TLAMACHTIL 36
TLAKUIKALI 89 Jehová kiteochiua akin kitlakamati
Matikchiuakan “tlen kijtoua iTlajtol toTajtsin Dios”
“Xikchiuakan tlen kijtoua iTlajtol toTajtsin Dios uan amo san xikkakikan” (SANT. 1:22).
NIN TLEN TIMOMACHTISKEJ
Tlen axkan timomachtiskej techpaleuis nochipa matiktlajtoltikan iTlajtol toTajtsin Dios. Noijki techpaleuis matimokuayejyekokan uan matikchiuakan tlen tiktlajtoltiaj.
1, 2. ¿Tleka tiyolpakij? (Santiago 1:22-25).
JEHOVÁ uan Jesús kinekij matiyolpakikan. Akin okijkuilo Salmo 119:2 okijto: “Pakij akinmej kichiuaj tlen kinmilnamiktia uan kitemouaj ika nochi inyolo”. Jesús noijki okijto: “¡Pakij akinmej kikakij iTlajtol toTajtsin Dios uan kichiuaj!” (Luc. 11:28).
2 Tipakij akinmej tiktekichiuiliaj Jehová. Onka miak tlamantli tlen kichiua matipakikan. Ijkon timomachiliaj ijkuak nochipa tiktlajtoltiaj iTlajtol toTajtsin Dios uan tikchiuaj tlen ompa kijtoua (xiktlajtolti Santiago 1:22-25).
3. ¿Ken techpaleuis tla tikchiuaj tlen tiktlajtoltiaj?
3 ¿Ken techpaleuis tla tikchiuaj tlen tiktlajtoltiaj? Tipakij porque tikmatij tikyolpaktiaj Jehová (Ecl. 12:13). Xamo yotikitak ijkuak timoyekanaj ika iTlajtol toTajtsin Dios, techpaleuia matimouikakan iuan tofamilia uan noijki inuan tokniuan. Noijki amo titlajyouiaj ijkon ken tlajyouiaj akinmej amo kintlakamatij itlanauatiluan Jehová. Tejuan timokuayejyekouaj ijkon ken tekiua David ijkuak okijkuilo se tlakuikali. Ompa okijto akin kintlakamati itlanauatiluan Jehová “kiselis tlateochiualistli” (Sal. 19:7-11).
4. ¿Tleka ualeua tikitaj oui tikchiuaskej tlen kijtoua iTlajtol toTajtsin Dios?
4 Pero ualeua tikitaj oui tikchiuaskej tlen kijtoua iTlajtol toTajtsin Dios. Moneki matiktlajtoltikan maski ualeua amo timajxiliaj. Noijki matimomachtikan Biblia uan ijkon tikajsikamatiskej tlen kineki Jehová matikchiuakan. Ikinon axkan tikitaskej tlen techpaleuis nochipa matiktlajtoltikan. Noijki tikitaskej tlen techpaleuis matimokuayejyekokan tlen tiktlajtoltiaj uan tikitaskej ken uelis tikchiuaskej tlen timomachtiaj.
MATIMAJXILIKAN TIKTLAJTOLTISKEJ BIBLIA
5. ¿Tlen tikchiuaj akinmej tiktekichiuiliaj Jehová?
5 Akinmej tiktekichiuiliaj Jehová tikpiaj miak tekitl uan tikchiuaj miak tlamantli ipati. Moneki titekipanoskej para tikpiaskej tlen moneki uan tikmakaskej tofamilia tlen ika mopanoltis (1 Tim. 5:8). Miakej tokniuan kinmaluiaj infamiliares tlen mokokouaj noso yikipiaj miak xiuitl uan tinochtin moneki timomaluiskej. Noijki moneki tikchiuaskej miak tlamantli itech tlanechikol uan noijki miak ipati matitetlapouikan. Ikinon xamo timotlajtlaniaj: “¿Tlen moneki tikchiuaskej tla tiknekij nochipa tiktlajtoltiskej Biblia, timokuayejyekoskej uan tikchiuaskej tlen ompa kijtoua?”.
6. ¿Tlen moneki tikchiuaskej tla tiknekij nochipa tiktlajtoltiskej Biblia? (Noijki xikita foto).
6 Sapanoua miak ipati matiktlajtoltikan Biblia ikinon matimochijchikauakan nochipa ijkon matikchiuakan (Filip. 1:10). Kanin peua Salmos kijtoua paki tlakatl tlen “moyolpaktia ika itlanauatil Jehová uan tonal uan youak ichtakatsin kitlajtoltia itlanauatil” (Sal. 1:1, 2). Ikinon moneki matimajxilikan matiktlajtoltikan Biblia. ¿Tlen hora okachi uelis tiktlajtoltiskej? San tejuan tikmatij tlen hora okachi timajxiliaj. Pero moneki matiktlalikan tlen hora tiktlajtoltiskej Biblia uan nochipa ijkon matikchiuakan. Se tokni itoka Víctor okijto: “Nechpaktia kualkan niktlajtoltis Biblia maski amo okachi nechpaktia kualkan niijsas. Ijkon nikchiua porque non hora amitlaj nechkuejsoua uan okachi nikajsikamati tlen niktlajtoltia”. ¿Tejuan noijki techpanoua ijkon ken Víctor kipanoua? Matimotlajtlanikan: “¿Tlen hora okachi uelis niktlajtoltis Biblia?”.
¿Tlen hora okachi uelis tiktlajtoltiskej Biblia? (Xikita párrafo 6).
MATIMOKUAYEJYEKOKAN TLEN TIKTLAJTOLTIAJ
7, 8. Xikyekijto ken moneki tiktlajtoltiskej Biblia.
7 Ualeua miak uelta tiktlajtoltiaj seki tlamantli pero satepan ayakmo tikilnamikij. Ikinon miak ipati matikitakan amo ijkon matechpano ijkuak tiktlajtoltiskej Biblia. Xamo yotikijtojkej keski capítulos tikintlajtoltiskej sejse tonal. Kuali tikchijtokej tla timochijchikauaj tikchiuaskej tlen yotikijtojkej (1 Cor. 9:26). Pero amo san moneki tiktlajtoltiskej Biblia. Moneki tikchiuaskej okseki tlamantli tla tiknekij matechpaleui tlen tiktlajtoltiaj.
8 Matikitakan tleka ijkon tikijtouaj. Ijkuak kiaui, tlatoktli selia. Pero ijkuak chikauak kiaui san momana atl uan tilini tlali. Ijkon tla oksepa kiauis ayakmo kalakis ijtik tlali uan tlatoktli amo selias. Ikinon moneki amo chikauak makiaui para kalakis ijtik tlali uan tlatoktli selias. Noijki ijkon panoua ijkuak tiktlajtoltiaj Biblia. Moneki yolik matiktlajtoltikan uan ijkon uelis tikilnamikiskej uan tikchiuaskej tlen ompa kijtoua (Sant. 1:24).
Uelis selias tlatoktli tla amo chikauak kiaui uan ijkon atl kalakis ijtik tlali. Moneki yolik matiktlajtoltikan uan ijkon uelis tikilnamikiskej uan tikchiuaskej tlen ompa kijtoua. (Xikita párrafo 8).
9. ¿Tlen moneki tikchiuaskej tla tikitaj san totoka tiktlajtoltiaj Biblia?
9 ¿Tlen moneki tikchiuaskej tla tikitaj san totoka tiktlajtoltiaj Biblia? Yolik matiktlajtoltikan uan matimokuayejyekokan tlen tiktlajtoltiaj. Noijki uelis timokuayejyekoskej ijkuak yotlanki otiktlajtoltijkej. Amo matimosotlauakan tla tikitaj oui timokuayejyekoskej, san matimokuayejyekokan tlen tiktlajtoltiaj. Okachi matiuejkauakan matimomachtikan uan ijkon uelis timokuayejyekoskej. Noijki uelis tikintlajtoltiskej san seki versículos uan ijkon timajxiliskej timokuayejyekoskej. Víctor tlen otimotlapouijkej itech párrafo 6, okijto: “Ualeua san niktlajtoltia seki versículos noso se capítulo. Ne kualkan niktlajtoltia Biblia uan ijkon nimokuayejyekoua tlen oniktlajtolti hasta ijkuak tlami tonal”. Amo moneki matikintlajtoltikan miakej versículos. Okachi ipati matikajsikamatikan uan matechpaleui tlen tiktlajtoltiaj maski amo miak (Sal. 119:97; xikita recuadro “ Matimotlajtlanikan seki tlamantli tlen techpaleuis matimokuayejyekokan)”.
10. ¿Tlen uelis tikchiuaskej tla tiknekij matechpaleui ijkuak tiktlajtoltiaj Biblia? (1 Tesalonicenses 5:17, 18).
10 Tejuan tikitaskej tlen hora tiktlajtoltiskej Biblia. Noijki moneki tikitaskej kox miak tiktlajtoltiskej noso amo uan matikitakan ken tikchiuaskej tlen otiktlajtoltijkej. Ijkuak tiktlajtoltiskej Biblia matimotlajtlanikan: “¿Ken uelis nikchiuas tlen axkan nimomachtijtok noso ken nechpaleuis satepan?”. Matikijtokan tiktlajtoltijtokej 1 Tesalonicenses 5:17, 18 (xiktlajtolti). Satepan matimokuayejyekokan ken timotlatlaujtiaj. Matimotlajtlanikan: “¿Kox nochipa timotlatlaujtiaj ika nochi toyolo? ¿Tlen tlamantli techpaktiskia tiktlasojkamatiliskej toTajtsin Dios?”. Xamo tikijtoskej tiknekij tiktlasojkamatiliskej eyi tlamantli. Tla timokuayejyekoskej maski san kanaj keski minutos, techpaleuis matikchiuakan tlen otimomachtijkej. Okachi kuali tiktekichiuiliskej Jehová tla nochipa ijkon tikchiuaskej. ¿Tlen tikchiuaskej tla tikitaj miak tlamantli amo tikchijtokej ken moneki?
MATIKITAKAN TLEN UELIS TIKCHIUASKEJ
11. Xikijto tleka ualeua uelis tisotlauaskej ijkuak tiktlajtoltiaj Biblia.
11 Ualeua uelis tisotlauaskej ijkuak tiktlajtoltiaj Biblia porque tikitaj moneki tikchiuaskej miak tlamantli tlen ompa kijtoua. Matikijtokan tikintlajtoltiskej seki versículos kanin kijtoua amo matitechikoitakan (Sant. 2:1-8). Tejuan tikmatij amo kuali titechikoitaskej ikinon timochijchikauaj ayakmo ijkon tikchiuaskej. Kuali tlen opejki tikchiuaj. Pero mostlatika tiktlajtoltiaj okse versículo kanin kijtoua miak ipati matiknauatikan tonenepil (Sant. 3:1-12). Non texto techititia ualeua tikijtouaj tlen amo teyolchikaua uan teyolkoko ikinon timochijchikauaj titeyolchikauaskej ijkuak itlaj tikijtouaj. Pero uiptlatika tiktlajtoltiaj okse versículo kanin kijtoua amo moneki matimouikakan inuan akinmej amo kitekichiuiliaj Jehová (Sant. 4:4-12). Ikinon moneki okachi kuali matikinpejpenakan tlen películas tikinmitaskej noso tlen tlatsotsonali tikkakiskej. Ijkuak ajsis naui tonal xamo tisotlauaskej porque tikitaj moneki tikpatlaskej miak tlamantli.
12. ¿Tleka amo matimosotlauakan tla tikitaj moneki tikpatlaskej seki tlamantli? (Noijki xikita nota).
12 Amo matimosotlauakan tla tikitaj moneki tikpatlaskej seki tlamantli. Non kijtosneki tikteititiaj tiyolyamankej ijkuak tiktlajtoltiaj Biblia uan tiknekij tikchiuaskej tlen ompa kijtoua. a Noijki matikilnamiktokan moneki nochipa timochijchikauaskej tikyankuiliskej tonemilis (Col. 3:10). ¿Tlen techpaleuis matikchiuakan tlen kijtoua iTlajtol toTajtsin Dios?
13. ¿Tlen techpaleuis matikchiuakan tlen timomachtiaj? (Noijki xikita foto).
13 Tla tiyolyamankej techpaleuis amo matiknekikan san niman tikchiuaskej nochi tlen timomachtiaj (Prov. 11:2). Uelis tikijkuiloskej nochi tlen moneki tikpatlaskej. Satepan matikpejpenakan kanaj ome tlamantli tlen tiknekij tikchiuaskej. Okseki tlamantli uelis tikchiuaskej satepan. ¿Tlen uelis achto tikchiuaskej?
Tla tiyolyamankej techpaleuis amo matiknekikan san niman tikchiuaskej nochi tlen timomachtiaj uan matikpejpenakan kanaj ome tlamantli tlen tiknekij tikchiuaskej. (Xikinmita párrafos 13 uan 14).
14. ¿Tlen uelis achto tikchiuaskej?
14 Achto uelis tikchiuaskej tlen amo okachi oui noso tlen tiknekij tikpatlaskej. Ijkuak yotikitakej tlen tikchiuaskej, matitlatemokan itech toamatlajkuiloluan. Uelis titlatemoskej itech Watchtower AMATLAJKUILOLMEJ ITECH INTERNET™ noso Tlen ika momachtiaj iTlaixpantijkauan Jehová. Matikiluikan Jehová ‘matechmaka chikaualistli para matikchiuakan’ tlen yotikijtojkej (Filip. 2:13). Satepan matikchiuakan tlen otimomachtijkej. Ijkon kuali timomachiliskej ijkuak tikitaskej tikchijtokej tlen yotikijtojkej uan tiknekiskej tikchiuaskej okseki tlamantli. Non techpaleuis amo matikitakan oui tikchiuaskej okseki tlamantli tlen otikijkuilojkej.
MATIKCHIUAKAN TLEN KIJTOUA ITLAJTOL TOTAJTSIN DIOS
15. ¿Tlen tikchiuaj tejuan tlen oksekimej amo kichiuaj? (1 Tesalonicenses 2:13).
15 Sekimej kijtouaj yimiak uelta yokitlajtoltijkej Biblia. Pero ¿kineltokaj tlen ompa kijtoua? ¿Tlen momachtiaj kinpatilia innemilis? Miakej amo kipatlaj innemilis. Pero tiiTlaixpantijkauan Jehová amo timokuayejyekouaj ijkon ken oksekimej. Tejuan tikchiuaj ijkon ken tokniuan tlen okatkaj achto siglo. Yejuan okiselijkej “iTlajtol toTajtsin Dios”. Ikinon timochijchikauaj tikteititiskej tikchiuaj tlen ompa kijtoua (xiktlajtolti 1 Tesalonicenses 2:13).
16. ¿Tlen techpaleuis matikchiuakan tlen kijtoua Biblia?
16 Ualeua amo okachi timajxiliaj tiktlajtoltiskej iTlajtol toTajtsin Dios uan tikchiuaskej tlen ompa kijtoua. Noso amo tikilnamikij tlen tiktlajtoltiaj porque san totoka tiktlajtoltiaj. Noijki xamo timosotlauaskej porque tikitaj moneki tikpatlaskej miak tlamantli. Pero Jehová techpaleuis tla moneki itlaj tikpatlaskej. Amo san matikkakikan iTlajtol toTajtsin Dios uan matikilkauakan. Moneki matikkauilikan matechpaleui uan matikchiuakan tlen ompa kijtoua. Okachi tipakiskej tla tiktlajtoltiskej Biblia uan tikchiuaskej tlen ompa kijtoua (Sant. 1:25).
TLAKUIKALI 94 Tiktlasojkamatij Biblia
a Xikalaki itech jw.org uan xikita video tlen itoka Tlen kijtouaj telpochmej uan ichpochmej: Ma tiktlajtoltikan Biblia.
