Itech 1940, iTlaixpantijkauan Jehová opejki kinmachtiaj notajtsin uan nonantsin. Satepan ayakmo omomachtijkej pero nonantsin ok okiseliaya revistas Akin Tetlapouijtok uan ¡Ma titlachixtokan! Itech 1950 nofamilia omonechiko ijkuak omochi se ueyi nechikol ompa Nueva York.

Satepan tokni Lawrence Jeffries opejki techtlajpaloua uan onechmachti tlen melauak tlamachtia Biblia. Ne amo kuali onikitaya iTlaixpantijkauan Jehová porque amo mokajkalakiaj itech política uan amo mochiuaj soldados. Onikijtouaya tla akinmej ochantiayaj Estados Unidos amo yaskia guerra, san niman kimoaxkatiskiaj toaltepe. Tokni Jeffries onechpaleui manikajsikamati tleka amo ijkon okichiuayaj. Ye onechilui: “¿Tlen kichiuas Jehová tla nochtin tlen chantij Estados Unidos kitekichiuiliskiaj uan akinmej kinkokoliaj kinekij kinteuiskej?”. Non uan okseki tlamantli tlen onechilui, onechpaleui manikita amo kuali onimokuayejyekouaya, non okichi manikneki nimomachtis Biblia.

Oniktlajtoltiaya revistas Akin Tetlapouijtok uan ¡Ma titlachixtokan! tlen nonantsin okipiaya. Satepan onikitak melauak tlen ompa oniktlajtoltiaya, ik non, onikseli tokni Jeffries manechmachti. Onechpakti tlen opejki nimomachtia, ik non, opejki nitetlapouia. Okse tlamantli opejki nimokuayejyekoua ijkuak onikasijkamatki “iueyi tonal Jehová amo uejka kajki” (Sof. 1:14). Ayakmo onimokuayejyeko nimomachtiti universidad, oniknekiaya  nikinmachtis oksekimej tlen melauak tlamachtia Biblia.

13 de junio 1956 otlanki nimomachtia preparatoria, uiptlatika otikpixkej nechikol itech circuito uan ompa onimoapolakti. Amo onimokuayejyeko ken Jehová sapanoua nechteochiuaskia porque onikpejpenki niktekichiuilis uan nikinmachtis oksekimej.

Ijkuak onimoapolakti opanok chikuase metstli uan onimochi precursor. Amatlajkuilol Toteki itech Tekiuajkayotl tlen okiski ika inglés diciembre 1956 okinyoleuaya tokniuan matetlapouitij kanin okachi moneki. Non onechpaleui porque oniknekiaya nitetlapouis kanin okachi omonekiaya (Mat. 24:14).

Onichantito Edgefield (Carolina del Sur), ompa opejki nimonechikoua san iuan naui tokniuan. San makuili otimonechikouayaj ikalijtik se tokni. Sejse metstli onitetlapouiayaj 100 horas. Onikinyekanaya tokniuan matetlapouikan, ontlamachtiaya uan onikchiuaya okseki tlamantli kanin onimonechikouaya. Ijkuak okachi oniktekichiuiliaya Jehová, okachi onikixmatiaya.

Se siuatl tlen onikmachtiaya okipiaya se funeraria ompa Johnston, amo uejka okatka. Onechilui iuan manitekipano uan otechtlaneti kanin timonechikoskiaj.

Itelpoch tokni tlen onechmachti omotokayotiaya Jolly Jeffries. Ochantito Brooklyn (Nueva York) kanin ne onichantiaya uan opejki iuan nitetlapouia. Se tokni otechtlaneti kanin timokauaskiaj.

Ik sur ompa Estados Unidos amo miak otechtlaxtlauiayaj ijkuak otitekipanouayaj, itech se tonal san otechtlaxtlauiayaj kanaj 50 pesos (ome noso eyi dólares). Se tonal ayakmo miak tomin onikpiaya, onikmokoui tlen nikkuaskia, ijkuakon se tlakatl onechtlajtlani: “¿Tiktemoua kanin titekipanos? Sejse hora nimitstlaxtlauis kanaj 20 pesos (se dólar)”. Eyi tonal onitlachipajki kanin kalchijchiuaskia. Ijkon onikitak Jehová onechpaleuiaya porque okinekiaya manimokaua Edgefield. Itech 1958, onia ijkuak omochi se ueyi nechikol ompa Nueva York, maski amo onikpiaya tomin.

Ijkuak yiome tonal ompa otimonechikojkej, onikixmatki Ruby Wadlington ye otlapaleuiaya ken precursora ompa Gallatin (Tennessee). Otiknekiayaj titlapaleuiskej ken misioneros, ik non, otiajkej itech nechikol para akinmej okinekiayaj yaskej Galaad. Se tonal onechyolejkej ompa Gallatin manitlamachtiti uan ompa oniktlajtlani Ruby kox okinekiaya nouan monamiktis. Opejki iuan nimonechikoua uan 1959 otimonamiktijkej.

Ijkuak onikpiaya 23 xiuitl opejki nikinyekana tlayekankej ompa Gallatin. Se tlayekanki itech circuito techtlajpaloskia, omotokayotiaya Charles Thompson, ye okatka sapanoua ixtlamatki. Onechtlajtlani ken okatkaj tokniuan uan tlen okichijkej oksekimej tlayekankej itech circuito para kinpaleuiskej. Ye onechmachti achto itlaj nikchiuas moneki nitlajtlanis.

Itech Mayo 1964, onechyolejkej manikseli Tlamachtil itech Tekiuajkayotl tlen ouejkauaya eyi metstli, ompa South Lansing (Nueva York). Akinmej otechmachtijkej, onechpaleuijkej okachi manikixmati Jehová uan okachi iuan manimouika.

Itech enero 1965, otechyolejkej matitlapaleuikan itech circuito. Tikintlajpaloskiaj miakej nechikolmej, tlen okatkaj itech Knoxville (Tennessee) hasta Richmond (Virginia). Noijki tikintlajpaloskiaj nechikolmej tlen katej Carolina del Norte, Kentucky uan Virginia Occidental. San otikintlajpaloayaj nechikolmej kanin okatkaj tokniuan tlen amo ixchipajkej porque ompa ik sur Estados Unidos amo ueli omonechikouayaj akinmej ixchipajkej uan akinmej amo. Tokniuan amo okipiayaj miak tlamantli, non otechpaleui matikinmakakan akinmej amitlaj okipiayaj. Se tlayekanki itech circuito onechmachti itlaj tlen sapanoua onechpaleui. Ye onechilui: “Amo ximoueyineki, amo ximokuayejyeko mitsnamiki tikinnauatijtos tokniuan. Uelis tikinpaleuis tla kitaj tikintlasojtla”.

Se tonal ijkuak otiktlajpalouayaj okse tlanechikol, Ruby opejki kimachtia se siuatl, ye okipiaya se itakotsin tlen okipiaya se xiuitl. Amo otikajsikej akin kimachtis, ik non, Ruby ok okimachti ika carta. Satepan ome precursoras especiales oajsitoj ompa uan opejki kimachtia, satepan omoapolakti. Opanok 30 xiuitl uan 1995 itech Betel ompa Patterson, se tokni okitlajpalo Ruby. Non tokni okatka ichpoch siuatl tlen okimachti Ruby, tokni iuan inamik omomachtito itech tlamachtil 100 tlen okichiuayaj Galaad.

Itech altepetl Florida otiktlajpalokej okse circuito. Otiknekiayaj se carro, ik non, otikkojkej se tlen amo patio. Opanok se semana uan oijtlakauik uan amo otikpiayaj tomin para tikyektlaliskej. Oniknotski se tokni tlen onimokuayejyeko uelis techpaleuiskiaj. Ye okilui se itlakeual makiyektlali tocarro uan amo okinek matiktlaxtlauikan. Ye san otechilui: “Amo techtlaxtlaui” uan otechtliokoli tomin. Ijkuakon, onikitak Jehová kinmaluia itekipanojkauan uan onikitak tejuan noijki moneki tiktemakaskej tlen tikpiaj.

Ijkuak otikintlajpalouayaj nechikolmej, otimokauayaj inkalijtik tokniuan, opejki inmiuan timouikaj. Se tonal amo oniktlami informe uan onikka kanin onitlajkuilouaya. Ijkuak onimokopki para niktlamis, se chokotsin tlen okipiaya eyi xiuitl tlen onimokauaya ikalijtik, otlajkuilo itech informe. Ijkuak tikilnamikij ok tiuetskaj.

Itech 1971, onechmakakej se carta kanin okijtouaya matitlapaleuitij ken tlayekanki itech distrito ompa Nueva York. ¡Amo otikneltokayaj! San onikpiaya 34 xiuitl ijkuak otichantitoj Nueva York. Tokniuan kuali onechselijkej maski amo niixchipauak.

Ijkuak onitlapaleuiaya ken tlayekanki itech distrito, onechpaktiaya nitlamachtis itech uejueyij nechikolmej tlen omochiuayaj itech circuitos. Miakej tlayekankej itech circuito okipiaya okachi miak xiuitl otlapaleuijtokaj uan noijki ompa okatka tokni tlayekanki itech circuito tlen okipanolti tlamachtil ijkuak onimoapolakti. Noijki tokni Theodore Jaracz ompa okatka, satepan opouik itech Cuerpo Gobernante. Okatkaj miakej tokniuan tlen okipiaya miak xiuitl tlen otlapaleuiayaj Betel ompa Brooklyn. Sapanoua onikintlasojkamatili tlayekankej itech circuito uan betelitas porque kuali inmiuan onimouikaya.  Onikitak ken okinyolchikauaya tokniuan, okitlakaitayaj Biblia uan okipaleuiayaj ialtepe Jehová. Nochi non okichi amo oui manitlapaleui ken tlayekanki itech distrito.

Itech 1974, Cuerpo Gobernante okintitlanki miakej tlayekankej itech circuito matlapaleuitij itech distrito. Ne oksepa onitlapaleui ken tlayekanki itech circuito ompa Carolina del Sur. Ijkuakon tokniuan oyolpakej porque ayakmo okinchikoitayaj uan uelis san sekan monechikoskiaj.

Itlamian 1976, otechtitlankej altepetl Georgia, itech se circuito tlen kajki Atlanta uan Columbus. Ok nikilnamiki ijkuak onikpanolti tlamachtil keman oixpolikej makuili konemej tlen amo ixchipajkej ijkuak okitlatilijkej ikalijtik, inantsin omokojko uan okiuikakej hospitaI. Miakej tokniuan, ixchipajkej uan akinmej amo, ompa oajsitoj para kinyolchikauaskej. Onikitak ken itekipanojkauan Jehová sapanoua tetlasojtlaj. Ijkuak tokniuan teiknomatij kinpaleuiaj ijkuak tlajyouiaj.

Itech 1977, otechiluijkej matitlapaleuitij seki metstli Betel ompa Brooklyn. Ijkuak yitimokopaskiaj tokalijtik, ome tokniuan tlen pouij itech Cuerpo Gobernante otechtlajtlanijkej Ruby uan ne, kox ok otiknekiayaj timokauaskej Betel. Otikijtojkej ok ompa titlapaleuiskiaj.

Onitlapaleui 24 xiuitl kanin okitayaj ken tetlapouiskiaj tokniuan, ompa tokniuan otechtlajtlaniayaj miak tlamantli uan omonekiaya tikinnankiliskej. Cuerpo Gobernante techmachtijtok ika principios bíblicos. Ik non, kuali tikinnankiliaj tokniuan uan noijki tikinmachtiaj tlayekankej itech circuito, precursores uan tlayekankej. Ijkon tokniuan kuali mouikaj iuan Jehová uan non yokinpaleui okachi matlaneltokakan.

Itech xiuitl 1995 hasta 2018, onikintlajpalo miakej kalmej Betel. Onimonechikouaya iuan tokniuan tlen okiyekanayaj kalmej Betel, akinmej ompa otlapaleuiayaj uan misioneros para nikinyolchikauas uan nikinpaleuis. Ruby uan ne otechyolchikauayaj ijkuak tokniuan otechiluiaya ken okitekichiuiliayaj Jehová. Itech xiuitl 2000, otikintlajpalotoj tokniuan tlen katej Betel ompa Ruanda. Tokniuan otechiluijkej ken otlajyouijkej itech 1994 uan miakej infamiliares oixpolikej. Pero tokniuan ok oyolpakiayaj, otlaneltokayaj uan okimatiayaj oksepa kinmitaskej infamiliares.

Axkan yitikpiaj kanaj 80 xiuitl. Nitlapaleuijtok 20 xiuitl iuan tokniuan tlen tlayekanaj Betel ompa Estados Unidos. Amo keman onia universidad pero Jehová uan ialtepe nechmachtijtok. Ik non, ueli nikinmachtia oksekimej tlen melauak tlamachtia Biblia para nochipa makinpaleui (2 Cor. 3:5; 2 Tim. 2:2). Yonikitak miakej yokinpaleui tlen kijtoua Biblia makipatlakan innemilis uan mamouikakan iuan Jehová (Sant. 4:8). Ijkuak tiuelij Ruby uan ne tikinpaleuiaj oksekimej makipatioitakan kixmatiskej Jehová uan ijkon uelis tlamachtiskej tlen melauak tlamachtia Biblia, non tlen okachi ipati kichiuaj akinmej kitekichiuiliaj Jehová.