1. ¿Ken tikteititiaj tiitekipanojkauan Jehová timotlasojtlaj?

TIITEKIPANOJKAUAN Jehová san sekan tikatej uan timotlasojtlaj (1 Juan 4:16, 21). Ualeua tikchiuaj miak tlamantli para tikinpaleuiskej tokniuan. Ualeua san moneki tikteititiskej tikintlasojtlaj. Tejuan noijki tikchiuaj ken Jehová ijkuak titeiknomatij (Efes. 5:1, TNM).

2. ¿Ken okichi Jesús ken iTajtsin?

² Jesús okichi ken iTajtsin. Nochipa okintlasojtlaya oksekimej. Okijto: “Xiwikih nonawak nonnochteh akimeh tekitih chikawak iwa yononsotlawakeh, iwa Ne nomechsewis”. Noijki okijto: “Porke Ne niyolyámanki iwa niteiknoma. Iwa nonkajsiskeh yolsewílistli itech nomoyolo” (Mat. 11:28, 29). Ijkuak tikchiuaj ken Jesús uan tikinmiknomatij ‘akinmej amo itlaj kipiaj’, tikyolpaktia toTajtsin Dios (Sal. 41:1). Ma tikitakan ken tikinmiknomatiskej tokalchanejkauan, tokniuan  tlen inmiuan timonechikoaj uan akinmej tikintlapouiaj.

3. ¿Ken moneki kiknomatis tlakatl isiua? (Xikinmita fotos kanin peua tlamachtil).

³ Tlakatl tlen yomonamikti moneki kinmiknomatis ikalchanejkauan (Efes. 5:25; 6:4). Biblia kijtoa tlakatl ma kiknomati isiua uan ma kajsikamati (1 Ped. 3:7). Tla tiknekij titeiknomatiskej, moneki tikajsikamatiskej tlen oksekimej kimachiliaj. Tlakatl kajsikamati isiua iajsikayo uan kipatioita maski okse tlamantli iyelis (Gén. 2:18). Ik non, kajsikamati tlen kimachilia isiua, kitlasojtla uan kitlakaita. Se tokni chanti Canadá, okijto: “Nonamik kipatioita tlen nikmachilia uan nechiluia: ‘Amo ximotekipacho’. Noijki nechkaki uan ika tlasojtlalistli nechpaleuia ijkuak moneki okse tlamantli ma nimokuayejyeko”.

4. ¿Tlen amo kichiua tlakatl tlen kitlasojtla isiua?

⁴ Noijki tlakatl amo kinuelita oksekimej siuamej porque kajsikamati tlen kimachilis isiua. Noijki amo kintemojtinemi siuamej itech Internet (Job 31:1). Amo kichiua nin tlamantli porque kitlasojtla isiua, kitlasojtla Jehová uan kikokolia tlen amo kuali (xiktlajtolti Salmo 19:14; 97:10).

5. ¿Ken kiteititia siuatl kiknomati inamik?

⁵ Siuatl okachi kitlakaitas inamik tla kiyekana ken Jesucristo kichiua (Efes. 5:22-25, 33). Ye okachi kitlakaitas ijkuak okachi moneki tekitis itech tlanechikol noso kiyektlalis seki ouijkayotl. Se tokni chanti Gran Bretaña, okijto: “Ualeua nosiua kita itlaj nechtekipachoa ijkon kita porque nikpatla noyelis. Ye moyekana ika principio bíblico tlen moajsi itech Proverbios 20:5, maski moneki mochias uan nikiluis tlen nechtekipachoa”.

6. (1) ¿Ken uelis tikinmachtiskej konemej ma kinmiknomatikan oksekimej? (2) ¿Ken kipaleuia tla ijkon tikchiuaskej?

⁶ Tla tetajmej teiknomatij kinpaleuis inkoneuan ma teiknomatikan. Pero noijki moneki kinmititiskej ma kinmiknomatikan oksekimej. Uelis tikinmiluiskej amo ma motlatlalokan kanin timonechikoaj noso ijkuak kanaj titlakuatiuij ma kinmiluikan moneki achto motlatekiliskej akinmej yikipiaj miak xiuitl. Tinochtin uelis tikinpaleuiskej tetajmej. Pero tla tikitaj se chokotsin tetlakaita, moneki ma tikiluikan kuali tlen kichiua. Nin sapanoa kipaleuis uan kilnamiktos “okachi yolpaki akin itlaj kitemaka uan amo ijkuak itlaj kiselia” (Hech. 20:35, TNM).

7. (1) ¿Ken okiknomatki Jesús se tlakatl tlen amo otlakakiaya? (2) ¿Tlen techmachtia tlen okichi Jesús?

⁷ Se tonal, ijkuak Jesús okatka ompa Decápolis, okiuikilijkej se tlakatl “kamapojpólochtli [noso amo otlajtoaya] iwa amo otlakakia” (Mar. 7:31-35). Ye oksekan okiuikak uan ompa okipajti. ¿Tleka amo okipajti inmixpan oksekimej? Jesús okitak amo otlakiaya, ik non, xamo omokuayejyeko pinauaskia tla kipajtiskia inmixpan oksekimej. Tejuan amo ueli tikinchiuaj milagros. Pero uelis tikitaskej ken tikinpaleuiskej tokniuan uan tlen kintekipachoa. Tlatitlanil Pablo okijto: “Matiktemolikah kenijki timosepampapalewiskeh, matimotlasojtlakah iwa matikchiwakah tlan kuali” (Heb. 10:24). ¿Ken  uelis titeiknomatiskej ken Jesús ijkuak okipajti se tlakatl tlen amo otlakakiaya?

8, 9. Xikijto ken tikinmiknomatiskej tokniuan tlen yikipiaj miak xiuitl uan akinmej mokokoaj.

⁸ Ma tikinmiknomatikan tokniuan tlen yikipiaj miak xiuitl uan akinmej mokokoaj. Tejuan techixmatij ken sapanoa timotlasojtlaj (Juan 13:34, 35). Sapanoa titetlasojtlaj, ik non, timochijchikauaj tikinpaleuiskej tokniuan tlen yikipiaj miak xiuitl uan akinmej mokokoaj ma monechikokan uan ma tetlapouikan. Tikinpaleuiaj tokniuan maski ayakmo okachi tlaxikoaj (Mat. 13:23). Se tokni itoka Michael amo ueli nejnemi, ik non, kiuikatinemij ika silla de ruedas. Ye okijto kintlasojkamatilia ikalchanejkauan uan tokniuan tlen inmiuan tetlapouia. Okijto: “Nikintlasojkamatilia porque nechpaleuiaj ma nimonechiko uan ma nitetlapoui. Noijki nechpaktia nitetlapouis kanin miakej panoaj”.

⁹ Itech kalmej Betel katej miakej tokniuan tlen yikipiaj miak xiuitl uan miakej mokokoaj. ¿Ken kiteititiaj tlayekankej kinmiknomatij uan kintlasojtlaj tokniuan? Kinpaleuiaj ma kinmijkuilokan cartas uan ma tlanotsakan ika teléfono uan ijkon tetlapouiaj. Se tokni itoka Bill uan kipia 86 xiuitl, ye kintlajkuililia akinmej uejka chantij, okijto: “Nimotlasojkamati porque ueli nikinmijkuiloa cartas”. Okse tokni tlen itoka Nancy uan kipia 90 xiuitl, okijto: “Nikpatioita nikinmijkuilos cartas porque ijkon nitetlapouia. Miakej moneki kimatiskej tlen tlamachtia Biblia”. Okse tokni tlen itoka Ethel oneski itech 1921, okijto: “Nochipa nikualo. Ualeua amo ueli nikonakia notlaken”. Maski nin tokni mokokoa kipaktia tetlapouis ika teléfono uan miakej oksepa kiluiaj ma kinnotsa. Okse tokni itoka Barbara uan kipia 85 xiuitl, okijto: “Nochipa nimokokoa uan amo okachi ueli nitetlapouia. Pero nimopaleuia ika teléfono uan ijkon nitetlapouia. ¡Melauak niktlasojkamatilia Jehová!”. Opanok kanaj se xiuitl, ninmej tokniuan uan oksekimej otetlapouijkej 1,228 horas, okinmijkuilojkej 6,265 cartas, okinnotskej kanaj 2,000 uan okintemakakej 6,315 amatlajkuilolmej. ¡Jehová melauak oyolpakik! (Prov. 27:11).

10. ¿Tlen tikchiuaskej para tokniuan kuali ma tlakaktokan ijkuak timonechikoaj?

¹⁰ Ma titeiknomatikan ijkuak timonechikoaj. Okachi kinpaleuis tokniuan ijkuak timonechikoaj tla tikinmiknomatij. ¿Ken tikchiuaskej? Kualkan ma tiajsitij tlamo tokniuan ayakmo kuali tlakakiskej. Maski ualeua titiotlakiskej porque itlaj otechtsakuili. Pero tla nochipa titiotlakiaj moneki timotlajtlaniskej tlen uelis tikchiuaskej uan ijkon tikteititiskej tikinmiknomatij tokniuan. Ma tikilnamiktokan ye Jehová uan Jesucristo techiluiaj ma timonechikokan (Mat. 18:20). Ik non, moneki ma tikintlakaitakan tokniuan.

11. ¿Ken kiteititiaj tokniuan tlen tlamachtiaj ijkuak timonechikoaj kichiuaj tlen kijtoa 1 Corintios 14:40?

¹¹ Noijki tikinmiknomatij tokniuan ijkuak ‘nochi tikyekchiwah ika kuali iwa kemi moneki’ (1 Cor. 14:40). Amo ma uejkauakan tokniuan tlen tlamachtiaj ijkuak timonechikoaj. Ijkon kiteititiskej kitlakaitaj tlen okse panos uan noijki tokniuan. ¿Tleka? Xamo sekimej tokniuan uejka chantij uan oksekimej innamik tokniuan amo momachtiaj uan kinchixtokej tlen hora ajsitiuij.

12. ¿Tleka moneki ma tikintlakamatikan tlayekankej uan ma tikintlasojtlakan? (Xikita recuadro “ Ma tikinmiknomatikan akinmej tlayekanaj itech ialtepe Jehová”).

 ¹² Tlayekankej sapanoa tekipanoaj itech totlanechikol uan nochipa tetlapouiaj, ik non, moneki ma tikintlakaitakan uan ma tikintlasojtlakan (xiktlajtolti 1 Tesalonicenses 5:12, 13). Tikintlasojkamatiliaj porque sapanoa techpaleuiaj. Ik non, moneki ma tikintlakamatikan uan ma tikinpaleuikan. Yejuan ‘techmokuitlawiah [noso techmaluiaj], iwa kuali kimatokeh Dios kintlajtlanis kenomi onomechyakankeh’ (Heb. 13:7, 17).

13. ¿Tlen otechmachti Jesús ijkuak okinmiknomatki oksekimej?

¹³ Profeta Isaías okijto tlen amo kichiuaskia Jesús: “Amo kipostekis ouatl tlen yopajpatlauik uan imecha candil tlen yitlajtlanti amo sepa kiseuis” (Is. 42:3). Jesús nochtin okintlasojtlayaj uan okimachiliaya tlen okinpanoaya. Okajsikamatiaya ken omomachiliayaj akinmej okatkaj ken se ouatl tlen yipostekiskia noso ken imecha candil tlen yiseuiskia. Ik non, oteiknomatiaya, otetlasojtlaya uan otexikoaya. Noijki konemej okinpaktiaya iuan yetoskej (Mar. 10:14). Jesús ixtlamatki uan okinmajsikamatiaya oksekimej uan okinmachtiaya. Tejuan noijki moneki tikinmajsikamatiskej akinmej tikintlapouiaj. Ma tikinmiknomatikan akinmej tikintlapouiaj uan tikteititiskej ken tikinnotsaj, keman moneki titetlapouiskej uan kox tiuejkauaj ijkuak titetlapouiaj.

14. ¿Tleka moneki kualtsin ma tikinnotsakan akinmej tikintlapouiaj?

 ¹⁴ ¿Ken moneki tikinnotsaskej akinmej tikintlapouiaj? Axkan akinmej tlasemankej, akinmej pouij itech política uan akinmej kinyekanaj religiones sapanoa miakej kintlajyouiltiaj (Mat. 9:36). Miakej ayakmo ikaj kineltokiliaj nion kichiaj ma pano tlen kuali. Ik non, moneki kualtsin ma tikinnotsakan, ma kitakan tikintlasojtlaj uan ma tikinmiknomatikan. Miakej kinekij techkakiskej porque tikintlakaitaj uan kuali tikinnotsaj. Amo porque kuali tikixmatij Biblia noso porque kuali tikinmachtiaj.

15. ¿Ken uelis tikinmiknomatiskej akinmej tikintlapouiaj?

¹⁵ Onka miak tlamantli kanin uelis tikteititiskej tikinmiknomatij akinmej tikintlapouiaj. Ijkuak tikintlajtlaniaj miak tlamantli techpaleuia kuali ma tikinmachtikan pero moneki tikintlakaitaskej uan tikteititiskej tikintlasojtlaj. Se precursor otetlapouiaya kanin amo okachi okinpaktiaya tlajtoskej. Ik non, amo okintlajtlaniayaj tlen kichiuaskia ma pinauakan. Amo okintlajtlaniaya kox okimatiayaj tlen itoka toTajtsin Dios noso tlen kijtosneki Tekiuajkayotl. Ye okinmiluiaya: “Yonimomachti itech Biblia toTajtsin Dios kipia itoka. ¿Tikneki ma nimitsititi?”. Tlatlamantli kanin titetlapouiaj, ik non, amo uelis san se tlamantli tikchiuaskej. Nochipa ma titeiknomatikan uan ma titetlakaitakan, ik non, moneki kuali tikinmixmatiskej akinmej tikintlapouiaj.

16. ¿Keman titetlapouitiuij tla titeiknomatij?

¹⁶ ¿Keman moneki titetlapouiskej? Akinmej tikintlapouiaj amo techchixtokej inkalijtik. Ik non, moneki tikitaskej tlen hora tikintlapouitiuij (Mat. 7:12). Ma tikitakan kox kualkan meuaj itlamian semana. Tla amo kualkan meuaj, uelis titetlapouiskej ojtli, ika carritos noso tikintlajpalotiuij akinmej tikmatij yomejkej.

17. ¿Tiuejkauaskej tikintlapouiskej oksekimej tla tikintlasojtlaj?

¹⁷ ¿Kox moneki tiuejkauaskej ijkuak titetlapouiaj? Amo majxiliaj akinmej tikintlapouiaj, ik non, amo ma tiuejkauakan (1 Cor. 9:20-23). Tla tikinmiluiaj amo tiuejkauaskej uan ijkon tikchiuaj, xamo okse tonal oksepa techkakiskej. Tla tikteititiaj tikpiaj toyelis ken tlen poui itech espíritu santo, melauak tiyetoskej “titlapalewijkeh itech iteki Dios”. Jehová uelis techtekitiltis para oksekimej ma kinekikan momachtiskej tlen kijtoa Biblia (1 Cor. 3:6, 7, 9).

18. ¿Tlen tlateochiualistli tikseliskej tla tikinmiknomatij oksekimej?

¹⁸ Ma tikinmiknomatikan tokalchanejkauan, tokniuan tlen inmiuan timonechikoaj uan akinmej tikintlapouiaj. Tikseliskej miak tlateochiualistli axkan uan satepan tla ijkon tikchiuaskej. Salmo 41:1, 2 kijtoa: “Yolpaki akin kipaleuia akin amo itlaj kipia; Jehová kimakixtis itech tonal ijkuak yetos tlajyouilistli. Noijki “kijtoskej yolpaki itech tlaltikpak”.