1. Xikijto ken kinmita Jehová akinmej yolyamankej.

JEHOVÁ kintlasojtla nochtin akinmej yolyamankej. San uelis mouikaskej iuan toTajtsin Dios akinmej yolyamankej. Pero “akin moueyineki san uejka kita” (Sal. 138:6). Tinochtin tiknekij tikyolpaktiskej Jehová uan tiknekij noijki ma techtlasojtla. Non techpaleuia ma tiyetokan tiyolyamankej.

2. ¿Tlen timomachtiskej?

² Axkan tikinnankiliskej ninmej eyi tlajtlanilmej: “¿Tlen kijtosneki ma tiyetokan tiyolyamankej? ¿Tleka moneki ma tiyetokan tiyolyamankej? ¿Tlen tlamantli uelis kichiuas ayakmo ma tiyetokan tiyolyamankej?”. Tikitaskej Jehová kipaktia ma tiyetokan tiyolyamankej uan noijki techpaleuia kuali ma tiyetokan (Prov. 27:11; Is. 48:17).

3. ¿Tlen kijtosneki ma tiyetokan tiyolyamankej?

³ Akin yolyamanki amo mokuayejyekoa okachi ueyititok uan oksekimej amitlaj inpati. Noijki amo moueyineki. Biblia kijtoa akin yolyamanki kajsikamati Jehová okachi ueyititok uan noijki oksekimej (Filip. 2:3, 4).

4, 5. ¿Tleka sekimej san kinekij kiteititiskej yolyamankej?

⁴ Sekimej san kinekij kiteititiskej yolyamankej. Xamo kipiaj kuali inyelis noso tetlakaitaj porque ijkon okinmititijkej ma kichiuakan. Pero itech inyolo xamo moueyinekij.  Satepan kiteititiskej tlen onka itech inyolo (Luc. 6:45).

⁵ Pero amo kijtosneki moueyinekij akinmej kijtoaj tlen kimachiliaj uan amo momojtiaj (Juan 1:46, 47). Noijki akinmej kinpaktia kijtoskej tlen kimachiliaj moneki momaluiskej uan ijkon amo motlapololtiskej. Tinochtin moneki timochijchikauaskej tiyetoskej tiyolyamankej maski tlatlamantli toyelis.

6. Ijkon ken kijtoa 1 Corintios 15:10, ¿tlen techmachtia tlen okichi Pablo?

⁶ Ma tikitakan tlen okichi tlatitlanil Pablo. Jehová okipaleui ma kintlali tlanechikolmej. Xamo ye okachi otlapaleui maski okatkaj oksekimej itlatitlaniluan Jesús. Pero Pablo amo omoueyineki. Ye okatka yolyamanki uan okijto: “Porke ne innawak n oksikimeh tlatematiltijkeh okachi amitla nopati, iwa nion amo nechnamiki manechnotsakah nitlatematilti, porke yowejka onikintlaijyowiltijtínenki akimeh okineltokayah” toTajtsin Dios (1 Cor. 15:9). Noijki okijto kuali omouikaya iuan Jehová porque okitlasojtlak maski amo okinamikiaya. Amo okitlasojtlaya porque oueyititoka noso okichi miak tlamantli (xiktlajtolti 1 Corintios 15:10). Ye okiteititi okatka yolyamanki ijkuak okintlajkuilili tokniuan tlen ochantiayaj Corinto maski sekimej okiteneuayaj (2 Cor. 10:10).

7. Xikijto ken okiteititi se tokni okatka yolyamanki.

⁷ Miakej tokniuan kinpaktia kitlajtoltiskej inemilis tokni Karl Klein. Ye opouik itech Cuerpo Gobernante. Tokni Karl okatka yolyamanki uan okijto tlen okixnamik miak xiuitl. Ma tikitakan seki tlamantli tlen okipanok. Kanaj itech  1922 tokni opejki tetlapouia pero oui okitak uan amo otetlapoui kanaj ome xiuitl. Satepan ijkuak yokatka Betel, uejkika okitlauelitak se tokni ijkuak okilui tlen omonekiaya kichiuas. Noijki sapanoa omotekipachoaya pero satepan ayakmo ijkon okipanoaya. Pero noijki okimakakej miak tekitl itech ialtepe Jehová. Nin tokni okatka sapanoa yolyamanki porque okijto tlen okixnamikiaya maski miakej okixmatiayaj. Miakej tokniuan kilnamiktokej tokni Karl uan nochi tlen okijto okipanok itech inemilis. *

8. ¿Ken techpaleuia 1 Pedro 5:6 ma tikitakan Jehová kipaktia ma tiyetokan tiyolyamankej?

⁸ Jehová okachi kipatioita ma tiyetokan tiyolyamankej ijkon ken okijto Pedro (xiktlajtolti 1 Pedro 5:6). Tlen okijto Pedro mouika iuan tlen kijtoa amochtli “Ven, sé mi seguidor”. Ompa kijtoa: “Akin moueyineki yetoskia ken se pajtli tlen ika temiktiaj. Akin ijkon kichiua amo uelis kitekichiuilis toTajtsin Dios. Pero akin yolyamanki toTajtsin Dios kitekitiltia maski mota amitlaj ipati”. Noijki kijtoa: “ToTajtsin Dios ika pakilistli techteochiuas tla tejuan tiyolyamankej”. * Ik non, okachi miak ipati tikyolpaktiskej Jehová (Prov. 23:15).

9. ¿Tleka techpaktia tiyetoskej iuan akinmej yolyamankej?

⁹ Ijkuak tiyolyamankej tikyolpaktiaj Jehová pero noijki techpaleuia kuali ma tiyetokan. Oksekimej kinekiskej touan mouikaskej tla tiyolyamankej. Techpaleuis ma tikajsikamatikan tla timokuayejyekoaj akinmej moneki inmiuan timouikaskej (Mat. 7:12). Amikaj kipaktia mouikas iuan akinmej san kinekij kichiuaskej tlen kinekij uan amo kinekij ma tikinmiluikan tlen kichiuaskej. Pero techpaktia timouikaskej iuan tokniuan tlen teajsikamatij, tetlasojtlaj, teiknomatij uan yolyamankej (1 Ped. 3:8). Kualtsin timomachiliaj ijkuak tikatej iuan akinmej yolyamankej uan oksekimej noijki kinekiskej touan yetoskej tla noijki ijkon toyelis.

10. ¿Ken techpaleuia tiyetoskej tiyolyamankej ijkuak tikixnamikij ouijkayotl?

¹⁰ Tiyetoskej tiyolyamankej techpaleuia  ijkuak tikixnamikij ouijkayotl. Xamo ualeua amo kuali tikitaj tlen oksekimej kichiuaj. Salomón okijto: “Yonikinmitak tlakeualmej nemij ipan caballos pero príncipes nejnemij ken tlakeualmej” (Ecl. 10:7). Amo nochipa kinmiluiaj kuali tlen okichijkej akinmej kimatij miak tlamantli. Ualeua akinmej amo ixtlamatkej okachi kinpatioitaj. Salomón okajsikamatki moneki ma tikmatikan tlen amo ueli tikchiuaj uan amo ma tiknekikan tikchiuaskej tlen amo tiuelij (Ecl. 6:9). Tla tiyetoskej tiyolyamankej, amo oui tikseliskej tlen amo ueli tikchiuaj maski ualeua amo techpaktia.

11. ¿Tleka moneki tiyetoskej tiyolyamankej ijkuak ikaj techyektlalia?

¹¹ Mojmostla uelis tikteititiskej tiyolyamankej. Ma tikitakan seki tlamantli. Ijkuak ikaj techyektlalia. Ma tikilnamiktokan ijkuak ikaj techyektlalia xamo porque otikchijkej itlaj amo kuali. Pero xamo san niman tikualanij, tikteneuaj noso tikijtoaj otechajuak. Pero tla tiyolyamankej, tikpatlaskej toyelis uan amo oksepa tikchiuaskej tlen amo kuali.

12. Ijkon ken kijtoa Proverbios 27:5, 6, xikijto tleka moneki ma timotlasojkamatikan ijkuak ikaj techyektlalia.

¹² Tla tiyolyamankej, tikseliskej ijkuak techiluiskej tlen amo kuali otikchijkej. Ma tikitakan se tlamantli tlen techpaleuis ma tikajsikamatikan. Ma tikijtokan tikatej kanin timonechikoaj timotlapouijtokej iuan tokniuan. Se tokni ichtaka otechnotski uan otechilui tikpiaj itlaj itech totlanuan. Tipinauaj ijkuak ijkon techiluiaj pero tiktlasojkamatiliaj. Noijki techpaktiskia tla achto techiluiskiaj. Noijki ma timotlasojkamatikan ijkuak ikaj techiluia tlen amo kuali tikchijtokej. Amo ma timokuayejyekokan tokni techkokolia uan tiktlauelitaskej. Ijkuak techyektlaliaj tokniuan kiteititiaj techtlasojtlaj (Proverbios 27:5, 6; Gál. 4:16).

13. ¿Ken tikteititiaj tiyolyamankej ijkuak oksekimej tokniuan kinmakaj okachi tekitl?

¹³ Ijkuak tokniuan okachi kinmakaj tekitl itech tlanechikol. Se tlayekanki itoka Jason, okijto: “Ijkuak oksekimej kinmakaj okseki tekitl, nimokuayejyekoa tleka amo ne onechmakakej”. ¿Se tonal ijkon yotimomachilijkej? Amo kijtosneki amo kuali tla tiknekij okachi  tiktekichiuiliskej Jehová (1 Tim. 3:1). Moneki timomaluiskej porque tlamo timoueyinekiskej tla timokuayejyekoskej tlen amo moneki. Noijki ijkon kipanos se tokni tla mokuayejyekoa san ye uelis kichiuas se tekitl. Noijki tla se tokni mokuayejyekoa san ye inamik uelis kichiuas se tekitl uan oksekimej tokniuan amo uelis kichiuaskej. Amo ijkon timokuayejyekoskej tla tiyolyamankej.

14. ¿Tlen techmachtia tlen okichi Moisés ijkuak oksekimej okinmakakej tekitl?

¹⁴ Ma tikitakan tlen okichi Moisés ijkuak oksekimej okinmakakej tekitl uan tikitaskej tlen techmachtia. Ye okipatioitaya kinyekanas israelitas. Pero ¿tlen okichi Moisés ijkuak Jehová okilui kipaleuiskiaj oksekimej? Ye amo okijto amikaj uelis kipaleuiskia (Núm. 11:24-29). Noijki okiteititi okatka yolyamanki ijkuak okiseli ma kipaleuikan ma kinyekanakan israelitas (Éx. 18:13-24). Ijkon israelitas okinpiayaj miakej tlakamej ixtlamatkej uan amo ouejkauayaj ijkuak okiyektlaliayaj ouijkayotl tlen okipiayaj. Moisés okachi okipatioitaya kuali ma yetokan israelitas uan amo okitekipachoaya tlen tekitl okipiaya. Techmachtia itlaj miak ipati. Tla tiknekij tiktekichiuiliskej Jehová, moneki ma tiyetokan tiyolyamankej uan amo porque tikmatij tikchiuaskej miak tlamantli. Ijkon ken kijtoa Salmo 138:6: “Maski Jehová ueyititok kita akin yolyamanki”.

15. ¿Tlen okinmiluijkej sekimej tokniuan tlen okachi okitekichiuiliayaj Jehová?

¹⁵ Ijkuak techiluiaj oksekan ma tiktekichiuilitij Jehová. Amo yikipia miak xiuitl, sekimej tokniuan oksekan okintitlankej ma kitekichiuilitij Jehová. Itech 2014 tlayekankej itech distrito iuan insiuauan okinmiluijkej oksekan ma tlapaleuitij.  Noijki itech non xiuitl ayakmo yetoskiaj tlayekankej itech circuito tlen yokipiayaj setenta xiuitl. Noijki tokniuan tlen yokipiayaj ochenta xiuitl ayakmo kinyekanaskej tlayekankej. Sekimej betelitas noijki okinmiluijkej ma tlapaleuitij ken precursores. Oksekimej ayakmo okachi kitekichiuiliaj Jehová porque mokokoaj, moneki kinmaluiskej akinmej chantij inkalijtik noso porque moneki kichiuaskej okseki tlamantli.

16. ¿Ken kiteititiaj sekimej tokniuan yolyamankej?

¹⁶ Sekimej tokniuan omoyolkokojkej ijkuak okinmiluijkej oksekan ma kitekichiuilitij Jehová. Porque okinpaktiaya tlen okichiuayaj uan yimiak xiuitl ompa okatkaj. Pero satepan omoyolchikajkej uan omomatkej kanin oyajkej. ¿Tlen okinpaleui? Yejuan kitlasojtlaj Jehová. Kilnamiktokej omotemakakej ixpan Jehová uan amo kanin okatkaj (Col. 3:23). Kiteititiaj yolyamankej uan yolpakij kitekichiuiliaj Jehová san kanin kintitlaniskej. Ninmej tokniuan kitlaliaj imak toTajtsin Dios tlen kintekipachoa porque kimatokej ye kinpaleuis (1 Ped. 5:6, 7).

17. ¿Tleka tiktlasojkamatiliaj toTajtsin Dios itech iTlajtol technauatia ma tiyetokan tiyolyamankej?

¹⁷ Tiktlasojkamatiliaj toTajtsin Dios itech iTlajtol technauatia ma tiyetokan tiyolyamankej. Techpaleuia ma tiyetokan tiyolyamankej porque kuali tikatej uan noijki kinpaleuia oksekimej. Noijki techpaleuia ijkuak tikixnamikij ouijkayotl uan okachi timouikaj iuan toTajtsin Dios. Tiyolpakij Jehová kintlasojtla uan kinpatioita itekipanojkauan maski ye “Uejkapan uan Ueyititok” (Is. 57:15).