1. ¿Ken kiteititia ikaj uelis kineltokiliskej?

 AKIN kijtoua tlen melauak uan kichiua tlen kijtoua, kiteititia uelis tikneltokiliskej (Sal. 15:4). Oksekimej kimatij ye uelis kinpaleuis uan tejuan noijki tiknekij mamokuayejyekokan tokniuan ijkon tiknekij tikchiuaskej. ¿Tlen techpaleuis para tokniuan matechneltokilikan?

2. ¿Ken tikteititiskej uelis techneltokiliskej?

² Moneki tikteititiskej uelis techneltokiliskej uan amo tikinchiualtiskej tokniuan matechneltokilikan. Yetoskia ken tomin, oui tiktlaniskej pero san niman uelis tiktlamiskej. Tejuan tikneltokilia Jehová porque “nochipa kichiua tlen kijtoua” (Sal. 33:4). Jehová kineki matikchiuakan ken ye (Efes. 5:1, TNM). Itech nin tlamachtil tikitaskej ken okiteititijkej yiuejkika sekimej itekipanojkauan Jehová uelis kinneltokiliskej ijkon ken ye. Noijki tikitaskej makuili tlamantli tlen techpaleuis para tikteititiskej uelis techneltokiliskej.

3, 4. (1) ¿Ken okiteititi Daniel uelis kineltokiliskej? (2) ¿Tlen moneki timotlajtlaniskej?

³ Profeta Daniel kuali tlen okichi porque ijkuak okiuikakej Babilonia nochtin san niman okineltokilijkej. Ijkuak Jehová okipaleui makijto tlen kijtosneki tlen okitemik  tekiua Nabucodonosor, okachi okineltokilijkej. Se tonal okilui tekiua Jehová amo okipaktiaya tlen okichiuaya. Nabucodonosor san niman okualaniaya, ik non, Daniel omonekiaya yetos yolchikauak para uelis kiluiskia tlen Jehová okimatilti (Dan. 2:12; 4:20-22, 25). Opanok miak xiuitl, Daniel oksepa okiteititi uelis kineltokiliskej porque okitlajtolkopki tlen oijkuilitoka itech tepamitl ompa Babilonia (Dan. 5:5, 25-29). Satepan, tekiua Darío iuan akinmej okipaleuiayaj, okitakej Daniel okatka yolkuali. Amo uelis kiteluiskiaj porque kuali otekipanouaya uan amo otlachtekiaya (Dan. 6:3, 4). Nochtin tekiuajkej tlen amo okiueyichiuayaj Jehová okitakej uelis kineltokiliskej.

⁴ Yotimomachtijkej tlen okipanok Daniel, axkan matimotlajtlanikan: “¿Ken nechitaj akinmej amo iTlaixpantijkauan Jehová? ¿Kitaj nechpaktia nitekipanos uan uelis nechneltokiliskej?”. Moneki non timotlajtlaniskej porque ijkon tikteititiskej uelis techneltokiliskej uan noijki ijkon tikueyichiuaj Jehová.

5. ¿Tleka miakej okineltokiliayaj Hananías?

⁵ Itech 455 achto itech xiuitl 1, satepan ijkuak okitlamijkej tepamitl Jerusalén, tekiua Nehemías okipejpenki sekimej tlakamej tlen okinneltokiliaya para matlamaluikan. Se omotokayotiaya Hananías, ye okinyekanaya akinmej otlamaluiayaj itech puertas. Biblia kijtoua Hananías okiteititi uelis kineltokiliskiaj uan  okitlakaitaya toTajtsin Dios, maski oksekimej amo okachi ijkon okichiuayaj (Neh. 7:2). Hananías okitlasojtlaya Jehová uan amo okinekiaya kichiuas tlen amo kuali, ik non, kuali otekipanouaya. Tla ijkon tikchiuaj, techpaleuis para matechneltokilikan.

6. ¿Ken okititi Tíquico uelis kineltokiliskia apóstol Pablo?

⁶ Matikitakan tlen okipanok se iyolikni apóstol Pablo tlen omotokayotiaya Tíquico. Ijkuak Pablo otsaktoka ikalijtik, okipaleui Tíquico uan okijto okatka “se kuali tepalewi” (Efes. 6:21, 22). Amo san okiteititi okineltokiliaya ijkuak okilui makinuikilicartas tokniuan tlen ochantiayaj ompa Éfeso uan Colosas, noijki okiteititi okineltokili para kinyolseuis uan kinyolchikauas. Tlen okichi Tíquico techilnamiktia katej tokniuan tlen nochipa kitekichiuiliaj Jehová uan kuali tikinneltokiliskej, yejuan techpaleuiaj matimouikakan iuan Jehová (Col. 4:7-9).

7. ¿Ken tlapaleuiaj tokniuan tlayekankej uan siervos ministeriales kanin timonechikouaj?

⁷ Sapanoua tikinpatioitaj tokniuan tlayekankej uan siervos ministeriales porque mochijchikauaj para tikinneltokiliskej. Ijkon ken Daniel, Hananías uan Tíquico, mochijchikauaj tlapaleuiskej kanin timonechikouaj. Tikmatij tlayekankej yokipejpenkej akin tlamachtis ijkuak timonechikouaj itlajkotia semana. Tokniuan tlayekankej kintlasojkamatiliaj tokniuan siuamej uan tlakamej kuali moyektlaliaj ijkuak tlamachtiskej. Ijkuak timonechikouaj itlamian semana uan tikinyoleuaj akinmej tikinmachtiaj touan mamonechikokan, amo timotlajtlaniaj kox kajki se tokni tlen tlamachtis. Noijki tikmatokej tokniuan techmakaskej amatlajkuilolmej para ika titetlapouiskej. Tiktlasojkamatiliaj Jehová porque techmaka tokniuan tlen techmaluiaj. Pero, ¿ken tikteititiskej uelis techneltokiliskej tokniuan?

8. ¿Ken tikteititiaj tikintlakaitaj ijkuak techtekipachoua tlen kinpanoua tokniuan? (Proverbios 11:13).

⁸ Tikintlasojtlaj tokniuan uan techtekipachoua tlen kinpanoua. Matikitakan tlen uelis tikchiuaskej pero amo matimokajkalakikan kanin amo moneki. Sekimej tlen omonechikouayaj itech achto siglo, san omokajkalakiayaj kanin amo moneki uan okijtouayaj tlen amo melauak (1 Tim. 5:13). Amo tiknekij ijkon tikchiuaskej. Matimokuayejyekokan ikaj techiluia tlen kipanotok porque kineltoka amikaj tikiluiskej. Matikijtokan se tokni siuatl techiluia mokokoua noso kipanotok okse tlamantli uan techiluia amikaj matikiluikan. Tla ijkon tikchiuaj, tikteititiaj tiktlakaitaj tokni (xiktlajtolti Proverbios 11:13). b ¿Keman amo moneki amitlaj matikijtokan?

9. ¿Ken kiteititiskej akinmej pouij itech familia uelis kinnetokiliskej?

⁹ Familia. Tinochtin akinmej tipouij itech tofamilia amo matikinmiluikan oksekimej tlen pano tokalijtik. Matikijtokan, se tokni mokuayejyekoua tlen kichiua isiua teuitskitia, ¿kinmiluis oksekimej tlen kichiua isiua? Ye amo kichiuas itlaj tlen kipinatis nion kiyolkokos porque  kitlasojtla (Efes. 5:33). Tetajmej moneki kilnamiktoskej moneki kintlakaitaskej inkoneuan, amo kinmiluiskej oksekimej tlen amo kuali kichiuaj para kinpinatiskej (Col. 3:21). Konemej noijki amo moneki kijtojtinemiskej itlaj tlen kipinatis se ifamiliar (Deut. 5:16). Kuali mouikaskej tla nochtin amo san kijtojtinemij tlen kipanoua ifamilia.

10. ¿Tlen kichiua akin melauak toyolikni? (Proverbios 17:17).

¹⁰ Akinmej inmiuan timouikaj. Xamo tinochtin tikneki tikiluiskej tlen techpanoua akin iuan timouika. Pero non ualeua oui porque xamo tipinauaj tikinmiluiskej oksekimej tlen techpanoua. Sapanoua timoyolkokouaj ijkuak tikmatij itlaj tlen otikiluijkej se toyolikni okinmilui oksekimej. Tiktlasojkamatilia akin iuan timouika amo kijtojtinemi tlen otikiluijkej, ijkon kiteititia “melauak toyolikni” (xiktlajtolti Proverbios 17:17).

11. (1) ¿Ken uelis kiteititiskej tlayekankej uan insiua uelis kinneltokiliskej? (2) ¿Tlen techmachtia ijkuak se tlayekanki motlapouia iuan se tokni uan satepan kajki iuan ifamilia? (Xikinmita fotos).

¹¹ Kanin timonechikoua. Tlayekankej amo moneki kinmiluiskej oksekimej tlen amo moneki kimatiskej, tla ijkon kichiuaj “yetos ken itlaj kanin ikaj motlatis ijkuak ejeka” (Is. 32:2). Uelis tikinmiluiskej tlen techpanoua uan yejuan amo kinmiluiskej oksekimej. Amo tikintlajtlaniaj tlen amo moneki tikmatiskej. Tikinpatioitaj insiua tlayekankej porque amo kintlajtlaniaj tlen amo moneki kimatiskej. Noijki tikpatioitaj tlayekankej amo motlapouiaj iuan insiua tlen kinpanoua tokniuan. Isiua se tlayekankej okijto: “Niktlasojkamatilia nonamik porque amo nechiluia akinmej kintlajpalotij uan intoka tokniuan akinmej moneki makinpaleuikan mamouikakan iuan Jehová. Niktlasojkamatilia amo nechiluia tlen kinpanoua tokniuan uan ijkon  amo nimotekipachoua, kuali nimouika iuan nochtin tokniuan uan nikmati ijkuak nikiluia nonamik tlen nechpanoua amikaj kiluis”. Tinochtin tiknekij tikteititiskej oksekimej uelis techneltokiliskej. Matikitakan makuili tlamantli tlen techpaleuis oksekimej matechneltokilikan.

12. ¿Tlen moneki tikchiuaskej tla tiknekij oksekimej matechneltokilikan? Xikijto.

¹² Uelis techneltokiliskej tla titetlasojtla. Jesús okijto moneki tiktlasojtlaskej Jehová uan oksekimej (Mat. 22:37-39). Ken tiktlasojtlaj Jehová tiknekij tikchiuaskej ken ye, san ye uelis tikneltokiliskej. Tla tikintlasojtla tokniuan, amo tikinmiluiskej oksekimej tlen kinpanoua, ijkon amo tikinyolkokoskej nion tikinpinatiskej (Juan 15:12).

13. ¿Ken techpaleuia tla tiyolyamankej?

¹³ Uelis techneltokiliskej tla tiyolyamankej. Akinmej tikchiuaj ken Cristo tiyolyamankej, ik non, amo san niman tikijtouaj tlen kinpanoua oksekimej (Filip. 2:3). Noijki amo tiknekij oksekimej mamokuayejyekokan tikmatij seki tlamantli tlen oksekimej amo kimatij. Noijki tla tiyolyamankej, amo tikinmiluiskej oksekimej tlen tejuan timokuayejyekouaj itech seki tlamantli tlen amo ijkuilitok itech Biblia nion itech amatlajkuilolmej.

14. ¿Ken techpaleuia kuali matimokuayejyekokan?

¹⁴ Kuali matimokuayejyekokan. Tla ijkon tikchiuaj, tikmatiskej “keman amitlaj se kijtos uan keman se tlajtos” (Ecl. 3:7). Itech sekimej altepemej kijtouaj akinmej tlajtouaj yetoskia ken plata uan akinmej amo tlajtouaj yetoskia ken oro, non kijtosneki ualeua amitlaj moneki tikijtoskej. Ik non, Proverbios 11:12 kijtoua: “Akin kuali mokuayejyekoua amitlaj kijtoua”. Matikitakan tlen kichiua se tlayekanki ijkuak kiluiaj matlapaleui itech okseki tlanechikolmej ijkuak panoua itlaj oui. Okse tlayekanki okijto: “Nin tokni amo kinmiluiaj oksekimej tokniuan tlen panoua itech okseki tlanechikolmej”. Tokni kuali mokuayejyekoua uan oksekimej tlayekankej kitlakaitaj porque kimatij amo kijtojtinemi tlen kimati.

15. ¿Ken techpaleuia tla tikijtouaj tlen melauak? Xikijto.

¹⁵ Matikijtokan tlen melauak. Non techpaleuis matechneltokilikan. Akinmej nochipa kijtouaj tlen melauak, uelis tikinneltokiliskej (Efes. 4:25; Heb. 13:18). Matikijtokan se tokni kineki okachi kuali tlamachtis. Ik non, kiluia okse tokni makikaki para ijkon kiluis ken uelis okachi kuali tlamachtis. ¿Akin kiluiskia? ¿Kiluis akin san kikajkayauas noso akin kiluis tlen melauak? Biblia kijtoua: “Okachi kuali ijkuak ikaj kiyektlaliaj uan amo ijkuak ikaj tetlasojtla pero amo kiteititia. Akin melauak moyolikni mitsuiteki porque mitstlasojtla” (Prov. 27:5, 6). Ijkuak se toyolikni techiluia tlen moneki tikchiuaskej, amo san niman tikseliaj pero tikmati non techpaleuis.

16. Ijkon ken kijtoua Proverbios 10:19, ¿tleka moneki kuali matimonauatikan?

¹⁶ Kuali matimonauatikan. Tla ijkon tikchiuaj, oksekimej techneltokiliskej. Ijkuak tiknekij tikijtoskej tlen amo moneki kimatiskej oksekimej, okachi kuali amitlaj matikijtokan (xiktlajtolti Proverbios  10:19). Redes sociales uelis kichiuaskej amo kuali matimonauatikan uan miakej uelis kimatiskej tlen amo moneki. Ijkuak itlaj tiktlaliaj itech redes sociales, amo tikmatij tlen kichiuaskej oksekimej ika non tlamantli uan amo uelis tikyektlaliskej tla tikinyolkokouaj oksekimej. Tla tikmatij kuali timonauatiskej, techpaleuis amitlaj matikijtokan ijkuak akinmej techkokoliaj techtlajtlaniskej itlaj itech tokniuan. Ijkon kinpanoua tokniuan kanin amo kinkauiliaj matetlapouikan ijkuak policías itlaj kintlajtlaniaj. Ijkuak ijkon panos, techpaleuis tlen kijtoua nin principio: “Nimokamatsakuas” (Sal. 39:1). Ik non, miak ipati matimonauatikan para ijkon uelis techneltokiliskej tofamiliares, toyolikniuan, tokniuan uan oksekimej. Ik non, moneki kuali matimonauatikan.

17. ¿Tlen uelis tikchiuaskej tinochtin para tokniuan san sekan mamoneltokilikan?

¹⁷ Sapanoua tiktlasojkamatiliaj Jehová porque techkauiliaj matikinpiakan miakej tokniuan tlen techtlasojtlaj uan tlen uelis tikinneltokiliskej. Moneki timochijchikauaskej tla tiknekij matechneltokilikan tokniuan uan tinochtin moneki nochipa ijkon tikchijtoskej. Tikinpaleuiskej tokniuan san sekan mamoneltokilikan, tla titetlasojtlaj, tiyolyamankej, kuali timokuayejyekouaj, tikijtouaj tlen melauak uan kuali timonauatiaj. Matikchiuakan ken Jehová uan matikteititikan uelis techneltokiliskej.