“Iwa tla se nomokni onomechchiwili itla amo kuali, xiktlapojpolwikah” (COLOSENSES 3:13).

Tinochtin timotlapololtiaj, ik non, xamo uelis ikaj techyolkokos noso tejuan ikaj tikyolkokoskej. Ik non, moneki tinochtin timotlapojpoluiskej. Ijkuak titetlapojpoluiaj techpaleuia ayakmo ma tikilnamikikan tlen otechchiuili akin otechyolkoko. Amo ‘ma tikopilikah’ nion ma tikilnamiktilikan tlen otechchiuili (Romanos 12:17). Pero ¿tla otechchiuili itlaj tlen amo uelis tikilkauaskej? Iuan ma timotlapouikan pero ma tiktlakaitakan. Tiknekij iuan timotlapouiskej pero amo para timokualaniskej porque tiknekij oksepa iuan timouikaskej (Romanos 12:18).

“Xikinmitakah n oksikimeh kemi okachi weyijkatitokeh” (FILIPENSES 2:3).

Tla tiyolyamankej uan titetlakaitaj, oksekimej kinekiskej touan mouikaskej. Yejuan kimatiskej titetlakaitaj uan titechiuiliaj tlen kuali uan amo keman tikinchiuiliskej tlen amo kuali. Pero tla timoueyinekij uan timokuayejyekouaj tejuan okachi topati uan tiknekij tikchiuaskej san tlen tejuan tiknekij, san timokualaniskej. Oksekimej amo kinekiskej touan mouikaskej uan amo tikinpiaskej toyolikniuan.

“Dios amo kintlasojtla san sikimeh, iwa oksikimeh amó, yej itech nochi nin tlaltíkpaktli, Dios kinselia akimeh kitlakitah iwa kichiwah tlan kuali”(HECHOS 10:34, 35).

ToTajtsin Dios amo san kinpatioita akinmej chantij itech se altepetl, tlajtouaj okse tlajtoli, ixchipajkej noso porque kipiaj miak tomin. Biblia kijtoua: “San itech se, Dios okinchijchi nochteh n tlakah” (Hechos 17:26). Non kijtosneki tinochtin tiiknimej. Ijkuak nochtin tikintlakaitaj uan tikinchiuiliaj tlen kuali, yejuan yolpakij, tejuan uan toTajtsin Dios noijki yolpaki.

“Xiyetokah nonyolyamankeh” (COLOSENSES 3:12).

Ijkuak tiyolyamankej uan amo san niman tikualanij, oksekimej kinekij touan yetoskej uan kimatij uelis techiluiskej itlaj tla kinekij ma tikinpaleuikan, hasta uelis techiluiskej itlaj tlen amo kuali tikchijtokej porque kimatij amo san niman tikualanij. Tla ikaj touan kualani uan tejuan kuali tiktlapouiaj, non kichiuas ma moyolseui. Proverbios 15:1 kijtoua: “Akin kuali tlanankilia kichiua amikaj ma kualani pero akin kijtoua tlen teyolkoko kichiua oksekimej ma kualankamikikan”.

“Okachi yolpaki akin itlaj kitemaka uan amo ijkuak itlaj kiselia’”(HECHOS 20:35, TNM).

Miakej san kinekij kipiaskej miak tlamantli. Pero tiyolpakiskej tla tiktemakaj tlen tikpiaj (Lucas. 6:38). Akinmej kinpaktia kitemakaskej tlen kipiaj okachi yolpakij porque kintlasojtlaj oksekimej uan non kichiuaj ma motlasojkamatikan ijkuak oksekimej kinmakaj tlen kipiaj (Colosenses 3:15). Ximotlajtlani: “¿Iuan akin nechpaktiskia niyetos? ¿Iuan akin san itech motekipachoua uan amo motlasojkamati noso iuan ikaj tlen kipaktia kitemakas tlen kipia uan motlasojkamati?”. Ma tikchiuakan ken techpaktiskia oksekimej ma techchiuilikan (Mateo 7:12).