1. ¿Tleka moneki tiktlakamatiskej Jehová?

MONEKI tiktlakamatiskej Jehová porque ye otechchijchi. San ye kinamiki techiluis tlen moneki tikchiuaskej (Apoc. 4:11). Noijki moneki tiktlakamatiskej porque san ye kuali tlanauatia. Yikipia miak xiuitl katej tekiuajkej. Pero Jehová ye se tekiua tlen ixtlamatki, tetlasojtla, teajsikamati uan teiknomati (Éx. 34:6; Rom. 16:27; 1 Juan 4:8).

2. ¿Tlen techiluia Hebreos 12:9-11 tla tiknekij tiktlakamatiskej Jehová?

² ToTajtsin Dios kineki ma tiktlakamatikan porque tiktlasojtlaj uan amo porque tikmauiliaj. Ijkuak tlatitlanil Pablo okintlajkuilili hebreos, okinmilui ma kitlakamatikan toTajtsin Dios akin “techmilawah porke milák kineki techpalewis” (xiktlajtolti Hebreos 12:9-11).

3. (1) ¿Ken tikteititiaj tiktlakamatij Jehová? (2) ¿Tlen tlajtlanilmej tikinnankiliskej?

³ Tiktlakamatij Jehová ijkuak tikchiuaj nochi tlen technauatia uan amo san tikchiuaj tlen timokuayejyekoaj (Prov. 3:5). Ijkuak tikmatij ken iyelis toTajtsin Dios, okachi amo oui tiktlakamatij porque mota itech nochi tlen kichiua (Sal. 145:9). Okachi tiktlasojtlaj ijkuak okachi tikixmatij. Tla tiktlasojtlaj, amo moneki ma techiluijtokan tlen tikchiuaskej uan tlen amo tikchiuaskej. Timochijchikauaj timokuayejyekoskej ken Jehová uan ijkon tikmatiskej tlen kuali uan tlen amo kuali (Sal. 97:10). Pero ualeua oui tiktlakamatiskej Jehová. ¿Tleka? ¿Ken kinpaleuis tlayekankej, tetajmej uan siuamej tlen kinpiaj inkoneuan ken otetlakamatki Nehemías, tekiua David  uan María tlen okatka inantsin Jesús? Itech nin tlamachtil tikinnankiliskej ninmej tlajtlanilmej.

4, 5. Ijkon ken kijtoa Romanos 7:21-23, ¿tleka ualeua oui tiktlakamatiskej Jehová?

⁴ Ualeua oui tiktlakamatiskej Jehová porque titlajtlakolejkej. Ik non, oui tlen technauatia. Adán uan Eva inselti okipejpenkej tlen kuali uan tlen amo kuali ijkuak okikuajkej tlakilotl tlen okinnauatijka amo ma kikuakan (Gén. 3:22). Ik non, axkan miakej amo kichiuaj tlen kipaktia toTajtsin Dios uan inselti kipejpenaj tlen kuali uan tlen amo kuali.

⁵ Xamo ualeua tejuan noijki oui tikitaj tiktlakamatiskej Jehová maski tikixmatij uan tiktlasojtlaj porque Pablo ijkon okipanok (xiktlajtolti Romanos 7:21-23). Ijkon ken okichi Pablo tiknekij timochijchikauaskej tikchiuaskej tlen kipaktia toTajtsin Dios. Pero moneki nochipa ma timochijchikauakan ma tikchiuakan tlen kuali.

6, 7. Xikijto tleka ualeua oui tiktlakamatiskej Jehová.

⁶ Noijki ualeua oui tiktlakamatiskej Jehová porque tikpiaj tlatlamantli costumbres uan noijki ken otechiskaltijkej. Ualeua timokuayejyekoaj miak tlamantli tlen amo mouika iuan tlen kijtoa toTajtsin Dios uan xamo oui ayakmo ijkon timokuayejyekoskej. Ma tikitakan tleka ijkon tikijtoaj.

⁷ Miakej kinmiluiaj telpokamej uan ichpokamej ma kitlanikan miak tomin. Ijkon okipanok se tokni tlen itoka Mary. * Ijkuak ayamo omomachtiaya tlen kijtoa Biblia, omomachtiaya itech se ueyi universidad tlen kajki itech ialtepe. Itatajuan okiluijkej ma tekipano kanin kitlaniskia miak tomin uan ijkon miakej kixmatiskiaj. Ye ijkon okinekiaya kichiuas. Pero ayakmo ijkon omokuayejyeko ijkuak opejki kixmati Jehová uan ijkuak opejki kitlasojtla. Pero ye okijto: “Ualeua nikneki nitekipanos kanin niktlanis miak tomin pero amo nechpaleuis ma niktekichiuili Jehová ken axkan nikchijtok. Ijkon nechpanoa porque ijkon onechmachtijkej notatajuan, ik non, oui nikita ayakmo ijkon nikchiuas. Niktlatlaujtia Jehová ma nechpaleui amo ma nitekipano kanin ayakmo nechkauilis ma niktekichiuili” (Mat. 6:24).

8. ¿Tlen timomachtiskej?

⁸ Nochi tlen yotikitakej kiteititia techpaleuia tla tiktlakamatij Jehová. Pero kinpaleuis oksekimej tla tlayekankej, tetajmej uan siuamej tlen kinpiaj inkoneuan kitlakamatij Jehová. Axkan tikitaskej sekimej itekipanojkauan toTajtsin Dios okichijkej tlen ye okipaktiaya.

9. ¿Tlen ouijkayotl okixnamik Nehemías?

⁹ Jehová kinnauatia tlayekankej ma kinmaluikan itekipanojkauan (1 Ped. 5:2). Tlayekankej kinpaleuis tlen okichi Nehemías ijkuak okatka tekiua. Ye san tlen tlamantli uelis tlanauatiskia porque ompa Judá okimakakej non tekitl (Neh. 1:11; 2:7, 8; 5:14). Ma tikitakan tlen ouijkayotl okixnamik. Ye okimatki judíos okisokiotijkej teokali uan amo okinmakayaj levitas tomin  ken okijtoaya itlanauatil toTajtsin Dios. Noijki amo omoseuiayaj sábado uan omonamiktijkej iuan akinmej oualayaj itech okseki altepemej. Ik non, Nehemías omonekiaya itlaj kichiuas (Neh. 13:4-30).

10. ¿Tlen okichi Nehemías ijkuak okitak tlen okichijtokaj judíos?

¹⁰ Nehemías amo san niman okinmilui judíos tlen omonekiaya kichiuaskej. Ye achto okitlatlaujti Jehová ika nochi iyolo uan okilui ma kipaleui uan ijkon okinmachti judíos tlen okijtoaya itlanauatil toTajtsin Dios (Neh. 1:4-10; 13:1-3). Noijki okatka yolyamanki porque otekipano iuan ikniuan ijkuak okiyektlalijkej tepamitl tlen okiyaualoaya Jerusalén (Neh. 4:15).

11. Ijkon ken kijtoa 1 Tesalonicenses 2:7, 8, ¿ken moneki kinpaleuiskej tlayekankej?

¹¹ Xamo tlayekankej amo kixnamikiskej ouijkayotl ken Nehemías okipanok. Pero tlen okichi uelis kinpaleuis. Ma tikitakan ken uelis kichiuaskej. Tlayekankej mochijchikauaj kinpaleuiskej tokniuan. Pero amo moueyinekij nion kijtoaj oksekimej amitlaj ipati. Yejuan sapanoa kintlasojtlaj tokniuan (xiktlajtolti 1 Tesalonicenses 2:7, 8). Kiteititiaj tetlasojtlaj uan yolyamankej ijkuak kuali kinnotsaj tokniuan. Se tlayekanki itoka Andrew, okijto: “Yonikitak tokniuan san niman kichiuaj tlen tikinmiluiaj tla kualtsin tikinnotsaj uan tikteititiaj tikintlasojtlaj. Non kichiua ma kinpaleuikan tlayekankej”. Okse tokni itoka Tony uan yimiak xiuitl tlapaleuia ken tlayekanki, okijto: “Nimochijchikaua nikchiuas tlen kijtoa Filipenses 2:3 uan nikilnamiktok oksekimej okachi ueyititokej. Non nechpaleuia amo san ma nikinnauatijto tokniuan”.

12. ¿Tleka moneki yetoskej yolyamankej tlayekankej?

 ¹² Tlayekankej moneki yetoskej yolyamankej ijkon ken Jehová. Maski Jehová ueyi Tekiua itech nochi semanauak, nochipa toloa uan ijkon kinpaleuia akinmej amitlaj kipiaj (Sal. 18:35; 113:6, 7). Ye kintlauelita akinmej moueyinekij (Prov. 16:5).

13. ¿Tleka tlayekankej moneki kimatiskej ken kinnotsaskej tokniuan?

¹³ Tlayekankej tlen kitlakamatij Jehová moneki kimatiskej ken kinnotsaskej tokniuan. Tla amo ijkon kichiuaskej, xamo san niman kualaniskej ijkuak itlaj kinmiluiskej (Sant. 1:26; Gál. 5:14, 15). Andrew tlen achto itech yotimotlapouijkej, okijto: “Ualeua nikneki nitlananankilis ijkuak itlaj nechiluiaj. Pero nechpaleuia ma niyeto niyolyamanki ijkuak nimokuayejyekoa tlen okichijkej itekipanojkauan toTajtsin Dios”. Tlayekankej kitlakamatij Jehová ijkuak kiteititiaj kintlasojtlaj tokniuan uan kuali kinnotsaj. Noijki ijkuak ijkuak kuali kinnotsaj oksekimej tlayekankej (Col. 4:6).

14. ¿Tlen okinnauati tetajmej Jehová uan tlen kineki ma kichiuakan?

¹⁴ Jehová kinnauatia tetajmej ma kinyekanakan akinmej inmiuan chantij uan noijki kinnauatia ma kinmachtikan uan ma kinyektlalikan inkoneuan (1 Cor. 11:3; Efes. 6:4). Pero nin amo kijtosneki kinchiuiliskej san tlen kinekiskej akinmej inmiuan chantij. Noijki ma kilnamiktokan kimaktiliskej Jehová nochi tlen kichiuaj porque ye okintlali ma yetokan familias (Efes. 3:14, 15). Tetajmej kitlakamatij Jehová ijkuak kinyekanaj akinmej inmiuan chantij ken ye kipaktia. Sapanoa kinpaleuis tla kichiuaskej ken okichi David.

15. ¿Tleka tetajmej uelis kinpaleuis tlen okichi tekiua David?

¹⁵ Jehová okitlali David ma kinnauati akinmej inmiuan ochantiaya uan noijki israelitas. Uelis san tlen tlamantli tlanauatiskia porque okatka tekiua. Pero ualeua omotlapololti uan okichi tlen amo kuali (2 Sam. 11:14, 15). Pero ye okiseliaya ijkuak Jehová okiyektlaliaya. Okitlatlaujti Jehová uan okilui ma kiyekana (Sal. 51:1-4). Okatka yolyamanki porque okinkak ijkuak siuamej uan tlakamej okiluijkej tlen kichiuaskia (1 Sam. 19:11, 12; 25:32, 33). David  okitekichiuili Jehová uan amo oksepa okichi tlen amo kuali.

16. ¿Ken kinpaleuis tetajmej tlen okichi tekiua David?

¹⁶ ¿Ken kinpaleuis tetajmej tlen okichi tekiua David? Kuali xikinnauatikan akinmej inmiuan nanchantij. Xikselikan tlen amo kuali nankichiuaj uan noijki xikselikan ijkuak ikaj namechyektlalia ika tlen kijtoa Biblia. Tla ijkon nankichiuaskej, namosiuauan uan namokoneuan namechtlakaitaskej porque nanyolyamankej. Noijki xikiluikan Jehová nochi tlen namechtekipachoa ijkuak nanmotlatlaujtiaj. Ijkon akinmej inmiuan nanchantij kitaskej san ye Jehová uelis techpaleuis. Okachi xikpatioitakan nankitekichiuiliskej Jehová (Deut. 6:6-9). Sapanoa kinpaleuis akinmej inmiuan nanchantij tla nankichiuaj tlen nankijtoaj.

17. ¿Tlen okinnauati Jehová ma kichiuakan siuamej tlen kinpiaj inkoneuan?

¹⁷ Jehová okinnauati siuamej ma kinmaluikan akinmej inmiuan chantij uan noijki inkoneuan (Prov. 6:20). Tlen kinmiluiaj siuamej inkoneuan nochipa kinpaleuis (Prov. 22:6). Ma tikitakan ken kinpaleuis siuamej tlen okichi María.

18, 19. ¿Ken kinpaleuis siuamej tlen kinpiaj inkoneuan tlen okichi María?

¹⁸ María kuali okimatiaya tlen kijtoa iTlajtol toTajtsin Dios. Okitlakaitaya Jehová uan kuali iuan omouikaya. Noijki okitlakamatki maski omopatlak seki tlamantli itech inemilis (Luc. 1:35-38, 46-55).

¹⁹ Ma tikitakan seki tlamantli tlen okichi María uan kinpaleuis siuamej tlen kinpiaj inkoneuan. Namechpaleuis tla nanmomachtiskej tlen kijtoa Biblia, tla nankitlatlaujtiskej Jehová uan kuali iuan nanmouikaskej. Noijki xikpatlakan namoyelis tla nankinekij nankiyolpaktiskej Jehová. Ma tikitakan ken uelis nankichiuaskej. Xamo namotatajuan san onamechajuayaj ijkuak onanmoskaltijkej. Ik non, xamo nanmokuayejyekoaj noijki ijkon nankinmiskaltiskej namokoneuan. Maski Jehová yonamechmachti ken moneki nankinmiskaltiskej, xamo ualeua nansotlauaj ijkuak namokoneuan kichiuaj tlen amo kuali uan nankinekij nankinmajuaskej (Efes. 4:31). Moneki xiktlatlaujtikan Jehová ijkuak ijkon nankinekiskej nankichiuaskej. Se siuatl  itoka Lydia, okijto: “Ualeua ika nochi noyolo niktlatlaujtia Jehová ma nechpaleui amo ma nikajua nokone ijkuak amo nechtlakamati. Ualeua ijkuak itlaj nikiluia, san niman niktlatlaujtia Jehová ma nechpaleui. Non nechpaleuia ma nimoyolseui” (Sal. 37:5).

20. ¿Tlen kinpanoa sekimej siuamej tlen kinpiaj inkoneuan uan tlen uelis kichiuaskej?

²⁰ Noijki sekimej siuamej tlen kinpiaj inkoneuan amo kiteititiaj kintlasojtlaj inkoneuan (Tito 2:3, 4). Ijkon kinpanoa porque ijkuak omoskaltijkej amo okintlasojtlakej. Pero axkan amo moneki ijkon kinmiskaltiskej inkoneuan. Siuamej tlen kinekij kichiuaskej tlen Jehová kipaktia moneki kimatiskej ken kiteititiskej kintlasojtlaj inkoneuan. Xamo oui ayakmo ijkon nanmokuayejyekoskej. Pero moneki okse tlamantli nanmokuayejyekoskej, okse tlamantli nankimachiliskej uan nankichiuaskej. Nanyolpakiskej tla ijkon nankichiuaskej uan noijki namokoneuan.

21, 22. Ijkon ken kijtoa Isaías 65:13, 14, ¿ken techpaleuia tla tiktlakamatij Jehová?

²¹ Tekiua David okipaleui ijkuak okitlakamatki Jehová. Ye okijkuilo: “Itlanauatiluan Jehová melauakej, kichiuaj ma tiyolpakikan; itlanauatil Jehová chipauak, kichiua ma petlanikan toixtololouan”. Noijki okijto: “Noijki motlakeual ika kinejmachtiaj uan tla nikintlakamati nikselis tlateochiualistli” (Sal. 19:8, 11). Axkan san niman mota akin kitlakamati Jehová uan akin amo kineki. Akinmej kitlakamatij Jehová “sapanoa yolpakiskej porque kuali yetos inyolo” (xiktlajtolti Isaías 65:13, 14).

²² Okachi yolpakij tlayekankej, tetajmej uan siuamej tlen kinpiaj inkoneuan ijkuak kitlakamatij Jehová uan noijki okachi kinpaleuiaj tokniuan. Pero okachi kiyolpaktiaj Jehová (Prov. 27:11). Non okachi teyolpakti.