Tlen techmachtia Biblia

¿Moneki timoyolpaktiskej kanin uelis itlaj techpanos?

“AXKAN OKACHI MIAKEJ KINPAKTIA UALMOTLAMOTLASKEJ ITECH SE AVIÓN. MOKAJKAUASKEJ IKA SE MEKATL ITECH SE TEPETL, YASKEJ ITECH CANOA KANIN UETSI ATL UAN AJKUISKEJ KANIN KATEJ TIBURONES”. (OKIKIXTIJKEJ ITECH PERIÓDICO THE WILLOW GLEN RESIDENT).

TLEN kijtoua periódico kiteititia okachi kinpaktia mauiltiskej kanin uelis itlaj kinpanos. Axkan miakej kinpaktia ualmotlamotlaskej ika se paracaídas, yauij kanin onka setl, patlanij ika se tlamantli tlen itoka parapente uan tsikuinij uejkapan. a Nochi non kiteititia kinpaktia moyolpaktiskej maski uelis itlaj kinpanos. Oksekimej kitekitiltiaj tablas para yaskej kanin onka nieve uan noijki yauij ika bicicletas itech tepeyo. Noijki sekimej mauiltiaj ika patinetas uan okseki tlamantli para kichiuaskej tlen okachi oui, ken tlejkoskej itech tepemej tlen sapanoua uejueyij uan tsikuinij kanin sapanoua tlauejkapan. Revista Time kijtoua axkan miakej kinpaktia mauiltiskej uan kiteititiaj tlen kinekij kichiuaskej. “Sekimej sapanoua mauiltiaj itlamian semana, oksekimej kinpaktia uan kimatij mauiltiskej maski uelis itlaj kinpanos uan momojtiaj pero ijkon kichiuaj porque kineltokaj uelis kixikoskej”.

Pero akinmej kichiuaj nochi non tlamantli noijki mokojkouaj. Mojmostla miakej mokojkouaj porque moyolpaktiaj kanin kijtouaj amitlaj kinpanos. Itech xiuitl 1997 kanin tlapajtiaj okijtojkej kanaj 33% omokojkojkej ika patinetas ompa Estados Unidos. Noijki omokojkojkej kanaj 31% ika tablas tlen okinuikayaj kanin onka nieve uan 20% omokojkojkej itech tepeyo. Sekimej mauiltiaj kanin uelis itlaj kinpanos uan ualeua ixpoliuij. Pero mauiltiaj maski kimatij uelis tlajyouiskej. Se siuatl tlen mauiltia ika tablas ipan nieve kijtoua: “Nochipa nikilnamiki uelis itlaj nechpanos uan uelis nimikis”. Se tlakatl tlen noijki mauiltia ika nieve kijtoua “tla amo timokojkoua, kijtosneki amo timochijchikaua timauiltis”.

TiiTlaixpantijkauan Jehová ¿ken tikitaj ijkuak ikaj mauiltia kanin uelis itlaj kipanos? ¿Biblia kijtoua kox uelis timauiltiskej kanin uelis itlaj techpanos? Para tikajsikamatiskej ma tikitakan ken kita Jehová tonemilis.

Ken kita Jehová tonemilis

Biblia kijtoua Jehová ye akin techmaka tonemilis (Salmo 36:9). ToTajtsin Dios amo san otechchijchi, noijki techiluia ken moneki timomaluiskej para tiyolpakiskej (Salmo 139:14; Hechos 14:16, 17; 17:24-28). Ik non, moneki timomaluiskej para tikteititiskej tikpatioita tonemilis. Tlanauatilmej tlen yiuejkika okinmakakej israelitas techmachtia ijkon moneki tikchiuaskej.

Tlanauatilmej tlen okinmakakej israelitas okijtouayaj tlen omonekiaya kichiuaskej para amikaj mokokos. Tla se israelita amo ijkon okichiuaya uan ikaj ixpoliuiaya, ye okitlajtlakoltiaya. Tla ikaj okichiuaya ikalijtik, omonekiaya kitlalilis se tepamitl ikuapak porque tla ikaj uetsiskia uan mokokoskia kitlajtlakoltiskiaj akin ompa chanti (Deuteronomio 22:8). Tla se toro ikaj okiteuiaya pero tlakatl akin iaxka amo okimatiaya kox otlateuiaya, amo okitlajtlakoltiayaj. Pero tla nin tlakatl okimatiaya itoro otlateuiaya uan amo okilpiaya, okatka itlajtlakol tla toro ikaj okimiktiaya (Éxodo 21:28, 29). Jehová kipatioita tonemilis uan tlanauatilmej tlen okinmakakej israelitas ijkon kiteititiaj.

Itekipanojkauan Jehová okajsikamatiayaj amo omonekiaya kichiuaskej itlaj kanin uelis mokojkoskej. Itech Biblia kijtoua David okinekiaya konis atl tlen okatka Belén itech pozo uan ompa otlanauatiayaj filisteos. Eyi tlakamej okikakej tlen okijto David, ik non, san niman oyajkej okikixtito atl itech non pozo maski okimatiayaj uelis kinmiktiskiaj satepan okiuikilijkej David. ¿Tlen okichi David? Amo okonik atl, okinoki ipan tlali uan okijto: “Nikmati ken mokuayejyekoua Dios, ¡nin amo keman nikchiuas! Tla nikonis atl, yetoskia ken nikonis inmieso ninmej tlakamej porque okikuito atl maski uelis kinmiktiskiaj” (1 Crónicas 11:17-19). David amo keman kitlajtlaniskia itlaj tla okimatiaya ikaj uelis mikiskia.

Jesús noijki ijkon omokuayejyekouaya ijkuak Diablo okilui ma motlamotla kanin uejkapan para kitaskia kox ángeles kipaleuiskiaj. Jesús okijto: “Amo xikyejyeko Moteko Dios” (Mateo 4:5-7). David uan Jesús okimatiayaj toTajtsin Dios amo kuali okitaya tla ikaj okichiuaya itlaj kanin uelis mokojkoskia.

Ik non, ma timotlajtlanikan ¿Ken uelis nikmatis kox kanin nimauiltia uelis itlaj nechpanos? Ualeua timoyolpaktiaj ika seki tlamantli kanin tikitaj amo itlaj techpanos pero tla amo timomaluiaj uelis timokojkoskej. ¿Tlen tlamantli uelis techpaleuis?

¿Ipati timokojkoskej?

Para tikmatiskej, kuali ma tikitakan tlen tikchiuaj, ma timotlajtlanikan: “¿Ika omokojko ika tlen nikneki nimoyolpaktis? ¿Nikmati nimauiltis noso nikpia tlen ika nimomaluis? ¿Tlen uelis nechpanos tla niuetsis noso tla ijtlakaui tlen ika nimomaluia? ¿San nimokojkos noso uelis nimikis?”.

Tla timauiltiaj ika seki tlamantli kanin uelis itlaj techpanos ayakmo timouikaskej iuan Jehová uan ayakmo uelis tiktekichiuiliskej ken tiknekij (1 Timoteo 3:2, 8-10; 4:12; Tito 2:6-8). TiiTlaixpantijkauan Jehová moneki tikitaskej ken timoyolpaktiaj uan moneki tikilnamiktoskej Jehová kipatioita tonemilis.

[Nota]