1, 2. ¿Tleka moneki matimomachtikan tlen okipanok Sansón?

 ¿TLEN timokuayejyekouaj ijkuak tikkakij itoka Sansón? Xamo timokuayejyekouaj okatka se tlakatl sapanoua chikauak. Melauak okatka chikauak pero noijki okichi itlaj tlen amo kuali. Jehová okitak sapanoua otlaneltokaya ikinon okika makijkuilokan itech Biblia tlen okichi para techmachtis.

² Jehová okichi Sansón makichiua miak tlamantli para kinpaleuis israelitas. Satepan ijkuak yoixpoliuik, Jehová okiyekanki Pablo para makijkuilo itoka Sansón itech hebreos capítulo 11 kanin okijto miakej sapanoua otlaneltokakej (Heb. 11:​32-34). Sansón okineltokak Jehová kipaleuiskia maski sapanoua otlajyouijtoka. Axkan tikitaskej ken techyolchikaua tlen okipanok uan tlen techmachtia.

3. ¿Tleka Jehová okipejpenki Sansón?

³ Sansón oneski ijkuak filisteos okinnauatiayaj israelitas uan okintlajyouiltiayaj (Juec. 13:1). Filisteos sapanoua okintlajyouiltiayaj israelitas ikinon Jehová okipejpenki Sansón para makinpaleui (Juec. 13:5). Sansón  omonekiaya kineltokas Jehová kipaleuiskia porque okatka sapanoua oui tlen kichiuaskia.

4. ¿Ken okipaleui Jehová Sansón? (Jueces 15:​14-16).

⁴ Tikitaskej se tonal Sansón okineltokak Jehová kipaleuiskia. Miakej soldados filisteos oyajkej Lehí para kikitskiskiaj Sansón. Lehí xamo okatka Judá. Akinmej ochantiayaj Judá sapanoua omomojtijkej ikinon okilpijkej Sansón uan okinmaktilijkej akinmej okikokoliayaj. Israelitas okilpijkej ika ome yankuik mekatl uan okinuikilijkej filisteos (Juec. 15:​9-13). Pero Jehová okimakak chikaualistli Sansón uan ototonki mekatl tlen ika oilpitoka. Satepan okajsik ikamachal se burro tlen ayamo ouakiaya uan ika okinmikti 1,000 filisteos (xiktlajtolti Jueces 15:​14-16).

5. ¿Ken okiteititi Sansón okineltokaya Jehová kipaleuiskia?

⁵ ¿Tleka Sansón otemikti ika ikamachal se burro uan amo ika se espada? Porque okimatiaya Jehová kipaleuiskia maski san tlen ika moteuiskia. Ye omoteui ika itlaj tlen san niman okajsik para kichiuaskia tlen okinekiaya Jehová. Ikinon otlatlanki porque ye okipaleui.

6. ¿Tlen techmachtia tlen okipanok Sansón?

⁶ Jehová noijki techpaleuis maski san tlen tekitl tikpiaskej itech ialtepe. Ye techpaleuis matikchiuakan maski ualeua tikitaskej oui. Xamo tejuan amo tikmatij ken techpaleuis pero ye uelis kichiuas miak tlamantli. Tla tejuan noijki tikneltokaj Jehová, ye techpaleuis uan techmakas chikaualistli para matikchiuakan tlen ye kineki ijkon ken okipaleui Sansón (Prov. 16:3).

7. ¿Tlen techititia moneki tikkauiliskej Jehová matechyekana?

⁷ Miakej tokniuan tlapaleuiaj para kinchiuaskej kalmej kanin timonechikouaj porque kineltokaj Jehová kinpaleuia. Yiuejkika ialtepe Jehová okinchiuaya kalmej kanin timonechikouaj uan okseki kalmej. Pero yejuan tokniuan  okijtouayaj ken kinchiuaskiaj nonmej kalmej. Pero axkan okachi miakej peua kitekichiuiliaj Jehová ikinon okipatlakej seki tlamantli. Tokniuan tlen tlayekanaj okitlatlaujtijkej Jehová uan okichijkej seki tlamantli. Opejki kinkouaj kalmej uan san okinyektlalijkej para ompa monechikoskej. Se tokni tlen itoka Robert uan yiuejkika tlapaleuia kanin kinchiuaj kalmej para timonechikoskej, okijto: “Oui otikpatlakej tlen yiuejkika otikchiuayaj porque yotimomatkaj ijkon otitekipanouayaj. Pero tokniuan okichijkej tlen okinmiluijkej uan otikitakej Jehová okiteochiuaya tlen otikchijtokaj”. Non techmachtia Jehová kiyekana ialtepe para mamochiua tlen ye kineki. Ikinon matimotlajtlanikan: “¿Nikkauilia Jehová manechyekana uan nimochijchikaua nikpatlas seki tlamantli tla moneki?”.

8. ¿Tlen okichi Sansón ijkuak sapanoua oamikiaya?

⁸ Xamo tikilnamikij tlen okseki tlamantli okichi Sansón. Matikitakan tlen okichi. Se tonal se león okinekiaya kikuas Sansón pero ye okimikti. Satepan okinmikti 30 tlakamej ompa Asquelón tlen opouiaya filistea (Juec. 14:​5, 6, 19). Sansón okimatiaya Jehová okipaleui uan amo san ye iselti okichi nochi non tlamantli. Ijkon okiteititi se tonal ijkuak okinmikti 1,000 filisteos uan ijkuak otlanki okinmikti sapanoua oamikiaya. Pero ¿tlen okichi? Ye okilui Jehová makipaleui porque oamikiaya uan amo okijto ye kitemoti kanin atlis (Juec. 15:18).

9. ¿Tlen okichi Jehová ijkuak Sansón okilui makipaleui? (Jueces 15:19).

⁹ ¿Tlen okichi Jehová ijkuak Sansón okilui makipaleui? Jehová okichi mameya atl uan Sansón oatlik uan oksepa omochika (xiktlajtolti Jueces 15:19). Non ameyali ok okatka ijkuak Jehová okilui profeta Samuel makijkuilo amochtli Jueces. Xamo non ameyali okinmilnamiktiaya israelitas Jehová kinpaleuiskia ijkuak tlajyouiskiaj tla kiluiskiaj makinpaleui.

10. ¿Tlen moneki tikchiuaskej para matechpaleui Jehová? (Noijki xikinmita fotos).

¹⁰ Tinochtin moneki matechpaleui Jehová ijkon ken Sansón okilui makipaleui. Moneki matechpaleui maski yotikchijkej miak tlamantli noso tikmatij tikchiuaskej okseki tlamantli. Moneki matiyetokan tiyolyamankej uan matikilnamiktokan kuali kisas tlen tikchiuaskej tla tikiluiskej Jehová matechpaleui. Otikitakej Sansón oksepa omochika ijkuak okonik atl tlen Jehová okimakak. Tejuan noijki okachi titlaneltokaskej tla timopaleuiaj ika nochi tlen Jehová techmaka (Mat. 11:28).

11. ¿Tlen moneki tikchiuaskej uan tlen techmachtia tlen kichiua se tokni uan isiua?

¹¹ Matikitakan tlen kipanoua se tokni itoka Alexéi. Ye chanti Rusia uan ompa sapanoua kintlajyouiltiaj. ¿Tlen kipaleuia tokni matlaxiko? Ye uan isiua kuali momachtiaj. Alexéi okijto: “Nimochijchikaua nimomachtis uan nochipa niktlajtoltia Biblia. Ne uan nosiua nochi kualkan tiktlajtoltiaj texto uan san sekan tiktlatlaujtiaj Jehová”. Tlen kichiua tokni uan isiua techmachtia moneki tikiluiskej Jehová matechpaleui uan amo san toselti tiknekiskej itlaj tikchiuaskej.  Pero uelis ijkon tikchiuaskej tla timomachtiaj, timotlatlaujtiaj, timonechikouaj uan titetlapouiaj. Jehová techteochiuas tla ijkon tikchiuaskej uan techpaleuis matiktekichiuilikan. Ye techpaleuis ijkon ken okipaleui Sansón.

12. ¿Tlen amo kuali okichi Sansón uan tleka?

¹² Sansón okatka tlajtlakole ijkon ken tejuan ikinon ualeua amo kuali okipejpenaya tlen okichiuaya. Se tonal okichi itlaj amo kuali uan sapanoua otlajyoui. Ijkuak Sansón yokatka juez opejki kitlasojtla se siuatl tlen omotokayotiaya Dalila uan ochantiaya ixtlauak Sorec (Juec. 16:4). Pero ijkuak ayamo okixmatiaya Dalila okinekiaya monamiktis iuan se filistea. Biblia kijtoua Jehová okinekiaya mamonamikti iuan non siuatl porque ye okitemojtoka ken kinteuiskia filisteos. Satepan Sansón oyajki altepetl Gaza uan ompa omoka ichan se siuatl tlen oauilnemiaya. Ijkuakon Jehová okimakak chikaualistli para makinuika puertas tlen okinpiaya altepetl uan ijkon ayakmo uelis mopaleuiskiaj (Juec. 14:​1-4; 16:​1-3). Pero Dalila xamo okatka israelita ikinon amo uelis kipaleuiskia Sansón mamoteui inuan filisteos.

13. ¿Tlen okichi Dalila para kikajkayauaskia Sansón?

¹³ Filisteos okinekiayaj Dalila makikajkayaua Sansón ikinon okiluijkej kimakaskiaj miak plata uan ye okiseli. Pero ¿tleka Sansón amo okitak tlen okinekiaya kichiuas Dalila? ¿Sapanoua okitlasojtlaya? Amo tikmatij. Pero Dalila nochipa okitlajtlaniaya makilui tleka okatka  sapanoua chikauak uan saiktlami ye okilui. Ikinon Jehová okika Sansón uan ayakmo okimakak chikaualistli (Juec. 16:​16-20).

14. ¿Tlen okipanok Sansón porque okichi tlen Dalila okinekiaya?

¹⁴ Sansón sapanoua otlajyoui porque okichi tlen okinekiaya Dalila uan amo tlen okinekiaya Jehová. Filisteos okikitskijkej uan okinkixtilijkej ixtololouan. Satepan okitsakej itech altepetl Gaza kanin achto okinkixti puertas. Ompa okitlalijkej makitisi semilla. Satepan filisteos oiluichijkej uan okitlamanilijkej indios Dagón porque okineltokayaj ye okinmaktili Sansón. Ikinon okikixtijkej Sansón kanin otsaktoka para kipinauiskiaj (Juec. 16:​21-25).

15. ¿Ken okiteititi Sansón okinekiaya oksepa makipaleui Jehová? (Jueces 16:​28-30). (Xikita dibujo tlen kajki itech página 1).

¹⁵ Sansón okichi tlen amo kuali pero amo omosotla. Ye ok okinekiaya moteuis inuan filisteos ijkon ken Jehová okinauati makichiua (xiktlajtolti Jueces 16:​28-30). Ikinon okitlatlaujti Jehová makipaleui mamomakopa. ToTajtsin Dios okikak uan oksepa okimakak chikaualistli. Ikinon non tonal okachi miakej filisteos okinmikti.

16. ¿Tlen techmachtia tlen okichi Sansón?

¹⁶ Sansón otlajyoui ijkuak okichi tlen amo kuali pero nochipa omochijchika kichiuas tlen kineki toTajtsin Dios. Tejuan noijki amo matimosotlauakan tla tikchiuaj itlaj amo kuali uan techyektlaliskej noso ayakmo tikpiaskej se tekitl itech tlanechikol. Matikilnamiktokan Jehová amo kijtoua amo keman uelis itlaj kuali tikchiuaskej (Sal. 103:​8-10). Ualeua tikchiuaj tlen amo kuali pero Jehová uelis techpaleuis matikchiuakan tlen ye kineki ijkon ken okipaleui Sansón.

17, 18. Xikijto kox mitsyolchikaua tlen okipanok Michael. (Noijki xikinmita fotos).

¹⁷ Matikitakan tlen okipanok se telpochtli itoka Michael. Ye okatka siervo ministerial, precursor regular uan sapanoua omochijchikauaya kitekichiuilis Jehová. Pero satepan okichi itlaj tlen amo kuali uan ayakmo okikauilijkej makichiua seki tekitl kanin monechikoua. Ye okijto: “Sapanoua onimochijchikajtoka  niktekichiuilis Jehová. Pero opejki nikmachilia itlaj onechtsakuiliaya uan ayakmo uelis niktekichiuiliskia Jehová. Onikmatiaya Jehová amo keman nechkauaskia noselti. Pero onimotlajtlaniaya kox oksepa nimouikaskia iuan Jehová uan kox oksepa nitlapaleuiskia kanin nimonechikoua ijkon ken achto onikchiuaya”.

¹⁸ Michael amo omosotla. Ye okijto: “Onimochijchika okachi nimouikas iuan Jehová. Onechpaleui nimotlatlaujtis ika nochi noyolo, nimomachtis uan nimokuayejyekos tlen onimomachtiaya”. Satepan Michael oksepa opejki tlapaleuia kanin monechikoua. Axkan ye tlayekanki uan tlapaleuia ken precursor regular. Ye okijto: “Tlayekankej onechyolchikajkej uan onechpaleuijkej manikita Jehová ok nechtlasojtla. Axkan niktekichiuilia Jehová uan amo nechkuejsoua notlalnamikilis. Tlen onechpanok nechititia Jehová techtlapojpoluia tla melauak timoyolkopaj”. Ualeua tikchiuaj tlen amo kuali pero Jehová uelis techpaleuis matikchiuakan tlen ye kineki ijkon ken okipaleui Michael. Noijki matikyektlalikan tlen amo kuali tikchijtokej uan matikiluikan Jehová matechpaleui uan ijkon techteochiuas (Sal. 86:5; Prov. 28:13).

19. ¿Mitsyolchikaua tlen okichi Sansón?

¹⁹ Axkan otimomachtijkej tlen okipanok Sansón. Ye okatka tlajtlakole pero omochijchika kitekichiuilis Jehová maski okichi tlen amo kuali ijkuak okilui Dalila tlen amo omonekiaya kiluis. Jehová okitlapojpolui uan oksepa okimakak chikaualistli. ToTajtsin Dios okitak ye otlaneltokaya ikinon otlanauati makijkuilokan itoka itech Hebreos capítulo 11. Techyolchikaua tikmatiskej Jehová techtlasojtla uan kineki techpaleuis. Noijki kineki techpaleuis ijkuak titlajyouiaj. Matikiluikan Jehová matechpaleui ijkon ken Sansón okilui makipaleui. Ye okilui makilnamiki uan makimaka chikaualistli (Juec. 16:28).