Ma tiyolpakikan
Biblia techiluia ken moneki tikpiaskej toyelis tla tiknekij kuali tiyetoskej.
AMO MA TIKUALANIKAN
PRINCIPIO BÍBLICO: “Akin amo san niman kualani okachi kuali amo ken se tlakatl tlen kipia miak chikaualistli” (Proverbios 16:32).
¿TLEN KIJTOSNEKI? Amo san niman ma tikualanikan. Ualeua sekimej techkualaniaj ijkuak itlaj techchiuiliaj. Pero titlajyouiskej tla san niman tikualanij. Akinmej san niman kualanij san tlen amo kijtoaj uan satepan moyolkokoaj.
¿TLEN UELIS TIKCHIUASKEJ? Amo san niman ma tikualanikan tlamo san tlen amo tikchiuaskej. Miakej mokuayejyekoaj yolchikauakej ijkuak kualanij. Pero kiteititiaj amo yolchikauakej ijkuak ijkon kichiuaj. Biblia kijtoa: “Akin san niman kualani yetoskia ken se altepetl tlen ipan okalakej porque amo kipia tepamitl” (Proverbios 25:28). Moneki achto ma tikitakan tlen opanok uan non techpaleuis amo san niman ma tikualanikan. Biblia kijtoa: “Akin ixtlamatki amo san niman kualani” (Proverbios 19:11). Amo san niman tikualaniskej tla tikinkakij akinmej techyekiluiaj tlen opanok.
MA TIMOTLASOJKAMATIKAN
PRINCIPIO BÍBLICO: “Nochipa ximotlasojkamatikah” (Colosenses 3:15).
¿TLEN KIJTOSNEKI? Miakej kijtoaj yolpakij akinmej motlasojkamatij. Noijki ijkon kijtoaj akinmej oixpoliuik akin kitlasojtlaj noso okinpanok okseki tlamantli. Kitlasojkamatij tlen kipiaj uan amo san kintekipachojtok tlen okinpanok.
¿TLEN UELIS TIKCHIUASKEJ? Mojmostla ma tikijkuilokan tlen tiktlasojkamatij. Amo moneki tikijkuiloskej miak tlamantli. Uelis tikijkuiloskej tiktlasojkamatij ijkuak tikitaj kualtsin tlanesi, ijkuak timotlapouiaj iuan akin tiktlasojtlaj noso porque oksepa otitlanexilijkej. Okachi tiyolpakiskej tla timochijchikauaskej ijkon tikchiuaskej.
Noijki techpaleuis tla tikintlasojkamatiliaj akinmej inmiuan tichantij uan toyolikniuan. Ma tikitakan tlen kuali kichiuaj uan ma tikinyolchikauakan noso ma tikinmijkuililikan se carta. Noijki uelis tikintitlaniliskej se correo noso ma tikintitlanilikan se mensaje. Ijkon okachi kuali timouikaskej iuan oksekimej uan tiyolpakiskej porque timochijchikauaj tikchiuaj tlen kuali (Hechos 20:35).
OKSEKI PRINCIPIOS BÍBLICOS
Uelis tikkixtis Biblia ika audio ika motlajtol. Itech jw.org Biblia kajki ika kanaj cuarenta tlajtolmej.
AMO MA TIMOKUALANIKAN
“Ijkuak ikaj peua kualani yetoskia ken ijkuak kikajkauaj atl, ik non, xio uan ijkon amikaj iuan timokualanis” (PROVERBIOS 17:14).
AMO SAN MA TECHTEKIPACHO TLEN PANOS SATEPAN
“Amo ximotekipachokah kenomi nontlanexiliskeh, porke mostla ok se welta nonmotekipachoskeh. Nochi tonati saman yetos itla tlan ika weletis nonmotekipachoskeh” (MATEO 6:34).
MA TIMOKUAYEJYEKOKAN TLEN TIKCHIUASKEJ
“Tla kuali timokuayejyekoa non mitsmaluis uan timomakixtis tla tikmati tlen kuali uan tlen amo kuali” (PROVERBIOS 2:11).
Xamo noijki mitspaktis
¡MA TITLACHIXTOKAN!
¿Tlen techpaleuis amo san ma timotekipachokan?
Xikita tlen techpaleuis amo okachi ma timotekipachokan.
