatioitaj motlakentiskej ken moneki? (Xikita tlaixkopinal tlen ika peua tlamachtil).

SE PERIÓDICO holandés okijto ken omotlakentijkej sekimej tlayekankej teopixkej se tonal ijkuak omonechikojkej. Okijto miakej amo omotlakentijkej ken omonekiaya pampa otonalmikiayaj. Nin periódico noijki otlajto itech iTlaixpantijkauan Jehová ijkuak oyajkej itech inueyi nechikol uan okijto yejuan kuali omotlakentijkej. Okijto chokotsitsintin uan tlakamej okiuikayaj corbata uan saco. Noijki okijto takotsitsintin uan siuamej okiuikayaj kualtsin inkue pero amo okatkaj tepontikej. Miak uelta iTlaixpantijkauan Jehová kinmiluiaj kuali motlakentiaj. Tlatitlanil Pablo okijto akinmej kichiuaj ken Cristo ma motlakentikan “ken moneki uan ika kuali inkuayejyekolis”, pampa toTajtsin Dios kineki ijkon ma motlakentikan itekipanojkauan (1 Timoteo 2:9, 10, TNM). Maski Pablo  otlapojtoka itech siuamej, tlen okijto noijki kinpaleuia tlakamej.

² Tiitekipanojkauan toTajtsin Dios tikpatioitaj timotlakentiskej ken moneki pampa ye noijki kipatioita (Génesis 3:21). Jehová ye ueyi Tekiua itech nochi semanauak. Itech Biblia Jehová techiluia ken moneki timotlakentiskej. Ik non, amo san tejuan ma techpakti totlaken. Moneki ma kipakti Jehová pampa ye toTajtsin Dios uan toueyi Tekiua.

3. ¿Tlen techmachtia Tlanauatil tlen okijkuilo Moisés itech ken moneki timotlakentiskej?

³ Tlanauatil tlen okijkuilo Moisés okinmaluiaya israelitas itech akinmej oauilnemiayaj tlen ik ompa ochantiayaj. Tlanauatil okijtoaya Jehová kikokolia tlakemitl tlen amo kiteititia akin tlakatl noso akin siuatl (xiktlajtolti Deuteronomio 22:5). * Tlanauatil tlen okijkuilo Moisés techmachtia Jehová amo kipaktia tlakemitl tlen kichiua tlakamej ma motakan ken siuamej nion tlen kichiua siuamej ma motakan ken tlakamej, nion tlen kichiua amo ma tikmatikan akin siuatl noso akin tlakatl.

4. ¿Tlen uelis techpaleuis kuali ma tikpejpenakan ken timotlakentiskej?

⁴ Principios bíblicos techpaleuiskej kuali ma tikpejpenakan ken timotlakentiskej. Uelis tikintlakamatiskej ninmej principios maski tona noso seua kanin tichantij, ken otimoskaltijkej noso maski san itech tlen ueyi altepetl tichantij. Amo moneki nochi ma techiluikan tlen uelis tikonakiskej uan tlen amo. San moneki ma tikintlakamatikan principios bíblicos, tlen techkauiliaj ma tikonakikan tlen techpaktia. Ma tikinmitakan seki principios tlen techpaleuiskej ma tikmatikan “tlan kimonekiltia Dios” ijkuak tikpejpenaskej ken timotlakentiskej (Romanos 12:1, 2).

5, 6. ¿Tlen uelis kichiuaskej oksekimej ijkuak kitaj ken timotlakentiaj?

⁵ Jehová okinauati Pablo ma kijkuilo principio tlen miak ipati tlen ijkuilitok itech 2 Corintios 6:4 (xiktlajtolti). Ken timotaj kijtoa ken toyelis uan kichiua kuali noso amo kuali ma mokuayejyekokan totech oksekimej (1 Samuel 16:7). Ken tiitekipanojkauan toTajtsin Dios, amo itlaj ma tikonakikan san pampa kuali technamiki noso pampa techpaktia. Principios bíblicos techiluiaj amo ma tikonakikan tlakemitl  tlen tilintok, tepontik noso tlen kiteititiaj totlalnakayo. Amo moneki ikaj amo kuali ma momachili noso ok kanaj ma tlachia pampa amo otimotlakentijkej ken moneki.

⁶ Tla tichipauakej uan timotlakentiaj ken moneki, uelis tlaltikpaktlakamej okachi kitlakaitaskej ialtepe Jehová uan tejuan akinmej tiitekipanojkauan. Noijki uelis kinekiskej kixmatiskej toTajtsin Dios akin tiktekichiuiliaj. Uan noijki uelis kinekiskej kikakiskej tlen titetlapouiaj tlen uelis kinmakixtis.

7, 8. ¿Keman okachi kuali timotlakentiskej ken moneki?

⁷ Ken tiktlakaitaj toTajtsin Dios akin chipauak, tokniuan uan akinmej tikintlapouiaj, moneki totlaken ma kiueyichiuaj Jehová uan tlen titetlapouiaj (Romanos 13:8-10). Ma timotlakentikan ken moneki, okachi ijkuak timonechikoaj noso titetlapouiaj. Totlaken moneki ma yeto ken itlaken akin kiueyichiua toTajtsin Dios (1 Timoteo 2:10). Uan onka tlakemitl tlen kanaj uelis motekitiltis pero oksekan amo. Ik  non, maski san kanin tichantij, tiiTlaixpantijkauan Jehová amo ikaj tikkuejsoaj ika ken timotlakentiaj.

⁸ (Xiktlajtolti 1 Corintios 10:31). Ijkuak tiauij uejueyij nechikolmej ma timotlakentikan ken moneki. Amo ma timotlakentikan ken akinmej amo kitekichiuiliaj Jehová. Noijki amo ma timotlakentikan ken ijkuak tipaxialotiuij achto tiaskej ueyi nechikol nion ijkuak tlamis, nion ijkuak tiajsitiuij itech hotel noso ijkuak tiaskej. Ijkon, ika pakilistli tikijtoskej tiiTlaixpantijkauan Jehová uan san kanin uelis titetlapouiskej.

9, 10. ¿Ken uelis techpaleuis Filipenses 2:4 ijkuak tikpejpenaj ken timotlakentiskej?

⁹ (Xiktlajtolti Filipenses 2:4). ¿Tleka miak ipati ma tikmatikan kox kinkuejsos noso kinpaleuis tokniuan ken timotlakentiaj? Pampa tiitekipanojkauan toTajtsin Dios timochijchikauaj tiktlakamatiskej tlen kijtoa Biblia: “Xikpojpolokah tlan amo kuali kelewia nomokuerpo. Amaka mamokalakijtinemi iwan se non amo isiwa, nion manemi itech tlan pitsotik, nion mamotemaka imak tlan amokuali kelewia ikuerpo” (Colosenses 3:2, 5). Sekimej tokniuan oauilnemiayaj achto yetoskiaj iTlaixpantijkauan Jehová uan uelis ok mochijchikauaj ayakmo ijkon kichiuaskej. Tla amo timotlakentiaj ken moneki, uelis okachi oui kinchiuilis kitlakamatiskej Biblia uan amo mochijchikauaskej kichiuaskej tlen kuali (1 Corintios 6:9, 10). ¡Amo tiknekij ijkon ma kinpano!

¹⁰ Ijkuak tikatej iuan tokniuan, tinochtin tikpiaj chipauak tokuayejyekol pampa amo timokuayejyekoaj itech auilnemilistli ken tlaltikpaktlakamej. Ken timotlakentiaj ken moneki, noijki chipauak tikpiaj tokuayejyekol ijkuak tikatej itech kali kanin timonechikoaj noso oksekan. Melauak tinochtin uelis tikpejpenaskej ken timotlakentiskej. Pero moneki ma tikinpaleuikan oksekimej ma mokuayejyekokan, ma tlajtokan uan ma kichiuakan tlen chipauak, ken toTajtsin Dios kineki (1 Pedro 1:15, 16). Tlasojtlalistli tlen melauak amo kichiua tlen amo kuali “nion kitemoa san tlan ye kipaktia” (1 Corintios 3:4, 5).

11, 12. ¿Ken techpaleuia Eclesiastés 3:1, 17 ma timotlakentikan ken moneki?

¹¹ Tiitekipanojkauan toTajtsin Dios tikmatij “pampa nochi onka kauitl” ken ijkuak tikpejpenaskej ken timotlakentiskej (Eclesiastés 3:1, 17). Tlatlamantli timotlakentiaj ijkuak seua uan ijkuak tona. Pero itlanauatiluan Jehová amo keman mopatlaj (Malaquías 3:6).

¹² Itech uejueyij altepemej kanin sapanoa tona tokniuan okachi oui kinchiuilia motlakentiskej ken moneki. Pero nochtin tokniuan  kitlasojkamatiskej tla amo tilintok ma timotlakentikan noso tlen kiteititis totlalnakayo (Job 31:1). Noijki ijkuak tikatej itech ueyi atl noso kanin uelis tiajkuiskej, totlaken moneki yetos ken moneki (Proverbios 11:2, 20). Pampa miakej tlaltikpaktlakamej sapanoa pitsotik motlakentiaj. Pero totlaken moneki ma kiueyichiua Jehová, toTajtsin Dios akin chipauak.

13. ¿Tleka moneki ma tikilnamikikan tlen kijtoa 1 Corintios 10:32, 33 ijkuak tikpejpenaj totlaken?

¹³ Onka okse principio tlen moneki techyekanas ijkuak tikpejpenaskej totlaken. Amo ma tikinmijtlakolikan intlalnamikilis tokniuan (xiktlajtolti 1 Corintios 10:32, 33). Amo ma tikonakikan totlaken tlen amo kuali mota inmixpan tokniuan noso akinmej amo kitekichiuiliaj Jehová. Tlatitlanil Pablo okijkuilo: “Tisejsemeh moneki matikpaktikah se tokni iwa ijkó okachi moskaltis itlaneltokalis”. Uan satepan okijto tleka: “Porke nion Cristo okichi san tlan ye inewia okipaktiaya” (Romanos 15:2, 3). Jesús okachi okipatioitaya kichiuas itlanekilis Jehová uan kinpaleuis oksekimej uan amo okichiuaya tlen ye okinekiaya. Tejuan noijki ijkon moneki tikchiuaskej. Ik non, amo keman ma tikonakikan totlaken tlen techpaktia pero uelis kichiuas sekimej amo ma techkakikan ijkuak tikintlapouiskej.

14. ¿Ken uelis tetajmej kinmachtiskej inkoneuan ma kitlakaitakan Jehová ika ken motlakentiaj?

¹⁴ Tetajmej tlen kichiuaj ken Cristo moneki ma kinmachtikan inkoneuan ma kintlakamatikan principios bíblicos. Nin kijtosneki ma kinmachtikan ma motlakentikan uan ma moyektlalikan ken moneki uan ijkon uelis kiyolpaktiskej Jehová (Proverbios 22:6; 27:11). ¿Ken uelis tetajmej kinmachtiskej inkoneuan ma kitlakaitakan Jehová uan itlanauatiluan? Tetajmej ma motlakentikan ken moneki uan ika tlasojtlalistli ma kinmachtikan kanin uelis kikoaskej intlaken. Noijki ma kinmachtikan intlaken amo san yejuan ma kinpakti, okachi kuali ma kipakti Jehová akin kitekichiuiliaj.

15. ¿Tlen uelis techpaleuis nochipa ma tikpejpenakan tlen kuali?

¹⁵ Biblia techyekana ma tikpejpenakan tlen kiueyichiua toTajtsin Dios. Ken timotlakentiaj kiteititia tlen techpaktia. Tinochtin techpaktia tlatlamantli timotlakentiskej. Pero totlaken nochipa moneki yetos chipauak, kuali uan ken moneki, ma kinamiki kanin tiauij uan kuali ma mota kanin tichantij.

16. ¿Tleka miak ipati ma timochijchikauakan timotlakentiskej ken moneki?

¹⁶ Ualeua oui tikajsiskej tlakemitl tlen kajki ken moneki. Miakej san kinemakaj tlen axkan motekitiltiaj. Ik non, uelis okachi monekis ma timochijchikauakan ma tikintemokan faldas, blusas uan vestidos tlen uelis tikintekitiltiskej  noso pampa tikinmajsiskej pantalones noso sacos tlen amo sapanoa tilintokej. Miak ipati ma timochijchikauakan. ¿Tleka? Achto, tokniuan kitaskej uan kitlasojkamatiskej kualtsin timotlakentiaj uan ken moneki. Uan ome, pampa ijkon tikueyichiuaskej toTajtsin Dios. Uan ken tiknekij tikchiuaskej nochi tlen moneki pampa tikueyichiuaskej toTajtsin Dios, kuali timomachiliaj ijkuak timochijchikauaj timotlakentiskej ken moneki.

17. ¿Tlen moneki kilnamiktos se tokni tlen kineki kipias ibarba?

¹⁷ ¿Uelis kipiaskej inbarba tokniuan? Tlanauatil tlen okijkuilo Moisés okijtoaya tlakamej omonekiaya ma kipiakan inbarba. Pero akinmej tikchiuaj ken Cristo ayakmo timoyekanaj ika non Tlanauatil nion moneki ma tiktlakamatikan (Levítico 19:27; 21:5; Gálatas 3:24, 25). Itech seki uejueyij altepemej uelis kitaj kuali se tokni ma kipia ibarba uan kuali ma kixima, uan uelis tlaltikpaktlakamej kuali kitaj non tokni uan kikakij ijkuak kintlapouia. Itech nonmej altepemej, sekimej tokniuan tlayekankej kipiaj inbarba. Pero uelis oksekimej tokniuan kijtoaj amo kipiaskej inbarba (1 Corintios 8:9, 13; 10:32). Itech okseki altepemej tlakamej amo kipiaj inbarba uan amo kuali kitaj iTlaixpantijkauan Jehová ma kipiakan inbarba. Tla ompa se tokni kipia ibarba, amo kiueyichiua toTajtsin Dios uan amo “yetos se tlakatl yekmilajka” (1 Timoteo 3:2, 7; Romanos 15:1-3).

18, 19. ¿Ken techpaleuia Miqueas 6:8?

¹⁸ Tiktlasojkamatiliaj Jehová pampa amo techmaka se ueyi lista kanin kijtoa ken uelis noso ken amo uelis timotlakentiskej uan timoyektlaliskej. Okachi kuali, techkauilia ma tikpejpenakan tlen tikchiuaskej, ik non, techmaka principios bíblicos. Uan ika totlaken uan ken timoyektlaliaj uelis tikteititiskej tiknekij tiktekichiuiliskej ika yolyamanilistli toTajtsin Dios ijkon ken kijtoa Miqueas 6:8.

¹⁹ Moneki ma timotlakentikan ken moneki uan ma tikilnamiktokan Jehová chipauak uan itlanauatiluan nochipa techpaleuiaj. Tla tiknekij tiyetoskej tiyolyamankej, tikintlakamatiskej itlanauatiluan itech tonemilis. Uan noijki tiktlakaitaskej tlen kimachiliaj uan mokuayejyekoaj oksekimej.

20. ¿Tlen uelis kichiuaskej oksekimej tla kitaj timotlakentiaj ken moneki?

²⁰ Ken timotlakentiaj ma kiteititi tiiTlaixpantijkauan Jehová. Itlanauatiluan Jehová techiluia miak tlamantli ma tikchiuakan, uan tikintlakamatij ika miak pakilistli. Tikinyolchikauaj tokniuan tlakamej uan siuamej pampa motlakentiaj ken moneki uan kuali kipiaj inyelis. Yejuan kinyoltilanaj akinmej kinekij kikakiskej tlen kijtoa Biblia tlen uelis kinmakixtis uan noijki kiueyichiuaj uan kiyolpaktiaj Jehová. Tla timotlakentiaj ken moneki, tikueyichiuaskej toTajtsin Dios akin motlakentiaj ika “ika ueyilistli uan ueyichiualistli” (Salmo 104:1, 2).