Matikitakan tlen kijtoua Biblia.

Hechos 24:15 kijtoua: “Nochteh non yomikkeh moyolitiskeh, akimeh otlájtlakolchijkeh iwa akimeh amó”. “Akimeh amó” otlajtlakolchijkej nochipa okitlakamatkej toTajtsin Dios ijkuak oyoltokaj, ik non, intoka ijkuilitok itech iamoch (Mal. 3:16). “Akimeh otlájtlakolchijkeh” ompa pouij akinmej amo okixmatkej Jehová, ik non, intoka amo ijkuilitok itech iamoch.

Juan 5:28, 29 noijki tlamachtia tlen kijtoua Hechos 24:15. Jesús okijto: “Akimeh okichijkeh tlan kuali, moyolitiskeh [...], iwa akimeh okichijkeh tlan amokuali, moyolitiskeh para kinyolkuitiskeh [noso kinmixkomakaskej]”. Akinmej amo otlajtlakolchijkej ijkuak oyoltoka okichijkej tlen kuali. Yejuan kinyolitiskej porque intoka ok ijkuilitok itech iamoch toTajtsin Dios. Akinmej sapanoua otlajtlakolchijkej ijkuak oyoltokaj, yejuan kinyolitiskej para kinmixkomakaskej. Intoka amo ijkuilitok itech iamoch toTajtsin Dios, moneki kiteititiskej kox melauak kipatlaskej innemilis. Ijkuakon kinpaleuiskej makixmatikan Jehová uan xamo intoka moijkuilos itech iamoch.

Apocalipsis 20:12, 13 kijtoua nochtin akinmej kinyolitiskej kitlakamatiskej tlen ijkuilitok “itech amatlajkuílolteh”, non kijtosneki yankuikej tlanauatilmej tlen tikseliskej itech xochitlali. Pero akinmej amo tetlakamatiskej kinmixpoloskej (Is. 65:20).

Daniel 12:2 kijtoua: “Sekimej kipiaskej yolilistli tlen amo keman tlamis uan oksekimej kintlajtlakoltiskej uan ayakmo kinseliskej”. Non versículo kijtoua tlen kinpanos akinmej kinyolitiskej, “sekimej kipiaskej yolilistli tlen amo keman tlamis” uan oksekimej “ayakmo kinseliskej”. Non kijtosneki ijkuak tlamis mil xiuitl sekimej kipiaskej yolilistli tlen amo keman tlamis uan oksekimej kinmixpoloskej (Apoc. 20:15; 21:3, 4).

Ijkuak kinyolitiskej ome grupos, yetoskia ken ijkuak sekimej kinekij chantiskej itech okse altepetl. “Akimeh amó” otlajtlakolchijkej yetoskia ken akinmej kinmakaj se visa para tekipanoskej noso ompa chantiskej seki metstli. “Akimeh otlájtlakolchijkeh” yetoskia ken akinmej kinmakaj se visa san para paxialotiuij noso para mokauaskej san seki tonalmej. Pero moneki kitlakamatiskej tlanauatilmej para uelis mokauaskej itech non altepetl. Noijki ijkon, “akimeh otlájtlakolchijkeh” moneki kitlakamatiskej itlanauatiluan Jehová tla kinekij yoltoskej itech xochitlali. Maski akinmej kinekij chantiskej itech okse altepetl kipiaskej se visa para tekipanoskej noso san para paxialotiuij, satepan xamo uelis kinkixtiskej noso ompa mokauaskej itech non altepetl, ik non, moneki kuali tetlakamatiskej tla kinekij ompa mokauaskej. Noijki ijkon, akinmej kinyolitiskej moneki kiteititiskej kineltokaj uan kitlakamatij itlanauatiluan Jehová, tla kinekij nochipa yoltoskej itech xochitlali.

Jehová amo san teiknomati, ye kuali tlaixkomaka (Deut. 32:4; Sal. 33:5). Ye kiteititis tetlasojtla ijkuak kinyolitis “akimeh amó” otlajtlakolchijkej uan “akimeh otlájtlakolchijkeh” pero moneki kitlakamatiskej tlen Jehová tlanauatia. San akinmej kitlasojtlaskej uan kitlakamatiskej, yoltoskej nochipa itech xochitlali.