TLAMACHTIL 39
¿Ijkuilitok motoka itech “iamoch toTajtsin Dios”?
“Iamoch toTajtsin Dios tlen kijtoua akinmej yoltoskej opejki moijkuiloua ixpan” (MAL. 3:16).
TLAKUIKALI 61 ¡Tiyeknemiskej ixpan Jehová!
XIKILNAMIKTO a
Yiuejkika Jehová kijkuilojtok intoka miakej itech iamoch. (Xikinmita párrafos 1 uan 2).
1. Ijkon ken kijtoua Malaquías 3:16, ¿tlen kichijtok Jehová?
MIAK xiuitl Jehová kijkuilojtok itech iamoch intoka miakej itekipanojkauan, achto okijkuilo itoka Abel (Luc. 11:50, 51). b Yiuejkika, Jehová okinmijkuilo intoka miakej itekipanojkauan itech iamoch. Biblia tlatlamantli kitokayotia non amochtli: “Iamoch toTajtsin Dios”, “amatlajkuíloli kan machotitokeh [noso ijkuilitokej] akimeh yolitoskeh” uan “iamatlajkuilol n Ichkatsi”. Itech nin tlamachtil tikijtoskej “iamoch toTajtsin Dios” (xiktlajtolti Malaquías 3:16; Apoc. 3:5; 17:8).
2. ¿Akinmej ijkuilitok intoka itech iamoch toTajtsin Dios uan tlen moneki tikchiuaskej para totoka ompa maijkuilito?
2 Itech iamoch toTajtsin Dios ijkuilitok intoka nochtin akinmej kiueyichiuaj, kitlakaitaj uan kipatioitaj itoka. Sekimej nochipa yoltoskej nikan tlaltikpak uan oksekimej yaskej iluikak. Tla timouikaj iuan Jehová uan tikneltokaj tlen Jesús okichi topatka, totoka uelis ijkuilitos itech non amochtli (Juan 3:16, 36). ¡Nochtin tiknekij ompa maijkuilito totoka!
3, 4. (1) ¿Nochipa tiyoltoskej tla axkan ijkuilitok totoka itech iamoch toTajtsin Dios? (2) ¿Tlen tikitaskej axkan uan itech okse tlamachtil?
3 ¿Nochipa tiyoltoskej tla axkan ijkuilitok totoka itech iamoch toTajtsin Dios? Itech Éxodo 32:33, Jehová okilui Moisés: “Nikpojpolos itech noamoch akin otlajtlakolchi”. Non kijtosneki uelis poliuis akinmej ijkuilitokej intoka itech iamoch, porque yetoskia ken Jehová okinmijkuilo ika se lápiz (Apoc. 3:5). Matimochijchikauakan para totoka ok maijkuilito itech non amochtli uan Jehová amo makipojpolo. Ijkon yetoskia ken kijkuilos ika tinta.
4 Xamo timotlajtlania. ¿Tlen kijtoua Biblia itech akinmej intoka ijkuilitok itech iamoch toTajtsin Dios uan akinmej amo? Akinmej ompa ijkuilitok intoka, ¿keman kiseliskej yolilistli tlen amo keman tlamis? ¿Tlen kinpanos akinmej oixpolikej uan amo okixmatkej Jehová? ¿Intoka yetos itech non amochtli? Non tikitaskej axkan uan itech okse tlamachtil.
¿AKINMEJ IJKUILIJTOK INTOKA ITECH IAMOCH TOTAJTSIN DIOS?
5, 6. (1) Ijkon ken kijtoua Filipenses 4:3, ¿akinmej ijkuilitok intoka itech iamoch toTajtsin Dios? (2) ¿Keman ayakmo poliuis intoka itech iamoch toTajtsin Dios?
5 ¿Akinmej ijkuilitok intoka itech iamoch toTajtsin Dios? Para tikmatiskej, axkan tikitaskej makuili grupos. Sekimej ijkuilitok intoka itech non amochtli uan oksekimej amo.
6 Itech grupo se, katej akinmej tlanauatiskej iuan Cristo ompa iluikak. ¿Ijkuilitok intoka itech iamoch toTajtsin Dios? Kema. Pablo okinmilui tokniuan tlen ochantiayaj Filipos, intoka sekimej tlapejpenalmej (akinmej tlanauatiskej iuan Cristo) yijkuilitok itech iamoch toTajtsin Dios (xiktlajtolti Filipenses 4:3). Moneki nochipa kitlakamatiskej Jehová para intoka nochipa maijkuilito itech iamoch. Tla ijkon kichiuaj, intoka ayakmo keman pojpoliuis maski ayamo ixpoliuij noso ayamo peua ueyi tlajyouilistli (Apoc. 7:3).
7. ¿Ken techpaleuia Apocalipsis 7:16, 17 tikmatiskej keman ayakmo poliuis intoka “oksikimeh ichkameh” itech iamoch toTajtsin Dios?
7 Itech grupo ome, pouij “oksikimeh ichkameh”. ¿Ijkuilitok intoka itech iamoch toTajtsin Dios? ¿Ok yetos intoka itech non amochtli ijkuak tlamis Armagedón? Kema (Apoc. 7:14). Jesús okijto “oksikimeh ichkameh” nochipa yoltoskej (Mat. 25:46). Pero akinmej momakixtiskej ijkuak tlamis Armagedón amo san niman kiseliskej yolilistli tlen amo keman tlamis. Yetoskia ken intoka ijkuilitok ika lápiz. Ijkuak Jesús tlanauatis mil xiuitl “kinwikas kan améyali non kichiwa se mayolito”. Akinmej kitlakamatiskej Cristo uan nochipa kitekichiuiliskej Jehová intoka ayakmo poliuis itech iamoch (xiktlajtolti Apocalipsis 7:16, 17).
8. ¿Akinmej amo ijkuilitok intoka itech iamoch toTajtsin Dios uan tlen kinpanos?
8 Itech grupo eyi, pouij akinmej yetoskiaj ken tentsomej, kinmixpoloskej itech Armagedón. Intoka amo ijkuilitok itech iamoch toTajtsin Dios, Jesús okijto kinmixpoloskej (Mat. 25:46). Noijki Pablo okijto akinmej yetoskia ken tentsomej ixpoliuiskej uan ayakmo kinyolitiskej (2 Tes. 1:9; 2 Ped. 2:9). Noijki ijkon kinpanos akinmej tlajtlakolchiuaj porque kixnamikij iespíritu santo Jehová. Axkan tikmatij, yejuan amo kinyolitiskej (Mat. 12:32; Mar 3:28, 29; Heb. 6:4-6). Matikitakan ok ome grupos tlen kinyolitiskej nikan tlaltikpak.
¿AKINMEJ KINYOLITISKEJ?
9. ¿Tlen ome grupos kinyolitiskej nikan tlaltikpak uan tlen okichijkej sejse grupo? (Hechos 24:15).
9 Biblia kijtoua ome grupos tlen kinyolitiskej uan uelis nochipa yoltoskej nikan tlaltikpak: “Akimeh otlájtlakolchijkeh” uan “akimeh amó” (xiktlajtolti Hechos 24:15). “Akimeh amó” otlajtlakolchijkej nochipa okitekichiuilijkej Jehová. “Akimeh otlájtlakolchijkeh” amo okitekichiuilijkej, miakej okichijkej tlen amo kipaktia Jehová. ¿Ijkuilitok intoka itech iamoch toTajtsin Dios? Para tikmatiskej, matikitakan okseki tlamantli itech ome grupos.
10. ¿Tleka kinyolitiskej “akimeh amó” otlajtlakolchijkej uan tlen kichiuaskej sekimej? (Noijki xikita itech nin revista tlamachtil “Sekimej techtlajtlaniaj”, ompa kijtoua akinmej kinyolitiskej nikan tlaltikpak).
10 Itech grupo naui pouij “akimeh amó” otlajtlakolchijkej. Intoka yokatkaj itech iamoch toTajtsin Dios, ijkuak oyoltokaj. ¿Opoliuik intoka ijkuak oixpolikej? Amo, porque Jehová ok kinmilnamiki. Ye “amo Dios de non yomikkeh, yej de akimeh yolitokeh, porke ixpa n Ye nochteh yolitokeh” (Luc. 20:38). Non kijtosneki ijkuak kinyolitiskej, intoka yetos itech non amochtli pero ok yetoskia ken ijkuilitos ika lápiz (Luc. 14:14). Sekimej tlen kinyolitiskej tlanauatiskej “ken príncipes itech nochi tlaltikpak” (Sal. 45:16).
11. ¿Tlen moneki kichiuaskej “akimeh otlájtlakolchijkeh” para intoka maijkuilito itech iamoch toTajtsin Dios?
11 Saiktlami matikitakan grupo makuili, ompa pouij “akimeh otlájtlakolchijkeh”. Yejuan amo okitlakamatkej Jehová porque amo okimatiayaj tlen kijtouaj itlanauatiluan. Ik non, intoka amo ijkuilitok itech iamoch toTajtsin Dios. Pero ijkuak toTajtsin Dios kinyolitis, kinkauilis makitekichiuilikan uan ijkon intoka xamo satepan kijkuiloskej itech iamoch pero monekis makinpaleuikan. Ijkuak oyoltokaj, miakej sapanoua otlajtlakolchijkej. Ik non, monekis kixmatiskej uan kitlakamatiskej itlanauatiluan Jehová. Ijkuak tlanauatis iTekiuajkayo toTajtsin Dios miakej kinmachtiskej.
12. (1) ¿Akinmej kinmachtiskej “akimeh otlájtlakolchijkeh”? (2) ¿Tlen kinpanos akinmej amo kipejpenaj kitekichiuiliskej Jehová?
12 ¿Akinmej kinmachtiskej “akimeh otlájtlakolchijkeh”? Kinmachtiskej “oksikimeh ichkameh” uan “akimeh amó” otlajtlakolchijkej. ¿Tlen monekis kichiuaskej “akimeh otlájtlakolchijkeh” para intoka maijkuilito itech iamoch toTajtsin Dios? Monekis mouikaskej iuan Jehová uan motemakaskej ixpan. Jesús uan akinmej iuan tlanauatiskej kitaskej ken kipatlaskej innemilis “akimeh otlájtlakolchijkeh” (Apoc. 20:4). Maski ikaj yikipias 100 xiuitl pero tla amo kipejpenas kitekichiuilis Jehová, kixpoloskej (Is. 65:20). Jehová uan Jesús kitaj tlen tikpiaj itech toyolo uan amikaj kikauaskej makichiua tlen amo kuali ijkuak tlanauatiskej (Is. 11:9; 60:18; 65:25; Juan 2:25).
SEKIMEJ KINYOLITISKEJ PARA KIPIASKEJ YOLILISTLI UAN OKSEKIMEJ KINMIXKOMAKASKEJ
13, 14. (1) ¿Ken otikajsikamatiayaj Juan 5:29? (2) ¿Tlen ok moneki tikitaskej ijkuak tiktlajtoltiaj non texto?
13 Jesús okijto akinmej kinyolitiskej nikan tlaltikpak. Noijki ye okijto: “Porke ajsiki n ora ijkuak nochteh non yomikkeh iwa tooktokeh kikakiskeh itlajtol. Iwa kisaskeh de inmiketekochwah. Akimeh okichijkeh tlan kuali, moyolitiskeh [...], iwa akimeh okichijkeh tlan amokuali, moyolitiskeh para kinyolkuitiskeh [noso kinmixkomakaskej]” (Juan 5:28, 29). ¿Tlen kijtosneki tlen okijto Jesús?
14 Otikajsikamatiayaj Jesús okijto sekimej kichiuaskiaj tlen kuali uan oksekimej tlen amo kuali, ijkuak kinyolitiskiaj. Pero Jesús amo okijto akinmej “kisaskeh de inmiketekochwah” kichiuaskej tlen kuali noso kichiuaskej tlen amo kuali, ye okijto sekimej tlen okichijkej “tlan kuali” uan akinmej okichijkej “tlan amo kuali”. Non kijtosneki tlen okichijkej ijkuak oyoltokaj. Non melauak porque ijkuak tiyetoskej itech xochitlali amikaj kichiuas tlen amo kuali. Sekimej otlajtlakolchijkej ijkuak oyoltokaj. Ik non, ¿tleka okijto Jesús sekimej kinyolitiskej para kipiaskej yolilistli tlen amo keman tlamis uan oksekimej kinmixkomakaskej?
15. ¿Akinmej kinyolitiskej para nochipa mayoltokan uan tleka?
15 Akinmej amo otlajtlakolchijkej kinyolitiskej para nochipa mayoltokan porque intoka ijkuilitok itech iamoch toTajtsin Dios. Juan 5:29 kijtoua “akimeh okichijkeh tlan kuali” uan Hechos 24:15 “akimeh amó” otlajtlakolchijkej, san se tlamantli techmachtia. Non mouika ika tlen kijtoua Romanos 6:7: ‘Porke akin yomikki, ayakmó kipia tlajtlákoli’. Ijkuak ixpoliuij akinmej okichijkej tlen kuali poliui intlajtlakol pero Jehová kilnamiki ken okitekichiuilijkej (Heb. 6:10). Pero ijkuak kiyolitiskej ok moneki kitekichiuilijtoskej Jehová para intoka amo mapoliui itech iamoch.
16. ¿Tlen kinpanos “akimeh otlájtlakolchijkeh”?
16 ¿Tlen kinpanos “akimeh otlájtlakolchijkeh”? Maski opoliuik intlajtlakol ijkuak oixpolikej, yejuan amo okitekichiuilijkej Jehová. Intoka amo ijkuilitok itech iamoch toTajtsin Dios. Pero kinyolitiskej ijkon ken kijtoua Hechos 24:15, yejuan kinmixkomakaskej. c Non kijtosneki Jesús kitas kox kipatlaskej innemilis (Luc. 22:30). Amo san niman kijkuiloskej intoka itech iamoch toTajtsin Dios porque moneki kitaskej kox kinekiskej kitekichiuiliskej Jehová uan kitlakamatiskej.
17, 18. ¿Tlen monekis kichiuaskej akinmej kinyolitiskej nikan tlaltikpak uan ken kinmixkomakaskej ijkon ken kijtoua Apocalipsis 20:12, 13?
17 Ijkuak Jesús tlanauatis mil xiuitl akinmej kinyolitiskej monekis kintlakamatiskej tlanauatilmej tlen kinpias yankuikej “amatlajkuílolteh”. Apóstol Juan okijto: “Iwa onikinmitak nochteh non yomikkeh, non tominyojkeh iwa non próbesteh, omoketokah iyakapan n yáyantli. Ijkuakó okintlapojkeh n amatlajkuílolteh kan ijkuilitok nochi tlan se okichi. Noiwa omotlapo n amatlajkuíloli kan machotitokeh nochteh akimeh yolitoskeh [...]. Non yomikkeh okinmixkomakakeh ika tlan okichijkeh ijkó kemi machotitok itech amatlajkuílolteh” (Apoc. 20:12, 13).
18 ¿Ken kinmixkomakaskej akinmej kinyolitiskej? ¿Kinmixkomakaskej ika tlen okichijkej ijkuak oyoltokaj? Amo. Porque opoliuik intlajtlakol ijkuak yejuan oixpolikej. Ik non, kinmixkomakaskej ika tlen kichiuaskej ijkuak kinyolitiskej uan amo ika tlen okichijkej ijkuak oyoltokaj. Noé, Samuel, David, Daniel uan oksekimej momachtiskej tlen okichi Jesús uan noijki moneki kiteititiskej kineltokaj. Tla yejuan ijkon kichiuaskej, “akimeh otlájtlakolchijkeh” okachi miak tlamantli momachtiskej.
19. ¿Tlen kinpanos akinmej amo kinekiskej kitekichiuiliskej Jehová?
19 ¿Tlen kinpanos akinmej amo kinekiskej kitekichiuiliskej Jehová? Apocalipsis 20:15 kijtoua: “Iwa akin amo omachotitoka [noso ijkuilitoka itoka] itech n amatlajkuíloli kan machotitokeh non nochipa yolitoskeh, okintlamotlakeh kan mextok tletl” uan ijkon panos, kinmixpoloskej. Moneki totoka ijkuilitos itech iamoch toTajtsin Dios uan amo matikauakan mapoliui.
Se tokni kinmachtia akinmej okinyolitijkej itech mil xiuitl. (Xikita párrafo 20).
20. ¿Tlen panos ijkuak tlanauatis Jesús mil xiuitl nikan tlaltikpak? (Xikita dibujo tlen kajki itech página 1).
20 Kualtsin yetos ijkuak Jesús tlanauatis mil xiuitl nikan tlaltikpak. Ika iTekiuajkayo toTajtsin Dios miakej kinmachtiskej uan akinmej kinyolitiskej kiteititiskej kox kitekichiuiliskej Jehová noso amo (Is. 26:9; Hech. 17:31). ¿Ken kinmachtiskej sapanoua miakej? Non timomachtiskej itech okse tlamachtil uan techpaleuis matikpatioitakan.
TLAKUIKALI 147 Jehová yokijto ayakmo timikiskej
a Itech nin tlamachtil tikajsikamatiskej tlen Jesús okijto itech Juan 5: 28, 29. Ye okijto sekimej “moyolitiskeh iwa [amo] ok ayik mikiskeh” uan oksekimej “moyolitiskeh para kinyolkuitiskeh [noso kinmixkomakaskej]”. Tikitaskej akinmej ome grupos kinyolitiskej uan akinmej ompa pouiskej.
b Iamoch toTajtsin Dios kijkuilojtok “desde ijkuak okichijchi n tlaltíkpaktli”. Kijtosneki, nochtin uelis kinpaleuis ijkuak Jesús omotemakak topatka (Mat. 25:34; Apoc. 17:8). Ik non, xamo Abel achto itoka ijkuilitok itech amochtli.
c Otikajsikamatiayaj kinchiuiliskiaj tlen amo kuali ijkuak otikijtouayaj “kinyolkuitiskeh [noso kinmixkomakaskej]” uan xamo ijkon moajsikamati. Pero ijkuak Jesús ijkon okijto, xamo okinekiaya tlamachtis: “Akimeh otlájtlakolchijkeh” moneki kiteititiskej kox kinekiskej kipatlaskej innemilis. Se diccionario bíblico griego okijto non tlajtoli kijtosneki “ijkuak kitaj tlen kichiua se tlakatl noso se siuatl”.
