¿Tleka miakej ayakmo kipatioitaj inyolilis?
MATIKPATIOITAKAN TOYOLILIS
Uelis timokokoskej tla tikchiuaj tlen amo kuali uan tikintlajyouiltiskej oksekimej. Non kiteititis amo tikpatioitaj toyolilis nion tikpatioitaj inyolilis oksekimej.
-
Ijkuak ikaj tlachichina uelis kajsis cáncer uan okachi tlajyouis maski mopajtis. Miakej ixpoliuij ika cáncer de pulmón porque otlachichinayaj noso okijyotilanayaj tlen kichichinaj oksekimej.
-
Sejse xiuitl miakej tlajyouiaj porque san kanin tlatojtoponiaj. Akinmej tlapaleuiaj itech Universidad tlen itoka Stanford uan kajki Estados Unidos, okijtojkej: “Yotikitakej ijkuak tlatojtoponiaj itech escuelas uan maski amitlaj kinpanoua akinmej ompa momachtiaj, yejuan miak xiuitl kilnamiktokej tlen opanok uan tlajyouiaj”.
-
Ijkuak ikaj tlakoni noso kintekitiltia drogas uan kiuika se carro, uelis kinkuitikisa okseki carros noso akinmej ik ompa panouaj. Miakej tlajyouiaj ijkuak oksekimej amo kipatioitaj yolilistli.
¿TLEN UELIS TIKCHIUAS?
Ximomalui. Ayakmo xitlachichina, ayakmo xitlakoni nion xikintekitilti drogas. Akinmej kichiuaj nin tlamantli kiteititiaj amo kipatioitaj inyolilis uan satepan mokokouaj. Noijki kiteititiaj amo kipatioitaj inyolilis oksekimej uan kintlajyouiltiaj.
Ximotlayektlalili. Xikyektlali mokal uan ijkon amitlaj kinpanos oksekimej. Xikyektlali mocarro uan ximomalui ijkuak tikuikatinemi. Amo xikchiua tlen oksekimej mitsiluiaj tla tikita uelis mitspanos itlaj amo kuali noso uelis tiixpoliuis.
Xikintlasojtla oksekimej. Tikteititiaj tikpatioitaj toyolilis ijkuak amo tikinchikoitaj oksekimej maski uitsej itech okseki altepemej, amo tikitaj kox kipiaj tomin uan amo tikitaj kox miak omomachtijkej. Axkan miakej techikoitaj uan tekokoliaj ikinon miakej kichiuaj tlen amo kuali uan katej miakej guerras ipan nochi tlaltikpak.
¿TLEN TIKCHIUAJ TIITLAIXPANTIJKAUAN JEHOVÁ?
Tejuan tikinmiluiaj oksekimej mamomaluikan. Titlamachtiaj tlen kijtoua Biblia uan miakej yokinpaleui makipatlakan innemilis uan ayakmo makichiuakan tlen okintlajyouiltiaya.
Tejuan sapanoua timomaluiaj ijkuak tikchijchiuaj se kali noso ijkuak tikyektlaliaj. Akinmej tlapaleuiaj ijkuak kichijchiuaj se kali kanin timonechikouaj uan okseki kalmej, kinmititiaj ken momaluiskej para amitlaj makinpano. Kalmej tlen tikinpiaj nochipa kinmitaj kuali mayetokan ijkon ken kijtouaj tlanauatilmej tlen kintlaliaj tekiuajkej.
Tikinpaleuiaj oksekimej. Yisexiuitl miakej otikinpaleuijkej porque opanok kanaj 200 tlamantli ipan nochi tlaltikpak. Kanaj 12 millones de dólares omotemakak para tikinpaleuiskej akinmej otlajyouijkej.
2014 opejki miakej mokokouaj ompa África Occidental porque okiski se kokolistli itoka Ébola uan 2018 noijki opejki non kokolistli ompa República Democrática del Congo. Ijkuakon miakej otikinmititijkej tlen uelis kichiuaskej para amo mamokokokan. Otikintitlankej sekimej tokniuan makitemakakan se tlamachtil tlen itoka “La obediencia salva vidas” uan miakej okikakej. Otiktlalijkej atl kanin uelis momajtekiskiaj nochtin tlen kalakiskiaj kanin timonechikouaj. Noijki otikinmiluijkej tleka miak ipati mamomajtekikan uan makichiuakan okseki tlamantli para amo mamokokokan.
Ompa Sierra Leona kajki se estación de radio uan ompa okijtojkej kuali tlen okichijkej iTlaixpantijkauan Jehová. Ijkon okijtojkej porque yejuan okinpaleuijkej akinmej pouij itech inreligión uan noijki okinmiluijkej oksekimej tlen omonekiaya kichiuaskej para amo makinmajsi kokolistli Ébola.
2014 okiski kokolistli tlen itoka Ébola ompa Liberia uan kanin timonechikouaj okitlalijkej atl kanin uelis momajtekiskiaj tokniuan.
a Nin tlanauatil kiteititia miak ipati kuali mayetokan akinmej chantij tokalijtik uan oksekimej.
