Xikilnamiki tleka ayakmo tikneki titlachichinas

“Akinmej ayakmo tlachichina kijtouaj melauak okinpaleui kilnamiktoskej tleka ayakmo okinekiayaj tlachichinaskej”. (Stop Smoking Now! [¡Ayakmo xitlachichina!])

TLA tejuatsin ayakmo tikneki titlachichinas moneki tikilnamiktos tleka ijkon tikneki tikchiuas. ¿Tlen mitspaleuis para ayakmo titlachichinas? Achto, ximokuayejyeko ken mitspaleuis tla ayakmo titlachichina.

Ayakmo tiktlamis motomin. Tla itech se tonal tikchichina se caja, itech se xiuitl tikpolos miak tomin. Gyanu tlen chanti altepetl Nepal, okijto: “Amo onikitaya ken oniktlamiaya notomin para nikkouas tabaco”.

Okachi tiyolpakis. Regina tlen chanti altepetl Sudáfrica, okijto: “Ijkuak ayakmo onitlachichinaya opejki niyolpaki uan kuali onimomachiliaya”. Ijkuak ikaj ayakmo tlachichina okachi kipaktia tlakuali uan okachi kuali tlajnekui, noijki amo san niman mosotlaua uan kuali mota.

Amo timokokos. Akinmej pouij itech Centros para el Control y la Prevención de Enfermedades, ompa altepetl Estados Unidos, kijtouaj: “Tlakamej uan siuamej okachi kuali momachiliaj uan amo okachi mokokouaj ijkuak ayakmo tlachichinaj”.

Okachi timopatioitas. Henning tlen chanti altepetl Dinamarca, okijto: “Ayakmo onitlachichinki porque oniknekiaya nikchiuas tlen kuali uan amo san nochipa nitlachichinas”.

Mofamilia uan moyolikniuan noijki kuali yetoskej. Akinmej pouij itech Sociedad Americana contra el Cáncer, kijtouaj: “Akin tlachichina [...] kinmijtlakoua oksekimej porque noijki uelis mokokoskej. [...] Akinmej tlapajtiaj kijtouaj sejse xiuitl miakej ixpoliui maski san kijnekuij cigarro porque kinmajsi cáncer itech inpulmón uan kijtlakouaj inyolo”.

Tikyolpaktis toTajtsin Dios. “Nokniwah, [...] moneki tinemiskeh kuali iwa amo matikchiwakah tlan weletis kijtlakos tokuerpo” (2 Corintios 7:1). “Ximotemaktikah nomejwah nomonewiah [...] chipawak ijkó kemi Ye kipaktia” (Romanos 12:1).

Sylvia tlen chanti altepetl España, kijtoua: “Ijkuak onikajsikamatki toTajtsin Dios amo kipaktia matiksokiotikan totlalnakayo, onikijto ayakmo nitlachichinas”.

Pero ualeua amo san moneki tikilnamiktoskej tleka ayakmo tiknekij titlachichinaskej. Noijki moneki matechpaleuikan tofamiliares uan toyolikniuan. ¿Ken uelis techpaleuiskej?