1, 2. (1) ¿Ken okatkaj tokniuan tlen ochantiayaj Judea ijkuak apóstol Pablo okinmijkuilili carta tokniuan hebreos? (2) ¿Tleka non carta okinpaleui ijkuak omonekiaya?

 IJKUAK okimiktijkej Jesús, opejki tlajyouiaj tokniuan hebreos. Opejki kintlajyouiltiaj tokniuan ijkuak yikin opejki monechikouaj ompa Jerusalén (Hech. 8:1). Opanok kanaj 20 xiuitl uan tokniuan tlen ochantiayaj Judea ayakmo okipiayaj tlen ika mopanoltiskej xamo porque ompa otlaapistik (Hech. 11:​27-30). Kanaj xiuitl 61 tokniuan kuali okatkaj pero satepan opejki tlajyouiaj. Ijkuakon apóstol Pablo okinmijkuilili se carta tlen sapanoua okinyolchika.

² Carta tlen Pablo okinmijkuilili tokniuan hebreos okiselijkej ijkuak omonekiaya porque satepan tlajyouiskiaj. Non carta okijtouaya seki tlamantli kinpaleuiskia matlaxikokan. Ayakmo miak opoliuiaya para kipojpoloskiaj Jerusalén ijkon ken okijto Jesús (Luc. 21:20). Pero Pablo uan oksekimej tokniuan tlen ochantiayaj Judea amo okimatiayaj keman ijkon panoskia. Ikinon omonekiaya okachi tlaneltokaskej, okachi tlaxikoskej uan ijkon kimatiskiaj tlen kichiuaskiaj ijkuak ajsiskia non tonal (Heb. 10:25; 12:​1, 2).

3. ¿Tleka techpaleuia tlen okinmijkuililijkej tokniuan hebreos?

 ³ Ayakmo miak poliui uan tejuan okachi titlajyouiskej uan amo ken okinpanok tokniuan hebreos (Mat. 24:21; Apoc. 16:​14, 16). Ikinon tejuan noijki techpaleuia tlen Jehová okinmilui nonmej tokniuan. Matikitakan seki tlamantli tlen techpaleuis.

OKACHI MATIMOMACHTIKAN ITLAJTOL TOTAJTSIN DIOS

4. ¿Tlen okitayaj oui kipatlaskej judíos tlen opejki kichiuaj ken Cristo? (Noijki xikita dibujo).

⁴ Judíos tlen opejki kichiuaj ken Cristo okitayaj oui kipatlaskej seki tlamantli porque achto opouiayaj itech se religión. Jehová okinpejpenka judíos mayetokan ialtepe. Miak xiuitl oueyititoka Jerusalén porque ompa otlanauatiaya se tekiua ipatka Jehová. Noijki ompa okatka templo kanin okiueyichiuayaj Jehová. Nochtin judíos okitlakamatiayaj iTlanauatil Moisés uan okintlakamatiayaj teopixkej tlen otlayekanayaj. Okinnauatijkej tlen kikuaskej, omonekiaya kimochiuiliskej circuncisión uan okinmiluijkej ken omonekiaya mouikaskej inuan akinmej ochantiayaj itech okseki altepemej. Pero ijkuak okimiktijkej Jesús, Jehová ayakmo okinseliaya yolkamej tlen okintemakayaj itech templo. Judíos tlen opejki kichiuaj ken Cristo okitakej oui kikauaskej seki tlamantli tlen kijtoua iTlanauatil Moisés (Heb. 10:​1, 4, 10). Miakej tokniuan ijkon okinpanok maski otlaneltokayaj. Ijkon okipanok apóstol Pedro porque okitaya oui kipatlas seki tlamantli (Hech. 10:​9-14; Gál. 2:​11-14). Akinmej okinyekanayaj religiones opejki kintlajyouiltiaj tokniuan porque okineltokayaj okseki tlamantli.

5. ¿Tlen okinpanok tokniuan?

⁵ Okatkaj ome grupos tlen okinmixnamikiayaj tokniuan tlen ochantiayaj Judea. Itech se grupo opouiayaj tlayekankej judíos uan yejuan okijtouayaj tokniuan okixnamikiayaj toTajtsin Dios. Oksekimej  okijtouayaj okichiuayaj ken Cristo pero ok okinekiayaj makitlakamatikan iTlanauatil Moisés uan xamo ijkon okichiuayaj para amo makintlajyouiltikan (Gál. 6:12). ¿Tlen kinpaleuiskia tokniuan matlaxikokan?

6. ¿Tlen okinmilui Pablo makichiuakan tokniuan hebreos? (Hebreos 5:​14–6:1).

⁶ Itech carta tlen Pablo okinmijkuilili tokniuan hebreos okinmilui okachi mamomachtikan iTlajtol toTajtsin Dios (xiktlajtolti Hebreos 5:​14–6:1). Ye okinyekilui ika Escrituras Hebreas akinmej kichiuaj ken Cristo okachi kuali kiueyichiuaj Jehová uan amo ken judíos. a Pablo okimatiaya kinpaleuiskia tla momachtiskiaj uan kajsikamatiskiaj iTlajtol toTajtsin Dios. Non kinpaleuiskia amo makinkakikan akinmej otlamachtiayaj tlen amo melauak uan makixtopeuakan tlen otlamachtiayaj. Ijkon amo kikauaskiaj Jehová.

7. ¿Tlen tlamantli tikixnamikij?

⁷ Axkan noijki sekimej kijtouaj seki tlamantli tlen kixnamiki itlanauatiluan Jehová uan amo kinpaktia tlen titlamachtiaj. Sekimej kijtouaj amo kuali tlen tikchiuaj porque tiktlakamatij tlen kijtoua Biblia ijkuak techiluia akinmej uelis san sekan motekaskej. Axkan okachi miakej okse tlamantli mokuayejyekouaj uan kichiuaj tlen amo kuali. Yejuan amo mokuayejyekouaj ijkon ken Jehová mokuayejyekoua (Prov. 17:15). Ikinon moneki kuali matikitakan tlen yejuan mokuayejyekouaj uan matikixtopeuakan tlen amo kuali kichiuaj. Yejuan kinekij matimosotlauakan uan matikkauakan Jehová (Heb. 13:9).

8. ¿Tlen techpaleuis okachi matitlaneltokakan?

⁸ Pablo okinmilui tokniuan hebreos okachi mamomachtikan iTlajtol toTajtsin Dios uan tejuan noijki moneki ijkon tikchiuaskej. ¿Ken uelis ijkon tikchiuaskej? Okachi matimomachtikan tlen kijtoua Biblia uan matimokuayejyekokan ijkon ken Jehová mokuayejyekoua. Moneki nochipa ijkon matikchiuakan maski yotimotemakakej ixpan Jehová uan yotimoapolaktijkej. Ikinon nochipa matimochijchikauakan matiktlajtoltikan Biblia uan matimomachtikan. Ijkon moneki tikchiuaskej maski yimiak xiuitl timomachtijtokej noso yikin otipejkej (Sal. 1:2). Tla mojmostla timomachtiskej iTlajtol toTajtsin Dios, techpaleuis okachi matitlaneltokakan ijkon ken okijto Pablo (Heb. 11:​1, 6).

“TEJUAN TIKCHIUAJ KEN AKINMEJ TLANELTOKAJ UAN IJKON TIYOLTOSKEJ”

9. ¿Tleka tokniuan omonekiaya okachi tlaneltokaskej?

⁹ Tokniuan hebreos omonekiaya okachi tlaneltokaskej porque non kinpaleuiskia makixikokan tlen panoskia ompa Judea (Heb. 10:​37-39). Jesús okinmilui idiscípulos mayakan itech tepeyo ijkuak kinmitaskiaj soldados okiyaualojkej Jerusalén. Ijkon omonekiaya kichiuaskej akinmej ochantiayaj Jerusalén uan akinmej okatkaj intlala (Luc. 21:​20-24). Yiuejkika ijkuak okinekiayaj kimoaxkatiskej se altepetl, nochtin akinmej ompa ochantiayaj oyayaj mopaleuitiuij itech se altepetl tlen okipiaya se ueyi tepamitl ijkon ken Jerusalén okipiaya. Ikinon tokniuan amo okajsikamatiayaj tleka omonekiaya yaskej itech tepeyo. Tokniuan omonekiaya okachi tlaneltokaskej para kichiuaskej tlen Jesús okijto.

10. ¿Tlen omonekiaya kichiuaskej tokniuan hebreos? (Hebreos 13:17).

 ¹⁰ Tokniuan hebreos omonekiaya kinneltokiliskej tokniuan tlen Jesús okintlali makiyekanakan tlanechikol. Xamo nonmej tlayekankej okinmiluijkej tokniuan keman choloskiaj uan tlen kichiuaskiaj ijkuak kisaskiaj (xiktlajtolti Hebreos 13:17). Apóstol Pablo okinmilui tokniuan ‘makintlakamatikan tlayekankej’. Ye okinmilui makintlakamatikan porque okinneltokiliayaj tlen okichiuayaj uan amo san porque omonekiaya tetlakamatiskej. Ikinon tokniuan omonekiaya kinneltokiliskej tlen okinmiluiayaj tlayekankej ijkuak ayamo opeuaya tlen okijto Jesús. Tla tokniuan tetlakamatiskiaj ijkuak ayamo itlaj opanouaya, tetlakamatiskiaj ijkuak tlajyouiskiaj.

11. ¿Tleka moneki okachi matitlaneltokakan?

¹¹ Tejuan noijki moneki okachi titlaneltokaskej ijkon ken tokniuan hebreos tlen Pablo okinmijkuilili se carta. Axkan miakej amo kineltokaj yiajsis tonal ijkuak toTajtsin Dios kipojpolos nochi tlen amo kuali uan techpinauiaj porque tejuan ijkon tikneltokaj (2 Ped. 3:​3, 4). Biblia techiluia seki tlamantli tlen panos ijkuak panotos ueyi tlajyouilistli pero amo nochi tikmatij. Jehová yokijto keman kipojpolos nochi tlen amo kuali ikinon moneki matikneltokakan ijkon panos uan ye techmaluis (Hab. 2:3).

12. ¿Tlen techpaleuis matimomakixtikan ijkuak panotos ueyi tlajyouilistli?

¹² Axkan noijki moneki matikneltokakan Jehová techyekana ika “tlakeuali yolmelajki uan ixtlamatki” (Mat. 24:45). Xamo tokniuan hebreos okinmiluijkej tlen omonekiaya kichiuaskej ijkuak soldados romanos ompa oajsitoj. Noijki tejuan xamo techiluiskej tlen monekis tikchiuaskej tla tiknekij timomakixtiskej ijkuak peuas ueyi tlajyouilistli. Ikinon matimochijchikauakan matikinneltokilikan akinmej kiyekanaj ialtepe Jehová. Tla axkan amo tikintlakamatij akinmej techyekanaj uan amo tikinneltokiliaj, okachi oui tikitaskej tikintlakamatiskej ijkuak panotos ueyi tlajyouilistli.

13. ¿Tleka tokniuan hebreos omonekiaya kilnamiktoskej tlen kijtoua Hebreos 13:5?

¹³ Tokniuan hebreos okichiayaj mapano tlen Jesús okijto pero omonekiaya mochijchikauaskej amo kipiaskej miak tlamantli uan amo kixnekiskej tomin (xiktlajtolti Hebreos 13:5). Sekimej otlajyouijkej porque amo okipiayaj tlen kikuaskej uan amitlaj okipiayaj (Heb. 10:​32-34). Yejuan omochijchikajkej tetlapouiskej kuali tlajtoli maski otlajyouijkej. Pero satepan xamo sekimej opejki kitemouaj ken kipiaskiaj miak tomin para momaluiskiaj uan amitlaj kinpoloskia. Pero nochi tlen okipiayaj amo kinpaleuiskia mamomakixtikan ijkuak kixixiniskiaj Jerusalén (Sant. 5:3). Ikinon akinmej okixnekiayaj tomin, okachi oui kitaskiaj choloskej porque amo kinekiskiaj kikauaskej inkalijtik uan tlen okipiayaj.

14. ¿Tlen tikchiuaskej tla titlaneltokaj?

¹⁴ Matikneltokakan ayakmo miak poliui Jehová kipojpolos nochi tlen amo kuali. Non techpaleuis amo matiknekikan tikpiaskej miak tlamantli. Porque tomin amo techpaleuis ijkuak panotos ueyi tlajyouilistli. Biblia kijtoua “ipan ojtli kitlamotlaskej inplata” ijkuak kitaskej “amo kinpaleuis inplata nion inmioro ijkuak Jehová  kualanis” (Ezeq. 7:19). Okachi miak ipati matikpiakan san tlen moneki uan amo matiktemokan tikpiaskej miak tomin. Ikinon amo matitlateuikilikan nion matimotekipachojtokan tikpiaskej miak tlamantli porque ayakmo timajxiliskej tikchiuaskej tlen okachi ipati. Noijki amo sapanoua matikpatioitakan tlen tikpiaj (Mat. 6:​19, 24). Tikatej itlamian tonalmej ikinon matikteititikan kox tikneltokaj Jehová noso okachi tikpatioitaj tlen tikpiaj.

“MONEKI NANTLAXIKOSKEJ”

15. ¿Tleka tokniuan omonekiaya tlaxikoskej?

¹⁵ Akinmej okichiuayaj ken Cristo omonekiaya kiteititiskej kox melauak okineltokayaj Jehová porque ompa Judea okachi kintlajyouiltiskiaj (Heb. 10:36). Sekimej tokniuan yotlajyouijkaj pero oksekimej ayamo otlajyouiayaj porque opejki tlaneltokaj ijkuak tokniuan kuali okatkaj. Pablo okinmilui okachi kintlajyouiltiskiaj ikinon omonekiaya tlaxikoskej ijkon ken Jesús otlaxiko maski uelis kinmiktiskiaj (Heb. 12:4). Miakej judíos okachi okualankej porque miakej opejki kichiuaj ken Cristo. Seki xiuitl achto ijkuak Pablo otetlapouijtoka ompa Jerusalén sekimej tlakamej tlen amo yolkualmej okinekiayaj kimiktiskej. Kanaj 40 tlakamej judíos okijtojkej “amitlaj tikkuaskej nion amitlaj tikoniskej hasta ijkuak tikmiktiskej Pablo” (Hech. 22:22; 23:​12-14). Pero ok omonekiaya monechikoskej, tetlapouiskej uan tlaneltokaskej maski miakej okinkokoliayaj.

16. ¿Ken techpaleuia matitlaxikokan tlen kijtoua Hebreos? (Hebreos 12:7).

¹⁶ ¿Tlen kinpaleuiskia tokniuan matlaxikokan? Pablo okinmilui tokniuan ijkuak tlajyouiskiaj, kinpaleuiskia matlaxikokan. Ikinon toTajtsin Dios kitekauilia matitlajyouikan porque non techpaleuis okachi matitlaneltokakan (xiktlajtolti Hebreos 12:7). Ijkuak otlajyouiayaj omonekiaya kitaskej  ken okinpaleuiaya okachi kualtsin makipiakan inyelis. Noijki tla yejuan tlaxikoskiaj kiyolpaktiskiaj Jehová uan okachi tlaneltokaskiaj (Heb. 12:11).

17. ¿Tleka Pablo okinmilui tokniuan matlaxikokan?

¹⁷ Pablo okinmilui tokniuan matlaxikokan uan amo mamosotlauakan. ¿Tleka ijkon okinmilui? Ye okimatiaya tlen kixnamikiskiaj tokniuan porque achto otetlajyouilti. Noijki ijkon okinmilui porque okitlajyouiltijkej ijkuak opejki kichiua ken Cristo pero ye otlaxiko (2 Cor. 11:​23-25). Pablo okimatiaya tlen kinpaleuiskia matlaxikokan. Ikinon okinmilui makineltokakan Jehová uan amo makichiuakan tlen yejuan okinekiayaj. Ye okineltokaya Jehová ikinon okijto: “Amo nimomojtis porque Jehová nechpaleuia” (Heb. 13:6).

18. ¿Tlen moneki tikilnamiktoskej uan tlen moneki tikchiuaskej?

¹⁸ Axkan sekimej tokniuan noijki kintlajyouiltiaj. Tejuan uelis tikteititiskej tikintlasojtlaj tla inpatka timotlatlaujtiaj uan tiktemakaj tlen tikpiaj para tikinpaleuiskej (Heb. 10:33). Biblia kiyekijtoua: “Kintlajyouiltiskej nochtin idiscípulos Cristo Jesús tlen kinekij kiueyichiuaskej toTajtsin Dios” (2 Tim. 3:12). Ikinon tinochtin moneki kuali timoyektlaliskej uan ijkon tikmatiskej tlen tikchiuaskej ijkuak techtlajyouiltiskej. Matikneltokakan Jehová techpaleuis maski san tlen techpanos. Matikilnamiktokan ye techyolseuis ijkuak monekis tla amo tikkauaj (2 Tes. 1:​7, 8).

19. ¿Tlen moneki tikchiuaskej para titlaxikoskej ijkuak panotos ueyi tlajyouilistli? (Noijki xikita dibujo).

¹⁹ Carta tlen Pablo okinmijkuilili tokniuan okinpaleui makixikokan tlen okixnamikej. Okinyole okachi mamomachtikan uan makajsikamatikan tlen kijtoua iTlajtol toTajtsin Dios. Tla ijkon kichiuaskiaj san niman kixtopeuaskiaj tlen amo melauak otlamachtiayaj uan okachi tlaneltokaskiaj. Noijki tla tlaneltokaskiaj kichiuaskiaj tlen Jesús okinnauati uan amo oui kitaskiaj kintlakamatiskej akinmej otlayekanayaj. Pablo noijki okinmilui ijkuak tlajyouiskiaj omonekiaya kitaskej ken okinpaleuiaya okachi kualtsin makipiakan inyelis. Tejuan noijki techpaleuis matitlaxikokan tla tikchiuaskej tlen Pablo okinmilui tokniuan. Ijkon titlaxikoskej hasta ijkuak tlamis nochi tlen axkan onka uan amo tikkauaskej toTajtsin Dios (Heb. 3:14).