¿Tleka titlajyouiaj, tikokoxkatij uan tiixpoliuij?
ToTajtsin Dios techita ken tiikoneuan, ik non, ye amo kineki ma titlajyouikan. Pero ¿tleka titlajyouiaj?
Amo kuali okichijkej tlen achto totatajuan
“Por itlajtlakol se tlakatl n tlajtlákoli okalak itech nin tlaltíkpaktli iwa okualík mikílistli, ijkó noiwa nochteh mikkih porke nochteh otlajtlakolchijkeh” (ROMANOS 5:12).
ToTajtsin Dios okichijchi achto tlakatl uan siuatl: Adán uan Eva yejuan amo okipiayaj tlajtlakoli. Okintlali itech se kualtsin xochitlali tlen omotokayotiaya Edén. Okinmilui uelis kikuaskiaj nochi tlakilotl tlen okatka itech non xochitlali pero se amo omonekiaya kikuaskiaj. Pero Adán uan Eva okikuajkej non tlakilotl uan ijkon otlajtlakolchijkej (Génesis 2:15-17; 3:1-19). Amo okitlakamatkej toTajtsin Dios, ik non, ye okinkixti kanin okatkaj. Ijkuakon opejkej tlajyouiaj. Okinpixkej inkoneuan uan noijki opejkej tlajyouiaj, ik non, nochtin okokoxkatikej uan oixpolikej (Génesis 3:23; 5:5). Tejuan noijki timokokouaj, tikokoxkatij uan tiixpoliuij porque touejkatatajuan Adán uan Eva amo otetlakamatkej.
Katej amo kuali ejekamej
“Nochteh n tlaltikpaktlakah non amo kineltokah Dios kinnawatijtok n satanás” (1 JUAN 5:19).
Satanás noso Diablo se espíritu tlen amo okitlakamatki toTajtsin Dios (Juan 8:44; Apocalipsis 12:9). Satepan oksekimej espíritus okichijkej ken ye uan omochijkej demonios. Yejuan kitekitiltiaj inchikaualis para kinkajkayauaskej miakej para amo ma mouikakan iuan toTajtsin Dios uan kichiuaj miakej ma tlajtlakolchiuakan (Salmo 106:35-38; 1 Timoteo 4:1). Satanás uan amo kuali ejekamej sapanoua yolpakij techtlajyouiltiskej.
Amo kuali tlen tikpejpenaj tikchiuaskej
“Nochteh kipixkah tlan kitookah” (GÁLATAS 6:7).
Ualeua titlajyouiaj porque otechpanoltilijkej tlajtlakoli uan porque Satanás tlayekana itech nin tlaltikpak. Pero ualeua tejuan tikchiuaj itlaj tlen techtlajyouiltia. Ijkuak tikchiuaj tlen kuali, kuali tikatej, noijki ijkuak tikpejpenaj tikchiuaskej tlen amo kuali, titlajyouiaj. Ma tikitakan ken panoua. Tla se teta amo tlakajkayaua uan amo tlachteki, kipaktia tekipanos uan kitlasojtla ifamilia, non kichiuas ma yolpakikan. Pero tla san mauiltia para kitlanis tomin, tlauana noso amo kineki tekipanos, ifamilia amitlaj kipias. Ik non, moneki ma tikkauilikan toTajtsin Dios ma techyekana porque ye kineki kuali ma tiyetokan uan ma tikpiakan “yolseuilistli” (Salmo 119:165).
Tikatej itlamian tonalmej
“Itech iksemi tonatijmeh [...]. Satlawel kiwilitaskeh tomi [...], mach kintlakitaskeh intajwah. Amo kimatiskeh motlasojkamatiskeh [...], amo kixikoskeh tlan amokuali kelewis inkuerpo, tetlaijyowiltiskeh iwa kikokoliskeh tlan kuali” (2 TIMOTEO 3:1-5).
Axkan miakej kichiuaj ken non profecía uan non kiteititia yitikatej itech itlamian tonalmej. ITlajtol toTajtsin Dios noijki kijtoua yetoskiaj guerras, miakej amo kipiaskiaj tlen kikuaskiaj, sapanoua tlaloliniskia uan yetoskia miak kokolistli (Mateo 24:3, 7, 8; Lucas 21:10, 11). Ik non, miakej tlajyouiaj uan ixpoliuij.
