TLAMACHTIL 38
“Xiwikih nonawak [...] iwa Ne nomechsewis”
“Xiwikih nonawak nonnochteh akimeh tekitih chikawak iwa yononsotlawakeh, iwa Ne nomechsewis” (MAT. 11:28).
TLAKUIKALI 17 Nikneki nikchiuas
XIKILNAMIKTO *
1. Ijkon ken kijtoa Mateo 11:28-30, ¿tlen miak ipati okijto Jesús?
JESÚS okijto itlaj miak ipati inmixpan tlen okikaktokaj. Okijto: “Xiwikih nonawak [...] iwa Ne nomechsewis” (xiktlajtolti Mateo 11:28-30). Sapanoa kipia ipati tlen okijto. Ma timokuayejyekokan tlen okichi ijkuak se siuatl sapanoa omokokoaya.
2. ¿Ken okipaleui Jesús se siuatl?
2 Non siuatl omonekiaya totoka ma kipajtikan. Porque kanaj doce xiuitl otlajyoui maski miak uelta omopajti. Noijki Tlanauatil tlen okijkuilo Moisés okijtoaya non siuatl okatka sokio (Lev. 15:25). Okimatki Jesús okinpajtiaya akinmej omokokoayaj uan oyajki okitemoto. Ijkuak okajsito, okitelko itempa itlaken uan san niman opajtik. Pero Jesús amo san okipajti. Noijki okichi kuali ma momachili porque okilui ika tlasojtlalistli: “Nokone” uan ye oyolpakik (Luc. 8:43-48).
3. ¿Tlen tlajtlanilmej tikinnankiliskej?
3 Ma timokuayejyekokan ijkuak siuatl okijto kitemoti Jesús uan okajsito. Tejuan noijki moneki ijkon ma tikchiuakan. Ma timochijchikauakan timouikaskej iuan Jesús. Axkan maski timouikaj iuan Jesús amo techpajtia. Pero techiluia tlen moneki tikchiuaskej. Techiluia: “Xiwikih nonawak [...] iwa Ne nomechsewis”. Itech nin tlamachtil tikinnankiliskej makuili tlajtlanilmej: ¿Ken timouikaj iuan Jesús? ¿Tlen okinekiaya kijtos Jesús ijkuak okijto ‘matikwikakah
itlamamal’? ¿Tlen techmachtia tlen okichi Jesús? ¿Tleka techyolseuia ijkuak tikchiuaj tlen ye otechnauati? Noijki ¿ken uelis timoyolseuiskej maski ‘tikwikaskeh itlamamal’?“XIWIKIH NONAWAK”
4, 5. ¿Ken uelis timouikaskej iuan Jesús?
4 Moneki tikmatiskej tlen okichi Jesús uan tlen otlamachti tla tiknekij iuan timouikaskej (Luc. 1:1-4). Ik non, moneki timomachtiskej tlen okichi Jesús porque amikaj uelis topatka kichiuas. Noijki timouikaj iuan Jesús ijkuak tikpejpenaj tikchiuaskej ken ye uan timoapolaktiaj.
5 Noijki timouikaj iuan Jesús ijkuak tikinmiluiaj tlayekankej ma techpaleuikan. Yejuan katej ken se tetliokolil tlen okintlali Jesús “mayetokah tlajpixkeh” (Efes. 4:7, 8, 11; Juan 21:16; 1 Ped. 5:1-3). Pero moneki ma tikinmiluikan tlayekankej ma techpaleuikan uan amo ma tikchiakan yejuan ma kitakan ken techyolchikauaskej. Ma tikitakan tlen okipanok Julian. Ye okijto: “Onitlapaleuiaya Betel pero onimokoko uan onikiski. Se noyolikni onechilui ma nikilui se tlayekanki ma nechtlajpaloti. Onimokuayejyeko amo omonekiaya. Pero satepan onikilui se tlayekanki ma nechtlajpaloti uan sapanoa onechyolchika tlen onechilui”. Tlayekankej yolmelajkej ijkon ken ome tokniuan tlen okitlajpalotoj Julian. Techpaleuiaj ma timokuayejyekokan ken Jesús uan noijki ma tikchiuakan ken ye (1 Cor. 2:16; 1 Ped. 2:21). ¡Tlayekankej sapanoa techpaleuiaj!
“XIKWIKAKAH NOTLAMAMAL”
6. ¿Tlen okinekiaya kijtos Jesús ijkuak okijto ‘xikwikakah notlamamal’?
6 Ijkuak Jesús otechilui ‘xikwikakah notlamamal’ xamo okijto ma tikkauilikan ma technauati. Noijki xamo okijto ma tikpaleuikan ma tikuikakan itlamamal uan san sekan ma tiktekichiuilikan Jehová. Maski amo tikmatij tlen okinekiaya kijtos, tikajsikamatij itlaj moneki tikchiuaskej.
7. Ijkon ken kijtoa Mateo 28:18-20, ¿tlen otechnauati Jehová ma tikchiuakan uan tlen moneki ma tikneltokakan?
7 Tikseliaj tikchiuaskej tlen ye okijto ijkuak timotemakaj ixpan Jehová uan timoapolaktiaj. Jesús kinyoleua nochtin ijkon ma kichiuakan. Ye amikaj kixtopeua tla kinekij kitekichiuiliskej Jehová ika nochi inyolo (Juan 6:37, 38). Nochtin imachtijkauan Jesús tetlapouiaj uan tlamachtiaj ijkon ken otlanauati Jehová. Nochipa ma tikneltokakan Jehová techpaleuis ma tikchiuakan tlen ye otechnauati (xiktlajtolti Mateo 28:18-20).
“XIKCHIWAKAH TLAN NE NIKCHIWA”
Ma titeyolseuikan ken okichi Jesús (Xikinmita párrafos 8 a 11). *
8, 9. (1) ¿Tleka akinmej yolyamankej okinekiayaj yetoskej iuan Jesús? (2) ¿Tlen moneki timotlajtlaniskej?
8 Akinmej yolyamankej okinekiayaj yetoskej iuan Jesús (Mat. 19:13, 14; Luc. 7:37, 38). ¿Tleka? Porque ye amo okipiaya iyelis ken fariseos. Yejuan amo otetlasojtlayaj uan omoueyinekiayaj (Mat. 12:9-14). Pero Jesús otetlasojtlaya uan okatka yolyamanki. Fariseos san otlaixnekiayaj uan omoueyinekiayaj porque miakej okinmixmatiayaj. Pero Jesús okinmititi imachtijkauan amo ma tlaixnekikan, ma yetokan yolyamankej uan ma kitechiuilikan tlen kuali (Mat. 23:2, 6-11). Fariseos san okinmomojtiayaj oksekimej porque okinmajuayaj tla amo okichiuayaj tlen okinmiluiayaj (Juan 9:13, 22). Pero Jesús oteyolchikauaya uan kualtsin okinnotsaya oksekimej.
9 ¿Tikchiuaj ken okichi Jesús? Ma timotlajtlanikan: “¿Nechixmatij ne amo san niman nikualani uan niyolyamanki? ¿Nechpaktia nikinpaleuis oksekimej maski amo miak tlamantli nikchiuas? ¿Nitetlasojtla?”.
10. ¿Tlen okichi Jesús para kuali ma momachilikan imachtijkauan?
10 Jesús kualtsin okinnotsaya imachtijkauan, okipaktiaya kinmachtis uan yejuan kuali omomachiliayaj (Luc. 10:1, 19-21). Okinmilui ma kitlajtlanikan san tlen tlamantli okinekiayaj kimatiskej uan okikakiaya tlen omokuayejyekoayaj (Mat. 16:13-16). Ijkuak tiktokaj xochitl uan kuali tikmaluiaj, kualtsin moxochiotia. Ijkon ken non xochitl kualtsin moxochiotia, Jesús kualtsin okinmachti imachtijkauan uan kuali okichijkej tlen okinnauati.
Ma timouikakan iuan tokniuan
Ma tiyolpakikan ijkuak titetlapouiaj
Ma tiyetokan tiyolyamankej uan ma titlapaleuikan *
11. ¿Tlen moneki timotlajtlaniskej?
11 Tla tikinyekanaj oksekimej, ma timotlajtlanikan: “¿Tlen nikchiua para kuali ma momachilikan oksekimej? ¿Nikchiua ma yetokan ika yolseuilistli? ¿Nikinmiluia oksekimej uelis nechtlajtlaniskej tlen kinekij kimatiskej? ¿Nikkaki tlen mokuayejyekoaj?”. Amo ma tikchiuakan ken okichiuayaj fariseos. Yejuan okualaniayaj ijkuak itlaj okintlajtlaniayaj uan okintlajyouiltiayaj akinmej okijtoayaj tlen omokuayejyekoayaj (Mar. 3:1-6; Juan 9:29-34).
“NONKAJSISKEH YOLSEWÍLISTLI”
12-14. ¿Tleka tikpiaj “yolsewílistli” ijkuak tikchiuaj tlen Jesús otechnauati?
12 ¿Tleka tikpiaj “yolsewílistli” ijkuak tikchiuaj tlen Jesús otechnauati? Ma tikitakan tleka tikpiaj timoyolseuiaj.
13 Kuali inyelis akinmej techyekanaj. Jehová ye akin okachi kuali techyekana uan techtlasojkamatilia tlen tikchiuaj uan amo techtlajyouiltia. Kipatioita timochijchikauaj tiktekichiuiliaj (Heb. 6:10). Noijki techpaleuia ma tikchiuakan tlen ye kineki (2 Cor. 4:7; Gál. 6:5). Toueyi tekiua Jesús otechititi ken moneki timouikaskej iuan oksekimej (Juan 13:15). Noijki tlayekankej kichiuaj ken Jesús akin “Toweyi Tlájpixki” (Heb. 13:20; 1 Ped. 5:2). Mochijchikauaj techyolchikauaskej, techtlasojtlaj uan kiteititiaj yolchikauakej ijkuak techmachtiaj uan techmaluiaj.
14 Kuali inyelis akinmej inmiuan tiktekichiuiliaj Jehová. San tejuan tiyolpakij tiktekichiuiliaj toTajtsin Dios uan sapanoa timotlasojtlaj. Ma timokuayejyekokan nin tlamantli. Tejuan tiktekichiuiliaj Jehová iuan akinmej kipiaj chipauak innemilis uan amo mokuayejyekoaj okachi ueyititokej. Kimatij kichiuaskej miak tlamantli pero amo moueyinekij. Amo mokuayejyekoaj oksekimej amitlaj inpati. Tejuan timouikaj ken tiknimej. Sapanoa techtlasojtlaj uan tla monekis topatka motemakaskej ma kinmiktikan.
15. ¿Ken moneki tikitaskej tekitl tlen otechnauatijkej ma tikchiuakan?
15 Tikchiuaj se tekitl tlen okachi kualtsin. Tejuan tikinmachtiaj oksekimej tlen melauak itech toTajtsin Dios uan tikinmititiaj Diablo san tlakajkayaua (Juan 8:44). Satanás san kintlajyouiltia oksekimej uan kichiua ma mosotlauakan. Ma tikitakan ken kichiua. Kineki ma tikneltokakan Jehová amo techtlapojpoluia ijkuak titlajtlakolchiuaj uan amo technamiki ma techtlasojtla. San kineki techkajkayauas uan non sapanoa teyolkoko. ToTajtsin Dios techtlapojpoluia ijkuak timouikaj iuan Cristo. Noijki Jehová sapanoa techtlasojtla (Rom. 8:32, 38, 39). ¡Tiyolpakij tikinmachtiaj oksekimej ma tlaneltokakan itech Jehová uan tikitaj ken kinpaleuia tlen tlamachtia Biblia!
MA TIKSELIKAN “YOLSEWÍLISTLI” TLEN TECHMAKA JESÚS
16. ¿Tleka amo etik tekitl tlen Jesús techiluia ma tikchiuakan?
16 Jesús techiluia ‘matikwikakah itlamamal’ pero nin amo etik. Ma tikitakan tleka ijkon tikijtoaj. Xamo techtekipachoa tlen ika timopanoltiskej uan non kichiua ma timosotlauakan uan ayakmo ma tiyolpakikan. Pero sapanoa tiyolpakij ijkuak tiktekichiuiliaj Jehová uan Cristo. Xamo ijkuak tlami titekipanoaj sapanoa tisotlauaj uan moneki timochijchikauaskej tiaskej timonechikotiuij. Pero ijkuak timokopatiuij, kuali timomachiliaj uan timoyolchikauaj. Noijki ijkon techpanoa ijkuak tiauij titetlapouitiuij noso ijkuak timomachtiaj. Sapanoa techpaleuia ijkuak ijkon tikchiuaj.
17. ¿Tleka moneki ma tikitakan tlen tikchiuaj uan tleka kuali ma timokuayejyekokan?
17 Moneki tikitaskej tlen ueli tikchiuaj uan kox titlaxikoskej. Ik non, kuali ma tikitakan tlen tikchiuaskej. Xamo sapanoa titekipanoaj porque tiknekij tikpiaskej miak tlamantli. Se tonal, se telpochtli okitlajtlani Jesús tlen kichiuaskia uan ijkon kipiaskiaj yolilistli tlen amo keman tlamis. Non telpochtli okitlakamatiaya Tlanauatil tlen okijkuilo Moisés uan okipiaya kuali iyelis. Porque itech Evangelio tlen okijkuilo Marcos kijtoa Jesús okitlasojtlak non telpochtli. Ik non, okilui: “Xiknemakati nochi tlan tikpia [...] iwa tiwits nowa”. Non telpochtli amo okimatiaya tlen kichiuas. Pero nesi amo oyajki iuan Jesús porque amo okinek kikauas nochi tlen okipiaya (Mar. 10:17-22). Non telpochtli amo okiseli ‘kiwikas itlamamal’ Jesús uan okachi okitemo “kitlawelpias tomi” (Mat. 6:24). ¿Tlen tikchiuaskiaj tla noijki techiluiskiaj ken non telpochtli?
18. ¿Tlen moneki ma tikchiuakan uan tleka?
18 Moneki ma tikitakan tlen okachi tikpatioitaj. ¿Tleka? Ijkon tikitaskej kox ipati tlen tikchiuaj. Ma tikitakan tlen okipanok se tokni itoka Mark. Ye okijto: “Miak xiuitl onimokuayejyeko san onikpiaya tlen ika onimopanoltiaya. Maski onikatka precursor, nochipa onimokuayejyekoaya ken okachi niktlaniskia tomin uan ijkon niyolpakiskia. Onimotlajtlaniaya tleka ijkon onimokuayejyekoaya. Pero onikitak okachi onechtekipachoaya tlen ne oniknekiaya nikpias uan ayakmo oniktekichiuiliaya Jehová ken moneki”. Mark ayakmo ijkon omokuayejyeko uan omochijchika okachi kitekichiuilis Jehová. Ye okijto: “Ualeua ok nimotekipachoa. Pero Jehová uan Jesús nechpaleuiaj ma nikintekichiuili”.
19. ¿Tleka moneki ma tikilnamiktokan tiktekichiuiliaj Jehová?
19 Jesús nochipa techyolseuis maski tikuikaj itlamamal tla tikchiuaj nin eyi tlamantli. Se tlamantli, tla tikilnamiktokej tiktekichiuiliaj toTajtsin Dios. Ma tikchiuakan tekitl ken Jehová technauatia porque ye iaxka. Tejuan san tiitekipanojkauan uan ye toTeko (Luc. 17:10). San timotlajyouiltiskej tla tiktekichiuiliskej san ken tejuan tiknekij. Ma tikitakan tlen uelis kipanos se toro. Mokojkos tla san kineki yas kanin ye kineki uan amo kineki ma kipeua iteko. Pero uelis tikchiuaskej miak tlamantli tla tiktlakamatij tlen Jehová technauatia. Ma kilnamiktokan amikaj uelis kijtos amo ma mochiua tlen kineki Jehová (Rom. 8:31; 1 Juan 4:4).
20. ¿Tlen moneki ma tikmatokan ijkuak tikuikaj itlamamal Jesús?
20 Ome tlamantli, ma tiktekichiuilikan Jehová porque tiktlasojtlaj. Tiknekij tikueyichiuaskej toTajtsin Dios akin sapanoa techtlasojtla. Itech achto siglo miakej sapanoa otlaixnekiayaj. Satepan ayakmo oyolpakej uan okikajkej Jesús (Juan 6:25-27, 51, 60, 66; Filip. 3:18, 19). Pero miakej okitlasojtlakej toTajtsin Dios ika nochi inyolo uan noijki oksekimej. Yejuan oyolpakiayaj kiuikaskej itlamamal Jesús porque noijki okinekiayaj kipaleuiskej ompa iluikak. Tejuan noijki tiyolpakiskej tla tikuikaj itlamamal Jesús porque tikmatij akin tiktekichiuiliaj.
21. Ijkon ken kijtoa Mateo 6:31-33, ¿ken techpaleuis Jehová?
21 Eyi tlamantli, ma tikilnamiktokan Jehová touan kajki. Otikpejpenkej tikchiuaskej se tekitl sapanoa oui maski Jesús otechnejmachti techtlajyouiltiskej. Pero Jehová techyolchikauas ma tikixnamikikan non ouijkayotl. Tla titlaxikoskej, okachi tiyetoskej tiyolchikauakej (Sant. 1:2-4). Noijki Jehová techmakas nochi tlen techpolos, Jesús kuali techyekana uan tokniuan techyolchikauaj (xiktlajtolti Mateo 6:31-33; Juan 10:14; 1 Tes. 5:11). Tikpiaj nochi tlen moneki uan non techpaleuis ma tikixnamikikan san tlen tlamantli.
22. ¿Tleka tiyolpakij?
22 San niman omoyolseui siuatl tlen Jesús okipajti. Pero nochipa kipiaskia yolseuilistli tla kichiuaskia tlen Jesús kijtoa. ¿Tlen okichi non siuatl? Tla omochi imachtijka Jesús xamo oyajki iluikak uan iuan tlanauatia. Okiseli tlateochiualistli tla omochijchika okichi tlen Jesús kijtoa. Tejuan noijki tiyolpakij otikselijkej itlamamal Jesús maski tiaskej iluikak noso tichantiskej nikan tlaltikpak.
TLAKUIKALI 13 Ma tikchiuakan ken Cristo
^ párr. 5 Jesús techiluia iuan ma timouikakan. ¿Tlen kijtosneki timouikaskej iuan Jesús? Itech nin tlamachtil tikitaskej non tlamantli uan noijki tikitaskej ken techyolseuia titekipanoskej iuan Cristo.
^ párr. 60 FOTO: Jesús tlatlamantli oteyolchika.
^ párr. 66 FOTO: Se tokni teyolchikaua ken Jesús okichi.