1. ¿Tlen okinauati Jehová makichiua Pedro ijkuak yokipiaya miak xiuitl?

 APÓSTOL Pedro okitekichiuili miak xiuitl Jehová. Ye otetlapoui iuan Jesús, tlatlamantli otetlapoui uan opouiaya iuan cuerpo gobernante. Jehová okinauati itlaj makichiua ijkuak yokipiaya miak xiuitl. Kanaj itech xiuitl 62 uan 64, toTajtsin Dios okipaleui makinmijkuilo ome cartas tlen katej itech Biblia. Ye okinmijkuilo 1 de Pedro uan 2 de Pedro. Pedro okinekiaya nonmej ome cartas makinpaleui tokniuan ijkuak ye ayakmo yoltoskia (2 Ped. 1:​12-15).

2. ¿Tleka sapanoua okinpaleui tokniuan cartas tlen okinmijkuilo Pedro?

² Pedro okinmijkuilo nonmej cartas ijkuak tokniuan sapanoua otlajyouijtokaj (1 Ped. 1:6). Ijkuakon okatkaj sekimej tlakamej tlen otlamachtiayaj tlen amo melauak uan okinekiayaj kintlapololtiskej tokniuan (2 Ped. 2:​1, 2, 14). Tokniuan tlen ochantiayaj Jerusalén kitaskiaj ijkuak soldados romanos kipojpoloskiaj altepetl uan teokali (1 Ped. 4:7). Cartas tlen okinmijkuilo Pedro okinpaleui tokniuan makixikokan tlen okinpanotoka uan noijki tlen satepan kinpanoskia. b

3. ¿Tleka moneki matimomachtikan cartas tlen okinmijkuilo Pedro?

³ Pedro okinmijkuilili nonmej cartas tokniuan tlen okatkaj achto siglo. Pero Jehová okijto cartas noijki mayetokan itech Biblia para matechpaleuikan (Rom. 15:4). Axkan noijki miakej kichiuaj tlen amo kuali ijkon ken yiuejkika okichiuayaj. Tejuan noijki tikixnamikij miak tlamantli tlen uelis kichiuas ayakmo kuali matiktekichiuilikan  Jehová. Ayakmo miak poliui uan sapanoua titlajyouiskej. Okachi titlajyouiskej uan amo ijkon ken ijkuak okipojpolojkej Jerusalén uan teokali. Ikinon ome cartas tlen okinmijkuilo Pedro techmachtiaj miak tlamantli tlen techpaleuis matikchiakan itonal Jehová. Noijki techpaleuis amo matikinmauilikan oksekimej uan matikintlasojtlakan tokniuan ika nochi toyolo. Noijki kinpaleuis tlayekankej kuali makinmaluikan tokniuan.

4. Ijkon ken kijtoua 2 Pedro 3:​3, 4, ¿tlen uelis kichiuas ayakmo okachi matitlaneltokakan?

⁴ Miakej amo kineltokaj Biblia kijtoua tlen panos satepan. Yikipia miak xiuitl tejuan titetlapouiaj tlamis nochi tlen amo kuali. Ikinon xamo techpinauiaj akinmej techkokoliaj uan kijtouaj amo keman tlamis tlen amo kuali (xiktlajtolti 2 Pedro 3:​3, 4). Xamo ayakmo okachi titlaneltokaskej tla ijkon techiluiskej kanin titetlapouiaj, kanin titekipanouaj noso se tofamiliar ijkon techiluis. ¿Tlen techpaleuis amo ijkon matechpano? Matikitakan tlen okijto apóstol Pedro.

5. ¿Tlen techpaleuis matikchiakan toTajtsin Dios makipojpolo tlen amo kuali? (2 Pedro 3:​8, 9).

⁵ Xamo sekimej kijtouaj Jehová uejkaua uan amo kipojpoloua tlen amo kuali. Pero Pedro techilnamiktia toTajtsin Dios amo kita tiempo ijkon ken tejuan tikitaj (xiktlajtolti 2 Pedro 3:​8, 9). Mil xiuitl toTajtsin Dios kita ken se tonal. Noijki kimati mochias porque amo kineki ikaj maixpoliui. Pero ajsis tonal kipojpolos nochi tlen amo kuali onka ipan tlaltikpak. Ikinon matimochijchikauakan nochtin matikintlapouikan tlen kichiuas toTajtsin Dios.

6. ¿Tlen techpaleuis ‘matikchiakah maajsiki n tonati non Dios yokitlali’? (2 Pedro 3:​11, 12).

⁶ Pedro okijto: ‘Matikchiakah maajsiki n tonati non Dios yokitlali’ (xiktlajtolti 2 Pedro 3:​11, 12). ¿Tlen techpaleuis matimochiakan? Nochipa matimokuayejyekokan melauak kualtsin tiyetoskej itech xochitlali. Matimokuayejyekokan tikijyotilanaj ejekatl chipauak uan tikkuaj tlen techpaleuis. Matimokuayejyekokan yitikinselijtokej akinmej kinyolitiskej. Noijki matimokuayejyekokan tikinmachtiaj tlen kijtosnekij profecías akinmej amo okimatkej tlen panoskia. Non techpaleuis matikchiakan itonal Jehová uan matikilnamiktokan tikatej itlamian tonalmej. Tejuan tikmatij tlen panos satepan ikinon amo matikinkauilikan matechkajkayauakan akinmej amo tlamachtiaj tlen melauak (2 Ped. 3:17).

7. ¿Tlen techpanos tla timomojtiaj?

⁷ Tikmatij ayakmo miak poliui ajsiki itonal toTajtsin Dios. Ikinon tiknekij tikinpaleuiskej oksekimej makimatikan tlen kichiuas iTekiuajkayo toTajtsin Dios. Pero ualeua xamo amo timixeuiskej tikintlapouiskej porque timomojtiaj. Ijkon okipanok Pedro ijkuak okixkomakakej Jesús. Ye okijto amo okatka idiscípulo uan miak uelta okijto amo okixmatiaya (Mat. 26:​69-75). Pero satepan ayakmo omomojti uan okijto amo matikmauilikan tlen oksekimej kimauiliaj uan amo matimotekipachokan (1 Ped. 3:14). Tlen okijto Pedro kiteititia uelis ayakmo timomojtiskej.

8. ¿Tlen techpaleuis amo matikinmauilikan oksekimej? (1 Pedro 3:15).

⁸ ¿Tlen techpaleuis amo matimomojtikan ijkuak titetlapouiskej? Pedro okijto  matiktlakaitakan ‘Cristo ika nochi toyolo, porke Ye Toteko’ (xiktlajtolti 1 Pedro 3:15). Non kijtosneki moneki matimokuayejyekokan Jesucristo toTekiua uan kipia miak chikaualistli. Matikilnamikikan ye toTekiua tla timomojtiaj ijkuak titetlapouiaj. Matimokuayejyekokan ye tlanauatijtok iluikak inuan miakej ángeles. Matikilnamikikan toTajtsin Dios ‘okimaktili nochi para Ye matlanawati itech ilwikak iwa itech tlaltíkpaktli’ uan touan yetos hasta ijkuak tlamis nochi tlen amo kuali (Mat. 28:​18-20). Pedro okijto ‘matikmatikah kenomi titlanankiliskeh’ para tikinmiluiskej oksekimej tlen tikneltokaj. Xamo techpaktiskia titetlapouiskej kanin titekipanouaj, kanin timomachtiaj noso oksekan. Tla tiknekij ijkon tikchiuaskej matimokuayejyekokan keman tikchiuaskej uan matimomachtikan tlen tikijtoskej. Matikiluikan Jehová matechyolchikaua uan matikneltokakan ye techpaleuis amo matimomojtikan (Hech. 4:29).

9. ¿Keman Pedro okiteititi amo otetlasojtlaya? (Noijki xikita dibujo).

⁹ Pedro okajsikamatki tlen kijtosneki titetlasojtlaskej. Ye ompa okatka ijkuak Jesús okijto: “Ne nomechmaka se yankuik tlanawátili: Ximosepantlasojtlakah,  ijkó kemi Ne nomechtlasojtla, ijkó moneki ximosepantlasojtlakah” (Juan 13:34). Pero satepan Pedro okichi tlen oksekimej okinekiayaj uan ayakmo otlakuaya inuan tokniuan tlen amo okatkaj judíos. Apóstol Pablo okijto Pedro okipiaya ome ixko (Gál. 2:​11-14). Pedro okichi tlen okilui Pablo uan ayakmo ijkon okichi. Ye okijto itech ome cartas tlen okinmijkuilo moneki tikteititiskej tikintlasojtlaj tokniuan uan amo san tikijtoskej.

10. ¿Tlen techpaleuis ‘matikinyektlasojtlakah tokniwah’ uan amo matikpiakan ome toixko? (1 Pedro 1:22).

¹⁰ Pedro okijto moneki ‘matikinyektlasojtlakah tokniwah’ uan amo matikpiakan ome toixko (xiktlajtolti 1 Pedro 1:22). Titetlasojtlaskej tla ‘tiktlakitah n kualitlájtoli non milák’. “Kualitlájtoli non milák” techmachtia toTajtsin Dios “amo kintlasojtla san sikimeh, iwa oksikimeh amó” (Hech. 10:​34, 35). Tla amo tikintlasojtlaj nochtin tokniuan kijtosneki amo tiktlakamatij tlen Jesús okijto. Pero xamo okachi kuali timouikaj inuan sekimej tokniuan ijkon ken Jesús omouikaya inuan sekimej idiscípulos (Juan 13:23; 20:2). Pero Pedro techiluia ‘matikinyektlasojtlakah [nochtin] tokniwah’ ijkon ken tiktlasojtlaj tofamilia (1 Ped. 2:17).

11. ¿Tlen kijtosneki ‘timosepantlasojtlaskeh ika nochi toyolo’?

¹¹ Pedro okijto: “Ximosepantlasojtlakah ika nochi nomoyolo”. Tlajtoli “ximosepantlasojtlakah” kijtosneki okachi matikintlasojtlakan akinmej amo tikintlasojtlaskiaj. ¿Tlen tikchiuaskiaj tla se tokni itlaj otechtokti noso otechkualani? Xamo tikijtoskej timomakopaskej uan amo tikteititiskej tiktlasojtlaj. Pero Jehová amo kipaktis tla ijkon tikchiuaskej ijkon ken Jesús okimachti Pedro (Juan 18:​10, 11). Pedro okijkuilo: “Tla nomechtoktiah itla amokuali, amo xikmokopilikah, nion xikwijwikaltikah akin nomechwijwikaltia, yej xikintiochiwakah” (1 Ped. 3:9). Tla titetlasojtlaj tikinnotsaskej akinmej itlaj techtoktiaj uan tikinmajsikamatiskej.

12. (1) ¿Tlen tikchiuaskej tla ‘timosepantlasojtlah’? (2) ¿Ken techpaleuia video Tikpiaskej tlateochiualistli tla tiktemoaj yolseuilistli iuan oksekimej?

¹² Pedro noijki okijto “ximosepantlasojtlakah ijkuak okijkuilo achto carta”. Tla timosepantlasojtlaj non techpaleuis nochipa matitetlapojpoluikan (1 Ped. 4:8). Ijkuak ijkon okijkuilo Pedro xamo okilnamik seki xiuitl achto Jesús okimachti matetlapojpolui. Pedro xamo omokuayejyeko okichijtoka tlen kuali ijkuak okijto uelis tetlapojpoluiskia “chikome welta”. Pero Jesús okilui moneki tetlapojpoluiskia 77 uelta. Non kijtosneki amo omonekiaya kitas keski uelta tetlapojpoluiskia (Mat. 18:​21, 22). Xamo tikitaj oui ijkon tikchiuaskej. Pero amo matimosotlauakan porque akinmej tiktekichiuiliaj Jehová titlajtlakolejkej uan ualeua tikitaj oui titetlapojpoluiskej. Pero ¿tlen tikchiuaskej? Miak ipati matimochijchikauakan matikintlapojpoluikan tokniuan uan kuali inuan matimouikakan. c

13. ¿Tleka ualeua tlayekankej amo majxiliaj kinmaluiskej tokniuan?

¹³ Xamo Pedro amo keman okilka ijkuak Jesús okiyolitijkej uan okilui makinmalui ichkauan (Juan 21:16). Tlayekankej kilnamiktokej moneki kichiuaskej tlen  okijto Jesús. Pero xamo amo majxiliaj ijkon kichiuaskej. Porque yejuan moneki kinmaluiskej akinmej inuan chantij, kinpaleuiskej kuali mayetokan uan kinpaleuiskej kuali mamouikakan iuan Jehová. Noijki moneki tetlapouiskej uan kuali momachtiskej. Ijkon kuali tlamachtiskej kanin timonechikouaj uan noijki itech uejueyij nechikolmej. Sekimej tlayekankej motlapouiaj inuan akinmej tlapajtiaj noso kinpaleuiaj tokniuan tlen kitaj ken kinchijchiuaskej kalmej kanin timonechikouaj. Tokniuan tlayekankej sapanoua kipiaj miak tekitl.

14. ¿Tleka tlayekankej kinekij kinmaluiskej tokniuan uan tlen kinpaleuis ijkon makichiuakan? (1 Pedro 5:​1-4).

¹⁴ Pedro noijki okinmilui oksekimej tlayekankej makinmaluikan ichkauan toTajtsin Dios (xiktlajtolti 1 Pedro 5:​1-4). Kuali tikmatij tlayekankej kintlasojtlaj tokniuan uan kinekij kinmaluiskej. Pero ualeua xamo kimachiliaj amo ueli ijkon kichiuaj porque amo majxiliaj noso sotlauaj. ¿Tlen uelis kichiuaskej tlayekankej tla ijkon kinpanoua? Makiluikan Jehová tlen kimachiliaj. Pedro okijkuilo: “Akin weleti tlapalewia makimpalewi oksikimeh, makichiwa ika nochi ichikawalis non Dios okimák” (1 Ped. 4:11). Xamo tokniuan itlaj kinpanoua tlen amo uelis kiyektlaliskej. Pero tlayekankej makilnamikikan Jesucristo uelis okachi kinpaleuis axkan uan noijki itech xochitlali. Jehová kineki yejuan makintlasojtlakan tokniuan, makinmaluikan uan makinmititikan tlen moneki kichiuaskej.

15. ¿Tlen kichiua se tlayekanki para kinmaluis tokniuan? (Noijki xikita foto).

¹⁵ Se tokni tlen itoka William uan yikipia miak xiuitl tlapaleuia ken tlayekanki, kita miak ipati kinmaluis tokniuan. Ijkuak opejki COVID-19 ye uan oksekimej tlayekankej, okitakej miak ipati sejse semana motlapouiskej inuan tokniuan tlen okatkaj itech ingrupo. ¿Tleka ijkon okichijkej? William okijto: “Miakej tokniuan inselti okatkaj inkalijtik uan uelis ayakmo kuali mokuayejyekoskiaj”. Ijkuak se tokni tlajyouia, William kuali kikaki para kimatis tlen kitekipachoua uan ken kipaleuis. Satepan kintemoua amatlajkuilolmej noso videos tlen katej itech  jw.org para kiyolchikauas tokni. William noijki okijto: “Axkan okachi moneki tikinmaluiskej tokniuan. Tejuan timochijchikauaj tikinpaleuiskej oksekimej makixmatikan Jehová. Ikinon noijki moneki timochijchikauaskej tikinmaluiskej ichkauan Jehová para amo keman makikauakan”.

16. ¿Ken uelis tikchiuaskej tlen okijkuilo Pedro itech ome cartas?

¹⁶ Axkan yotikitakej seki tlamantli miak ipati tlen kajki itech cartas tlen okinmijkuilo Pedro. Xamo otikitakej moneki tikchiuaskej seki tlamantli tlen amo tikchijtokej. Xamo techpaktiskia okachi timokuayejyekoskej ken tiyetoskej itech xochitlali. Xamo tiknekij okachi titetlapouiskej kanin titekipanouaj, kanin timomachtiaj noso oksekan. Xamo tiknekij okachi tikteititiskej tikintlasojtlaj tokniuan. Tlayekankej xamo kinekij okachi mochijchikauaskej kinmaluiskej ichkauan toTajtsin Dios ika nochi inyolo. Amo matimosotlauakan tla tikitaj itlaj amo tikchijtokej. Matikilnamiktokan “Toteko teiknomatih” uan ye techpaleuis matikchiuakan tlen moneki (1 Ped. 2:3). Pedro okijto: “Dios nomechyekmilawas, nomechyekchikawas iwa nonyektlakxilitoskeh” (1 Ped. 5:10).

17. ¿Tlen tikseliskej tla timochijchikauaj uan tikkauiliaj Jehová ‘matechyekmilawa’?

¹⁷ Se tonal Pedro omokuayejyeko amo okinamikiaya yetos ixpan iKone toTajtsin Dios (Luc. 5:8). Pero Jehová uan Jesús okipaleuijkej ikinon amo keman okika Cristo. Non okipaleui mapoui itech iTekiuajkayo toTeko Jesucristo tlen temakixtia uan non Tekiuajkayotl amo keman pojpoliuis (2 Ped. 1:11). Sapanoua kualtsin tlen okiseli Pedro. Tejuan noijki nochipa tiyoltoskej tla timochijchikauaj ijkon ken Pedro okichi uan tikkauiliaj Jehová ‘matechyekmilawa’ (1 Ped. 1:9).