Biblia techpaleuia ma tikpatlakan tonemilis. Ma tikitakan ken okipaleui Ricardo uan Andrés.

RICARDO. Ijkuak onikpiaya 15 xiuitl opejki nimouika iuan pandilleros. Yejuan onechijtlakojkej. Ne oniknekiaya nitsaktos majtlaktli xiuitl. Xamo ikaj kijtos non kichiua akin amo tlalnamiki. Pero ik kanin nichanti okintlakaitayaj akinmej okintsakuayaj. Ne noijki oniknekiaya ma nechtlakaitakan.

Oniauilnemiaya, onikintekitiltiaya drogas uan onikinuitekiaya oksekimej. Se yoak, otikintlatojtoponilijkej oksekimej uan onikijto ompa nimikiskia. Pero amitlaj onechpanok. Ik non, opejki nimokuayejyekoa tlen oniknekiaya nikchiuas. Onikijto nikpatlaskia nonemilis. Pero ¿ken nikchiuaskia? ¿Akin nechpaleuiskia?

Sekimej nokalchanejkauan san omokualaniayaj uan amo oyolpakiayaj. Pero ikalchanejkauan se notío amo ijkon okipiayaj inyelis. Ne kuali onikmatiaya okatkaj yolkualmej uan kichiuaj tlen kijtoa Biblia. Yejuan yonechiluijkaj toTajtsin Dios itoka Jehová. Ik non, ijkuak otlanki otikintlatojtoponilijkej oksekimej, oniktlatlaujti toTajtsin Dios ika itoka uan onikilui ma nechpaleui. Onechtlajtlachialti mostlatika onechtlajpaloto se iTlaixpantijka Jehová. Ye opejki nechmachtia tlen kijtoa Biblia.

Pero opejki nikixnamiki okseki ouijkayotl. Telpokamej tlen inmiuan onimouikaya, onechnotsayaj inmiuan ma nikisa. Ualeua oniknekiaya nias pero onikinmiluiaya amo niaskia. Oniknekiaya nimomachtis tlen kijtoa Biblia uan niyolpaki ijkon onikchi. Nonemilis omopatlak uan axkan sapanoa niyolpaki.

Ne oniknekiaya nitsaktos majtlaktli xiuitl uan ijkon nechtlakaitaskiaj pandilleros. Ik non, onikilui toTajtsin Dios ma nechkauili ma nikinmachti oksekimej tlen kijtoa Biblia kanaj majtlaktli xiuitl ijkon ken ne onechmachtijkej. ToTajtsin Dios ijkon okichi uan axkan yinikpia diecisiete xiuitl nitetlapouia. Noijki amo keman onechtsakej.

Sekimej tlen inmiuan onimouikaya yikipiaj miak xiuitl tsaktokej uan sekimej yoixpolikej. Nikintlasojkamatilia nokalchanejkauan tlen kitekichiuiliaj Jehová porque yejuan kichiuaj tlen kijtoa Biblia. Axkan okachi nikintlakaita. Pero okachi niktlasojkamatilia toTajtsin Dios porque onechpaleui ma nikpatla nonemilis.

 ANDRÉS. Onineski uan onimoskalti kanin tlatlasojti. Ompa okintekitiltiayaj drogas, otemiktiayaj, otlakajkayauayaj uan oauilnemiayaj. Notajtsin sapanoa otlauanaya uan okitekitiltiaya cocaína. Nochipa okiuitekiaya nonantsin uan okiuijuikaltiaya.

Opejki nitlauana uan noijki opejki nikintekitiltia drogas. San ojtli oninentinemiaya, onitlachtekiaya uan oniknemakaya. Satepan, notajtsin onechmachti ichtaka ma nikpanolti drogas uan okseki tlamantli itech toaltepe uan ompa niknemakaskia. Opejki nikpia miak tomin. Se tonal, policías oajsitoj nokalijtik. Onechkitskijkej uan onechtsakej makuili xiuitl porque oniknekiaya nitemiktis.

Se tonal, otechiluijkej akinmej otitsaktokaj, ualaskiaj iTlaixpantijkauan Jehová uan techtlapouiskiaj. Ne onikijto niaskia. Onechpakti tlen okijtojkej uan onikseli ma nechmachtikan. ITlaixpantijkauan Jehová kuali onechiluijkej tlen kijtoa Biblia uan onechmachtijkej tlen kineki toTajtsin Dios ma tikchiuakan.

San niman onikitak omonekiaya ikaj ma nechpaleui. Porque akinmej inmiuan oniktsaktoka amo okinpakti ma nimomachti Biblia. Onikilui Jehová ma nechpaleui uan ma nechmaka ixtlamatilistli. Non onechpaleui ma nikintlapoui tlen kijtoa Biblia ijkuak itlaj onechiluiayaj.

Sapanoa onimomojtiaya ijkuak onechkixtijkej uan ok oniknekiaya nitsaktos. Ijkuak yonikistoka sekimej onechnauatijkej. Sekimej onechiluijkej: “Timotaskej teopixki”.

Ualeua nimomojtia ijkuak nimokuayejyekoa tlen nechpanoskia tla amo nikkauiliskia toTajtsin Dios ma nechpaleui. Niktlasojkamatilia toTajtsin Dios porque nechtlasojtla uan onechpaleui ma nikpatla nonemilis. a