1. ¿Tleka miakej ayakmo kimatij akin kineltokiliskej?

 AXKAN tlanauatijtok Satanás, ik non, miakej ayakmo kimatij akin kineltokiliskej. Porque akinmej kinyekanaj empresas, políticos uan akinmej kinyekanaj religiones san tekajkayauaj uan noijki mokuayejyekouaj ijkon kichiuaj iyolikniuan, oksekimej akinmej kinmixmatij uan infamiliares. Pero non amo techtlajtlachialtia porque Biblia kijtoua itlamian tonalmej yetoskiaj akinmej tlakajkayauaskiaj uan kijtoskiaj tlen amo melauak intech oksekimej. Non kiteititia kichiuaj ken Satanás, akin amo kinamiki matikneltokilikan (2 Tim. 3:1-4; 2 Cor. 4:4).

2. (1) ¿Akinmej uelis nochipa tikinneltokiliskej? (2) ¿Xamo tlen uelis ikaj motlajtlanis?

² Akinmej tikchiuaj ken Cristo tikmatij nochipa uelis tikneltokiliskej Jehová (Jer. 17:7, 8). Tikneltokaj ye techtlasojtla uan nochipa techpaleuis (Sal. 9:10). Jesucristo topatka omotemakak, ik non, uelis tikneltokiliskej (1 Ped. 3:18). Noijki yotikitakej tlen kijtoua Biblia techpaleuia (2 Tim. 3:16, 17). Yotikitakej uelis tikneltokiliskej Jehová, Jesús uan tlen kijtoua Biblia. Pero xamo ikaj motlajtlania kox uelis kinneltokilis tokniuan tlen iuan monechikouaj. ¿Tleka ijkon tikijtouaj?

3. ¿Tlen techkauilia Jehová matikchiuakan? (Marcos 10:29, 30).

³ Tiktlasojkamatiliaj Jehová sapanoua techteochiua uan techkauilia matiktekichiuilikan (xiktlajtolti Marcos 10:29, 30). Itech nochi tlaltikpak tikinpiaj miakej tokniuan tlen noijki kitlasojtlaj Jehová uan mochijchikauaj kitlakamatiskej. Peua tikintlasojtlaj ijkuak tikinmixmatij,  maski tlatlamantli totlajtol, ken otechiskaltijkej uan ken timotlakentiaj. Tinochtin tiyolpakij tiktekichiuiliskej uan tikueyichiuaskej toTajtsin Dios (Sal. 133:1).

4. ¿Ken techpaleuiaj tokniuan?

⁴ Axkan okachi moneki timouikaskej iuan tokniuan porque ualeua yejuan techpaleuiaj matitlaxikokan (Rom. 15:1; Gál. 6:2). Noijki techyoleuaj kuali matimouikakan iuan Jehová uan matiktekichiuilijtokan (1 Tes. 5:11; Heb. 10:23-25). Ximokuayejyeko ken timomachiliskiaj tla tokniuan amo techpaleuiskiaj, amo uelis titlaxikoskiaj uan xamo tikchiuaskiaj tlen Satanás kineki uan ken akinmej kinyekana. Ayakmo poliui miak ye uan akinmej kinyekana kinmixnamikiskej akinmej kitekichiuiliaj Jehová. Ijkuakon sapanoua timotlasojkamatiskej porque tokniuan touan yetoskej.

5. ¿Tleka sekimej kitaj oui kinneltokiliskej tokniuan?

⁵ Xamo sekimej kitaj oui kinneltokiliskej tokniuan. ¿Tleka? Xamo okiluijkej itlaj se tokni uan satepan ye okinmilui oksekimej. Noso okse tokni okilui itlaj kichiuaskia uan amo melauak okichi. Xamo ikaj okse okijto noso okichi itlaj tlen okiyolkoko. Ik non, ¿tlen techpaleuis oksepa matikinneltokilikan tokniuan?

6. ¿Ken techpaleuis oksepa matikinneltokilikan tokniuan tla titetlasojtlaj? (1 Corintios 13:4-8).

⁶ Tla titetlasojtlaj, tikineltokiliskej tokniuan. 1 Corintios capítulo 13 techmachtia ken uelis tikteititiskej titetlasojtlaj uan techpaleuis okachi matikinneltokilikan tokniuan noso oksepa matikneltokilikan se tokni maski okinmilui oksekimej  tlen amo omonekiaya kimatiskej (xiktlajtolti 1 Corintios 13:4-8). Versículo 4 kijtoua: “Akin tetlasojtla, kimati texikoa; semi yolyámanki”. Maski titlajtlakolchiuaj Jehová techxikoua, ik non, moneki tejuan noijki tikxikoskej ijkuak tokniuan kijtouaj noso kichiuaj itlaj tlen techkualania noso techyolkokoua. Versículo 5 kijtoua: “Amo kimati kualani” uan amo “tekokolia”, non kijtosneki ayakmo matikilnamiktokan tlen otechchiuilijkej tokniuan. Eclesiastés 7:9 kijtoua amo san niman matikualanikan, okachi kuali matikchiuakan tlen kijtoua Efesios 4:26: “Amo xikkawilikah makalaki n tonati iwa nomejwah ayamó nonmoyolsewiah”.

7. ¿Ken techpaleuia Mateo 7:1-5 okachi matikinneltokilikan tokniuan?

⁷ Tla tikinmitaj tokniuan ken Jehová kinmita, techpaleuis okachi matikinneltokilikan. Ye kintlasojtla uan amo san kilnamiktok ijkuak tlajtlakolchiuaj, ik non, tejuan noijki amo san matikilnamiktokan tlen amo kuali kichiuaj (Sal. 130:3). Matimochijchikauakan tikitaskej tlen kuali kichiuaj tokniuan uan matimokuayejyekokan tlen uelis kichiuaskej satepan (xiktlajtolti Mateo 7:1-5). Tikneltokaj tokniuan amo kinekij techchiuiliskej tlen amo kuali porque yejuan tetlasojtlaj (1 Cor. 13:7). Non amo kijtosneki Jehová kineki matikinneltokilikan nochtin maski amo tikinmixmatij, ye kineki ijkon matikchiuakan porque yokiteititijkej uelis tikinneltokiliskej. b

8. ¿Tlen uelis tikchiuaskej para okachi tikinneltokiliskej tokniuan?

⁸ Xamo amo san niman tikinneltokiliaj tokniuan. ¿Tlen uelis tikchiuaskej para okachi tikinneltokiliskej? Okachi xikinmixmati, inmiuan ximotlapoui ijkuak nanmonechikouaj, inmiuan xitetlapoui, amo san niman ximosotlaua uan xikinkauili makiteititikan uelis tikinmiluis tlen mitspanoua. Pero tla amo kuali tikinmixmati, xamo amo tikinmiluis tlen mitspanoua. Xamo ijkuak okachi tikinmixmatis tikinmiluis ken timomachilia (Luc. 16:10). Pero, ¿tlen tikchiuas tla se tokni okinmilui oksekimej tlen amo omonekiaya kimatiskej? Amo san niman xikijto ayakmo tikneltokilis, xikkaua mapano seki tonal uan amo ximokuayejyeko tla ikaj ijkon omitschiuili, nochtin ijkon kichiuaj. Techpaleuis tla timomachtiaj tlen okichijkej yiuejkika itekipanojkauan Jehová, maski okinyolkokojkej, yejuan ok okinneltokilijkej oksekimej.

9. (1) ¿Tlen okichi Ana maski otlajtlakolchiuayaj akinmej otlayekanayaj? (2) ¿Tlen mitsmachtia tlen okipanok Ana? (Xikita dibujo).

⁹ ¿Okichi itlaj tlen omitsyolkoko se tokni tlen tlapaleuia kanin timonechikoua? Tla ijkon, mitspaleuis tlen okipanok Ana. Itech altepetl Israel otlayekanaya ueyi teopixki Elí. Pero itelpochuan oauilnemiayaj uan ye amo okinyektlaliaya. Jehová amo san niman okichi ayakmo mayeto teopixki. ¿Tlen okichi Ana? Ye nochipa okiueyichi Jehová itech tabernáculo, maski Elí ok okatka ueyi teopixki. Ijkuak sapanoua omoyolkokouaya uan okitlatlaujti Jehová, Elí omokuayejyeko Ana otlauanki uan okajuak (1 Sam. 1:12-16).  Maski non okipanok, okilui Jehová tla kimakaskia se ikone, kiuikaskia itech tabernáculo para makitekichiuili uan ompa Elí kimaluiskia (1 Sam. 1:11). ¿Omonekiaya kinyektlaliskej itelpochuan Elí? Kema, satepan Jehová okinyektlali (1 Sam. 4:17). Noijki Jehová okichi Ana makipia ikone uan okitokayoti Samuel (1 Sam. 1:17-20).

10. ¿Ken okiteititi David ok okinneltokili Husái maski oksekimej okiyolkokojkej?

¹⁰ ¿Se moyolikni okichi itlaj tlen omitsyolkoko? Tla ijkon, matikitakan tlen okipanok tekiua David. Iyolikni tlen omotokayotiaya Ahitofel okipaleui Absalón ijkuak okinekiaya ipatka tlanauatis. Sapanoua okiyolkoko David porque itelpoch uan akin okijtouaya iyolikni ayakmo okipaleuiayaj. Tlen okipanok amo okichi ayakmo makinneltokili oksekimej. Pero ok okineltokili iyolikni tlen omotokayotiaya Husái porque nochipa okipaleui, maski oksekimej okixnamikej. Kuali okipejpenki kineltokilis Husái porque ye nochipa okipaleui uan hasta ipatka kimiktiskia (2 Sam. 17:1-16).

11. ¿Ken okiteititi se itlakeual Nabal okinneltokiliaya oksekimej?

¹¹ Noijki ximokuayejyeko tlen okipanok se itlakeual Nabal, ye okatka israelita uan okipiaya miak tlamantli. David uan itlakeualuan okipaleuijkej itlakeualuan Nabal. Satepan ye okitlajtlanili Nabal makinmaka itlakeualuan tlen kikuaskej, ye uelis ijkon kichiuaskia. Pero Nabal amo okinpaleui, ik non, David sapanoua okualanki uan okijto kinmiktiskiaj nochtin itlakeualuan. Se itlakeual okiluito isiua Nabal tlen opanotoka, ye omotokayotiaya Abigaíl. Non tlakatl okimatiaya Abigaíl uelis kinpaleuiskia. Ik non, amo ocholo porque okineltokaya Abigaíl okatka ixtlamatki uan uelis kiyektlaliskia tlen opanotoka uan kuali okiski porque Abigaíl amo omomojti uan okitato David para amo makichiua tlen omokuayejyekojtoka (1 Sam. 25:2-35). Ye okimatiaya David kichiuaskia tlen kuali.

12. ¿Ken okiteititi Jesús okinneltokiliaya imachtijkauan maski omotlapololtijkej?

¹² Jesús okinneltokili imachtijkauan  maski ualeua omotlapololtijkej (Juan 15:15, 16). Ijkuak Santiago uan Juan okitlajtlanilijkej makinkauili iuan matlanauatikan, ye amo omokuayejyeko tleka okitekichiuiliayaj Jehová uan amo okinmilui ayakmo yetoskiaj iapóstoles (Mar. 10:35-40). Imachtijkauan Jesús okikajtejkej ijkuak okikitskijkej (Mat. 26:56). Maski yejuan ijkon okichijkej, Jesús nochipa okinneltokili. Maski okimatiaya ualeua omotlapololtiayaj, nochipa okintlasojtlak (Juan 13:1). Satepan, ijkuak toTajtsin Dios okiyoliti, Jesús okinauati 11 iapóstoles makinpaleuikan oksekimej mamochiuakan imachtijkauan uan makinpaleuikan tokniuan (Mat. 28:19, 20; Juan 21:15-17). Ye kuali okinpejpenki imachtijkauan, maski omotlapololtijkej nochipa okichijkej tlen okinauati. Ana, David, itlakeual Nabal uan Jesús okinneltokilijkej sekimej maski omotlapololtijkej. Tlen okichijkej techyoleua noijki ijkon matikchiuakan.

13. ¿Tleka ualeua oui tikinneltokiliskej tokniuan?

¹³ ¿Otikilui itlaj se tokni tlen amo omonekiaya kimatiskej oksekimej pero satepan otikmatki ye kijtojtinemi tlen otikilui? Sapanoua teyolkoko ijkuak ikaj ijkon kichiua. Se tonal, se tokni siuatl okilui se tlayekanki itlaj tlen amo omonekiaya kimatiskej oksekimej. Pero satepan isiua tlayekanki okinotski tokni siuatl para kiyolchikauas, ijkon ye okimatki tlayekanki okilui isiua nochi tlen okipanotoka. Tokni okiyolkoko tlen okichi tlayekanki, ik non, ayakmo okineltokiliaya. Tokni siuatl okilui okse tlayekanki makipaleui para uelis oksepa kinneltokiliskiaj oksekimej tlayekankej.

14. ¿Tlen okipaleui se tokni oksepa makinneltokili tlayekankej?

¹⁴ Se tokni miak xiuitl okualantoka iuan ome tlayekankej uan amo okinneltokiliaya. Pero sapanoua okipaleui tlen okijto se tokni: “Satanás techkokolia, amo tokniuan”. Tokni omokuayejyeko tlen okikak uan okitlatlaujti Jehová, satepan okintlapojpolui nonmej tlayekankej.

15. ¿Tleka ualeua oui oksepa tikinneltokiliskej tokniuan? Xikijto tlen okipanok Grete.

¹⁵ ¿Ayakmo ueli otitlapaleui kanin timonechikoua? Xamo sapanoua omitsyolkoko. Matikitakan tlen okipanok Grete uan inantsin, itech 1930 nonmej ome tokniuan siuamej omochijchikajkej kitekichiuiliskej Jehová. Ochantiayaj ompa Alemania, kanin tekiuajkej nazis ayakmo okitekauiliayaj matetlapouikan. Grete okikauilijkej makichijchiua copias itech revista Akin Tetlapouijtok para kinmakaskiaj tokniuan. Pero tokniuan okimatkej itajtsin Grete amo okikauiliaya makitekichiuili Jehová. Sapanoua omomojtijkej uan omokuayejyekojkej itajtsin Grete kinteluis tokniuan, ik non, ayakmo okikauilijkej matlapaleui. Ijkuak opanotoka Segunda Guerra Mundial, ayakmo okinmakaya amatlajkuilolmej nion okintlajpalouayaj ijkuak okinmitayaj itech ojtli. ¡Sapanoua teyolkoko tlen okinchiuilijkej! Ik non, Grete oui okitak kintlapojpoluis tokniuan uan oksepa kinneltokilis. Satepan okajsikamatki omonekiaya kintlapojpoluis porque Jehová yokintlapojpoluijka. c

16. ¿Tleka moneki timochijchikauaskej para tikinneltokiliskej tokniuan?

 ¹⁶ Tla yomitspanok ijkon ken tokniuan tlen yotimotlapouijkej, ximochijchikaua oksepa tikinneltokilis tokniuan. Xamo achto tikitas oui pero tla timochijchikaua, kuali tiyetos. Matimokuayejyekokan, tla tikkuaj itlaj uan techkokoua, satepan tikmaluiskej tlen tikkuaskej pero non amo kijtosneki ayakmo titlakuaskej. Noijki ijkon, tla ikaj okichi itlaj tlen otechyolkoko amo matimokuayejyekokan noijki ijkon kichiuaj nochtin tokniuan, matikilnamiktokan tinochtin titlajtlakolejkej. Tla oksepa tikinneltokiliaj tiyolpakiskej uan san tikitaskej ken uelis titlapaleuiskej para nochtin tokniuan makinneltokilikan.

17. (1)¿Tleka ipati tikinneltokiliskej tokniuan? (2) ¿Tlen tikitaskej itech okse tlamachtil?

¹⁷ Axkan Satanás kinyekanaj miakej, ik non, ayakmo kinneltokiliaj oksekimej. Pero tejuan tikintlasojtlaj tokniuan, ik non, tikinneltokiliaj. Non techpaleuia matiyolpakikan uan kuali matimouikakan. Noijki techpaleuis porque satepan sapanoua titlajyouiskej. Pero, ¿tlen panos tla ok techyolkokoua porque se tokni okinmilui oksekimej tlen amo omonekiaya kimatiskej? Tla timokuayejyekouaj ijkon ken Jehová, tikchiuaj tlen kijtouaj principios bíblicos, tikintlasojtlaj tokniuan uan timomachtiaj tlen okichijkej yiuejkika itekipanojkauan Jehová, oksepa tikinneltokiliskej tokniuan uan inmiuan miakej timouikaskej (Prov. 18:24). Amo san moneki tikinneltokiliskej tokniuan, yejuan noijki moneki kimatiskej uelis techiluiskej tlen kinpanoua. Itech okse tlamachtil tikitaskej ken uelis tikchiuaskej.