1. ¿Tlen okinmilui Jesús naui tlakamej tlen omichkitskiaya uan tlen okichijkej?

PEDRO, Andrés, Santiago uan Juan okatkaj imachtijkauan Jesús uan omichkitskiayaj. Xamo omotlajtlachialtijkej ijkuak Jesús okinmilui: “Xiwikih nowa, iwa ya nonkinmichmaskeh tlakah”. * ¿Tlen okichijkej? Biblia kijtoua: “Yejwah sa nima okinkajtejkeh inmichayawah iwa oyajkeh iwan Jesús” (Mat. 4:18-22). Axkan okse tlamantli kichiuaskiaj porque ayakmo michkitskiskiaj. Yejuan ‘pewas kinmichmaskiah tlakahʼ (Lucas 5:10). Axkan Jesús noijki kinmiluia miakej tlen yolyamankej ma kichiuakan tlen ye kinmiluia (Mat. 28:19, 20, TNM). ¿Tejuatsin yitikchijtok tlen Jesús okijto?

2. ¿Tleka moneki titetlapouiskej uan tlen techpaleuis ijkon ma tikchiuakan?

² Xamo yitikpia miak xiuitl timomachtijtok Biblia, yotikpatlak monemilis uan moneki timokuayejyekos kox yititetlapouis. Tla amo tikmati kox tikchiuas, amo ximoyolkoko. Xamo ijkon mitspanoua porque tikmati miak ipati ijkon tikchiuas. Biblia kijtoua Pedro uan akinmej inmiuan omouikaya san niman okikajtejkej tlen okichijtokaj.  Pero Pedro uan ikni Andrés amo san ijkon okichijtikiskej. Yokipiaya kanaj tlajko xiuitl okixmatiayaj Jesús uan okineltokakej ye Mesías (Juan 1:35-42). Xamo noijki ijkon, tejuatsin yotimomachti ken iyelis Jehová uan Jesús uan tikneki tiktekichiuilis Jehová. Pero achto moneki timokuayejyekos tlen moneki tikchiuas. ¿Tlen okinpaleui Pedro, Andrés uan oksekimej ijkon ma kichiuakan?

3. ¿Tlen techpaleuis ma tikchiuakan tlen Jesús okijto?

³ Imachtijkauan Jesús okinekiayaj tetlapouiskej, okimatiayaj tekipanoskej, okatkaj yolchikauakej uan okichiuayaj tlen moneki. Nochi non okinpaleui kuali ma tetlapouikan tlen kichiuas toTajtsin Dios. Tlen axkan timomachtiskej techpaleuis ijkon ma tikchiuakan.

4. ¿Tleka Pedro omichkitskiaya?

⁴ Pedro omichkitskiaya uan ijkon ye uan ifamilia okipiayaj tlen ika mopanoltiskej uan sapanoua okipaktiaya non tekitl (Juan 21:3, 9-15). Noijki okipaktiaya ‘kinmichmas tlakahʼ, kijtosneki okipaktiaya tetlapouis. Jehová okipaleui kuali ma tlamachti (Hech. 2:14, 41).

5. (1) Ijkon ken kijtoua Lucas 5:8-11, ¿ken omomachili Pedro? (2) ¿Tlen mitspaleuis tla timomachilia ken Pedro?

⁵ Tiktlasojtlaj Jehová, ik non, titetlapouiaj. Non techpaleuis ma titetlapouikan maski timokuayejyekouaj amo tikmatij ken tikchiuaskej. Ijkuak Jesús okilui Pedro ma ‘kinmichma tlakahʼ, noijki okilui: “Amo ximawi” (xiktlajtolti Lucas 5:8-11). Pedro amo okimomojtiaya tlen  kipanoskia tla mochiuaskia imachtijka Jesús. Pedro omotlajtlachialti ijkuak okitak Jesús okinpaleui uan ijkon okinmajsikej miakej michimej. Jesús okichi se milagro, ik non, Pedro omokuayejyeko uelis kipaleuiskia. ¿Tejuatsin noijki timokuayejyekoua amo uelis tikchiuas tlen Jesús kijtoua? Tla ijkon mitspanoua, ximochijchikaua tiktlasojtlas Jehová, Jesús uan akinmej moneki tikintlapouis. Ijkon tiknekis titetlapouis ken okijto Jesús (Mat. 22:37, 39; Juan 14:15).

6. ¿Tlen noijki techyolinis ma titetlapouikan?

⁶ Ma tikitakan tlen noijki techyolinis ma titetlapouikan. Achto, tiknekij tikchiuaskej tlen Jesús okijto: “Xiakan xikinchiuakan nomachtijkauan” (Mat. 28:19, 20, TNM). Miakej kintlajyouiltiaj uan amikaj kinpaleuia, ik non, moneki tikinmiluiskej tlen kichiuas iTekiuajkayo toTajtsin Dios (Mat. 9:36). Jehová “kineki mamomakixtikah nochteh iwa makixmatikah tlan milák” (1 Tim. 2:4).

7. Ijkon ken kijtoua Romanos 10:13-15, ¿tleka moneki titetlapouiskej?

⁷ Tla tikilnamiktoskej miakej uelis momakixtiskej, tiknekiskej titetlapouiskej. Akinmej michkitskiaj kinnemakaj noso kinkuaj michimej. Pero tejuan ‘tikinmichmah tlakahʼ porque tiknekij ma momakixtikan (xiktlajtolti Romanos 10:13-15, TNM; 1 Tim. 4:16).

8, 9. ¿Tlen moneki kimatiskej akinmej michkitskiaj uan tleka?

⁸ Ijkuak Jesús okatka nikan tlaltikpak, israelitas tlen omichkitskiayaj omonekiaya kimatiskej katli michimej kinkitskiskiaj (Lev. 11:9-12). Noijki omonekiaya kimatiskej kanin kinmajsiskiaj. Michimej katej kanin kinpaktia uan kanin onka tlen kikuaskej. Akinmej michkitskiaj moneki kimatiskej tlen horas moneki yaskej. Ma tikitakan tleka ijkon tikijtouaj. Se misionero tlen chanti itech se isla del Pacífico okajsikamatki keman moneki michkitskiti. Ompa se tokni okilui iuan ma michkitskiti. Misionero okilui tokni: “Kualkan timotaj a las 9”. Pero tokni okinankili: “Timichkitskitiuij ijkuak yionka michimej, amo ijkuak tejuan techpaktiskia tiaskej”.

⁹ Noijki ijkon imachtijkauan Jesús otetlapouiayaj kanin okatkaj akinmej kintlapouiskiaj. Oyayaj teokali, sinagogas, tekalijtik uan tiankistli (Hech. 5:42; 17:17; 18:4). Tejuan noijki moneki tikmatiskej tlen kichiuaj akinmej tikintlapouiskej, kanin uan keman tikinmajsiskej. Tla moneki okse hora titetlapouitiuij, moneki ijkon tikchiuaskej uan ijkon tikinmajsiskej akinmej tikintlapouiskej (1 Cor. 9:19-23).

10. ¿Tlen techmaka ialtepe Jehová?

¹⁰ Akinmej michkitskiaj moneki kimatiskej tlen kitekitiltiskej uan ken kitekitiltiskej. Noijki tejuan moneki tikmatiskej ken titetlapouiskej. Jesús okinmilui imachtijkauan ken tetlapouiskiaj, tlen kiuikaskiaj, kanin tetlapouiskiaj uan tlen kijtoskiaj (Mat. 10:5-7; Luc. 10:1-11). Axkan ialtepe Jehová techmaka tlen ika titlamachtiaj uan techiluia ken tiktekitiltiskej. * Non techpaleuia kuali ma titlamachtikan uan amo ma timomojtikan (2 Tim. 2:15).

11. ¿Tleka noijki moneki tiyetoskej tiyolchikauakej akinmej titetlapouiaj?

¹¹ Akinmej michkitskiaj moneki yetoskej yolchikauakej porque amo kimatij kox kiauis noso ejekas. Ualeua noijki michkitskitiuij ijkuak yiyouak. Akinmej titetlapouiaj noijki moneki tiyetoskej tiyolchikauakej. Ijkuak peuaj titetlapouiaj uan tikteititiaj tiiTlaixpantijkauan Jehová, xamo noijki tikixnamikiskej ouijkayotl porque kualanis tofamilia, techpinauiskej akinmej inmiuan timouikaj noso oksekimej amo kinekiskej techkakiskej. Pero amo timotlajtlachialtiaj porque Jesús yokijtojka miakej techkokoliskiaj (Mat. 10:16).

12. Ijkon ken kijtoua Josué 1:7-9, ¿tlen techpaleuis ma tiyetokan tiyolchikauakej?

¹² ¿Tlen techpaleuis ma tiyetokan tiyolchikauakej? Achto, moneki tikilnamiktoskej Jesús techpaleuijtok ma titetlapouikan (Juan 16:33; Apoc. 14:14-16). Noijki moneki tikilnamiktoskej Jehová techmaluis ijkon ken yokijto (Mat. 6:32-34). Ijkuak okachi tikneltokaskej Jehová techpaleuis, okachi tiyetoskej tiyolchikauakej. Pedro uan oksekimej okiteititijkej otlaneltokayaj ijkuak okikajkej inteki uan oyajkej iuan Jesús. Tejuatsin noijki yotikteititi titlaneltoka ijkuak otikinmilui mofamilia uan akinmej inmiuan timouikaj opejki timomachtiaj Biblia uan opejki timonechikoua.  Xamo yotikpatlak monemilis uan tiktlakamati tlen Jehová kijtoua. Ijkon noijki tikteititia titlaneltoka uan tiyolchikauak. Jehová nochipa mouan yetos tla nochipa tiyetos tiyolchikauak (xiktlajtolti Josué 1:7-9).

13. ¿Ken mitspaleuis tla timotlatlaujtis uan timokuayejyekos?

¹³ ¿Tlen okseki mitspaleuis xiyeto tiyolchikauak? Xiktlatlaujti Jehová ma mitsyolchikaua (Hech. 4:29, 31). Ye mitsnankilis, amo keman mitskauas uan nochipa mitspaleuis. Ximokuayejyeko yiuejkika Jehová okinmakixti itekipanojkauan. Noijki ximokuayejyeko yomitspaleui ijkuak otitlajyoui uan yomitspaleui xikchiua tlen ye kineki. Tla Jehová okinpaleui israelitas ma panokan itlajkotia mar Rojo, noijki mitspaleuis xikchiua ken Cristo (Éx. 14:13). Xikneltoka Jehová mitspaleuis ijkon ken okijto se salmista: “Jehová nouan kajki; amo nimomojtis. ¿Akin uelis itlaj nechchiuilis?” (Sal. 118:6).

14. ¿Tlen mitsmachtia tlen okipanok Masae uan Tomoyo?

¹⁴ Mitspaleuis tla timokuayejyekos Jehová yokinpaleui tokniuan tlen opinauayaj ma yetokan yolchikauakej. Ma tikitakan tlen okipanok tokni Masae. Omokuayejyekouaya amo keman uelis tetlapouiskia porque sapanoua opinauaya. Okitaya oui kintlapouis akinmej okinmixmatiaya, okitaya ken yetoskia tlejkos ipan se ueyi tepetl. Ik non, omochijchika okachi kitlasojtlas Jehová uan akinmej kintlapouiskia. Omokuayejyeko tikatej itlamian tonalmej uan moneki titetlapouiskej uan okitlatlaujti Jehová ma kiyolchikaua. Ijkon ayakmo omomojti uan omochi precursora regular. Akinmej peuaj tetlapouiaj, Jehová noijki kinpaleuis ma yetokan yolchikauakej ijkon ken kijtoua Josué 1:7, 9. Axkan ma tikitakan tlen okipanok se tokni tlen itoka Tomoyo. Ijkuak yikin otetlapouito, se siuatl okitsajtsili: “¡Amo nikneki ma nechtlapouikan iTlaixpantijkauan Jehová!” uan chikauak okitsak ipuerta. Tomoyo amo omoyolkoko uan okilui tokni tlen iuan otetlapouito: “Amitlaj onikilui uan ye yokimatiaya tiiTlaixpantijkauan Jehová. ¡Sapanoua niyolpaki!”. Tokni Tomoyo omochi precursora regular.

15. ¿Tleka moneki tikchiuaskej ken akinmej michkitskiaj uan tleka moneki ijkon tikchiuaskej?

¹⁵ Ma timochijchikauakan ma tikchiuakan tlen moneki. Akinmej michkitskiaj moneki kualkan meuaskej, mochijchikauaskej kitlamiskej inteki maski kiauis, ejekas noso ok itlaj panos. Tejuan noijki moneki tikchiuaskej tlen moneki para titlaxikoskej hasta ijkuak tlamis nin tekitl (Mat. 10:22).

16. ¿Tlen techpaleuis ma tikchiuakan tlen moneki?

¹⁶ Ualeua oui tikitaj tikchiuaskej tlen techiluiaj. Okachi techpaktia tikchiuaskej tlen amo oui. Ik non, ikaj moneki ma techpaleui tla tiknekij tikchiuaskej tlen moneki. Jehová uelis techpaleuis ika espíritu santo (Gál. 5:22, 23).

17. Ijkon ken kijtoua 1 Corintios 9:25-27, ¿tlen okijto Pablo omonekiaya kichiuas?

¹⁷ Tlatitlanil Pablo okichiuaya tlen omonekiaya pero noijki okijto omonekiaya ‘kinajnawatis ikuerpoʼ para kichiuas tlen kuali (xiktlajtolti 1 Corintios 9:25-27). Okinmilui tokniuan kuali ma kichiuakan  tlen moneki (1 Cor. 14:40). Noijki ijkon moneki timochijchikauaskej para tikchiuaskej tlen Jehová kineki uan noijki ijkuak titetlapouiskej (Hech. 2:46).

18. Tla tiknekij tikyolpaktiskej Jehová, ¿tlen moneki tikchiuaskej?

¹⁸ Akinmej michkitskiaj kijtouaj kuali kichiuaj inteki tla kinkitskiaj miakej michimej. Tejuan amo ijkon timokuayejyekouaj, amo tikijtouaj kuali tikchiuaj toteki tla miakej tikinpaleuiaj ma mochiuakan iTlaixpantijkauan Jehová (Luc. 8:11-15). Jehová yolpaki tla nochipa titetlapouiaj uan titlamachtiaj. Jehová yolpaki porque tiktlakamatij uan noijki iKone (Mar. 13:10; Hech. 5:28, 29).

19, 20. ¿Tlen okachi techyolinia ma titetlapouikan?

¹⁹ Itech seki altepemej san seki metstli kitekauiliaj ma michkitskikan. Akinmej michkitskiaj kimatij okachi moneki tekipanoskej ijkuak yotlanki nonmej metstli. Axkan tejuan okachi moneki titetlapouiskej porque yitlamis nochi tlen amo kuali. Ijkon moneki tikchiuaskej para miakej ma momakixtikan. Ik non, amo ximokuayejyeko titetlapouis hasta ijkuak tiuelis (Ecl. 11:4).

²⁰ Ximoyolchikaua para tiknekis titetlapouis, okachi ximomachti Biblia, xiyeto tiyolchikauak uan xikchiua tlen moneki. Xitetlapoui iuan kanaj ocho millones tokniuan tlen tetlapouiaj itech nochi tlaltikpak uan ijkon tikpias “ipakilis Jehová” (Neh. 8:10). Ximochijchikaua xitetlapoui hasta ijkuak Jehová kijtos. Itech okse tlamachtil tikitaskej tlen techpaleuis ma tiktematiltikan tlen kichiuas iTekiuajkayo toTajtsin Dios.