Tlen kijtoua Eclesiastés 5:8 kichiua ma timokuayejyekokan. Ompa kijtoua: “Amo ma mitstlajtlachialti tla kanin tichanti se tekiua kitlajyouiltia akin amitlaj kipia uan amo kichiua tlen moneki. Porque ikaj kita tlen kichiua non tekiua pero noijki katej oksekimej tekiuajkej tlen okachi ueyititokej”.

Miakej uelis kijtoskej nin texto tlajtoua itech tekiuajkej. Pero tikitaj nin texto techmachtia itlaj itech Jehová uan non techyolseuia uan techyolchikaua.

Eclesiastés 5:8 tlajtoua itech se tekiua tlen kintlajyouiltia akinmej amitlaj kipiaj uan amo kichiua tlen moneki. Non tekiua moneki kilnamikis kita okse tekiua tlen okachi tlanauatijtok uan kita tlen kichijtok. Teyolkoko tikitaj tekiuajkej amo yolkualmej san kintlajyouiltiaj akinmej kinnauatiaj.

Maski sapanoua titlajyouiaj tikmatij Jehová kita tlen kichiuaj tekiuajkej. Ma tikiluikan ma techpaleui uan ma tikiluikan nochi tlen techyolkokoua (Sal. 55:22; Filip. 4:6, 7). Tikmatokej “ixtololouan Jehová tlachixtokej itech nochi tlaltikpak para kinpaleuis akinmej ixpan kipiaj ajsitok inyolo” (2 Crón. 16:9).

Tlen kijtoua Eclesiastés 5:8 techititia kajki se tekiua tlen okachi tlanauatijtok. Noijki itech non texto tikitaj Jehová ye akin okachi ueyititok. Axkan yokitlali Jesucristo para ma tlanauati itech iTekiuajkayo. ToTajtsin Dios ye okachi chikauak, nochi kichiua ika melajkayotl uan iKone noijki ijkon kichiua.