TLAMACHTIL 37
Nochipa ma titetlapouikan
“Kualkan xiktoka xinachtli uan hasta tiotlak amo ximoseui” (ECL. 11:6).
TLAKUIKALI 68 Nikchiuas tekitl tlen miak ipati
XIKILNAMIKTO *
1, 2. Ijkon ken kijtoua Eclesiastés 11:6, ¿tlen moneki tikchiuaskej?
ITECH seki altepemej miakej kinpaktia ma tikintlapouikan tlen kichiuas iTekiuajkayo toTajtsin Dios uan non kinyolchikaua. Pero itech okseki altepemej amo kinekij ma tikintlapouikan akin toTajtsin Dios noso tlen kijtoua Biblia. Maski sekimej techkakiskej noso amo Jehová kineki ma titetlapouikan hasta ijkuak ye kijtos.
2 Ijkuak Jehová kijtos ayakmo ma titetlapouikan, “ijkuakon nochi tlamis” (Mat. 24:14 TNM, 36). Pero ayamo ajsi non tonal, ik non, ¿ken uelis tikchiuaskej tlen kijtoua Eclesiastés 11:6? (Xiktlajtolti). *
3. ¿Tlen timomachtiskej?
3 Itech okse tlamachtil otikitakej naui tlamantli tlen techpaleuis ma titetlapouikan uan ma titlamachtikan (Mat. 4:19). Axkan timomachtiskej eyi tlamantli tlen techyolchikauas ma titetlapouikan maski tikpiaskej ouijkayotl. Tikitaskej tleka moneki ma tikpatioitakan titetlapouiskej, ma tikmatikan timochiaskej uan nochipa ma tikneltokakan Jehová.
MA TIKPATIOITAKAN TITETLAPOUISKEJ
4. ¿Tleka moneki tikpatioitaskej tlen Jehová yotechilui ma tikchiuakan?
4 Jesús okijto tlen panoskia itlamian tonalmej uan ken kipiaskiaj inyelis miakej. Noijki okijto non uelis kintlapololtiskiaj imachtijkauan, ik non, okinmilui: “Xiijsatokah” (Mat. 24:42). Ijkuak okatka Noé miakej amo okikakilijkej porque okinyoltilanaya miak tlamantli. Axkan noijki uelis ijkon techpanos (Mat. 24:37-39; 2 Ped. 2:5). Ik non, nochipa moneki ma tikpatioitakan tlen Jehová yotechilui ma tikchiuakan.
5. Ijkon ken kijtoua Hechos 1:6-8, ¿hasta kanin motetlapouiskia?
5 Axkan moneki tikpatioitaskej tiktematiltiskej tlen kichiuas iTekiuajkayo toTajtsin Dios. Jesús okijto maski ye ayakmo yetoskia nikan, imachtijkauan tetlapouiskiaj itech okseki altepemej (Juan 14:12). Satepan ijkuak Jesús okimiktijkej, sekimej imachtijkauan oksepa omichkitskitoj. Satepan ijkuak toTajtsin Dios okiyoliti Jesús, ye okichi se milagro uan ijkon imachtijkauan okinkitskijkej miakej michimej. Ijkon okinmititi okachi miak ipati tetlapouiskej uan tlamachtiskej (Juan 21:15-17). Ijkuak Jesús ayamo oyaya iluikak, okinmilui imachtijkauan tlen ye otetlapouiaya noijki motematiltiskia itech okseki altepemej (xiktlajtolti Hech. 1:6-8). Ijkuak opanok seki xiuitl, Jesús okititi tlatitlanil Juan tlen panoskia itonal toTeko. * Juan okitak ángeles okinyekanayaj akinmej okintlapouiayaj “kualitlájtoli de Dios [...] nochteh akimeh chantitokeh ipan tlaltíkpaktli, itech nochteh paísmeh, innawak nochteh non tlatlamantli tlachixtokeh, innawak nochteh akimeh tlatlamantli tlajtoah, iwa itech nochteh n altepemeh” (Apoc. 1:10, TNM; 14:6). Nin techmachtia Jehová kineki ma titetlapouikan hasta ijkuak ye kijtos.
6. ¿Tlen techpaleuis nochipa tikpatioitaskej titetlapouiskej?
6 Nochipa tikpatioitaskej titetlapouiskej tla timokuayejyekouaj ken techpaleuia Jehová. Ye techmaka miak amatlajkuilolmej uan ika formato electrónico. Noijki grabaciones ika audio uan video uan tlen tikitaj itech JW Broadcasting. Página jw.org kajki kanaj ika mil tlajtolmej (Mat. 24:45-47, TNM). Maski miakej amo mouikaj porque mokajkalakiaj itech política, tlatlamantli inreligión uan sekimej kipiaj miak tomin uan sekimej amo, tejuan kuali timouikaj. Ijkon otikteititijkej viernes 19 de abril de 2019. Itlaixpantijkauan Jehová itech nochi tlaltikpak otikitakej se video kanin okiyekijtouaya texto tlen omotlajtolti non tonal. Non youak otimonechikojkej 20,919,041 (veinte millones novecientos diecinueve mil cuarenta y uno) ijkuak otikilnamikej imikilis Jesús. Ijkuak tikitaj ijkon panoua techyolchikaua titetlapouiskej tlen kichiuas iTekiuajkayo toTajtsin Dios.
Jesús okipatioitak nochipa tetlapouis uan amitlaj okitsakuili. (Xikita párrafo 7).
7. ¿Ken techpaleuia tlen Jesús okichi?
7 Noijki tla tikchiuaj ken Jesús techpaleuis nochipa ma tikpatioitakan titetlapouiskej. Ye nochipa okitematilti iTlajtol toTajtsin Dios uan amitlaj okitsakuili (Juan 18:37). Ijkuak Satanás okitekiuilti nochi “tlalmeh kan tlanawatiah n tlaltikpaktlakah ika nochi inweyilis” uan ijkuak sekimej okinekiayaj ma yeto intekiua, Jesús amo okinek (Mat. 4:8, 9; Juan 6:15). Amo okimotemoli tomin nion okseki tlamantli uan amo omomojti maski okikokolijkej (Luc. 9:58; Juan 8:59). Ijkuak tikixnamikiskej ouijkayotl, amo timotlapololtiskej tla tikchiuaj tlen okijto Pablo. Ye okijto ma tikchiuakan ken Jesús porque non techpaleuis amo ma timosotlauakan (Heb. 12:3).
MONEKI TIMOCHIASKEJ
8. ¿Tleka axkan moneki timochiaskej?
8 Tla tiknekij ma pano se ouijkayotl noso ma mochiua itlaj tlen tiknekij, moneki timochiaskej. Yiuejkika profeta Habacuc okinekiaya ma tlami nochi tlen amo kuali ompa Judá (Hab. 1:2). Imachtijkauan Jesús “okiyejyekoliayah Dios san nima ya pewaskia tlanawatis ompa” inmialtepe uan kinpaleuiskia para ayakmo kinnauatiskia tekiua romano (Luc. 19:11). Tejuan tiknekij iTekiuajkayo toTajtsin Dios ma kipojpolo nochi tlen amo kuali uan san ma yetokan akinmej kitlakamatiskej (2 Ped. 3:13). Pero moneki timochiaskej ma ajsi tonal tlen ye yokijto. Ma tikitakan ken techmachtia Jehová ma timochiakan.
9. ¿Ken kiteititia Jehová kimati mochias?
9 Jehová ye akin okachi kimati mochias. Okikauili Noé yolik ma kichiua akali uan noijki ‘nochipa matlanonotsaʼ (2 Ped. 2:5; 1 Ped. 3:20). Noijki okikak Abrahán ijkuak okitlajtlani ken kinmixpoloskia akinmej amo yolkualmej ompa Sodoma uan Gomorra (Gén. 18:20-33). Miak xiuitl Jehová okinxiko israelitas maski amo okitlakamatiayaj (Neh. 9:30, 31). Axkan noijki kiteititia kimati mochias porque miakej kinkauilia ma moyolkopakan uan iuan ma mouikakan (2 Ped. 3:9; Juan 6:44; 1 Tim. 2:3, 4). Ken Jehová kimati mochias, tejuan noijki moneki ijkon tikchiuaskej ijkuak titetlapouiskej uan titlamachtiskej. Tlen ijkuilitok itech iTlajtol techmachtia ma tikmatikan timochiaskej. Ma tikitakan tlen kijtoua.
Tla tikmatij timochiaj ken akin tlatoka, kuali kisas toteki. (Xikita párrafo 10 uan 11).
10. ¿Tlen techmachtia tlen kijtoua Santiago 5:7, 8?
10 (Xiktlajtolti Santiago 5:7, 8). Moneki timochiaskej ijkon ken akin tlatoka. Seki tlatoktli san niman moskaltia pero tlen kitemaka itlakilo okachi uejkaua. Yiuejkika ompa Israel otlatokayaj ijkuak peua okiauiaya metstli octubre uan opixkayaj ijkuak saiktlami okiauiaya metstli abril (Mar. 4:28). Tiyetoskej tiixtlamatkej tla tikmatiskej timochiaskej ijkon ken akin tlatoka. Pero xamo oui ijkon tikchiuaskej.
11. ¿Ken techpaleuis tikmatiskej timochiaskej ijkuak titetlapouiaj?
11 Titlajtlakolejkej, ik non, san niman tiknekij ma mota tekitl tlen tikchiuaj. Tla ikaj tlatoka uan kineki ma tlamochiua, moneki kichiuas seki tlamantli: moneki tlachkuas, tlatokas, tlaxouas uan katekis itlatok. Noijki ijkon tla tiknekij titetlapouiskej uan titlamachtiskej, moneki timochijchikauaskej. Xamo akinmej tikinmachtiaj moneki tikinpaleuiskej ma tetlasojtlakan uan amo ma techikoitakan. Tla tikmatij timochiaskej, amo timoyolkokoskej ijkuak ikaj amo kinekis techkakis. Pero noijki moneki timochiaskej ijkuak ikaj peua momachtia Biblia porque amo uelis tikchiualtiskej san niman ma tlaneltoka. Hasta imachtijkauan Jesús amo san niman okajsikamatkej tlen ye okinmachtiaya (Juan 14:9). Ma tikilnamiktokan maski tejuan titetlapouiaj uan titlamachtiaj, san toTajtsin Dios kinpaleuis ma tlaneltokakan (1 Cor. 3:6).
12. ¿Ken uelis tikteititiskej tikmatij timochiaj ijkuak tikintlapouiaj tofamiliares?
12 Xamo oui tikmatiskej timochiaskej ijkuak tikintlapouiaj tofamiliares tlen amo iTlaixpantijkauan Jehová. Pero uelis techpaleuis tlen kijtoua Eclesiastés 3:1 uan 7. Ompa kijtoua: “Moneki tikitaskej keman [...] amitlaj se kijtos uan keman se tlajtos”. Tla kuali tikpiaj toyelis, non kichiuas ma techkakikan tofamiliares. Pero nochipa moneki tikitaskej keman uelis tikintlapouiskej tlen kichiuas Jehová (1 Ped. 3:1, 2). Nochtin tikintlapouiaj ika pakilistli uan noijki tofamiliares pero moneki tikmatiskej timochiaskej.
13, 14. ¿Ken akinmej uelis tikchiuaskej?
13 Yiuejkika uan axkan itekipanojkauan Jehová kiteititiaj kimatij mochiaj. Maski Habacuc yokinekiaya ma tlami tlen amo kuali, okijto: “Nimoketos kanin nitlamaluis” (Hab. 2:1). Tlatitlanil Pablo okijto ika nochi iyolo okinekiaya tlamis tetlapouis. Pero omochixki uan okichi tlen omonekiaya: ‘Otetlapowi de n kualitlájtoli non techmatiltia kenijki Dios satlawel techtlasojtlaʼ (Hech. 20:24).
14 Ma tikitakan tlen okichi se tokni uan isiua. Yejuan okiselito tlamachtil tlen kichiuaj ompa Patterson tlen itoka Galaad. Satepan okintitlankej ma tetlapouitij kanin amo katej miakej iTlaixpantijkauan Jehová uan ompa san sekimej tlaneltokaj itech Jesús. San sekimej okinekiayaj momachtiskej Biblia. Pero oksekimej tokniuan tlen inmiuan omomachtijkej uan oksekan okintitlankej, okinualtlapouiayaj uan okinmiluiayaj ompa kanin yejuan okatkaj miakej yokinpaleuijkej ma moapolaktikan. Tokni uan isiua amo omosotlajkej maski omotaya amikaj okinekiaya momachtis Biblia. Satepan ijkuak opanok kanaj chikueyi xiuitl, oyolpakej miak ijkuak omoapolakti ikaj tlen okimachtiayaj. Nin techititia tokniuan amo omosotlajkej, nochipa otetlapouijkej uan Jehová okinteochi. Axkan tokniuan noijki ijkon kichiuaj. Ik non, ‘matikchiwakan ijkón ken nekatej katlej kiresibiroaj tlan Dios okijtoj techmakas porke yejwan tlaneltokaj iwan kimatij mochiajʼ (Heb. 6:10-12, Itlajtol totajtzin Dios [NHY]).
OKACHI MA TITLANELTOKAKAN ITECH JEHOVÁ
15. ¿Ken techpaleuis tla titlaneltokaj?
15 Tikneltokaj tlen tiktematiltiaj, ik non, tiknekij miakej ma kimatikan. Tikneltokaj tlen kichiuas toTajtsin Dios uan non ijkuilitok itech iTlajtol (Sal. 119:42; 1 Ped. 1:24, 25). Yipanotok seki profecías tlen Biblia okijto. Noijki tikitaj okachi kuali katej akinmej kichiuaj tlen kijtoua Biblia. Nochi nin techititia nochtin moneki kimatiskej tlen kichiuas iTekiuajkayo toTajtsin Dios.
16. (1) Ijkon ken kijtoua Salmo 46:1-3, ¿ken techpaleuia titlaneltokaskej itech Jehová? (2) ¿Ken techpaleuia titlaneltokaskej itech Jesús?
16 Noijki titlaneltokaj itech Jehová, ye akin techmatiltia tlen tikijtoskej. Noijki titlaneltokaj itech Jesús akin Jehová okitlali ma tlanauati itech iTekiuajkayo (Juan 14:1). Maski san tlen techpanos, Jehová nochipa techpaleuis uan techyolchikauas (xiktlajtolti Salmo 46:1-3). Tikmatokej Jehová yokitlali Jesús para ma techpaleui ma titetlapouikan (Mat. 28:18-20, TNM).
17. Xikijto tleka ok moneki ma titetlapouikan.
17 Tikneltokaj Jehová techteochiuas tla timochijchikauaj titetlapouiskej (Ecl. 11:6). Mojmostla miakej panouaj kanin tikintlaliaj mesas uan carritos. Ijkon miakej tikinpaleuiaj. Amatlajkuilol Toteki itech Tekiuajkayotl de noviembre 2014, kijtoua se ichpochtli tlen omomachtiaya itech se Universidad okinekiaya kijkuilos tlen kichiuaj iTlaixpantijkauan Jehová. Amo okajsik nion se kali kanin timonechikouaj pero ompa kanin omomachtiaya okitak se mesa ika toamatlajkuiloluan. Non okipaleui ma kimati tlen kijkuiloskia. Opejki touan momachtia, satepan omoapolakti uan omochi precursora regular. Tlen okipanok non tokni techyolinia ok ma titetlapouikan porque ok katej akinmej kinekij kikakiskej tlen kichiuas iTekiuajkayo toTajtsin Dios.
NOCHIPA MA TITETLAPOUIKAN
18. ¿Ken tikmatij ajsis hora ijkuak Jehová kijtos ayakmo ma titetlapouikan?
18 Kuali tikmatokej ajsis hora ijkuak ayakmo titetlapouiskej. Ma timokuayejyekokan tlen opanok ijkuak okatka Noé. Jehová okiteititi kichiua tlen kijtoua ijkuak moneki. Ijkuak opoliuiaya kanaj ciento veinte xiuitl atemiskia tlaltikpak, ye yokijtojka ijkon kichiuaskia. Seki xiuitl satepan okilui Noé ma kichijchiua akali. Noé chikauak otekipano kanaj cuarenta noso cincuenta xiuitl. Maski amo okikakilijkej, Noé otenejmachtiaya hasta ijkuak Jehová okilui ma kinkalaki yolkamej ijtik akali. Ijkuakon, ijkuak oajsik tonal, Jehová okitsaki akali (Gén. 6: 3; 7:1, 2, 16).
19. ¿Tlen tikitaskej tla amo timosotlauaj?
19 Ayakmo miak poliui Jehová techiluis ayakmo ma titetlapouikan. Kipojpolos nochi tlen Satanás kiyekana uan kichiuas tlaltikpak se xochitlali uan ompa yetoskej san akinmej kitlakamatiskej Jehová. Moneki timochiaskej ijkon ma pano pero ma tikchiuakan ken Noé, Habacuc uan oksekimej itekipanojkauan Jehová tlen nochipa okitekichiuilijkej. Ma tikpatioitakan titetlapouiskej, ma timochiakan, okachi ma titlaneltokakan itech Jehová uan ma tikneltokakan tlen yokijto kichiuas.
TLAKUIKALI 75 “¡Nikan nika, techtitlani!”
^ párr. 5 Itech okse tlamachtil otikitakej akinmej momachtiaj Biblia, Jesús kinyoleua ma tetlapouikan uan ma tlamachtikan. Axkan timomachtiskej eyi tlamantli tlen techyolchikauas ma tiktematiltikan tlen kichiuas iTekiuajkayo Jehová. Nin techpaleuis maski yikin opejki titetlapouiaj noso yikipia miak xiuitl. Jehová kijtos hasta keman titetlapouiskej.
^ párr. 2 TLEN OKACHI IPATI: Itech nin tlamachtil “amo ximoseui”, kijtosneki nochipa moneki timochijchikauaskej titetlapouiskej hasta ijkuak Jehová kijtos ayakmo ma titetlapouikan.
^ párr. 5 Itonal toTeko kijtosneki ijkuak Jesús opejki tlanauatia itech 1914 uan tlanauatis hasta ijkuak tlamis mil xiuitl.
