1. ¿Tlen okichi Pedro ijkuak okinkitskijkej miakej michimej?

 PEDRO oyajki omichkitskito se youali pero amo okajsik nion se michin. Pero Jesús okilui: “Xikijkuani n barka kan okachi tlawejkatla, xikonintlamotlakah nomomichayawah iwa ompa ximichmaakah” (Luc. 5:4). Pedro okichi tlen okinauati Jesús maski omokuayejyekouaya amitlaj kajsiskia. Ijkuak oyajkej okinkitskijkej sapanoua miakej michimej uan michayamej otsayankej. Pedro uan akinmej iuan okatkaj omotlajtlachialtijkej porque okitakej tlen opanok okatka se milagro. Pedro okijto: “Noteko, amo xiwalmijkuani nonawak, porke ne nitlajtlakole” (Luc. 5:​6-9). Ye omokuayejyekouaya amo okinamikiaya yetos inauak Jesús.

2. ¿Ken techpaleuia ijkuak timomachtiaj tlen okichi Pedro?

² Tlen okijto Pedro okatka melauak porque ye okatka tlajtlakole. Biblia kijtoua Pedro okichi seki tlamantli uan okijto seki tlamantli pero satepan omoyolkoko. ¿Yomitspanok ijkon ken Pedro? Xamo yiuejkika timochijchikaua tikkauas itlaj tlen amo kuali. Amo ximoyolkoko tla ijkon mitspanotok. Tlen okipanok Pedro uelis mitspaleuis. ToTajtsin Dios uelis kichiuaskia amo makijkuilokan tlen amo kuali okichi Pedro. Pero ye okitekauili makijkuilokan para techmachtis seki tlamantli (2 Tim. 3:​16, 17). Ijkuak timomachtiaj tlen okipanok Pedro, tikitaj ualeua okichi tlen amo kuali uan omomachiliaya ijkon ken tejuan. Non techilnamiktia Jehová kimatok tejuan titlajtlakolejkej. Ye kineki matimochijchikauakan maski ualeua timotlapololtiaj.

3. ¿Tleka moneki timochijchikauaskej?

 ³ ¿Tleka miak ipati matimochijchikauakan? Porque okachi kuali tikchiuaj itlaj ijkuak nochipa timochijchikauaj. Ijkon panoua ijkuak ikaj kineki kitsotsonas se violín. Moneki miak xiuitl momachtis para kuali kitsotsonas. Ye xamo miak uelta motlapololtis pero tla okachi momachtis satepan okachi kuali tlatsotsonas. Xamo ualeua ok motlapololtis maski yikimati tlatsotsonas. Pero ye amo mosotlaua uan okachi momachtia. Tejuan xamo noijki ijkon techpanoua. Uelis tikchiuaskej itlaj tlen achto yotikchijkaj. Pero amo timosotlauaj uan timochijchikauaj tikchiuaj tlen kuali. Tinochtin timotlapololtiaj noso tikchiuaj itlaj uan satepan timoyolkokouaj. Jehová techpaleuis matikchiuakan tlen kuali tla amo timosotlauaj (1 Ped. 5:10). Axkan matikitakan Pedro omochijchika maski omotlapololti. Ikinon Jesús okiknomatki uan non techpaleuia okachi matiktekichiuilikan Jehová.

4. ¿Tlen okijto Pedro uan ken okiyolchika Jesús? (Lucas 5:​5-10).

⁴ ITlajtol toTajtsin Dios amo kijtoua tleka Pedro okijto okatka se tlakatl tlajtlakole. Noijki amo kijtoua tlen amo kuali omokuayejyeko (xiktlajtolti Lucas 5:​5-10). Pero xamo Pedro okichi itlaj sapanoua amo kuali. Jesús okitak Pedro omomojtiaya xamo porque omokuayejyekouaya amo uelis kichiuaskia seki tlamantli. Pero Jesús noijki okimatiaya Pedro uelis nochipa kitekichiuiliskia Jehová. Ikinon ika miak tlasojtlalistli okilui: “Ayakmo ximomojti”. Pedro sapanoua okipaleui ijkuak okitak Jesús okineltokaya uelis kichiuaskia tlen kuali. Satepan Pedro uan ikni tlen omotokayotiaya Andrés okikajkej inteki uan otetlapouitoj iuan Jesús. Jehová sapanoua okinteochi porque okichijkej tlen ye kipaktia (Mar. 1:​16-18).

5. ¿Ken Jehová okiteochi Pedro porque ayakmo omomojti uan omochi idiscípulo Jesús?

⁵ Pedro okitak miak tlamantli kualtsin porque okatka idiscípulo Jesús. Ye okitak Jesús okinpajti akinmej omokokouayaj, okinkixtili amo kuali ejekamej tlen okinpiayaj uan okinyoliti akinmej yoixpolikaj (Mat. 8:​14-17; Mar. 5:​37, 41, 42). b Noijki okitak Jesús ueyititoskia ijkuak tlanauatiskia uan non amo keman okilka  (Mar. 9:​1-8; 2 Ped. 1:​16-18). Pedro okitak tlen amo keman omokuayejyeko kitaskia. Ye sapanoua opaki porque amo omosotla maski omotlapololti uan okitak nochi non tlamantli.

6. Xikyekijto tlen okipanok Pedro.

⁶ Pedro ok omonekiaya mochijchikauas para amo motlapololtis maski okitak uan okikak miak tlamantli kualtsin. Matikitakan seki tlamantli tlen okichi. Se tonal okajuak Jesús ijkuak ye okijto omonekiaya tlajyouis uan mikis para mochiuaskiaj profecías tlen katej itech Biblia (Mar. 8:​31-33). Satepan Pedro uan oksekimej apóstoles omokualanijkej porque okinekiayaj kimatiskej akin okachi oueyititoka (Mar. 9:​33, 34). Youak ijkuak yikimiktiskiaj Jesús, Pedro okinakastek se tlakatl (Juan 18:10). Noijki non youak omomojti uan eyi uelta okijto amo okixmatiaya Jesús (Mar. 14:​66-72). Saiktlami sapanoua ochokak (Mat. 26:75).

7. Ijkuak toTajtsin Dios okiyoliti Jesús, ¿tlen okilui makichiua Pedro?

⁷ Pedro sapanoua omoyolkokouaya pero Jesús amo okijto ayakmo uelis itlaj kichiuaskia. Ijkuak toTajtsin Dios okiyoliti Jesús, ye okikauili Pedro makiteititi kox ok okitlasojtlaya. Ye okilui mayeto yolyamanki uan makinmalui ichkauan (Juan 21:​15-17). Pedro ika nochi iyolo okichi tlen okilui Jesús. Ikinon ye inuan oksekimej okatkaj Jerusalén tonal pentecostés uan yejuan achto okinpejpenkej ika espíritu santo.

8. ¿Tlen amo kuali okichi Pedro ompa Antioquía?

⁸ Pedro ok omonekiaya mochijchikauas para amo motlapololtis maski yokipejpenkaj ika espíritu santo. Itech xiuitl 36 Pedro okitak Cornelio okiseli espíritu santo maski amo okatka judío. Tlen opanok okiteititi toTajtsin Dios amo techikoita uan akinmej chantij itech okseki altepemej uelis pouiskiaj itech ialtepe (Hech. 10:​34, 44, 45). Ijkuakon Pedro opejki tlakua inuan akinmej amo okatkaj judíos maski achto amo ijkon okichiuaya (Gál. 2:12). Pero sekimej tokniuan tlen okatkaj judíos omokuayejyekouayaj amo kuali okatka tla judíos tlakuaskiaj inuan akinmej amo judíos. Ikinon Pedro ayakmo otlakua inuan akinmej amo okatkaj judíos ijkuak sekimej judíos oajsitoj Antioquía. Xamo ijkon okichi porque omomojtiaya makualanikan tokniuan tlen okatkaj judíos. Apóstol Pablo okitak tlen okichijtoka Pedro uan okajuak inmixpan oksekimej (Gál. 2:​13, 14). Pero Pedro amo omosotla uan omochijchika kichiuas tlen kuali. ¿Tlen okipaleui?

9. ¿Ken okiteititi Pedro okineltokaya Jesús ijkon ken kijtoua Juan 6:​68, 69?

⁹ Pedro nochipa otetlapoui iuan Jesús uan amo okika itlaj makitsakuili. Se tonal ye okiteititi okineltokaya Jesús ijkuak itlaj okijto uan idiscípulos amo okajsikamatkej (xiktlajtolti Juan 6:​68, 69). Pero miakej okikajtejkej Jesús uan amo okiluijkej makinyekilui tlen okijto nion amitlaj okitlajtlanijkej. Pedro amo okikajte Jesús uan inmixpan oksekimej okijto ye kitemaka “yolílistli non ayik tlami”.

10. ¿Ken okiteititi Jesús okineltokaya Pedro kichiuaskia tlen kuali? (Noijki xikita dibujo).

¹⁰ Jesús amo keman okika Pedro. Ye yokimatiaya Pedro uan oksekimej apóstoles kikajteuaskiaj youak ijkuak yikikitskiskiaj. Pero Jesús okilui Pedro ye okimatiaya uelis kichiuaskia tlen kuali  uan amo kikauaskia Jehová (Luc. 22:​31, 32). Jesús okimatiaya iapóstoles okinekiayaj kichiuaskej tlen kuali pero incuerpo amo otlaxikouaya (Mar. 14:38). Ikinon Jesús okimatiaya Pedro uelis kichiuaskia tlen kuali maski eyi uelta okijto amo okixmatiaya. Ijkuak toTajtsin Dios okiyoliti Jesús okimonextili Pedro (Mar. 16:7; Luc. 24:34; 1 Cor. 15:5). Non okipaleui Pedro ayakmo mamoyolkoko.

11. ¿Ken Jesús okipaleui Pedro makineltoka Jehová kimaluiskia?

¹¹ Jesús okilui Pedro Jehová nochipa kimaluiskia. Ijkuak Jesús okiyolitijkej okichi se milagro uan ijkon Pedro uan oksekimej apóstoles okinkitskijkej michimej (Juan 21:​4-6). Non milagro okipaleui Pedro makineltoka Jehová kimakaskia tlen ika mopanoltiskia. Ijkuakon Pedro xamo okilnamik Jesús okijto, Jehová nochipa kinmaluis akinmej kitekichiuiliaj (Mat. 6:33). Ikinon Pedro omochijchika otetlapoui uan ayakmo omichkitski. Noijki itech pentecostés xiuitl 33 omoyolchika uan otlamachti. Ijkon miakej okinpaleui matlaneltokakan (Hech. 2:​14, 37-41). Satepan okinpaleui miakej samaritanos mamochiuakan idiscípulos Cristo uan noijki akinmej amo okatkaj judíos (Hech. 8:​14-17; 10:​44-48). Jehová okichi Pedro matlapaleui para miakej tlen chantij itech tlatlamantli altepemej matlaneltokakan.

12. ¿Ken techpaleuia tlen okipanok Pedro para ayakmo matikchiuakan tlen achto otikchiuayaj?

¹² Jehová noijki uelis techpaleuis amo matimosotlauakan. Ualeua oui porque xamo yiuejkika timochijchikauaj para amo tikchiuaskej itlaj tlen amo kuali. Xamo tikitaj tejuan okachi timotlapololtiaj amo ijkon ken Pedro. Pero Jehová uelis techpaleuis amo matimosotlauakan (Sal. 94:​17-19). Matikitakan tlen okipanok se tokni. Ijkuak ayamo okixmatiaya Jehová miak xiuitl ye omosiuakopki. Satepan ayakmo oauilnenki pero ualeua okiyoltilanaya tlen amo kuali. ¿Tlen okipaleui amo mamosotlaua? Ye okijto Jehová techpaleuia. Noijki okijto: “Ika iespíritu Jehová [...], yonikitak uelis nochipa [...] tikchiuaskej tlen kuali”. Saiktlami okijto: “Jehová yonechkauili maniktekichiuili [...] uan ye nechyolchikaua maski nimotlapololtia”.

13. ¿Ken uelis tikchiuaskej ijkon ken okichi Pedro? (Hechos 4:​13, 29, 31; noijki xikita foto).

 ¹³ Yotikitakej Pedro miak uelta omomojti. Pero okilui Jehová makipaleui uan omoyolchika (xiktlajtolti Hechos 4:​13, 29, 31). Tejuan noijki uelis ijkon tikchiuaskej. Matikitakan tlen okipanok se tokni itech Segunda Guerra Mundial. Ye itoka Horst uan ochantiaya Alemania. Ijkuakon miakej okinekiayaj makijtokan “Heil Hitler” tlen okijtosnekiaya “Hitler techmakixtis”. Horst okimatiaya amo kuali tla ijkon kijtoskia, pero miak uelta ijkon okijto porque okinmauiliaya akinmej inuan omomachtiaya uan akinmej okimachtiayaj. Itatajuan amo okajuakej, iuan omotlatlaujtijkej uan okiluijkej Jehová makiyolchikaua. Satepan Horst omoyolchika uan okichi tlen omonekiaya porque itatajuan okipaleuijkej uan okikauili Jehová makipaleui. Satepan okijto: “Jehová amo keman onechilka”. c

14. ¿Ken mochijchikauaj tlayekankej kinyolchikauaskej tokniuan tlen moyolkokouaj?

¹⁴ Jehová uan Jesús nochipa techpatioitaskej. Pedro omonekiaya kipejpenas itlaj miak ipati ijkuak ye yokijto amo okixmatiaya Jesús. ¿Mosotlauaskia noso ok yetoskia idiscípulo Cristo? Jesús okitlatlaujti Jehová makipaleui Pedro para nochipa matlaneltoka. Jesús okilui Pedro ipatka omotlatlaujti uan ye okimatiaya satepan uelis kinyolchikauaskia ikniuan (Luc. 22:​31, 32). Pedro omoyolchika ijkuak okilnamik tlen okijto Jesús. Tejuan noijki moneki tikpejpenaskej itlaj miak ipati. Ijkuak moneki itlaj tikpejpenaskej,  Jehová xamo kichiuas matechyolchikauakan tokniuan tlayekankej para matikchiuakan tlen kuali (Efes. 4:​8, 11). Se tlayekanki tlen itoka Paul uan yikipia miak xiuitl tlapaleuijtok, mochijchikaua kinyolchikauas tokniuan. Ijkuak kita se tokni moyolkokoua kiluia makilnamiki ken Jehová okiyoltilanki para mayeto itech ialtepe. Noijki kiluia Jehová amo keman kikauas porque ye kitlasojtla. Non tokni tlayekanki yokitak miakej tokniuan tlen omoyolkokouayaj ok kitekichiuiliaj Jehová porque ye kinpaleuia.

15. ¿Ken techititia tlen okinpanok Pedro uan tokni Horst melauak mochiua tlen kijtoua Mateo 6:33?

¹⁵ Yotikitakej Jehová okinmakak tlen ika mopanoltiskej Pedro uan oksekimej apóstoles. Jehová noijki techteochiuas tla nochipa tiktekichiuiliaj (Mat. 6:33). Horst okinekiaya mochiuas precursor ijkuak yopanok Segunda Guerra Mundial. Pero ye amo okipiaya tomin uan omokuayejyekouaya amo kipiaskia tlen ika mopanoltis tla okachi kitekichiuiliskia Jehová. ¿Tlen okichi? Ijkuak okintlajpaloto tokni tlen tlayekana itech circuito ye nochi semana inuan otetlapoui. Ijkon okichi porque okinekiaya kitas kox Jehová melauak kimakaskia tlen okipolouaya. Ijkuak otlanki semana omotlajtlachialti porque tokni tlen okintlajpaloto okimakak se sobre tlen okipiaya tomin pero ye amo okimatiaya akin okitemakak. Non tomin kipaleuiskia mamochiua precursor miak metstli. Tlen okitliokolijkej Horst okipaleui makita Jehová nochipa kimaluiskia. Ijkuakon opejki okachi kitekichiuilia Jehová (Mal. 3:10).

16. ¿Tleka ipati matimomachtikan tlen okipanok Pedro uan tlen okijkuilo itech ome cartas?

¹⁶ Pedro sapanoua opaki porque Jesús omotoki inauak maski ye okilui “amo xiwalmijkuani nonawak”. Jesús nochipa okipaleui Pedro mayeto kuali apóstol. Ijkon oksekimej tokniuan kitaskiaj tlen ye okichiuaya. Tlen Jesús okimachti tinochtin techmachtia miak tlamantli ipati. Pedro okijto seki tlamantli itech ome cartas tlen okinmijkuilili tokniuan achto siglo. Chikome timomachtiskej seki tlamantli miak ipati tlen ijkuilitok itech nonmej cartas uan ken uelis tikchiuaskej axkan.