1. ¿Keman tikitaj oui tiktekichiuiliskej Jehová?

¿KEMAN tikitaj oui tiktekichiuiliskej Jehová? ¿Ijkuak kuali tikatej noso ijkuak titlajyouiaj? Tla titlajyouiaj, san niman tikiluiaj Jehová ma techpaleui. ¿Tlen tikchiuaj ijkuak kuali tikatej? ¿Tikilkauaj okachi miak ipati tiktekichiuiliskej toTajtsin Dios? Jehová okinnejmachti israelitas para amo ijkon kinpanoskia (Deut. 6:10-12).

2. ¿Tlen okichi tekiua Asá uan ken techpaleuia?

² Tekiua Asá kuali okichi porque otlaneltokak itech Jehová. Amo san okitekichiuili ijkuak otlajyouiaya, noijki okitekichiuili ijkuak okatka ika yolseuilistli. Ijkuak okatka telpochtli opejki kitekichiuilia Jehová ika nochi iyolo (1 Rey. 15:14). Ijkon okiteititi porque okipojpolo nochi religión tlen amo melauak ompa Judá. Biblia kijtoua okipojpolo kanin sekimej okinueyichiuayaj teotsitsintin uan okseki tlamantli tlen noijki ompa okitekitiltiayaj (2 Crón. 14:3, 5). Noijki ayakmo okikauili ma tlanauati Maacá tlen okatka isitsin porque okichijchi se teotsin uan okinekiaya israelitas ma kiueyichiuakan (1 Rey. 15:11-13).

3. ¿Tlen timomachtiskej?

³ Asá amo san okinpojpolo teotsitsintin. Noijki okinpaleui akinmej ochantiayaj Judá oksepa ma kiueyichiuakan Jehová. Ye okiteochi Asá uan noijki akinmej ochantiayaj Judá, ik non, okipiayaj yolseuilistli. * Ijkon okatkaj majtlaktli xiuitl nochi kanin otlanauatiaya Asá (2 Crón.  14:1, 4, 6). Itech nin tlamachtil tikitaskej tlen okichi Asá itech non majtlaktli xiuitl. Satepan tikitaskej tokniuan tlen okatkaj achto siglo okichijkej tlen omonekiaya ijkuak okatkaj ika yolseuilistli ijkon ken okichi Asá. Saiktlami tikitaskej tlen uelis tikchiuaskej tla kanin tichantij tekiuajkej techkauiliaj ma tikueyichiuakan Jehová.

4. Ijkon ken kijtoua 2 Crónicas 14:2, 6, 7, ¿tlen okichi Asá ijkuak nochtin okatkaj ika yolseuilistli?

⁴ (Xiktlajtolti 2 Crónicas 14:2, 6, 7). Asá okinmilui akinmej ochantiayaj Judá Jehová okinpaleui, ik non, okatkaj ika yolseuilistli. Pero Asá amo omokuayejyeko amitlaj kichiuas. Okinchijchi altepemej, okinyaualo ika tepamitl uan okintlalili torres uan puertas. Okinmilui akinmej ompa ochantiayaj amikaj okinnauatiaya, ik non, uelis kichiuaskiaj tlen yejuan kipejpenaskiaj. Uelis tekipanoskiaj itech tlali tlen Jehová okinmakak uan amikaj kinkuejsoskia. Ik non, nochtin okinyole porque okatkaj ika yolseuilistli.

5. ¿Ken okinpaleui Asá isoldados?

⁵ Ijkuak amo okatka guerra, Asá okinnauati isoldados ma moyektlalikan (2 Crón. 14:8). ¿Kijtosneki non amo okineltokaya Jehová kipaleuiskia? Amo. Kema otlaneltokaya pero ye okimatiaya omonekiaya kinauatis ialtepe ma moyektlali porque satepan uelis kipiaskia ouijkayotl. Ye okimatiaya ompa Judá amo nochipa yetoskia ika yolseuilistli.

6. ¿Tlen okichijkej tokniuan itech achto siglo?

⁶ Tokniuan tlen ochantiayaj itech achto siglo okintlajyouiltijkej pero oajsik tonal  ijkuak okipixkej yolseuilistli. ¿Ijkuakon tlen okichijkej? Tokniuan omochijchikajkej nochtin kintlapouiskej. Amochtli Hechos kijtoua “okachi omoyolchikawayah otlaneltokayah inawak Toteko [Jehová]” uan ken nochipa otetlapouiayaj, “omomiakiliayah”. Jehová okinteochi porque otetlapouijkej ika pakilistli ijkuak okatkaj ika yolseuilistli (Hech. 9:26-31).

7, 8. Xikijto tlen okichijkej Pablo uan oksekimej tokniuan.

⁷ Imachtijkauan Jesús omochijchikauayaj nochipa tetlapouiskej. Tlatitlanil Pablo omoka Éfeso porque ‘okitak sa tlawel weletis kitekichiuiliskia Diosʼ. Ijkon uelis tetlapouiskia uan ijkon kinmachtiskia oksekimej ma kichiuakan ken Cristo (1 Cor. 16:8, 9).

⁸ Pablo uan oksekimej tokniuan noijki miakej okintlapouijkej itech xiuitl 49, ijkuak tlatitlanilmej uan tlayekankej tlen okatkaj Jerusalén okitakej kox tokniuan ok kimochiuiliskiaj circuncisión (Hech. 15:23-29). Ijkuak okinmiluijkej tokniuan ken omokajkej, yejuan omochijchikajkej “otetlapowiayah de itlajtol Toteko” Jehová (Hech. 15:30-35). ¿Tlen opanok satepan? Biblia kijtoua “tokniwah okachi okineltokayah Cristo Jesús, iwa ixmostla okachi omomiakiliayah” (Hech. 16:4, 5).

9. ¿Tlen techkauiliaj axkan ma tikchiuakan uan tlen uelis timotlajtlaniskej?

⁹ Axkan techkauiliaj ma titetlapouikan itech miakej altepemej. Tla toaltepe ijkon panoua, ma timotlajtlanikan: “¿Nimochijchikaua nitetlapouis?”. Itekipanojkauan Jehová mochijchikauaj tetlapouiskej uan tlamachtiskej porque axkan tikatej itlamian tonalmej (Mar. 13:10). Ma timokuayejyekokan ken okachi uelis tiktekichiuiliskej Jehová.

10. ¿Tlen techyolinia ma tikchiuakan 2 Timoteo 4:2?

¹⁰ ¿Tlen uelis tikchiuaskej tla tikatej ika yolseuilistli? (Xiktlajtolti 2 Timoteo 4:2). Ma tikitakan tlen uelis tikchiuaskej. Ma tikitakan kox tejuan noso se tofamiliar uelis okachi tetlapouis noso uelis mochiuas precursor (Prov. 11:4; Mat. 6:31-33; 1 Juan 2:15-17).

11. ¿Tlen yokichijkej sekimej tokniuan para okachi tetlapouiskej?

¹¹ Miakej tokniuan momachtiaj okse tlajtoli para tetlapouiskej uan tlamachtiskej. Ialtepe Jehová kitemoua ken kinpaleuis, ik non, yokinchijchi amatlajkuilolmej ika miakej tlatlamantli tlajtolmej. Itech xiuitl 2010, san okatkaj amatlajkuilolmej ika quinientos tlajtolmej. Pero axkan yitikinpiaj kanaj mil tlajtolmej.

12. Xikijto ken momachiliaj akinmej kikakij iTlajtol toTajtsin Dios ika intlajtol.

¹² ¿Ken momachiliaj miakej ijkuak kintlapouiaj ika intlajtol? Ma tikitakan tlen okipanok se tokni. Ye oyajki se ueyi nechikol ompa Memphis, Tennessee, Estados Unidos. Ompa otlamachtijkej ika itlajtol tlen itoka kiniaruanda, tlen tlajtouaj ompa Ruanda, República Democrática del Congo uan Uganda. Ijkuak otlanki ueyi nechikol ye okijto: “Yinikpia diecisiete xiuitl nichanti nikan Estados Unidos uan yikin axkan onikajsikamatki tlen toTajtsin Dios tlamachtia”. ITlajtol toTajtsin Dios oajsik itech iyolo porque okikak ika itlajtol. Tla tiuelij ma timomachtikan okse  tlajtoli uan ijkon uelis tikintlapouiskej oksekimej. Ma timokuayejyekokan xamo sekimej okachi kinekiskej momachtiskej tla tikintlapouiaj ika intlajtol. Tiyolpakiskej miak tla ijkon tikchiuaskej.

13. ¿Tlen okichijkej tokniuan tlen chantij Rusia ijkuak okatkaj ika yolseuilistli?

¹³ Itech seki altepemej tokniuan amo kinkauiliaj ma tetlapouikan. Ma timokuayejyekokan tlen kinpanotok tokniuan tlen chantij Rusia. Miak xiuitl okintlajyouiltijkej pero marzo de 1991 tekiuajkej okinkauilijkej ma tetlapouikan. Ijkuakon san okatkaj dieciséis mil tlen otetlapouiayaj. Veinte xiuitl satepan yokatkaj kanaj ciento sesenta mil. Nin techititia tokniuan omochijchikajkej otetlapouijkej. Uan maski axkan oksepa ayakmo katej ika yolseuilistli ok mochijchikauaj kitekichiuiliskej Jehová ika miak pakilistli.

14, 15. ¿Ken okipaleui Jehová tekiua Asá?

¹⁴ Oksepa ma tikilnamikikan tlen opanok ijkuak okatka Asá. Akinmej ochantiayaj Judá okipiayaj yolseuilistli pero satepan kanaj se millón soldados tlen ochantiayaj Etiopía inpan oualajkej. Zérah okinyekanaya uan ye okineltokaya kitlaniliskia altepetl Judá. Pero Asá okineltokaya Jehová kipaleuiskia. Ik non, okitlatlaujti uan okilui: “Techpaleui oh Jehová toTajtsin Dios, porque melauak motech titlaneltokaj uan itech motoka otiualajkej para tikinmixnamikiskej ninmej tlaltikpaktlakamej” (2 Crón. 14:11).

 ¹⁵ Maski altepetl Etiopía okipiaya okachi miakej soldados, Asá okimatiaya Jehová uelis kinpaleuiskia isoldados. Jehová okipaleui ialtepe uan okintlanilijkej soldados tlen oualayaj Etiopía (2 Crón. 14:8-13).

16. ¿Ken tikmatij amo nochipa tikpiaskej yolseuilistli?

¹⁶ Amo tikmatij tlen techpanos. Xamo axkan tikatej ika yolseuilistli pero tikmatij amo nochipa ijkon tiyetoskej. Jesús okijto: “Nochteh n tlaltikpaktlakah nomechkokoliskeh por nonnechneltokah” (Mat. 24:9). Tlatitlanil Pablo noijki okijto: “Nochteh akimeh kinekiskeh kimosenmakaskeh [iuan toTajtsin Dios uan] Cristo Jesús, san kan yaskeh kintlaijyowiltiskeh” (2 Tim. 3:12). Satanás “kualankamiki, ik non, ye techtlajyouiltis (Apoc. 12:12).

17. ¿Keman tikteititiskej kox melauak titlaneltokaj itech toTajtsin Dios?

¹⁷ Ayakmo miak poliui yiuits ueyi tlajyouilistli, ijkuakon tikteititiskej kox melauak titlaneltokaj itech toTajtsin Dios. Biblia kijtoua ueyi “tlaijyowílistli yetos satlawel temojti non ayamaka ijkó okitak desde ijkuak omonexti n tlaltíkpaktli, iwa ayik oksepa ijkó tlamochiwas” (Mat. 24:21). Ijkuakon ayakmo kinekiskej ma titetlapouikan uan xamo tofamilia touan kualanis (Mat. 10:35, 36). Ma timotlajtlanikan: “¿Nikchiuas ken Asá uan nikneltokas Jehová nechpaleuis uan nechmaluis?”.

18. Ijkon ken kijtoua Hebreos 10:38, 39, ¿tlen techpaleuis para tikxikoskej tlen panos?

¹⁸ Jehová techpaleuia ma tikpiakan chikauak totlaneltokilis para uelis titlaxikoskej. Ye techmaka “tlakeuali yolmelajki uan ixtlamatki” tlen techpaleuia chikauak ma tikpiakan totlaneltokilis (Mat. 24:45, TNM). Pero tejuan moneki timochijchikauaskej para okachi titlaneltokaskej itech Jehová (xiktlajtolti Hebreos 10:38, 39).

19, 20. Ijkon ken kijtoua 1 Crónicas 28:9, ¿tlen moneki timotlajtlaniskej uan tleka?

¹⁹ Ma tiktemokan Jehová ijkon ken okichi  Asá (2 Crón. 14:4; 15:1, 2). Ijkon tikchiuaj ijkuak opejki timomachtiaj uan otimoapolaktijkej. Pero moneki timochijchikajtoskej okachi tiktlasojtlaskej Jehová. Tla tiknekij tikmatiskej kox tiktlasojtlaj, ma timotlajtlanikan: “¿Nochipa nimonechikoua?”. Ijkuak timonechikouaj tokniuan techyolchikauaj nochipa ma tiktekichiuilikan Jehová uan tiyolpakij porque inmiuan tikatej (Mat. 11:28). Noijki ma timotlajtlanikan: “¿Nimomachtia noselti? Tla tichantij iuan tofamilia, ¿timomachtiaj sejse semana? Tla tichantij toselti, ¿timomachtiaj ijkon ken yejuan? ¿Timochijchikauaj titetlapouiskej uan titlamachtiskej?”.

²⁰ ¿Tleka moneki ijkon ma timotlajtlanikan? Biblia kijtoua Jehová kita tlen timokuayejyekouaj uan tlen onka itech toyolo. Ik non, tejuan moneki timotlajtlaniskej para tikmatiskej ken tikatej (xiktlajtolti 1 Crónicas 28:9). Ma tikiluikan Jehová ma techpaleui tla tikitaj moneki tikpatlaskej tlen timokuayejyekouaj uan tlen tiknekij tikchiuaskej. Axkan moneki timoyektlaliskej porque tikpiaskej ouijkayotl. Ik non, tla tikatej ika yolseuilistli ma tikchiuakan tlen moneki.